Asʋ̃ Ɔwɔ Dedi a?

Sɛ yɛkɔzɔ Gyehova anyɩ a, ɩsɛ kɛɛ yenyia dedi. Naasʋ̃ Bayɩbʋlʋ yɩ ka kɛɛ, “kɛ mmenii munwatĩĩ yɛ bede odwokɔ nɩ bedi a.” (2 Tɛs. 3:2) Mmɩlɩ mɔ sʋ̃mavʋlɔ Pɔɔlʋ hanlɩ odwokɔ eyi nɩ, nɩ ɩkãã “atinuzɩzɩbɛmaa nɩɩ tanɩyɛlɛmaa” mɔɔ botwodwu betiyia bɛ nɩ nwʋ odwokɔ. Mmenii be wɔ kɛnɩ a, bɛzabɛ bɛábɛ kɛɛ bekele bekeli kɛɛ Nyamɩnlɩ be wɔ kɛnɩ mɔɔ ɩwɔlɩ nninyeni munwala. (Wul. 1:20) Ebiye a, abiyemmɔ sʋ̃ kɛhã kɛɛ bede debe bedi anzɛnyɩɩ bɔwɔ tumivʋlɔ kezile be nu dedi. Naasʋ̃, dedi mɔɔ ɩdɩ zɔ kɛkɛ nɩ ɩáma abiye sɔ Gyehova anyɩ.

Ɩsɛ kɛɛ yede yedi paa kɛɛ Gyehova wɔ kɛnɩ, na iyila bɛzabɛ mɔɔ bɔwɔ dedi kezile wɔ yi nu nɩ. (Hib. 11:6) Yehyinyia Nyamɩnlɩ yi sunzuma nwanzanwanza yɩ na ama yeanyia dedi. Sɛ yɛ sa kɛhã sunzuma nwanzanwanza yɩ sʋ̃ a, gyɩsɛ yɛbɔ mpayɩ yesiã Gyehova. (Lk. 11:​9, 10, 13) Dɩyɛ fʋlɔ mɔɔ nwʋmɔ hyinyia paa mɔɔ ɩkɔwʋwa yɛ ma yɛ sa kɛhã sunzuma nwanzanwanza yɩ yɛ lɛ kɛɛ, yɛkɛɣɩnga Nyamɩnlɩ Odwokɔ yɩ mɔɔ iluwa yi sunzuma yɩ zʋ ɩmanlɩ bɛhɛlɛlɩ nɩ. Na akʋ̃ sɛ yɛdwɩnɩndwɩnɩ mɔɔ yɛkɩnga nɩ nwʋ na yɛbɔ mmɔdɩnɩ kɛɛ yɛkɛva kɛyɛ egyima a, yɛ Gyehova sʋ̃ kɛva yi sunzuma yɩ kɔwʋwa yɛ ma yɛkɔwɔ yɛ ɛbɩla kɛɛ mmenii mɔɔ yɛwɔ dedi mɔɔ ɩma yɛsɔ yɩ anyɩ a.