Nɔ́ Nɛ Baiblo ɔ Deɔ Ngɛ Gba Mi Pomi Kɛ Gba Jemi He

Yehowa suɔ kaa nyumu kɛ e yo nɛ ye kita nɛ a ka a sibi ɔ nɔ. Benɛ Yehowa ngɔ kekle nyumu kɛ yo ɔ kɛ tsa kaa nɔ kɛ e yo ɔ, e de ke: ‘Nyumu ma ya mɛtɛ e yo he nɛ a maa pee he lo kake.’ Pee se ɔ, Yesu Kristo ti munyu nɛ ɔ mi nɛ e de kɛ piɛɛ he ke: “Lɔ ɔ he ɔ, nɔ́ nɛ Mawu ngɔ tsa a, nɔmlɔ kó gba mi.” (1 Mose 2:24; Mateo 19:3-6) Enɛ ɔ tsɔɔ kaa Yehowa kɛ Yesu buu gba si himi kaa e ji weku kpa nɛ hii nyumu kɛ yo a kpɛti a wami be tsuo kɛ ya si benɛ nɔ kake ma gbo. (1 Korinto Bi 7:39) Akɛnɛ gba si himi ji blɔ nya tomi nɛ ngɛ klɔuklɔu he je ɔ, e sɛ kaa a buu gba mi pomi kaa nɔ́ ko nyafii. Ngɛ anɔkuale mi ɔ, Yehowa hiɔ gba mi pomi nɛ́ dɛ Ngmami ɔ nɔ ɔ.​—Malaki 2:15, 16.

Mɛni be Ngmami ɔ ngmɛɛ blɔ kaa a po gba mi? Yehowa hiɔ gba puɛmi kɛ ajuama bɔmi. (1 Mose 39:9; 2 Samuel 11:26, 27; La 51:4) Akɛnɛ e nyɛ ajuama bɔmi he je ɔ, e kplɛɛ nɔ kaa a ma nyɛ maa da nɔ kɛ po gba mi. (A sɛsɛ nɔ́ nɛ ajuama bɔmi tsɔɔ he ngɛ Yi 9 kuku 7.) Yehowa ha nɔ nɛ a tɔ e nɔ ɔ he blɔ kaa e ma nyɛ maa mwɔ e yi mi kpɔ kaa e kɛ e he piɛɛlɔ ɔ ma tsa a si himi ɔ nɔ, aloo a po gba a mi. (Mateo 19:9) Enɛ ɔ he ɔ, ke nɔ nɛ a tɔ e nɔ ɔ pee e juɛmi kaa e kɛ e he piɛɛlɔ ɔ maa po gba mi ɔ, e pee we yayami kɛ si we Yehowa. Se kɛ̃ ɔ, Kristofohi asafo ɔ wui nihi he wami kaa a po gba mi. E ji anɔkuale kaa si fɔfɔɛ komɛ ma nyɛ ma ha nɔ nɛ a tɔ e nɔ ɔ be e he piɛɛlɔ ɔ sie, titli ke e na kaa e tsake e tsui niinɛ. Se nɔ nɛ ngɛ he blɔ kaa e maa po gba mi ngɛ Ngmami nya a, e sa kaa lɛ nitsɛ e mwɔ e yi mi kpɔ ngɛ he, nɛ́ e pɛtɛ nɔ́ tsuaa nɔ́ nɛ maa je mi kɛ ba a hu he.​—Galatia Bi 6:5.

Si fɔfɔɛ komɛ nɛ a nya wa wawɛɛ haa nɛ Kristo se nyɛɛli komɛ jeɔ a he piɛɛli a he kɛ ya hii he kpa, loo a kɛ mɛ poɔ gba mi, nɛ pi ajuama nɛ a bɔ. Ke e ba jã a, Baiblo ɔ blɔ tsɔɔmi ji kaa, nɔ nɛ je e he piɛɛlɔ ɔ he ɔ, ‘e hi si jã, nɛ e ko sɛ gba si himi mi, ke pi jã lɛɛ, e ya nɛ e kɛ e he piɛɛlɔ ɔ nɛ ya dla.’ (1 Korinto Bi 7:11) Kristofo no nɛ ngɛ si fɔfɔɛ nɛ ɔ mi ɔ, be he blɔ nɛ e kɛ nɔ kpa ya sɛɛ gba si himi mi. (Mateo 5:32) Ha nɛ wa susu si fɔfɔɛ komɛ nɛ a nya wa nɛ nihi daa nɔ kɛ jee a he piɛɛli a he kɛ ya hii he kpa a he nɛ waa hyɛ.

