Nyiá Dedi Kɛɛ Sɛ Oyuwadɩ Nhyɩhyɛlɩyɛ Eyi Ɩba Awielɩyɛ a, Bekele Yɛ Nnwʋanlɩ

Ɩlɛ́kyɛ Gyehova ilényia oyuwadɩ nhyɩhyɛlɩyɛ eyi nwʋ abʋtalɩ dɔkʋ̃. Bɛkɛzɩkɛ awohwi ɔzʋ̃mɩnlɛ, amanlɩ be bɛkɛhã bɔ nwʋ bɔkɔwɔ numɔ bɔkɔdʋ bɛkɛhyɛ Nyamɩnlɩ yɩ mmenii zʋ, na Gyehova ɩkɛzɩkɛ amumuyɛmaa wɔ Amagadɔnʋ. Kilisinyiamaa bekilaa ɔzɔ mmɩlɩ nɩ mɔ nwʋmɔ ihyinyia na ɩyɛ anyɩnlɩlelɛ nɩ ɔhʋanɩ paa.

Nɔhʋanlɛ nu nɩ, yézi anwʋhyɩlɩlɛ kezile yɩ nwʋ ndwokɔ sʋ̃maa. Kɛ ndianwʋ nɩ, yézi mmɩlɩ pɔkyɩɩ mɔ ɩkɔwɔ yɩ tʋ. Yézi mɔɔ manlɩwulɛ ahyɩhyɛdɩ azʋlɔtʋ nɩ bekegyina ɔzʋlɔ bɔkɔdʋ bɛkɛhyɛ awohwi ɔzʋ̃mɩnlɛ zʋ. Sɛ amanlɩ yɩ tʋ hyɛ Nyamɩnlɩ yɩ mmenii zʋ a, yézi mmɩlɩ tɩndɩnlɩ mɔɔ ikeli anzɛnyɩɩ mɔɔ bɛkɛva bɛkɛyɛ yɛ. Yézi dɩyɛ pɔkyɩɩ mɔɔ Gyehova ɩkɛva ɩkɛzɩkɛ amumuyɛmaa wɔ Amagadɔnʋ.

Naasʋ̃, ndwokɔ mɔɔ yehyinyia na ama yɛava anwʋlazʋ nɩɩ akɛnɣazɩzɩbɛ yeagyina mɔɔ ikezizi aɣile be yi munwa mɛyɩ, Bayɩbʋlʋ yɩ ɩfa ɩma yɛ. Kɛ ndianwʋ nɩ, yezi kɛɛ yɛwɔ “mmɩlɩ mɔɔ ili awielɩyɛ” nu. (2Tim 3:1) Yezi kɛɛ ‘bokodua mmɩlɩ’ mɔ bɔkɔdʋ bɛkɛhyɛ ɔzʋ̃mɩnlɛ zʋ nɩ zʋ na ama bɛázɩkɛlɩ nɔhʋanlɛ ɔzʋ̃mɩnlɛ. (Mt 24:22) Yezi kɛɛ Gyehova kele yi mmenii. (2Pit 2:9) Na yezi sʋ̃ kɛɛ Enii mɔɔ Gyehova ɩyɩ yɩ kɛɛ ɩzɩkɛ́ amumuyɛmaa na ilé ɔlɔmɩ sʋ̃maa sʋ̃maa nɩ wɔ Amagadɔnʋ nɩ, ɩdɩ pɛlɩpɛlɩ na ɩwɔ tumi kezile.—Yik 19:11, 15, 16.

Mɔɔ ikezizi eɣile be nɩ ti, ‘bɔɔlɔ kɛma mmenii kɔdʋdɔ abitĩ.’ Naasʋ̃, sɛ yɛkɩnga na yɛdwɩnɩndwɩnɩ kezimɔ Gyehova ileli yi mmenii wɔ ɔwɔkɩ nɩɩ mɔɔ ɩma yɛnwʋ yɛvalɩ mɔɔ ikezizi wɔ eɣile be nɩ nwʋ a, sa yɛkʋla ‘yepigyia ye ti sʋlɔ, na yɛahila sʋlɔ,’ na yeanyia anwʋlazʋ kɛɛ yɛ elelɛ mmɩlɩ idwu.—Lk 21:26, 28.