Ɔhʋanɩbukolɛ Egyima Yɩ

Sɛ yɛfa bʋtayɩ azʋlɔtʋ yesiyeziye yɛ anyɩ zʋ wɔ Gyehova yɩ ɔzʋ̃mɩnlɛ nu a, nɩ yɛlɛ yɛ anwʋzɩzɩbɛ yedii egyima bʋwɔ. (1Kɔl 9:26) Ɩma yɛfa yɛ mmɩlɩ yedi egyima bʋwɔ ansaana awielɩyɛ nɩ ɩaɣa. (Ɛfɩ 5:15, 16, NWT) Wɔ bɛ abusunwazʋ̃mɩnlɛ tʋ nɩ, sa bɔkʋla bosunzu bʋtayɩ be mɔɔ bɛpɛ kɛɛ bɛfa besiye bɛ anyɩ zʋ nɩ nwʋ. Mɔɔ ɩkɔwʋwa wʋ nɩ, ndwokɔ sʋ̃maa wɔ dɩyɛzumanlɛ kɛlɛta eyi nu mɔɔ ɩfalɩ bʋtayɩ azʋlɔtʋ mɔɔ yɛkɔhʋla yɛkɛva yekeziyeziye yɛ anyɩ zʋ mɔɔ sa ɔkʋla ɛfa mpayɩwɔlɛ osunzu nwʋmɔ.—Gye 1:5.

Kɛ ndianwʋ nɩ, asʋ̃ abusunwa yɩ kɔhʋla kɔwʋwa ma ɩáyɛ bʋwɔ kʋlaa nɩ enii ɔkʋ̃ kɔhʋla kɛyɛ ɔhʋanɩbukolɛvʋlɔ a? Sɛ ɛtɩ nɣanlɩ kɛɛ ɔlɔ́kʋla kodwu wʋ dɔnɩhwɩlɩ nɩ nwʋ a, sa ɔkʋla ɛ nɩɩ ɔhʋanɩbukolɛmaa mɔɔ beyiyia wʋ bʋwabɩlɛ be kyɩ̃ nɩ bɔ nwʋmɔ nkɔmmɔ. (Ɛɣɛ 15:22) Ebiye a, sa bɔkʋla po bebiziabizia ɔhʋanɩbukolɛvʋlɔ be ndwokɔ wɔ bɛ abusunwazʋ̃mɩnlɛ tʋ. Akʋ̃ kɛlɛ nhyɩhyɛlɩyɛ azʋlɔtʋ mɔɔ ɩkɔhʋla kɔwʋwa wʋ nɩ tiã ɛkɛ. Sɛ ɛyɛ ɔhʋanɩbukolɛ egyima be kyɩ̃ na ɛva ediã ɛkɛ a, sunzú nwʋmɔ kila kɛɛ wʋ bʋwabɩlɛ kɛma ɔhʋanɩ wʋ ma ekezia kɛva yɩ dɔkʋ̃ a.

Asʋ̃ abiye wɔ abusunwa yɩ nu mɔɔ ɩkɔhʋla ɩkɛva eziyianɩ ɔkʋ̃ anzɛnyɩɩ mɔɔ ɩbʋ zɔ ɩkɛyɛ ɔhʋanɩbukolɛ bʋwavʋlɔ egyima nɩ be a? Sɛ éni anwʋzɩzɩbɛ sʋ̃maa po na sɛ ɛfa mmɩlɩ ɛgyɩkɩ̃ɩ̃ ɛyɛ dasɩlɛlilɛ egyima yɩ eɣile bela a, sa ɔkʋla ɛyɛ ebiye. Sɛ wʋáhʋla kɔ dasɩlɛlilɛ wɔ dapɛnɩ yɩ nu iluwakɛɛ ɛfa wʋ mmɩlɩ sʋ̃maa ɛyɛ egyima anzɛnyɩɩ ɔkɔ sukuulu a, sa ɔkɔhʋla ɛfa eziyianɩ mɔɔ holiday anzɛnyɩɩ dapɛnɩ awielɩyɛ anlu wɔ nu ɛyɛ ebiye. Yɛ mmɩlɩ mɔ ɛpɛ kɛɛ ɛfa ɛyɛ ebiye nɩ ndwɩ wɔ wʋ calendar zʋ na kɛlɛ nhyɩhyɛlɩyɛ mɔɔ ɛyɛ nɩ tɩã ɛkɛnɩ.—Ɛɣɛ 21:5.

KILÁ VIDIYO MƆƆ ISE NYIÁ AKƐNƔAZƖZƖBƐ KƐƐ . . . —ƆHƲANƖBUKOLƐVƲLƆ, NA AKƲ̃ YƖ ODWOKƆƔIZIALƐ EYI YI MUNWA:

• Mɩnla yɛ Eliyema baalɛ Aamand yɩ ozumalɛnwʋnlɛ yɩ ma yɛnwʋ yɛfalɩ kezimɔ Gyehova kila bɛzabɛ mɔɔ bɛfa nninyeni bɔbɔ afɔlɩ bɛyɛ ɔhʋanɩbukolɛ egyima nɩ a?