YOHANE KEKLEEKLE WOMI

1 Wami munyu ɔ nɛ e ngɛ kɛ je sisije, nɛ́ wa nu, nɛ wa na kɛ wa hɛngmɛ, nɛ wa hyɛ lɛ saminya, nɛ waa kɛ wa nine pɛtɛ he,+ 2 (ee, a je neneene wami kpo kɛ tsɔɔ wɔ nɛ wa na, nɛ wa ngɛ e he odase yee+ nɛ wa ngɛ e he sane jajee kɛ ngɛ nyɛ hae. Neneene wami+ nɛ ɔ je Tsɛ ɔ ngɔ, nɛ e je lɛ kpo kɛ tsɔɔ wɔ), 3 nɛ́ wa nu, nɛ́ wa na a he amaniɛ lɛ wa ngɛ nyɛ bɔe ɔ nɛ,+ konɛ nyɛ hu nyɛɛ kɛ wɔ nɛ ba bɔ huɛ. Nɛ huɛ bɔmi nɛ ɔ, waa kɛ Tsɛ ɔ kɛ e Bi Yesu Kristo lɛ bɔɔ.+ 4 Wa ngɛ ní nɛ ɔmɛ ngmae konɛ wa bua jɔmi ɔ nɛ pi si.

5 Nɔ́ nɛ wa nu kɛ je e ngɔ nɛ wa ngɛ nyɛ he amaniɛ bɔe ɔ ji nɛ ɔ nɛ: Mawu ji la,+ nɛ diblii ko kulaa be e mi. 6 Ke wa de ke, “Waa kɛ lɛ ngɛ huɛ bɔe,” se kɛ̃ ɔ, wa yaa nɔ nɛ wa nyɛɛɔ ngɛ diblii mi ɔ, wa ngɛ lakpa yee nɛ waa kɛ anɔkuale ɔ tsu we ní.+ 7 Se ke wa ngɛ nyɛɛe ngɛ la a mi kaa bɔ nɛ lɛ nitsɛ hu e ngɛ la a mi ɔ, lɛɛ huɛ bɔmi ngɛ waa kɛ wa sibi wa kpɛti, nɛ e Bi Yesu muɔ ɔ tsuɔ wa he kɛ jeɔ yayamihi tsuo a he.+

8 Ke wa de ke, “Yayami be wa he” ɔ, wa ngɛ wɔ nitsɛmɛ wa he sisie,+ nɛ anɔkuale ɔ be wa mi. 9 Mawu ji anɔkualetsɛ kɛ dalɔ, lɔ ɔ he ɔ, ke wa jaje wa he yayami ɔmɛ ɔ, e kɛ wa he yayami ɔmɛ maa ke wɔ, nɛ e maa tsu wa he kɛ je níhi nɛ dɛ tsuo he.+ 10 Ke wa de ke, “Wa pee we yayami” ɔ, lɛɛ wa ngɛ tsɔɔe kaa lakpatsɛ ji lɛ, nɛ e munyu ɔ be wa mi.

2 Ye bimɛ tsɔwi, i ngɛ nyɛ ní nɛ ɔmɛ ngmae konɛ nyɛ ko pee yayami. Se kɛ̃ ɔ, ke nɔ ko pee yayami ko po ɔ, wa ngɛ yemi kɛ bualɔ* ko ngɛ Tsɛ ɔ ngɔ, lɛ ji Yesu Kristo,+ dalɔ ɔ nɛ.+ 2 Nɛ lɛ ji kpatami afɔle*+ kɛ ha wa he yayami ɔmɛ,+ se kɛ̃ ɔ, pi kɛ ha wɔ pɛ, mohu ɔ, kɛ ha je ɔ tsuo+ hulɔ. 3 Nɛ ke wa yaa nɔ nɛ wa yeɔ e mlaa amɛ a nɔ ɔ, lɔ ɔ haa nɛ wa naa kaa wa ba le lɛ. 4 Nɔ nɛ e deɔ ke, “I ba le lɛ,” se kɛ̃ ɔ, e yi e mlaa amɛ a nɔ ɔ, lakpatsɛ ji lɛ, nɛ anɔkuale ɔ be nɔmlɔ nɛ ɔ mi. 5 Se nɔ fɛɛ nɔ nɛ e yeɔ e munyu ɔ nɔ ɔ, ngɛ anɔkuale mi ɔ, suɔmi nɛ jamɛatsɛ ɔ ngɛ kɛ ha Mawu ɔ pi si.+ Kɛ gu enɛ ɔ nɔ ɔ, wa leɔ kaa waa kɛ lɛ pee kake.+ 6 Nɔ nɛ e deɔ ke kake peemi ngɛ e kɛ lɛ a kpɛti ɔ, e ji e blɔ nya ní tsumi kaa e maa ya nɔ maa nyɛɛ kaa bɔ nɛ jamɛ a nɔ ɔ nyɛɛ ɔ.+

7 Nihi nɛ i suɔ, níhi nɛ i ngɛ ngmae ha nyɛ nɛ ɔ, pi mlaa ehe ko, mohu ɔ, mlaa momo ɔ nɛ nyɛ nine su nɔ kɛ je sisije ɔ.+ Mlaa momo nɛ ɔ ji munyu ɔ nɛ nyɛ nu ɔ nɛ. 8 Jehanɛ hu ɔ, i ngɛ mlaa ehe ko ngmae kɛ ba ha nyɛ, nɛ ngɛ e blɔ fa mi kɛ nyɛ hu nyɛ blɔ fa mi ɔ, e ji anɔkuale, ejakaa diblii ɔ ngɛ bee kɛ yaa, nɛ anɔkuale la a ngɛ kpɛe momo.+

9 Nɔ nɛ e deɔ ke e ngɛ la a mi, se kɛ̃ ɔ, e nyɛɔ+ e nyɛmi ɔ, e ngɛ diblii ɔ mi loloolo.+ 10 Nɔ nɛ e suɔ e nyɛmi ɔ, e hiɔ la a mi,+ nɛ nane tɔ̃tɔ̃mi nɔ́ ko be e mi. 11 Se nɔ nɛ e nyɛɔ e nyɛmi ɔ, e ngɛ diblii ɔ mi, nɛ e ngɛ nyɛɛe ngɛ diblii ɔ mi,+ nɛ e li he nɛ e yaa,+ ejakaa diblii ɔ yu e hɛngmɛ.

12 Bimɛ tsɔwi, i ngɛ nyɛ womi nɛ ɔ ngmae, ejakaa e biɛ ɔ he ɔ, a ngɔ nyɛ he yayami ