Asʋ̃ Esiyeziyee Wʋ Nwʋ Ɛkɛma Ɛhakɛlɛlilɛ Yɩ Nɩ a?

Nɩ Gyisɛsɩ yɩ Ahʋanɩnwʋmɔ Awuwa mɔɔ itualɩ yɩ tʋ nɩ ɩkɛyɛ sʋnʋnkʋ̃. Iluwakɛɛ nɩ ɩlɛ́kyɛ na iawu nɩ ti, ɩyɛlɩ nhyɩhyɛlɩyɛ mɔɔ ɩ nɩɩ yɩ adʋwavʋlɔ nɩ bekeli Ahʋanɩnwʋmɔ alɩyɛ nɩ, na akʋ̃ ɩava Niibenyia Yi Nunuma Alɩyɛ mɔɔ bekeli yi ɔlʋbɔ ɔlʋbɔ nɩ sʋ̃ iaziye ɛkɛnɩ. Meti ɩzʋmanlɩ Pita nɩɩ Dwɔɔnʋ kɛɛ bɔhɔ́ beziyeziye dɩka mɔɔ bɛkɛyɛ Awuwa yɩ nɩ. (Lk 22:7-13; kilá mfonyini mɔɔ ɩwɔ kɛlɛta yɩ anyunu nɩ.) Eyi ɩkakɛ yɛ ehyinyianlɛ mɔɔ ihyinyia kɛɛ yekeziyeziye yɛ nwʋ yɛkɛma March 27 Ɛhakɛlɛlilɛ yɩ nɩ. Ebiye a, asafʋ azʋlɔtʋ nɩ bɛyɛ nhyɩhyɛlɩyɛ bɛma ndɛnɩmanlɛvʋlɔ, nwanyɩ nɩɩ pʋanʋ, nɩɩ mɔɔ ɩkɩnla nwʋmɔ. Naasʋ̃ kɛ ɩkɛyɛ na ye nu bela iaziyeziye yɩ nwʋ ɩama Ɛhakɛlɛlilɛ yɩ nɩ a?

Siyeziyé wʋ ahʋnlɩnɩ. Kɩngá na dwɩnɩndwɩnɩ Ɛhakɛlɛlilɛ Bayɩbʋlʋ ɛɣɩngalɛ yɩ nwʋ. Ɔkɔnwʋ ɔzɔ Bayɩbʋlʋ ɛɣɩngalɛ yɩ nɩ wɔ Kyerɛwnsɛm No Mu a Wobɛhwehwɛ Daa yi nu. Ɛɣɩngalɛ eyi nu ndwokɔ mɔɔ ɩkɔ aɣinzi sʋ̃ wɔ April 2020 Ɛbɩlawɔlɛ Nɩɩ Dasɩlɛlilɛ Dɩyɛzumanlɛ Kɛlɛta yi nu. Sa mmusunwa benyia ndwokɔ mɔɔ ɩfalɩ sianti mɔɔ elelɛdɩyɛ yɩ nwʋ ihyinyia mɔɔ bɔkɔhʋla bokozunzu nwʋmɔ wɔ bɛ abusunwa ɔzʋ̃mɩnlɛ tʋ wɔ Nhoma a Yehowa Adansefo De Yɛ Nhwehwɛmu yi nu.

Tʋ́ salɛ fʋlɔ mmenii mvʋlɔ ma bɛɣɩla ebiye. Fá wʋ nwʋ munwala wula Ɛhakɛlɛlilɛ salɛdʋlɛ yi nu. Dwɩnɩndwɩnɩ mmenii mɔɔ ɔkɔhʋla ɔkɔdʋ salɛ ɔkɔvʋlɔ bɛ nɩ nwʋ, dɩkɛɛ mmenii mɔɔ ɛ nɩɩ bɛ wɔ́ nkɔmmɔ kyɩ̃, mmenii mɔɔ nɩ ɛ nɩɩ bɛ suma Bayɩbʋlʋ, wʋ ɔhɔnwʋmmɔ, nɩɩ wʋ abusunwamaa. Ɩsɛ kɛɛ asafʋ nu mbanimbani bɔtʋ salɛ bɔfʋlɔ bɛzabɛ mɔɔ beyiaki dasɩlɛlilɛhɔlɛ nɩ. Kakɛ kɛɛ, sɛ abiye ɩ́da wʋ apaa yi nu ɛkɛnɩ na ɩkɔ jw.org/aha yɩ zʋ a, sa ɩnwʋ dɩka nɩɩ mmɩlɩ mɔ bɛkɛyɛ Ɛhakɛlɛlilɛ yɩ nɩ. Sa ɩnwʋ yɩ wɔ YƐ NWƲ NDWOKƆ ɔfʋã ɛkɛnɩ mɔɔ ise “Ɛhakɛlɛlilɛ” yɩ nɩ.

Mɩnla dɔkʋ̃ yɛ yɛkɔhʋla yɛkɛyɛ na yɛava yɛaziyeziyee yɛ nwʋ a?