Ke nyumu kua e weku nɔ hyɛmi. Eko ɔ, weku ko ngɛ ohia yee, nɛ a ná we si himi mi níhi nɛ hia mɛ ɔ, ejakaa nyumu ɔ kua a nɔ hyɛmi, be mi nɛ e ma nyɛ maa hyɛ a nɔ. Baiblo ɔ de ke: ‘Kristo se nyɛɛlɔ nɛ hyɛ we lɛ nitsɛ e we mi bimɛ ɔ, blɔɔ e ngmɛɛ hemi kɛ yemi ɔ he. Afani nɔ nɛ he we yi ngɛ kikɛmɛ a nɔmlɔ nɛ ɔ he.’ (1 Timoteo 5:8) Ke nyumu nɛ peeɔ jã tsakee we e ní peepee ɔ, e yo ɔ ma nyɛ ma pee e juɛmi kaa e maa je e he ngɛ mlaa nya kɛ ya hi he kpa, bɔ nɛ pee nɛ e po e kɛ e bimɛ a he piɛ. Ke a ba po Kristofo no ko nya kaa e kua e weku nɔ hyɛmi ɔ, e sa kaa asafo mi nikɔtɔma amɛ nɛ hyɛ munyu ɔ mi saminya. A ma nyɛ maa fie nɔ nɛ kua e weku nɔ hyɛmi ɔ kɛ je asafo ɔ mi.

Ke nɔ ko kongoɔ e he piɛɛlɔ. Nɔ ko nɛ ngɛ basabasa ma nyɛ maa kongo e he piɛɛlɔ ngɛ yi wu tso nya, nɛ e he piɛɛlɔ ɔ nɔmlɔ tso mi he wami nami loo e wami po maa sɛ oslaa mi. Ke nɔ nɛ kongoɔ e he piɛɛlɔ ji Kristofo no ɔ, e sa kaa asafo mi nikɔtɔma amɛ nɛ hla munyu ɔ mi kaa e peeɔ jã niinɛ lo. A ma nyɛ maa fie nɔ ko kɛ je asafo ɔ mi ke e mi mi fuɔ wawɛɛ, nɛ e peeɔ e ní basabasa.​—Galatia Bi 5:19-21.

Ke nɔ tsiɔ e he piɛɛlɔ nya ngɛ Mawu jami he. Eko ɔ, nɔ ko tsiɔ e he piɛɛlɔ nya daa kaa e ko ngɔ e he kɛ wo anɔkuale jami mi, loo eko ɔ, e nyɛɔ e nɔ kaa e ko ye Mawu mlaa amɛ a nɔ. Ke e ba jã a, he piɛɛlɔ ɔ nɛ ngɛ haomi mi ɔ, ma nyɛ maa pee e juɛmi kaa e he piɛɛlɔ ɔ he nɛ e maa je ngɛ mlaa nya kɛ ya hi he kpa a, ji nɔ́ nɛ ma ha nɛ e bu “Mawu mohu tue, se pi nimli.”​—Bɔfo Ɔmɛ A Ní Tsumi 5:29.

Ngɛ si fɔfɔɛhi nɛ nya wa nɛ wa sɛsɛ he nɛ ɔmɛ tsuo mi ɔ, e sɛ kaa nɔ ko nɛ nyɛ nɔ nɛ a tɔ e nɔ ɔ nɔ kaa e je e he piɛɛlɔ ɔ he kɛ ya hi he kpa, loo e ko je e he. Kristofohi nɛ pi si ngɛ Mawu jami mi kɛ asafo mi nikɔtɔmahi ma nyɛ maa je Baiblo ɔ mi kɛ ye bua nɔ ɔ nɛ a wo lɛ ga mohu, se a be nyɛe maa le nɔ́ tsuaa nɔ́ nɛ yaa nɔ ngɛ e kɛ e he piɛɛlɔ ɔ a kpɛti. Yehowa pɛ nɛ le. Se e sɛ kaa yogbayo loo huno nɛ e ji Kristofo no bangeɔ e gba si himi haomihi a mi pe bɔ nɛ e ji nitsɛnitsɛ, bɔ nɛ pee nɛ e na blɔ kɛ je e he piɛɛlɔ ɔ he kɛ ya hi he kpa ngɛ e dɛ he. Ke e pee jã a, e wui Mawu hɛ mi nyami, nɛ e bui gba si himi blɔ nya tomi ɔ hulɔ. Ke nɔ ko to ga nɛ e kɛ je e he piɛɛlɔ he ɔ, e ngɛ mi kaa nɔ ko li mohu, se Yehowa le. Niinɛ, “nɔ́ tsuaa nɔ́ ngɛ je nɛ ɔ mi fɔɔ si pãa ngɛ Mawu hɛ mi. Nɛ nɔ tsuaa nɔ maa bu lɛ nitsɛ e he akɔtaa ngɛ e hɛ mi.” (Hebri Bi 4:13) Se ke si fɔfɔɛ ko nɛ nya wa ya nɔ be kɛkɛɛ, nɛ nɔ nɛ kɛ haomi ɔ ngɛ kpee ɔ pee e juɛmi kaa e maa je e he piɛɛlɔ ɔ he kɛ ya hi he kpa a, e sɛ kaa nɔ ko nɛ tu munyu kɛ si lɛ. Nyagbenyagbe ɔ, “Mawu hɛ mi wɔ tsuo wa maa da si ngɛ nɛ e maa kojo wɔ.”​—Roma Bi 14:10-12.