Kilá Na Wʋápɩndɩ Awohwi Ndwokɔ

Nnɛ, bɔkʋla bɛfa ndwokɔ bɔnwʋã mmenii abʋmɩ abʋmɩ sʋ̃maa ndɛndɛ zʋ iluwa nninyeni be mɔɔ betindimi, ɣilediyo, TV, nɩɩ intanɛtɩ zʋ. Mmenii mɔ bɔsʋ̃mɩ “nɔhʋanlɛ Nyamɩnlɩ” nɩ mɛyɩ, bɛábɛ kɛɛ bɛpɩndɩ awohwi ndwokɔ wɔ mmɩlɩ po mɔ bɛ anyɩ ɩála nɩ. (Ndw 31:5; Ɛkɩ 23:1) Awohwi ndwokɔ mɔɔ yɛkɛhã yekehile mmenii mvʋlɔ nɩ ɩkʋla ɩsɩkɛ nninyeni. Mmɩlɩ mɔ ɔbɔɔ mmɔdɩnɩ kɛɛ ɔkɔnwʋ nɔhʋanlɛ mɔɔ ɩwɔ odwokɔ be nu nɩ, biziá wʋ nwʋ kɛɛ:

• ‘Ɛhɩnlafʋã yɛ odwokɔ yɩ ɩzʋ̃ a?’ Ebiye a, enii mɔɔ ɩkãã nɩ ízi nɔhʋanlɛ mɔɔ ɩwɔ odwokɔ yɩ munwala nu. Sɛ odwokɔ be ɩzʋ̃ abiye yɩ ɛkɛnɩ a, ɩhã kɛɛ idwu enii fʋlɔ yɩ ɛkɛnɩ nɩ, nɩ ɩzɩnza. Meti sɛ ézi dɩka pɔkyɩɩ mɔɔ odwokɔ yɩ ɩzʋ̃ a, mɛyɩ ɩyɛ a, kila yɩ bʋwɔ. Iluwakɛɛ mmeliyema bu ndwokɔ mɔɔ bɛzabɛ mɔɔ bɔwɔ ɔnwʋmɔ ɔhʋanɩ wɔ asafʋ yɩ nu nɩ bɛkã nɩ ti, ɩsɛ kɛɛ bekila bʋwɔ na bɛábɩndɩnlɩ ndwokɔ mɔɔ bɛlɛ́tɩlɩ numɔ bʋwɔ

• ‘Ɩkã ndwokɔ tanɩ ɩfalɩ abiye nwʋ a?’ Sɛ ɔzɔ ndwokɔ nɩ ɩsɩkɛ dimaba mɔɔ abiye anzɛnyɩɩ okuwu be ɩwɔ a, mɛyɩ ɩlɛ́yɛ baaba kɛɛ ɛkɛbɩndɩ.—Ɛɣɛ 18:8; Fɩl 4:8

• ‘Sa yɛkʋla yede odwokɔ yɩ nɩ yedi a?’ Kilá yɩ bʋwɔ wɔ mmɩlɩ mɔ ɛdɩ ndwokɔ be nɩɩ ozumalɛnwʋnlɛ be mɔɔ bokugua numɔ bɛkã nɩ

KILÁ VIDIYO MƆƆ ISE KƐ ƖKƐYƐ NA MIAYIAKI NDWOKƆLILƐ A? NA AKƲ̃ YƖ NDWOKƆƔIZIALƐ EYIMMƆ BO MUNWA:

• 

  Kɛmɔ Ɛɣɛlɛwulɛ 12:18 ikile nɩ, sɛ yɛákila ye munwa odwokɔ bʋwɔ a, mɩnla asianɩ yɛ ɩkɔhʋla ɩkɛɣa a?

• 

  Mɩnla ɔhʋanɩ zʋ yɛ Fɩlɩpɩmaa 2:4 ɩbʋwa yɛ ma yekila yɛ nwʋ bʋwɔ wɔ mmɩlɩ mɔ yɛkãã ye anlima be nwʋ odwokɔ nɩ a?

• 

  Sɛ bɔbɔ yɩ tʋ kɛɛ bɛkãã abiyemmɔ bɔ nwʋ ndwokɔ tanɩ a, mɩnla yɛ ɩsɛ kɛɛ yɛyɛ wɔ nwʋ a?

• 

  Ansaana yɛkɔwɔ yɩ tʋ kɛɛ yɛkãã abiyemmɔ bɔ nwʋ ndwokɔ nɩ, mɩnla ndwokɔ yɛ ɩsɛ kɛɛ yebizia yɛ nwʋ a?