Yɛla Nyamɩnlɩ Nɩɩ Kɩlayɩsɩ Asɩ​—Ye Eɣile Be Fanwʋdi Nɩ Ti

Mɩnla ndwokɔ ɛzɩzɩbɛ yɛ eyiyiaa a? Asʋ̃ ɛdɩ ohunɛ mɔɔ eminyiaa wʋ nwʋ kɛɛ ekeli asɛdɩ sʋ̃maa nwʋ egyima a? Ɛdɩ ɔwʋvʋlɔ ɔkʋ̃ mɔɔ ɔbɔɔ mmɔdɩnɩ kɛɛ ekehila wʋ abusunwa a? Ɛdɩ abɩlantɩyɛ anzɛnyɩɩ kɛdɛkɛ mɔɔ eyiyiaa nhyɛ wɔ sukuulu nu a? Asʋ̃ éni pɔkɔdɩlɛ baaba anzɛnyɩɩ ebaniyɛlɛ ɩma ɛtɩɩ ɛyɛkɛ a? Abiyela wɔ yɩzayɩ yɩ ndwokɔ ɛzɩzɩbɛ mɔɔ iyiyiaa. Kilisinyiamaa be beyiyiaa wʋ atɩɩtɩɩ dɩyɛ nɩ yɩ mmɔnwʋ sʋ̃maa wɔ mmɩlɩ ɔkʋ̃ yɩ la nu. Naasʋ̃ yezi kɛɛ ɩlɛ́kyɛ, Gyehova ibale yɛ wɔ yi munwala nu.—2Kɔl 4:16-18.

Kɔbʋmɩ kɛɛ ɔzɔ eɣile yɩ ɩkɛɣa nɩ, sa yɛkʋla yenyia ɛɣɛɛlɛyɩkyɩlɛ kɛɛ Gyehova ɩtɩ yɛ ndwokɔ ɛzɩzɩbɛ yɩ tʋ, yɩ anyɩ ɩsɔ yɛ nɔhʋanlɛlilɛ nɩɩ ye pindinyiigyinanlɛ, na yi nyilalɛ kezile ɩla yɛ anyunu ɩdɩkɛɛ yɛ. (Gyɛ 29:11, 12) Gyisɛsɩ sʋ̃ yɩ anyɩ ideli yɛ nwʋ baaba. Mmɩlɩ mɔ yedii yɛ Kilisinyianɩ asɛdɩ nwʋ egyima nɩ, yɛkɔhʋla yenkenyia anwʋlazʋ eyi kɛɛ ‘ɩ nɩɩ yɛ yeluwa eɣile bela.’ (Mt 28:20) Sɛ yede mmɩlɩ yɛdwɩnɩndwɩnɩ eɣile be fanwʋdi mɔɔ yekenyia wɔ Nyamɩnlɩ yɩ Bulombunlililɛ yi nu nɩ nwʋ a, ɩkɛhyɛ yɛ anyɩnlɩlazʋ nɩɩ yɛ kɛnɣa mɔɔ yezi kɛɛ yekegyina yɛ atɩɩtɩɩ nu wɔ nnɛ nɩ nu ɛzɩzɩbɛ.—Wul 8:19-21.

KILÁ VIDIYO MƆƆ ISE MMƖLƖ MƆ AHUMI YI ƖBƲBƆ ƖBA NƖ, FÁ WƲ ADWƖNƖ SIYE KƖLAYƖSƖ ZƲ!—NYILALƐ MƆƆ EƔILE BE BULOMBUNLILILƐ YƖ ƖKƐVA ƖKƐƔA NƖ, NA AKƲ̃ YƖ́ NDWOKƆƔIZIALƐ EYIMMƆ BO MUNWA:

• Kɛ ɩyɛlɩ mɔɔ adasamaa bɔhwɩnlɩ bɔ nwʋ wɔ Nyamɩnlɩ nwʋ a, na mɩnla yɛ ɩzʋ̃ numɔ ɩɣa a?

• Mɩnla nyilalɛ yɛ ɩwɔ ɛkɛnɩ ɩma bɛzabɛ mɔɔ bedi Gyehova nɔhʋanlɛ nɩ a?

• Kɛ ɩyɛlɩ mɔɔ eɣile be eyi mɔɔ ɩyɛ nnwʋánlɩ nɩ ɩyɛlɩ bʋwɔ a?

• Oyuwadɩ fʋlɔ mɔɔ bɔwɔ nwʋmɔ anʋhʋba nɩ, numɔ nyilalɛ ɛhɩnla dɩyɛ yɛ ekilaa yɩ ɔhʋanɩ a?