Má Wʋ Anyɩ Ɩzɔ Ɛ Nɩɩ Gyehova Bɛ Avinli Abusunwawɔlɛ Yɩ Nɩ

Gyehova Dasɩvʋlɔmaa bɔwɔ ɔnwʋmɔ ɔhʋanɩ sʋnʋnkʋ̃ be. Kɛ Kilisinyiamaa mɔɔ yeyila yɛ nwʋ zʋ na yenluma nɩ, yɛkɔ ɔzʋlɔ yɛ nɩɩ Amansɔnɩ Niibenyia Gyehova nyia abusunwawɔlɛ mɔɔ numɔ ɩyɛ ɛzɩzɩbɛ. Iluwa yɩ Ɣa yɩ zʋ ɩhwɩ̃ yɛ ɩɣa yɩ pɛ. (Dwɔ 6:44) Itiye yɛ mpayɩwɔlɛ.—Ndw 34:15.

Mɩnla ɔhʋanɩ zʋ yɛ yɛkɔhʋla yɛkɔwɔ yɛ nɩɩ Nyamɩnlɩ avinli abusunwawɔlɛ sʋnʋnkʋ̃ eyi nwʋ banɩ a? Ɔkʋ̃ yɛ lɛ kɛɛ, íni kɛɛ yɛyɛ nninyeni tanɩ mɔɔ Yizilayamaa nɩ bɛyɛlɩ nɩ be. Bɛ nɩɩ Gyehova yɛlɩ apamɩ nɩ, ɩákyɛ bela yɛ bɛyɛlɩ nantwi aboduwaba na bɔwɔlɩ yɩ tʋ kɛɛ bɔsʋ̃mɩɩ aboduwaba nɩ a. (Ɛkɩ 32:7, 8; 1Kɔl 10:7, 11, 14) Sa yɛkʋla yebizia yɛ nwʋ kɛɛ: ‘Sɛ miyiyia odwohilalɛ kɛɛ mɩyɛ dɩyɛ tanɩ a, kɛ mɩyɛ mɩ dɩyɛ mise a? Asʋ̃ mɩ nyɛlɩyɛ ikile kɛɛ mɩ anyɩ ɩsɔ mɩ nɩɩ Gyehova yɛ avinli abusunwawɔlɛ yɩ nɩ a?’ Ɔlɔlɛ mɔɔ numɔ ɩyɛ ɛzɩzɩbɛ mɔɔ yɛlɛ yɛma yɛ sʋlɔ Ɛzɩlɛ nɩ ɩkɛhã yɛ ma yɛkɔbʋ nninyeni mɔɔ ikyi.—Ndw 97:10.

KILÁ VIDIYO MƆƆ ISE BƆ́ Ɛ NƖƖ GYEHOVA BƐ AVINLI ABUSUNWAWƆLƐ NWƲ BANƖ (KOL 3:5), NA AKƲ̃ YƖ́ NDWOKƆƔIZIALƐ EYIMMƆ BO MUNWA:

• Mɩnla yɛ lɛ anyɩnlɩbʋlʋ a?

• Mɩnla ti mɔɔ ɩsɛ kɛɛ yɛpʋ angʋmidi nɩɩ awʋzʋmɩzʋ̃mɩnlɛ a?

• Mɩnla ɔkʋ̃yɛlɛ yɛ ɩwɔ adwomanlɩwɔlɛ nɩɩ awʋzʋmɩzʋ̃mɩnlɛ bɛ avinli a?

• Mɩnla ti mɔɔ ɩsɛ kɛɛ bɛzabɛ mɔɔ yi titili bɔwɔ asɛdɩ wɔ asafʋ yi nu nɩ, bɔbɔ mmɔdɩnɩ kɛɛ bekeli bɛ yɩmmɔ anzɛnyɩɩ bo hũmmɔ bɛ ahyinyiadɩ nwʋ egyima a?