Agyiahʋnlɩ—Nhyɩhyɛlɩyɛ Mɔɔ Ɩbʋwa Ɛkɛnɩ Daabaa

Kilisinyianɩ agyiahʋnlɩ mɔɔ ɩyɛ pɩkɛ nɩ, ɩhyɛ Gyehova animinyiamɩ na ɩma ohunɛ nɩɩ ɛyɩlɛ yɩ bɛ anyɩ de. (Mk 10:9) Sɛ Kilisinyianii be pɛ kɛɛ yɩ agyiahʋnlɩ bʋwa ɛkɛnɩ daabaa na ɩyɛ anyɩnlɩlelɛ a, mɛyɩ nɩ ɩsɛ kɛɛ ɩfa Bayɩbʋlʋ nu egyinalɛzʋ-ndwokɔ ɩyɛ egyima wɔ mmɩlɩ mɔ ɩyɩɩ yɩ nwʋkãvʋlɔ nɩ.

Ansaana ɛ nɩɩ abiye kɛyɛ agyiahʋnlɩ nhyɩhyɛlɩyɛ nɩ, kila kɛɛ “ɛ́dɩ kuakula ebiyekʋ̃.” Eyi dɩ mmɩlɩ mɔ nna nwʋ akɔnɔ ɩ́dɩ kezi wɔ wʋ nu. Eyi ɩkɔwʋwa wʋ na ama wʋágyinanlɩ wʋ nɣanlɩdɩlɛ zʋ wʋázili pɔkɔ. (1Kɔl 7:36, NWT) Ɩdɩ baaba paa kɛɛ, ɛkɛva wʋ sigyialilɛ mmɩlɩ nɩ kɛhyɛ ɛ nɩɩ Nyamɩnlɩ avinli abusunwawɔlɛ nu ɛzɩzɩbɛ, na wʋanyia Kilisinyianɩ subanɩ azʋlɔtʋ. Eyi kɔwʋwa wʋ na sɛ ekyia a, wʋ agyiahʋnlɩ ɩayɛ anyɩnlɩlelɛ.

Ansaana ekele ekediã numɔ kɛɛ ekegyia abiye nɩ, bɔ mmɔdɩnɩ de mmɩlɩ nwʋ yɩ ‘Nyamɩnlɩ zʋ anwʋpɩkɛ nɩ mɔɔ ɩwɔ yi nu’ nɩ bʋwɔ. (1Pit 3:4) Sɛ ɔnwʋ kɛɛ dɩyɛ be ɩáhɔ bʋwɔ wɔ enii mɔɔ ɛ nɩɩ yɩ yɛ agyiahʋnlɩ nhyɩhyɛlɩyɛ yɩ nwʋ a, ɛ nɩɩ yɩ wɔ nwʋmɔ nkɔmmɔ. Kezimɔ yɛ nɩɩ mmenii mvʋlɔ bʋwa nɩ, ɔzɔ la yɛ agyiahʋnlɩ dɩ a. Ɩsɛ kɛɛ ɛfa wʋ adwɩnɩ esiye mɔɔ ɔkɔhʋla ɛkɛyɛ ɛkɛma wʋ nwʋkãvʋlɔ yɩ zʋ tɛla mɔɔ ekilaa ɔhʋanɩ kɛɛ ɩkɛyɛ ɩkɛma wʋ nɩ. (Fɩl 2:3, 4) Sɛ ɛfa Bayɩbʋlʋ nu egyinalɛzʋ-ndwokɔ mɔɔ ɩfalɩ agyiahʋnlɩ nwʋ nɩ edi egyima ansaana wʋagyia a, ɩkɔwʋwa wʋ ma ɔkɔdʋ fapɩmɩ baaba ɛkɛma agyiahʋnlɩ mɔɔ ɩyɛ anyɩnlɩlelɛ.

KILÁ VIDIYO MƆƆ ISE YƐ NWƲ MƆƆ YEKEZIYEZIYE YƐKƐMA AGYIAHƲNLƖ—ƆFƲÃ 3: ‘SƖNZƖ NWƲMƆ KAKƐ,’ NA AKƲ̃ YƖ NDWOKƆƔIZIALƐ EYIMMƆ BO MUNWA:

• Kɛ nɩ eliyema baalɛ yɩ nɩɩ Shane bɛ agyiahʋnlɩ nhyɩhyɛlɩyɛ yɩ ɩkɔɔ ise a?

• Mmɩlɩ ɩkɔlɩɩ ɔzʋlɔ nɩ, mɩnla yɛ ɩnwʋnlɩ wɔ Shane nwʋ a?

• Kɛ yɩ awʋvʋlɔ wʋwalɩ yɩ zeli a, na mɩnla pɔkɔba yɛ izili a?