Ɛ Nɩɩ Mmenii Mɔɔ Bɔdɔ Gyehova Nɩ Bɔwɔ́

Mɩnla ti mɔɔ ɩsɛ kɛɛ yɛ nɩɩ mmenii mɔɔ bɔdɔ Gyehova nɩ yɛbɔ́ a? Iluwakɛɛ mmenii mɔɔ yɛ nɩɩ bɛ bɔ nɩ, bɔkʋla benyia yɛ zʋ tumi wɔ ɔhʋanɩba zʋ anzɛnyɩɩ ɔhʋanɩ tanɩ zʋ. (Ɛɣɛ 13:20) Kɛ ndianwʋ nɩ, mmɩlɩ mɔ Bulombunli Gyehowahyɩ nɩɩ Azɔfʋ mbanimbani nu ebani Gyehoyada bɔwɔlɩ nɩ, “ɩyɛlɩ mɔɔ ɩtɩnɣɛ wɔ Gyehova yɩ anyɩ zʋ.” (2Mm 24:2) Naasʋ̃, wɔ Gyehoyada yɩ owulo mɛda nɩ, iluwa ɔhɔnwʋ tanɩ ti, ɩbʋlɩ Gyehova.—2Mm 24:17-19.

Wɔ asʋ̃mavʋlɔ nɩ bɛ mmɩlɩ zʋ nɩ, sʋ̃mavʋlɔ Pɔɔlʋ ɩvalɩ Kilisinyiamaa asafʋ yɩ nɩ idindianlɩ “pika kezile” be nwʋ, na ɩvalɩ asafʋ yi nu maa sʋ̃ idindianlɩ ‘nninyeni mɔɔ bedidi numɔ nɩɩ mɔɔ bɔnʋnʋ numɔ’ nwʋ. Sɛ yɛtwɩ̃ yɛ nwʋ wɔ abiyela mɔɔ ɩyɛ dɩyɛ mɔɔ Gyehova ikyi nɩ nwʋ, kɛ ebiye a, ɩdɩ ye busunwanii anzɛnyɩɩ aliyemma po a, yɛkɔhɔ ɔzʋlɔ yɛkɛyɛ dɩyɛ mɔɔ bɛfa ‘bɛyɛ egyima mɔɔ ɔnwʋmɔ ihyinyia.’ (2Tim 2:20, 21) Meti, ɩɣɩla kɛɛ, yɛkɔhɔlɩ ɔzʋlɔ yɛ nɩɩ mmenii mɔɔ bɔdɔ Gyehova na bɛhyɛ yɛ ɛzɩzɩbɛ kɛɛ yɛzʋ̃mɩ yɩ nɩ kɔwɔ.

KILÁ VIDIYO MƆƆ ISE SUMÁ KƐƐ ƆKƆBƲ ƆHƆNWƲ TANƖ, NA AKƲ̃ YƖ́ NDWOKƆƔIZIALƐ EYIMMƆ BO MUNWA:

• Mɩnla ɔhʋanɩ zʋ yɛ yɛkɔhʋla yɛ nɩɩ ɔhɔnwʋ tanɩ kɔwɔ, wɔ mmɩlɩ mɔ yɛ anyɩ ɩála a?

• Wɔ vidiyo yi nu nɩ, mɩnla yɛ ɩwʋwalɩ Kilisinyiamaa asã be ma bodualɩ ɔhɔnwʋ tanɩ nu a?

• Sɛ ɛpɛ kɛɛ wʋ anyɩ ɩda ɛkɛnɩ wɔ ɔhɔnwʋvalɛ nu a, mɩnla Bayɩbʋlʋ nu egyinalɛzʋ-ndwokɔ yɛ ɩkɔwʋwa wʋ a?