Asʋ̃ Ɛkɛyɛ Gyehova Yɩ Apɛdɩ a?

Yɛ la wʋ asɩ paa kɛɛ ele mmɩlɩ ozuma blohyʋɔ eyi kɛmɔ ɩkɛyɛ na wʋanwʋ Gyehova Dasɩvʋlɔmaa bʋwɔ, wʋazuma yɛ egyimalilɛ, na wʋanwʋ kezimɔ yɛ ahyɩhyɛdɩ ɩyɛɛ yɩ egyima. Yede yedi kɛɛ, eyi ɩwʋwa wʋ ma ɔnwʋ yɩ kɛɛ amɩyɛ yɛɛ yɛyɛ Gyehova yɩ apɛdɩ nnɛ a. Yɛhyɛ wʋ ɛzɩzɩbɛ kɛɛ kɔ ɔzʋlɔ nyia Nyamɩnlɩ yɩ nwʋ nnimidi, na kã mɔɔ osuma yɩ nwʋ dɩyɛ kile wʋ abusunwamaa nɩɩ wʋ ɔhɔnwʋmmɔ, na ɛ nɩɩ yɛ wɔ numɔ hɔ yɛ Kilisinyianɩ ayiyialɩyɛ nɩ be.—Hibulumaa 10:23-25.

Ɛkɛɣa ɔkɔnwʋ yɩ kɛɛ, mbɔmɩ sʋ̃maa mɔɔ osuma Gyehova yɩ nwʋ dɩyɛ nɩ, mbɔmɩ sʋ̃maa nɩ la yɛɛ ɔkɔnwʋ kezimɔ ɩdɔ wʋ a. Eyi ɩkɛhã wʋ ma ɛkɛyɛ mɔɔ ɔkɔhʋla bela kɛɛ ɛkɛla ɔlɔlɛ mɔɔ wʋzawʋ sʋ̃ ɔwɔ ɛma yɩ nɩ ali. (1 Dwɔɔnʋ 4:8-10, 19) Naasʋ̃ mɩnla ɔhʋanɩ zʋ yɛɛ ɔkɔhʋla ɛkɛla ɔlɔlɛ mɔɔ ɔwɔ ma Gyehova nɩ ali wɔ wʋ ɛbɩlawɔlɛ nu a? Mɩnla ti mɔɔ ɛbɩlawɔlɛ nu egyinalɛzʋ-ndwokɔ mɔɔ ɛkɛyɛ sutiye ɛkɛma yɩ nɩ ɔzʋlɔ ɩkɛɣa mfasʋ ɩkɛma wʋ a? Na mɩnla yɛɛ ɩkɔwʋwa wʋ ma ɛkɛbɛyɩ kɛɛ ɛ nɩɩ yɛ kɔwɔ nu kɛyɛ Nyamɩnlɩ yɩ apɛdɩ a? Wʋ Bayɩbʋlʋ kilehilevʋlɔ ɩanyɩ ikeleli ɔnwʋmɔ kɛɛ ɩ nɩɩ wʋ kɛbɩbɛlɩ ɔnwʋmɔ munwalɩyɛ nu kɛmɔ ɩkɛyɛ na wʋzawʋ nɩɩ wʋ abusunwa yɩ nɩ ‘bɛaziye bɔ nwʋ wɔ Nyamɩnlɩ yɩ ɔlɔlɛ nɩ nu bɛalɩkɛ nnwʋanlɩ mɔɔ íni awielɩyɛ nɩ.’—Dwuudu 21.

Yɛtʋ salɛ yɛfʋlɔ wʋ kɛɛ kɔ ɔzʋlɔ nyia anyunumihɔlɛ wɔ nɔhʋanlɛ yɩ nu iluwa “Momfa Mo Ho Nsie Onyankopɔn Dɔ Mu” bukuu yɩ nɩ mɔɔ ɔkɔdʋwa ɔzʋlɔ okozuma yɩ nɩ zʋ.