KILISINYIAMAA BƐ ƐBƖLAWƆLƐ

Bʋwa Mmenii Mɔɔ Béni Ɔzʋ̃mɩnlɛ Bela Nu Anzɛnyɩɩ Bɛále Nyamɩnlɩ Bedi Nɩ Ma Bɔnwʋ Bɔ Wɔlɛvʋlɔ Yɩ

Ɛta twɩnhwɩ̃ wʋ agyia azɩ kɛɛ ekeli bɛzabɛ mɔɔ béni ɔzʋ̃mɩnlɛ bela nu anzɛnyɩɩ bɛále Nyamɩnlɩ bedi nɩ dasɩlɛ iluwakɛɛ osunzu kɛɛ belétiye a? Sɛ ɔzɔ a, kakɛ kɛɛ mmenii sʋ̃maa mɔɔ béni ɔzʋ̃mɩnlɛ bela nu, mɔɔ bɛzabɛ mɔɔ bɛále Nyamɩnlɩ bedi po kɩnla nwʋmɔ nɩ bɛɣa bɛyɛ Gyehova Dasɩvʋlɔmaa. Mbɔmɩ sʋ̃maa nɩ, dɩyɛ mɔɔ behyinyia yɛ lɛ mmʋwalɩyɛ ɛgyɩkɩ̃ɩ̃ mɔɔ yɛkɛva yɛkɛma bɛ ma bɔkɔnwʋ dasɩlɛ mɔɔ ikile kɛɛ Nyamɩnlɩ wɔ kɛ.—Wul 1:20; 10:14.

KILÁ VIDIYO MƆƆ ISE KAKƐ́ KƐƐ BƐZABƐ MƆƆ BÉNI DEDI NƖ, SA BƆKƲLA BENYIA DEDI!—BƐZABƐ MƆƆ BƐÁZƲ̃MƖ NYAMƖNLƖ, NA AKƲ̃ YƖ ODWOKƆƔIZIALƐ EYI YƖ MUNWA:

Kɛ Tommaso yɩ ozumalɛnwʋnlɛ nɩ bʋwa wʋ ma enyia mmenii mɔɔ béni ɔzʋ̃mɩnlɛ bela nu anzɛnyɩɩ bɛále Nyamɩnlɩ bedi mɔɔ yekeli bɛ dasɩlɛ nɩ nwʋ adwɩnɩba a?

Wu munwalɩyɛ

Kezimɔ ɛkɛyɛ yɩ

Sɛ abiye kã kɛɛ iále Nyamɩnlɩ idi a, da kunlumiba ali, ma wʋ anyɩ ɩla ɛkɛnɩ, kile yɩ adwɩnɩhilelɛ yɩ nwʋ anyɩnlɩlelɛ na ma ɩnwʋ kɛɛ ɛtɩ yɩ nɣanlɩdɩlɛ yɩ tʋ. (2Tim 2:24) Ɛ nɩɩ yɩ zunzu ndwokɔ adile mɔɔ yɩ anyɩ keleli nwʋmɔ nɩ nwʋ. Asʋ̃ ɩwɔ ɛpɛ kɛɛ ɩkɛma bokozunzu dasɩlɛ azʋlɔtʋ mɔɔ ɩma mmenii sʋ̃maa bele beli kɛɛ Dɩyɛwɔlɛvʋlɔ be wɔ ɛkɛnɩ nɩ nwʋ a? Sɛ ɔzɔ a, fa awuuku nɩɩ vidiyo azʋlɔtʋ mɔɔ ɩfalɩ ɔzɔ ndwokɔ yɩ nwʋ nɩ di egyima. Bɛva Was Life Created? nɩɩ The Origin of Life—Five Questions Worth Asking bɛhɩnla ye Nninyeni Mɔɔ Yɛfa Yekilehile nɩ nwʋ na ama ɩayɛ mɛlɛkɛ kɛɛ yɛ sa kɛhã yɩ.

Ebiye a, ahyɛasɩ nɩ, ɩkɛyɛ sɩ ɩkɛma wʋ kɛɛ ɛ nɩɩ abiye mɔɔ iále Nyamɩnlɩ idi nɩ kozunzu nɔhʋanlɛ yɩ nwʋ. Sa ɔkʋla pɩbɛ mmʋwalɩyɛ wɔ ɛlawulowɔlɛvʋlɔ be mɔɔ yɩ nwʋ ɩwʋkwa yɩ ɛkɛnɩ. Kakɛ sʋ̃ kɛɛ, ahʋnlɩnɩbamaa mɔɔ nɩ ahyɛasɩ nɩ, bɛále bedi kɛɛ Nyamɩnlɩ wɔ ɛkɛnɩ po nɩ, Gyehova kɔhʋla kɔwʋwa yɛ ma yekodwu bɛ ahʋnlɩnɩ nu.—Egy 13:48.