Ndwokɔɣizialɛ Mɔɔ Ɩzʋ̃ Ɛɣɩngalɛmaa Bɛ Ɛkɛnɩ
Mɩnla mmɩlɩ yɛ dasɩlɛlilɛ egyima mɔɔ bɛyɛɛ yɩ kakɩ yɩ nɩ kɛɣa awielɩyɛ a?
Gyisɛsɩ hanlɩ kɛɛ: “Na bɔkɔwɔ Odwokɔba eyi mɔɔ ɩfalɩ Nyamɩnlɩ Bulombunlililɛ nɩ nwʋ ɛlawulo wɔ oyuwadɩ yɩ dɩka bela, ama abiyela ɩadɩ Odwokɔba nɩ na akʋ̃ awielɩyɛ nɩ ɩaɣa.” (Mt. 24:14) Giliki odwokɔpɔkɔ mɔɔ bekile yɩ tʋ “awielɩyɛ” mɔɔ ɩwɔ nkyɩkyɛmi eyi nu, nɩɩ nkyɩkyɛmi 6 nɩɩ 13 yɩ dɩ teʹlos. Ikile Setanɩ yi oyuwadɩ eyi mɔɔ ɩkɛɣa awielɩyɛ kʋlakʋla wɔ Amagadɔnʋ nɩ. (Yik. 16:14, 16) Meti, yɛkɔhɔ zʋ yɛkɛhã odwokɔba yɩ kɔbʋmɩ kɛɛ Amagadɔnʋ kʋnɛ yɩ kɔwɔ yɩ tʋ. Eyi sɩnza ntɩyasɩ mɔɔ nɩ yɛlɛ yɩ wɔ mmɩlɩ be nɩ.
Bɔmʋnlɩ nɩ, nɩ yɛtɩ yɩ tʋ kɛɛ, sɛ anwʋhyɩlɩyɛ kezile yi bɔ yɩ tʋ na bɛsɩkɛ Babilɔnʋ Kezile yi a, yekeyiaki dasɩlɛlilɛ egyima yɩ. (Yik. 17:3, 5, 15, 16) Nɩ yede yedi kɛɛ ɔzɔ mmɩlɩ yɩ yɛ “Gyehova yɩ adʋmɩ ɔlʋbɔ” nɩ kɛɣa awielɩyɛ a. (Ayɩ. 61:2) Nɩ yesunzu sʋ̃ kɛɛ, bɛzabɛ mɔɔ bekenyia be ti bekelili numɔ wɔ anwʋhyɩlɩyɛ kezile yi nu nɩ, bɛdɩ mmenii mɔɔ behileli kɛɛ bɛlɛ nɔhʋanlɛlilɛ bɔsʋ̃mɩɩ Gyehova ansaana anwʋhyɩlɩyɛ kezile yi ɩbɔ yɩ tʋ. Yɛvalɩ bɛ yedindianlɩ Dwuumaa mɔɔ benyianlɩ be ti belili numɔ wɔ Gyelusalamɩ yɩ ɛzɩkɛlɛ yɩ nu wɔ ɔlʋbɔ 607 A.Y.M. nu. Nɩ beli bɔmʋnlɩ bɛyɛ ɔzɔ mmenii yi mɔɔ bekenyia nnwʋanlɩ nɩ ndwɩ daada iluwakɛɛ bɔzʋ̃mɩnlɩ Gyehova na behyili tanɩ. (Izi. 5:11; 9:4) Naasʋ̃ ɔzɔ ndindianwʋ yɩ, ɩ nɩɩ mɔɔ Gyisɛsɩ hanlɩ wɔ Matiyu 24:14 mɔɔ ikile kɛɛ, mmenii kenyia ɔnwʋmɔ ɔhʋanɩ kɛyɛ odwokɔba yɩ nwʋ debe ansaana awielɩyɛ kʋlakʋla nɩ ɩaɣa wɔ Amagadɔnʋ nɩ iáyiyia.
Ntɩyasɩ fʋlɔ mɔɔ yenyia wɔ Matiyu 24:14 nwʋ nɩ ti, ɩsɛ kɛɛ yɛsɩnza ntɩyasɩ mɔɔ nɩ yɛlɛ yɩ wɔ nzulo awʋlɔ mɔɔ Yikile 16:21 kã nwʋmɔ odwokɔ nɩ. Ɛbɩbɛlɛnu mɔɔ ɩkɔ aɣinzi mɔɔ yɛyɛ nɩ ma yɛnwʋ kɛɛ, ɛhɛlɛlɛndwokɔ anwɩ̃ eyimmɔ wɔ abusunwawɔlɛ be. Mɩnla ɔhʋanɩ zʋ a? Kezimɔ mmenii kɛyɛ bɛ dɩyɛ wɔ Bulombunlililɛ odwokɔba yɩ nwʋ nɩ yɛ ikehile a. Sʋ̃mavʋlɔ Pɔɔlʋ hɛlɛlɩ kɛɛ, bɛzabɛ mɔɔ “bedee bɛ nnwʋanlɩ” nɩ, odwokɔ yɩ “nɣanlɩ ɩdɩ kɛɛ ɛyɛlɛ ovuãmɛ be mɔɔ ɩbɔ ɩwɔlɔ wɔlɔ bɛ na ɩma nnwʋanlɩ bɛ.” Naasʋ̃ Nyamɩnlɩ yɩ adamvʋlɔ mɛyɩ, ɩdɩ odwokɔ tanɩ ɩma bɛ, na “yɩ nɣanlɩ ɩbʋã kɛɛ owulo ɩma bɛ.” (2 Kɔl. 2:15, 16) Bekyi Bulombunlililɛ nwʋ odwokɔba yɩ iluwakɛɛ bɛda yɩ ali kɛɛ bɔdɔ tanɩ oyuwadɩ mɔɔ Setanɩ di zʋlɔ mɔɔ ɩlɛ́kyɛ na bɛazɩkɛ yɩ nɩ.—Dwɔ. 7:7; 1 Dwɔ. 2:17; 5:19.
