Mɩnla Ɔhʋanɩ Zʋ Yɛɛ Yɛbʋwa Ye Mmeliyema Mɔɔ Asianɩ Ɩdʋ Bɛ Nɩ a?

Sɛ asianɩ isi a, Gyehova Dasɩvʋlɔmaa bɛyɛ nhyɩhyɛlɩyɛ ndɛ bɔkɔ bɔbʋwa be mmeliyema mɔɔ asianɩ ɩdʋ bɛ nɩ. Mɔɔ yɛyɛ yɩ nɩ ɩda ɔlɔlɛ kanyɩɩ mɔɔ yɛwɔ yɛma yɛnwʋ yɛnwʋ nɩ yɩ ali. (Dwɔɔnʋ 13:34, 35; 1 Dwɔɔnʋ 3:17, 18) Mɩnla ahʋanɩ zʋ yɛɛ yɛbʋwa a?

Yɛyɩ ozukua yɛbʋwa. Mmɩlɩ mɔɔ kɔmɩ kezile be izili wɔ Dwudiyia nɩ, Ahilisinyiamaa mɔɔ beli bɔmʋnlɩ mɔ nɩ bɔwɔ Antɩyɔkɩ nɩ bɛvalɩ ozukua bɔhɔ bɔwʋwalɩ be mmeliyema mɔɔ nɩ bɔwɔ Dwudiyia nɩ. (Egyima 11:27-30) Ɔzʋ sʋ̃ la yɛ nnɛ, sɛ yɛba yɛnwʋ kɛɛ, ye mmeliyema mɔɔ bɔwɔ oyuwadɩ yɩ ɔfʋã be beyiyia amanɩyɛ a, yɛyɩ ozukua yeduwa yɛ asafʋ yɩ zʋ na ama yɛava nnwʋnlamɩ fʋãnu mmʋwalɛ yɛama mmenii mɔɔ behyinyia nɩ.​—2 Kɔlɛntɩmaa 8:13-15.

Yɛfa mmʋwalɛ mɔɔ behyinyia yɛma bɛ. Asafʋ nu mbanimbani mɔɔ bɔwɔ dɩka mɔɔ asianɩ izi nɩ pɩbɛ aliyema bela mɔɔ ɩwɔ asafʋ yɩ nu na bɛahila kɛɛ, bonu bela wɔ ɛkɛnɩ na bɔnwʋ sʋ̃ dɩyɛnɛ. Mmʋwalɛ okuwu be kehila alɩyɛ mɔɔ bɛkɛhyɩhyɛ, nzulo kɔlɔngyɩ̃ɩ̃, ntalɩ, dɩka mɔɔ bɛkɛla, nɩɩ nnuno mɔɔ bɛkɛva bɛkɛma bɛ nɩ yɩ zʋ. Dasɩvʋlɔmaa sʋ̃maa mɔɔ bɔwɔ nnimidi nɩ botu bɔnwʋ bɛma, na bɔbɔ kakɛ bɔkɔ dɩka mɔɔ asianɩ izi nɩ bɔkɔ bɔbʋwa ma bɛyɛ mmʋwalɛ egyima anzɛnyɩɩ besiyeziye abika abika nɩɩ Bulombunli Ayiyialɩyɛ Nniyia mɔɔ ɩzɩkɛ nɩ. Ɔkʋ̃yɛlɛ mɔɔ ɩwɔ yenu kɛɛ ahyɩhyɛdɩ nɩɩ dɩyɛ mɔɔ yesuma iluwa egyima mɔɔ yɛyɛ yɛbɔ numɔ nɩ ti, ɩbʋwa ma yɛfa nninyeni mɔɔ ihyinyia nɩɩ egyimayɛlɛmaa yɛkɔ yɛbʋwa ndɛndɛ wɔ mmɩlɩ mɔɔ asianɩ be izi nɩ. Ɩwɔ numɔ kɛɛ yɛkɩnhã yɛ sa azɩ yɛbʋwa “bɛzabɛ munwatĩĩ mɔɔ yɛ nɩɩ bɛ yɛlɛ dedi ɔkʋ̃ nɩ” dɩyɛ, naasʋ̃ yɛbʋwa mmenii mvʋlɔ, ɩávalɩ nwʋ ɔzʋ̃mɩnlɛ mɔɔ bɔwɔ nu.​—Galatiyiamaa 6:10.

Yeduwa Ɛhɛlɛlɛ Odwokɔ yɩ zʋ yɛkyɩkyɩ mmenii bɛ ɛɣɛɛlɛ. Mmenii mɔɔ asianɩ ɩdʋ bɛ nɩ behyinyia ɛɣɛɛlɛ yɩkyɩlɛ baaba. Wɔ mmɩlɩ mɔ ɩdɩdɩ ɛzɛ nu nɩ, yenyia ɛzɩzɩbɛhyɛlɛ wɔ Gyehova, “Nyamɩnlɩ mɔɔ ɩkyɩkyɩ yɛ ɛɣɛɛlɛ baaba” nɩ yɩ ɛkɛnɩ.(2 Kɔlɛntɩmaa 1:3, 4) Yɛfa anyɩnlɩlelɛ yɛ nɩɩ mvʋlɔ mɔɔ bɛtɩdɩɩ nɩ kyɛ Bayɩbʋlʋ yɩ nu anʋhʋba azʋlɔtʋ mɔɔ ɩma benyia anwʋlazʋ kɛɛ, ɩlɛ́kyɛ Nyamɩnlɩ yɩ Bulombunlililɛ ɩkɛva asianɩ azʋlɔtʋ yɩ mɔɔ ɩma yɛnwʋ ɛyɛkɛ nɩɩ amanɩyɛ yɩ nɩ munwala ɩkɛɣa awielɩyɛ.​—Yikile 21:4.

• Mɩnla ti mɔɔ Dasɩvʋlɔmaa yɩ nɩ bɛyɛ ndɛ bɔkɔ bɔbʋwa mmɩlɩ mɔɔ asianɩ izi nɩ a?

• Ɛhɩnla Bayɩbʋlʋ nu ndwokɔ yɛɛ yɛkɔhʋla yɛkɛva yɛkɛyɩkyɩ mmenii mɔɔ asianɩ ɩdʋ bɛ nɩ bɛ ɛɣɛɛlɛ a?