Mɩnla Ti Mɔ Yɛkɔ Ayiyialɩyɛ Nɣezile a?

Mɩnla ti mɔɔ mmenii eyimmɔ bɛanyɩ ile zɛyɩ a? Bɔkɔɔ yɛ ayiyialɩyɛ azʋlɔtʋ nɩ numɔ ɔkʋ̃. Dɩkɛ Nyamɩnlɩ yɩ azʋ̃mɩvʋlɔ mɔ bɔwʋwalɩ azɩ wɔ tɩɩtɩɩ mɔɔ bɛhyɛlɩ bɛ kɛɛ beyiyia numɔ mbɔmɩ asã wɔ ɔlʋbɔ bela nu nɩ, amɩyɛzayɛ sʋ̃ yekila ɔhʋanɩ kɛɛ yɛkɔwɔ numɔ yekeyiyia kɛɛ okuwu nɣezile. (Deuteronomy 16:16, NW) Ɔlʋbɔ bela nɩ, yɛwɔ ayiyialɩyɛ nɣezile azʋlɔtʋ asã: eɣile ɔkʋ̃ mansini ayiyialɩyɛ mɔɔ yɛyɛ yɩ mbɔmɩ anwɩ̃ wɔ ɔlʋbɔ bela nu nɩɩ aɣile-asã manlɩ-avinli ayiyialɩyɛ. Mɩnla mfasʋ yɛɛ yenyia wɔ ɔzɔ ayiyialɩyɛ azʋlɔtʋ yɩ zʋ a?

Ɩhyɛ yɛ Ahilisinyiamaa mmeliyema okuwu nɩ nu ɛzɩzɩbɛ. Dɩkɛ mɔɔ Yizilayamaa yɩ nɩ bɛanyɩ ileli wɔ Gyehova mɔɔ bɛyɩlɩ yɩ ayɛlɛ wɔ mmɩlɩ mɔɔ ‘beyiyia nu nɩ’, amɩyɛzayɛ sʋ̃ yɛanyɩ ide wɔ mmɩlɩ mɔɔ yɛbɔ numɔ yɛsʋ̃mɩ wɔ ɔzɔ ayiyialɩyɛ sʋnʋnkʋ̃ yɩ tʋ. (Hibulumaa 10:24, 25) Ɔzɔ ayiyialɩyɛ yɩ nɩ ɩma ɔnwʋmɔ ɔhʋanɩ yɛ ma yeyiyia Dasɩvʋlɔmaa mɔɔ bɔzʋ̃ asafʋ azʋlɔtʋ anzɛnyɩɩ amanlɩ mvʋlɔ nu na yɛfa bɛ ɔhɔnwʋ. Wɔ mmɩlɩ mɔɔ nwɔnɩ egyimalililɛ ɩɣa awielɩyɛ nɩ, yedi alɩyɛ wɔ ayiyialɩyɛ nɩ yɩ tʋ, eyi ɩma yenyia ɔhɔnwʋmmɔ mvʋlɔ wɔ ɛzɛ sunzuma nu ayiyialɩyɛ azʋlɔtʋ nɩ yɩ tʋ. (Egyima 2:46) Wɔ ɔzɔ ayiyialɩyɛ nɣezile nɩ yɩ tʋ nɩ, yɛnwʋ ɔlɔlɛ mɔ ɩkã yɛ “ɔhɔnwʋmmɔ dedimaa” mɔɔ bɔwɔ oyuwadɩ yɩ dɩka bela ɩbɔ numɔ nɩ.—1 Pita 2:17.

Ɩma yetu mpʋnɩ wɔ yɛ ɔzʋ̃mɩnlɛ nu. Yizilayamaa yɩ nɩ beyianlɩ mfasʋ wɔ Ɛhɛlɛlɛ Ndwokɔ mɔɔ behilehileli numɔ ma “bɛdɩlɩ ndwokɔ abɔkɔ yɩ tʋ” nɩ. (Nehemiah 8:8, 12, NW) Amɩyɛzayɛ sʋ̃ yɛanyɩ ɩsɔ Bayɩbʋlʋ nu ehilehilelɛ mɔɔ yenyia yɩ wɔ yɛ ayiyialɩyɛ nɣezile yɩ tʋ. Egyimalilɛ bela igyĩ Bayɩbʋlʋ nu odwokɔ be zʋ. Iluwa ndɛnɩ mɔɔ itu ovuãmɛ, ndɛnɩ mɔɔ bɛhyɩhyɛ numɔ, nɩɩ yɛkile azʋlɔtʋ zʋ nɩ, yesuma kɛmɔ yɛkɛyɛ Nyamɩnlɩ yɩ apɛdɩ wɔ yɛ ɛbɩlawɔlɛ nu. Sɛ yetiye ozumalɛnwʋnlɛ azʋlɔtʋ mɔɔ ɩfalɩ mmenii mɔɔ beyiyia odwohilalɛ azʋlɔtʋ iluwakɛɛ bɛdɩ Ahilisinyiamaa nɩ ti, na bɔhʋla begyina numɔ wɔ mmɩlɩ mɔɔ numɔ yɛ ɛzɩzɩbɛ eyi nu a, ɩhyɛ yɛ ɛzɩzɩbɛ. Wɔ manlɩ-avinli ayiyialɩyɛ yɩ tʋ nɩ, dɩlama azʋlɔtʋ nɩ ɩma yɛtɩ Bayɩbʋlʋ nu ndwokɔ tʋ bʋwɔ na ikilehile yɛ ozumalɛdɩyɛ azʋlɔtʋ mɔɔ ɩyɛ egyima. Wɔ ayiyialɩyɛ nɣezile bela tʋ nɩ, mmenii mɔɔ beyila bɔnwʋ zʋ bɛma Nyamɩnlɩ nɩ, bonuma bɛ bɛfa bɛyɛ bɔnwʋ zʋ yilalɛ yɩ nwʋ sɛnkyɩlɛdɩ.

• Mɩnla ti mɔɔ ayiyialɩyɛ nɣezile yɩ nɩ ɩdɩ anyɩnlɩlelɛ mmɩlɩ a?

• Mɩnla mfasʋ yɛɛ ekenyia wɔ ayiyialɩyɛ nɣezile mɔɔ ɔkɔhɔ yɩ zʋ a?