Bɛhyɛ́ Bɔ Nwʋ Bɔ Nwʋ Ɛzɩzɩbɛ

Sɛ yɛ nɩɩ ye mmeliyema Kilisinyiamaa bɔ numɔ yɛ dɩyɛ a, yenyia ɛzɩzɩbɛhyɛlɛ. Naasʋ̃ ɩsɛ kɛɛ yɛyɛ sʋ̃maa tɛla kɛɛ yɛ nɩɩ yɛ nwʋ keyiyia numɔ kɛkɛ. Bayɩbʋlʋ yɩ hyɛ yɛ ɛzɩzɩbɛ kɛɛ yɛyɩkyɩ́ yɛ ɔhɔnwʋmmɔ bɛ ɛɣɛɛlɛ na yɛhyɛ be dedi ɛzɩzɩbɛ. (Wul. 1:​11, 12) Kɛ ɩkɛyɛ na yɛayɛ zɔ a?

Fa wu munwa ndwokɔ hyɛ mvʋlɔ ɛzɩzɩbɛ. Kɛ ndianwʋ nɩ, sɛ yɛmaa munwalɩyɛ wɔ dɩyɛzumanlɛ tʋ a, ɩsɛ kɛɛ yekila bʋwɔ kɛɛ yɛlɔ́twɩ̃ adwɩnɩ keziye yɛ nwʋ zʋ sʋ̃maa, mfomi sa yɛkʋla yɛma ɩfalɩ Gyehova, yi Odwokɔ yɩ nɩɩ yi mmenii nwʋ. Sɛ yɛ nɩɩ ye mmeliyema bɔ nkɔmmɔ sʋ̃ a, ɩsɛ kɛɛ yɛkã ndwokɔ mɔɔ ɩkɛhyɛ be dedi ɛzɩzɩbɛ.

Duwa wʋ pɔkɔzilɛ nɩɩ wʋ nyɛlɩyɛ zʋ hyɛ mvʋlɔ ɛzɩzɩbɛ. Kɛ ndianwʋ nɩ, abiyemmɔ zi pɔkɔ kɛɛ bɔkɔhɔ zʋ kɛyɛ mmɩlɩ munwala ɔzʋ̃mɩnlɛ egyima yɩ ɩávalɩ nwʋmɔ ndwokɔzɩzɩbɛ mɔɔ beyiyiaa nɩ. Abiyemmɔ sʋ̃ bɔ mmɔdɩnɩ ba dapɛnɩ avinli dɩyɛzumanlɛ mmɩlɩ munwala ɩávalɩ nwʋmɔ kɛɛ adimakɛlɛ ididee bɛ anzɛnyɩɩ bɔkɔbɔ egyima nɩ, nɩ bɛvɛ nɩ.

Asʋ̃ ɛfa wu munwa ndwokɔ nɩɩ wʋ nyɛlɩyɛ hyɛ wu mmeliyema ɛzɩzɩbɛ a? Na ɔnwʋ mɔɔ wu mmeliyema yɛ fa hyɛ wʋ ɛzɩzɩbɛ nɩ a?