Nninyeni Be Mɔɔ Ɩwɔ Sa Ɔkʋla Enyia Anyɩnlɩlelɛ Daabaa! Yi Nu Mɔɔ Ɩkɔhʋla Ɩkɔwʋwa

Vidiyo azʋlɔtʋ nɩɩ ndwokɔɣizialɛ mɔɔ ɩma Bayɩbʋlʋ dɩyɛzumanlɛvʋlɔ yɩ kile yɩ adwɩnɩ mɔɔ ɩwɔ Sa Ɔkʋla Enyia Anyɩnlɩlelɛ Daabaa! buuku yi nu nɩ, asʋ̃ wʋ anyɩ ideli nwʋmɔ kɛɛ ɛkɛva ekeli egyima a? Na “Abiyemmɔ Bɛkã Kɛɛ,” “Bʋtayɩ,” nɩɩ “Pɩbɛ́ Sʋ̃maa” ɔfʋã yɩ sʋ̃ ɛ? Mɩnla ɔfʋã azʋlɔtʋ sʋ̃ yɛ osunzu kɛɛ sɛ ɛyɛɛ Bayɩbʋlʋ dɩyɛzumanlɛ a, ɩbʋwa paa a?—Mt 28:19, 20, NWT.

Vidiyo Nɩɩ Nninyeni Mvʋlɔ: Sɛ ɛlɛ mɔɔ bɛpɩlɩntɩ yɩ be ɛyɛɛ Bayɩbʋlʋ dɩyɛzumanlɛ a, kɛ ɩkɛyɛ na wʋanyia vidiyo nɩɩ nninyeni mvʋlɔ munwala wɔ dɩka ɔkʋ̃ a? Sa wʋ sa kã yɩ wɔ ɩlɛtɩlɔnɩkɩ dɩyɛ zʋ. Sa ɔnwʋ yɩ wɔ ozumalɛdɩyɛ yɩ ndwokɔ adile mɔɔ ɩwɔ ɔfʋã bela yɩ awielɩyɛ nɩ yɩ tʋ. Sɛ eminyia ɔzʋlɔ a, ɔkɔnwʋ vidiyo nɩɩ nninyeni mvʋlɔ munwala mɔɔ ɩwɔ ɔzɔ ɔfʋã yɩ nu nɩ. (Kilá mfonyini 1.)

“Mɔɔ Bɛpɩlɩntɩ”: Sɛ ɛ nɩɩ abiye sumaa mɔɔ ɩwɔ ɩlɛtɩlɔnɩkɩ zʋ a, sa ɔkʋla ɛdanɩ ɔkɔ “Mɔɔ Bɛpɩlɩntɩ” nɩ zʋ mmɩlɩ mɔ dɩyɛzumanlɛ yɩ ɩkɔlɩɩ ɔzʋlɔ nɩ. Dɩka mɔɔ bosumaa nɩ, minyiá dɔɔtɩ asã mɔɔ ɩwɔ sʋlɔ wɔ wʋ sa nyini zʋ nɩ zʋ, na minyiá “Mɔɔ Bɛpɩlɩntɩ” nɩ zʋ. Kezimɔ bɛhyɩhyɛ mɔɔ bɛpɩlɩntɩ yɩ nɩ, ɩkɔwʋwa wʋ ma odwokɔ titili mɔɔ ɔzɔ ozumalɛdɩyɛ yɩ ɩkã nwʋmɔ odwokɔ nɩ ɩkɔwʋwa wʋ adwɩnɩ nu. Sɛ ɛpɛ kɛɛ esia ɔkɔ mɔɔ ɩwɔ ɩlɛtɩlɔnɩkɩ zʋ nɩ a, minyiá dɔɔtɩ asã yɩ zʋ na minyiá “Mɔɔ Ɩwɔ Ɩlɛtɩlɔnɩkɩ Zʋ” nɩ zʋ.

“Asʋ̃ Miziyeziye Mʋ Nwʋ a?”: Nnɛka mɔɔ ɩwɔ buuku yi awielɩyɛ nɩ, ɩkã nninyeni azʋlɔtʋ mɔɔ ɩma abiye ɩfata kɛɛ ɩ nɩɩ asafʋ yɩ kɔwɔ numɔ kɔhɔ dasɩlɛlilɛ nɩɩ mɔɔ abiye ɩyɛ a, ɩkɛma ɩkɛvata ɩkɛma onlumanlɛ nwʋ odwokɔ. (Kilá mfonyini 2.)

Awielɩyɛ Ndwokɔ: Awielɩyɛ ndwokɔ ɔfʋã yɩ nɩ ikilehile ndwokɔ adile aditili azʋlɔtʋ be nu. Mɔɔ ɩwɔ ɩlɛtɩlɔnɩkɩ zʋ nɩ ɩlɛ lɩnkɩ wɔ awielɩyɛ ndwokɔ bela yɩ awielɩyɛ mɔɔ isia ɩfa wʋ ɩkɔ ozumalɛdɩyɛ mɔɔ nɩ ɔwɔ ɔzʋlɔ yɩ nɩ zʋ. (Kilá mfonyini 2.)