Yɛ yɩ ndwɩ sʋ̃ kɛɛ, sɛnkyɩlɛdɩ ɔhʋanɩ zʋ nzulo awʋlɔ nɩ ‘yɩ ɛyɛkɛ nɩ kɛyɛ kezile.’ Eyi ma yɛnwʋ kɛɛ wɔ anwʋhyɩlɩyɛ kezile yi nu nɩ, odwokɔbahanlɛ egyima yɩ munwa kɛyɛ ɛhyɩmɛ paa, kile kɛɛ, yɛkɔwɔ Gyehova yi dima nwʋ ɛlawulo wɔ ɔhʋanɩ be zʋ mɔɔ ebiye lésili kyɩ̃. (Izi. 39:7) Ɔzɔ mmɩlɩ yɩ, sɛ bɛsɩkɛ Babilɔnʋ Kezile yi bowie yi a, asʋ̃ abiyemmɔ bɛ anyɩ keleli odwokɔ yɩ nwʋ dɩkɛɛ ɛyɛlɛ ovuãmɛ a? Sa ɩkʋla ɩba yɩ zɔ. Ebiye a bɛkɛhakɛ kɛɛ alʋbɔ be mɔɔ idua nu nɩ, Gyehova Dasɩvʋlɔmaa wɔlɩ awohwizʋ̃mɩnlɛ yɩ ɛzɩkɛlɛ nwʋ ɛlawulo.
Eyi dɩkɛɛ mɔɔ izili wɔ ɔwɔkɩ Igyibiti, mmɩlɩ mɔ Atɩɩtɩɩ Bunlu yi ɣalɩ bɔ zʋ nɩ. Mmɩlɩ mɔ Gyehova ‘wuwalɩ Igyibiti anyamɩnlɩ yɩ munwatĩĩ ndɛnɩ’ wieli nɩ, “mmenii sʋ̃maa sʋ̃maa be mɔɔ bɛ́dɩ Yizilayamaa” hɩnlanlɩ Gyehova yi mmenii nwʋ ma bɔhɔlɩ. (Ɛkɩ. 12:12, 37, 38) Ɩkɛyɛ kɛɛ mmenii eyimmɔ zili pɔkɔ kɛɛ bɛ nɩɩ Gyehova yi mmenii kɔhɔ mmɩlɩ mɔ bɔnwʋnlɩ kɛɛ mɔɔ Mosisi hanlɩ valɩlɩ Atɩɩtɩɩ Bunlu yɩ nwʋ munwala ɣa numɔ nɩ.
Sɛ bɛsɩkɛ Babilɔnʋ Kezile yi bowie a, abiyela mɔɔ ɩkɛɣa kɔzʋ̃mɩ Gyehova nɩ kenyia ɔnwʋmɔ ɔhʋanɩ kɔwʋwa Kɩlayɩsɩ yi mmenlima mɔɔ bɛlanwʋ la bɔwɔ azɩlɛ yɩ zʋ nɩ. (Mt. 25:34-36, 40) Naasʋ̃ sɛ ɩka ɛgyɩkɩ̃ɩ̃ be ma Amagadɔnʋ kʋnɛ yɩ bɔ yɩ tʋ a, ɔnwʋmɔ ɔhʋanɩ mɔɔ mmenii wɔ kɛɛ bokowuwa bɛ ndɛnɩ kɛɛ mmunwanɩ nɩ kɛɣa awielɩyɛ. Ɔzɔ mmɩlɩ yɩ, nɩ bɛva bɛzabɛ mɔɔ bɔvɔ ngɔlɔ bɛ mɔɔ bɛha wɔ azɩlɛ yɩ zʋ nɩ bɔhɔ sʋlɔ.
Ntɩyasɩ fʋlɔ eyi ma yɛnwʋ kɛɛ Gyehova wɔ ɔlɔlɛ nɩɩ nwɔkɛnwʋnlɛ kezile. Amba, “ɩábɛ kɛɛ ɩsɩkɛ abiyela. Ɩpɛ kɛɛ abiyela inu yɩ nwʋ, na ɩtwɩ̃ yɩ nwʋ wɔ yɩ tanɩ nɩ mmɔ nwʋ.”—2 Pit. 3:9.