“Bɔdʋ́ Nanabɩnɩ Anyamɩnlɩ Mɔɔ Ɩwɔ Bɛ Pɛ Nɩ Munwala Bogua”

Wɔ mmɩlɩ mɔ nɩ Gyehova ɩlɛ́hyɩhyɛlɩ mmɛla mɔɔ ɩfalɩ awʋzʋmɩ ɔzʋ̃mɩnlɛ nwʋ po nɩ, nɩ Gyekɔpʋ izi kɛɛ ɩsɛ kɛɛ yɛsʋ̃mɩ Gyehova yɩzayɩ nkʋ̃tɩnyɩɩ. (Ɛkɩ 20:3-5) Meti mmɩlɩ mɔ Gyehova ɩhanlɩ ihileli yi kɛɛ iziá ɩhɔ Bɛtɩlɩ nɩ, Gyekɔpʋ ɩhyɛlɩ abiyela mɔɔ nɩ ɩwɔ yɩ nwʋ nɩ kɛɛ ɩdʋ́ aboduwaba mɔɔ ɩwɔ yɩ nwʋ nɩ igua. Akʋ̃ Gyekɔpʋ ɩdʋlɩ mmoduwaba nɩ munwala, mɔɔ asʋmadɩ mɔɔ ebiye a bɛfa bedi egyima kɛɛ nsɩlɩba nɩ munwala igualɩ. (Gyn 35:1-4) Ɩda ali paa kɛɛ, Gyehova yɛ anyɩ ɩzɔlɩ mɔɔ Gyekɔpʋ ɩyɛlɩ nɩ.

Wɔ nnɛ sʋ̃ nɩ, kɛ ɩkɛyɛ na yɛazʋ̃mɩ Gyehova yɩzayɩ nkʋ̃tɩnyɩɩ a? Mɔɔ ihyinyia kɛɛ yɛyɛ yɛ lɛ kɛɛ yɛkɔbʋ dɩyɛ bela mɔɔ ɩfalɩ amʋnlɩzʋ̃mɩnlɛ anzɛnyɩɩ azunzuma ndwokɔ nwʋ. Eyi ikile kɛɛ yɛkɔdʋ dɩyɛ bela mɔɔ ɩfalɩ azunzuma ndwokɔlilɛ nwʋ nɩ yekogua na yɛabɩbɛlɩ nninyeni mɔɔ yɛfa yede yɛ anyɩ nɩ nu. Kɛ ndianwʋ nɩ, biziá wʋ nwʋ kɛɛ: ‘Asʋ̃ mɩ anyɩ ideli awuuku nɩɩ fɩlɩmɩ mɔɔ azunzuma evinli ndwokɔ wɔ numɔ, dɩkɛɛ ngyɛnɩ mɔɔ bekile kɛɛ bɔtwɩ̃ mmenii be mmegyia anzɛnyɩɩ bowunla nwunla mmenii, anzɛnyɩɩ mmenii mɔɔ bekile kɛɛ bɛlɛ tumi sʋnʋnkʋ̃ be nɩ bɔ nwʋ ndwokɔ nwʋ a? Asʋ̃ nninyeni mɔɔ mɩfa mide mɩ anyɩ nɩ ikile kɛɛ mɩ anyɩ ideli ngongyiayɩlɛ, nnunodʋnlɛ, nɩɩ amʋnlɩgulɩyɛ nwʋ a?’ Ɩsɛ kɛɛ yɛtwɩ̃ yɛ nwʋ kʋlaa wɔ dɩyɛ bela mɔɔ Gyehova ikyi nɩ nwʋ.—Ndw 97:10.

KILÁ VIDIYO MƆƆ BƐYƐ YƖ DƖLAMA MƆƆ ISE “SÍ ABƆNSAMƖ ƆHƲANƖ,” NA AKƲ̃ YƖ́ NDWOKƆƔIZIALƐ EYIMMƆ BO MUNWA:

• 

  Mɩnla ndwokɔ ɛzɩzɩbɛ yɛ ɩdʋlɩ Bayɩbʋlʋ dɩyɛzumanlɛvʋlɔ be mɔɔ bɔfʋlɔ yɩ Palesa a?

• 

  Sɛ yeyiyia bʋwabɩlɛ be mɔɔ ɩfalɩ azunzuma ndwokɔ nwʋ a, mɩnla ti mɔɔ ihyinyia kɛɛ yɛpɩbɛ mmʋwalɩyɛ wɔ asafʋ nu mbanimbani bɛ ɛkɛnɩ a?

• 

  Mɩnla yɛ ɩsɛ kɛɛ bɛzabɛ mɔɔ bɛpɛɛ Gyehova yɩ banɩwɔlɛ nɩ bɔtwɩ̃ bɔ nwʋ wɔ nwʋmɔ kʋlaa a?

• Mɩnla pɔkɔ mɔɔ nɣɛlɛbɛ wɔ numɔ yɛ Palesa izili a?

• Dɩka mɔɔ ɛda nɩ, mɩnla yɛ ɔkɔhʋla ɛkɛyɛ na ama wʋahwɩ̃ wʋ nwʋ wɔ azunzuma evinli nwʋ a?