Fa Awɔhwɛ Yɩ Di Egyima Bʋwɔ

Sʋ̃mavʋlɔ Gyemisi valɩ Bayɩbʋlʋ yɩ dindianlɩ awɔhwɛ mɔɔ ɩbʋwa ma yɛnwʋ enii kʋ̃ mɔɔ yɛdɩ ankasa nɩ nwʋ. (Gye. 1:​22-25) Kɛ ɩkɛyɛ na yɛava Bayɩbʋlʋ yɩ yɛali egyima bʋwɔ dɩkɛɛ awɔhwɛ a?

Kɩnga yɩ bʋwɔ. Sɛ yɛádɩdagyɩ kila yɛ nwʋ wɔ awɔhwɛ nu a, ebiye a yɛlɔ́nwʋ nninyeni be mɔɔ ɩáhɔ bʋwɔ wɔ yɛ nwʋ nɩ. Ɔzɔ la sʋ̃ yɛ sɛ yɛfa yɛ Bayɩbʋlʋ ɛɣɩngalɛ yetu tɔlɔnwa a, yɛlɔ́nwʋ subanɩ be mɔɔ ɩwɔ yɛ nwʋ mɔɔ ɩsɛ kɛɛ yɛyɛ nwʋmɔ egyima nɩ. Meti sɛ yɛkɔnwʋ yɛ nwʋ bʋwɔ a, ɩsɛ kɛɛ yɛdɩdagyɩ yɛkɩnga Nyamɩnlɩ Odwokɔ yɩ bʋwɔ.

Fa wʋ adwɩnɩ siye wʋzawʋ wʋ nwʋ zʋ wɔ awɔhwɛ yɩ nu, na kɛ mmenii mvʋlɔ a. Ɩyɛ a, kezimɔ yekila awɔhwɛ nu nɩ, ɩma yɛnwʋ mmenii mvʋlɔ sʋ̃ wɔ nu na yɛkʋla yɛnwʋ nninyeni mɔɔ ɩáhɔ bʋwɔ wɔ bɔ nwʋ nɩ. Ɔzɔ la sʋ̃ yɛ sɛ yɛkɩngaa Bayɩbʋlʋ yɩ a, yɛákila yɩ bʋwɔ a, sa yɛfa yɛ adwɩnɩ yesiye mmenii mvʋlɔ bo subanɩ mɔɔ ɩsɛ kɛɛ bɛyɛ nwʋmɔ egyima nɩ zʋ. Naasʋ̃ yɛyɛ zɔ a, ɩlɔ́bʋwa yɛ ma yekeziyeziye nninyeni mɔɔ ɩáhɔ bʋwɔ wɔ yɛzayɛ yɛ nwʋ nɩ.

Da ntɩyasɩ ali. Sɛ mmɩlɩ bela mɔ yekehila awɔhwɛ nu nɩ, yɛ mfʋmɩ nkʋ̃ la yɛ yɛfa yɛ adwɩnɩ yesiye zʋlɔ a, sa ɩkʋla ɩma yɛ padi kolɔ. Sɛ yɛkɩngaa Nyamɩnlɩ Odwokɔ yɩ a, ɩsɛ kɛɛ yɛda ntɩyasɩ ali na íni kɛɛ yɛpɩbɛ sʋ̃maa wɔ yɛ nwʋ tɛla mɔɔ Gyehova kila ɔhʋanɩ kɛɛ yɛkɛyɛ nɩ.—Ndw. 103:14.