DƖYƐZUMANLƐ 7

Kã Yɩ Pɛpɛɛpɛ Na Ɩhã Ahʋnlɩnɩ

Luuku 1:3

MƆ ƖSƐ KƐƐ ƐYƐ: Fá dasɩlɛ mɔɔ ɩdɩ nɔhʋanlɛ bʋwa wʋ ediyelɛmaa nɩ ma bɛdɩ mɔɔ ɛkãã nɩ tʋ bʋwɔ.

Pɩbɛ́ na fá dasɩlɛ mɔɔ ɩdɩ nɔhʋanlɛ di egyima. Má wʋ ehilehilelɛ munwala igyina Nyamɩnlɩ yɩ Odwokɔ nɩ zʋ, sɛ ɩkɛyɛ bʋwɔ a, kɩnga wɔ numɔ senyii. Sɛ ɛlɛ odwokɔ be mɔɔ ɩfalɩ abɔdɩ nwʋ, amanɩyɛwɔlɛ be, ozumalɛnwʋnlɛ, anzɛnyɩɩ odwokɔ be mɔɔ ɩfʋwa mɔɔ ɛkãã nɩ zʋ edii egyima a, pɩbɛ nu kila kɛɛ ɩdɩ nɔhʋanlɛ na ɩlɛ́palɩ nwʋ sʋ̃.
Fá dasɩlɛ nɩ di egyima bʋwɔ. Kilehile ɛhɛlɛlɛ odwokɔ nɩ nu ma ɩ nɩɩ nkyɩkyɛmi nɩ mɔɔ ɛkɩngaa, Bayɩbʋlʋ yɩ nu ndwokɔ, nɩɩ awuuku nɩɩ nninyeni mvʋlɔ mɔɔ “sʋ̃mɩvʋlɔ nɔhʋanlɛvʋlɔ nɩɩ nɣɛlɛbɛvʋlɔ” ɩyɛ nɩ iyiyia. (Mt. 24:45) Sɛ ɛlɛ dasɩlɛ mɔɔ ɩ́zʋ̃ Bayɩbʋlʋ yɩ nu edii egyima a, bɔ́ mmɔdɩnɩ kɛɛ ɛlɛ́sɩnza sianti anzɛnyɩɩ ntɩyasɩ mɔɔ yɩ ɛhɛlɛlɛvʋlɔ nɩ ɩva ɩhɛlɛlɩ nɩ.

Áma okugua ndwokɔ nu. Kilá yɩ bʋwɔ na sɛ ɛkãã “mmenii be” nwʋ odwokɔ a, wʋáhanlɩ kɛɛ “mmenii sʋ̃maa,” na “mmɩlɩ be” ɩáyɛlɩ “eɣile bela,” akʋ̃ sʋ̃ “ɩdɩ” ɩába ɩyɛ “ɩdɩ kɛɛ.”
Ɛ nɩɩ wʋ ediyelɛmaa nɩ bozunzu dasɩlɛ nɩ nwʋ. Sɛ ɛkɩnga ɛhɛlɛlɛ odwokɔ be anzɛnyɩɩ ɔtwɩ̃ adwɩnɩ esiye dasɩlɛ be zʋ owie a, biziá ndwokɔ be mɔɔ itunwo adwɩnɩ anzɛnyɩɩ má ndianwʋ be fa bʋwa wʋ ediyelɛmaa nɩ ma bɛdɩ mɔ ɛhã nɩ tʋ anzɛnyɩɩ bɔnwʋ mɔ ɩsɛ kɛɛ bɛyɛ.