Kɛlɛta Mɔɔ Ɩzʋ̃ Ɔhʋanɩhilelɛ Okuwu Nɩ Bɛ Ɛkɛnɩ
Ɩsɛ kɛɛ bɛyɛ “ahilehilevʋlɔ.” (Hib. 5:12) Dwɩnɩ́ nwʋ kila! Kɛ Gyehova—Kilehilevʋlɔ baaba ɔkʋ̃ pɛ la mɔɔ ɩwɔ amansɔnɩ yi nu nɩ—ɩtʋʋ salɛ ɩfʋlɔ yɛ kɛɛ yehilehile yɩ nwʋ ndwokɔ yehile mmenii mvʋlɔ! Egyimalilɛ bela mɔɔ ekenyia kɛɛ ehilehile nɔhʋanlɛ mɔɔ ɩfalɩ Gyehova yɩ nwʋ—wɔ yɛ abusunwa nu, asafʋ yɩ nu, anzɛnyɩɩ dasɩlɛlilɛ nu nɩ—ɩdɩ ɔnwʋmɔ ɔhʋanɩ sʋnʋnkʋ̃ nɩɩ asɛdɩ mɔɔ numɔ ɩyɛ ɔnlʋmɔ. Kɛ ɩkɛyɛ na yɛayɛ eyi a?
Munwalɩyɛ nɩ wɔ odwokɔ mɔɔ sʋ̃mavʋlɔ Pɔɔlʋ hɛlɛlɩ manlɩ Timoti nɩ nu: “Kɩnga Ɛhɛlɛlɛ nɩ kile dedimaa nɩ mmɔ, kã Nyamɩnlɩ odwokɔ nɩ fa kyɩkyɩ bɛ ɛɣɛɛlɛ, na kilehile numɔ kile bɛ.” Pɔɔlʋ ɩzɔlɩ ɔzʋlɔ kɛɛ: “Sɛ ɛyɛ yɩ ɔzɔ a, Nyamɩnlɩ ikele mɔwʋ nɩɩ bɛzabɛ mɔɔ betiye wʋ nɩ bɔ nnwʋanlɩ.” (1 Tim. 4:13, 16) Ɔwɔ nnwʋanlɩlelɛ odwokɔ mɔɔ ɩsɛ kɛɛ ɛ nɩɩ mmenii kyɛ. Meti ihyinyia kɛɛ ɔbɔ mmɔdɩnɩ kɛɛ okodu mpʋnɩ wɔ kezimɔ ɛkɩnga dɩyɛ na ekilehile numɔ nɩ nu. Bɛyɛ blohyʋɔ eyi kɛɛ ɩwʋwa wʋ ma ɛyɛ ɔzɔ. Yɛ́ blohyʋɔ eyi nu nninyeni ɛgyɩkɩ̃ɩ̃ be ndwɩ̃.
Ɛhɛlɛlɛ odwokɔ mɔɔ bɔhwɩ̃ adwɩnɩ beziye zʋ mɔɔ ɩdɩ Bayɩbʋlʋ nu egyinalɛzʋ-odwokɔ anzɛnyɩɩ ndianwʋ be mɔɔ ɩfalɩ dɩyɛzumanlɛ mɔɔ bɛkãã nwʋmɔ odwokɔ wɔ owukolɛ bela nu nɩ wɔ numɔ
Gyehova yɛ ɩdɩ “Kilehilevʋlɔ Kezile” a. (Ayɩ. 30:20) Ɩwɔ numɔ, blohyʋɔ eyi ɩkɔwʋwa wʋ ma ɛkɛyɛ nna kɛɛ ɛɣɩngalɛvʋlɔ nɩɩ kilehilevʋlɔ dɩyɛ, naasʋ̃ áma wʋ ɛɣɛɛlɛ ifi kɛɛ odwokɔ yɩ nɩ ɩzʋ̃ Gyehova yɩ ɛkɛnɩ na mɛyɩ yɛɛ ɩtwɩ̃ mmenii ɩba yɩ pɛ a. (Dwɔɔnʋ 6:44) Meti, ta bɔ́ mpayɩ pɩbɛ sunzuma nwanzanwanza. Fá Nyamɩnlɩ yɩ Odwokɔ nɩ dí egyima mmɩlɩ munwala. Áma ɔtwɩ̃ adwɩnɩ esiye wʋ zʋ, mfomi fa siye Gyehova zʋ. Bɔ́ mmɔdɩnɩ kɛɛ ɛkɛma wʋ ediyelɛmaa nɩ bekenyia ɔlɔlɛ kezile wɔ bɛ ahʋnlɩnɩ nu bɛkɛma Gyehova.
Bɔdʋ salɛ bɔvʋlɔ wʋ kɛɛ ehilehile odwokɔ mɔɔ ihyinyia ɩtɛla odwokɔ bela mɔɔ bɛva bɛma adasamaa nɩ. Yede yedi kɛɛ, sɛ ɔkɔlɩ ɔzʋlɔ ɛfa wʋ nwʋ etiã “anwʋzɩzɩbɛ mɔɔ Nyamɩnlɩ ɩva ɩma” wʋ nɩ zʋ a, sa ɔkʋla ɛyɛ yɩ bʋwɔ.—1 Pit. 4:11.
Wʋ ɔhɔnwʋmmɔ ahilehilevʋlɔ,
Gyehova Dasɩvʋlɔmaa Bɔ Ɔhʋanɩhilelɛ Okuwu