YOHANE WOMI ETƐNE

1 Imi nyumu nɔkɔtɔma a* lɛ i ngɛ womi nɛ ɔ ngmae kɛ ha mo Gayo, mo nɛ nihi suɔ o sane, nɛ imi hu i suɔ mo wawɛɛ ɔ.

2 Mo nɛ i suɔ mo, ye sɔlemi ji kaa ngɛ níhi tsuo a mi ɔ, o hi nɔ yae, nɛ o ná nɔmlɔ tso mi he wami kpakpa, kaa bɔ nɛ níhi ngɛ nɔ yae ha mo* amlɔ nɛ ɔ. 3 Ejakaa ye bua jɔ wawɛɛ nitsɛ benɛ nyɛmimɛ ba nɛ a ba ye anɔkuale ɔ nɛ o hɛɛ mi ɔ he odase, kaa bɔ nɛ o ngɛ nyɛɛe ngɛ anɔkuale ɔ nya a.+ 4 Nɔ́ ko be nɛ haa mi bua jɔmi pe enɛ ɔ: kaa ma nu kaa ye bimɛ ɔmɛ ngɛ nyɛɛe ngɛ anɔkuale ɔ nya.+

5 Mo nɛ i suɔ mo, ngɛ nibwɔhi nɛ nyɛmimɛ ɔmɛ ji ɔ tsuo se ɔ, o tsɔɔ kaa o yeɔ anɔkuale ngɛ níhi nɛ o peeɔ kɛ haa mɛ ɔ mi.+ 6 A ba ye o suɔmi ɔ he odase ngɛ asafo ɔ hɛ mi. I kpa mo pɛɛ nɛ o wo mɛ blɔ kɛ ho bɔ nɛ e maa sa Mawu hɛ mi.+ 7 Ejakaa e biɛ ɔ he je nɛ a je kɛ ho ɔ nɛ, a ngɔɛ nɔ́ ko nɔ́ ko+ ngɛ nihi nɛ a ngɛ je ma amɛ a mi ɔ a dɛ. 8 Enɛ ɔ he ɔ, e ji wa blɔ nya ní tsumi kaa wa maa pee nihi kaa jã a nibwɔ,+ konɛ waa piɛɛ a he kɛ tsu ní ngɛ anɔkuale ɔ mi.+

9 I ngma sɛ womi ko kɛ ya ha asafo ɔ, se Diotrefe, nɔ nɛ e suɔ kaa e maa ye kekleekle blɔ he ngɛ a kpɛti ɔ bui wɔ,+ nɛ e kplɛɛ we nɔ́ ko nɔ́ ko nɛ jeɔ wa ngɔ ɔ nɔ.+ 10 Enɛ ɔ he je nɛ ke i ba a, ma je e ní tsumi ɔmɛ nɛ ji munyuhi nɛ e tuɔ kɛ gbeɔ wa he guɛ ɔ* kpo ɔ nɛ.+ Lɔ ɔ kɛkɛ pi ha lɛ, e he we nyɛmimɛ ɔmɛ atuu ngɛ bumi mi;+ nɛ ni nɛmɛ nɛ a suɔ kaa a ma he mɛ atuu ɔ hu e bɔɔ mɔde kaa e maa tsi mɛ blɔ nɛ e maa fie mɛ kɛ je asafo ɔ mi.

11 Mo nɛ i suɔ mo, koo kase nɔ́ yayami, mohu ɔ, kase nɔ́ kpakpa.+ Nɔ nɛ e peeɔ kpakpa a je Mawu mi.+ Nɔ nɛ e peeɔ yayami ɔ, e nɛ Mawu.+ 12 Demetrio lɛɛ, mɛ tsuo a tu e he munyu kpakpa, nɛ anɔkuale ɔ nitsɛ hu ye e he odase. Ngɛ anɔkuale mi ɔ, wɔ hu wa ngɛ e he odase yee, nɛ o le kaa odase nɛ wa ye ɔ ji anɔkuale.

13 I ngɛ níhi fuu nɛ ma ngma mo, se i sume nɛ ma ya nɔ nɛ ma ngɔ ningma tso kɛ inki kɛ hi mo ngmae. 14 I ngɛ blɔ hyɛe kaa ma na mo ngɛ be kpiti mi, nɛ waa tu munyu hɛ mi kɛ hɛ mi.

Tue mi jɔmi ha mo.

Huɛmɛ ɔmɛ ke a biɔ mo. Mo tsɛ huɛmɛ ɔmɛ a biɛ kakaaka nɛ o de mɛ ke i biɔ mɛ.