YOHANE WOMI ENYƆNE

1 Imi nyumu nɔkɔtɔma a lɛ i ngɛ womi nɛ ɔ ngmae kɛ ha mo alua nɛ a hla mo ɔ kɛ o bimɛ ɔmɛ. I suɔ nyɛ wawɛɛ. Pi imi pɛ nɛ i suɔ nyɛ, mohu ɔ, nihi tsuo nɛ a ba le anɔkuale ɔ, 2 ejakaa anɔkuale ɔ ngɛ wa mi nɛ e kɛ wɔ maa hi si kɛ maa ya neneene. 3 Dloomi, mɔbɔ nami, kɛ tue mi jɔmi nɛ je Mawu nɛ ji Tsɛ ɔ, kɛ Yesu Kristo nɛ ji Tsɛ ɔ Bi ɔ ngɔ ɔ kɛ wɔ nɛ hi si ngɛ anɔkuale kɛ suɔmi mi.

4 Ye bua jɔ wawɛɛ nitsɛ, ejakaa i na o bimɛ ɔmɛ a ti ni komɛ nɛ a ngɛ nyɛɛe ngɛ anɔkuale ɔ nya+ kaa bɔ nɛ Tsɛ ɔ wo wɔ mlaa a. 5 Enɛ ɔ he ɔ, amlɔ nɛ ɔ, alua, i ngɛ mo pɛɛ kpae kaa waa suɔ wa sibi. (Pi mlaa ehe ko nɛ i ngɛ ngmae ha mo, mohu ɔ, nɔ́ nɛ wa nine su nɔ kɛ je sisije ɔ.)+ 6 Nɔ́ nɛ suɔmi tsɔɔ ji kaa wa maa ya nɔ maa nyɛɛ ngɛ Tsɛ ɔ mlaa amɛ a nya.+ Kaa bɔ nɛ nyɛ nu kɛ je sisije ɔ, mlaa a ji, e sa nɛ nyɛɛ ya nɔ nɛ nyɛɛ nyɛɛ ngɛ suɔmi mi. 7 Ejakaa nɔ sisili fuu ba je ɔ mi.+ Nimli nɛ ɔmɛ he we yi kaa Yesu Kristo ba ngɛ he lo mi.+ Nɔ nɛ peeɔ jã a ji nɔ sisilɔ kɛ Kristo he hyɛlɔ.*+

8 Nyɛɛ hyɛ saminya konɛ nɔ́ nɛ wa gbo dengme kɛ ná a nɛ ko bɔ nyɛ, mohu ɔ, nyɛ nine nɛ su hiɔwo ɔ tsuo nɔ.+ 9 Nɔ fɛɛ nɔ nɛ e sɛɔ Kristo hlami, nɛ e hí si ngɛ e tsɔɔmi ɔ mi ɔ be Mawu.+ Nɔ fɛɛ nɔ nɛ e hiɔ tsɔɔmi nɛ ɔ mi ɔ ngɛ Tsɛ ɔ kɛ Bi ɔ tsuo.+ 10 Ke nɔ ko ba nyɛ ngɔ nɛ pi tsɔɔmi nɛ ɔ nɛ e kɛ ba a, nyɛ ko ngɔ lɛ kɛ ya nyɛ we mi,+ nɛ nyɛ ko nga lɛ hulɔ. 11 Ejakaa nɔ nɛ e ma nga lɛ ɔ, e kɛ lɛ pee kake ngɛ e ní tsumi yayami ɔmɛ a mi.

12 E ngɛ mi kaa i ngɛ níhi fuu nɛ ma ngma nyɛ mohu lɛɛ, se i sume nɛ ma ngɔ womi kɛ inki kɛ pee jã, mohu ɔ, i ngɛ blɔ hyɛe kaa ma ba nyɛ ngɔ konɛ i kɛ nyɛ nɛ ba tu munyu hɛ mi kɛ hɛ mi, bɔ nɛ pee nɛ nyɛ bua jɔmi ɔ nɛ pi si.

13 O nyɛmiyo ɔ nɛ a hla lɛ ɔ bimɛ ɔmɛ ke a biɔ mo.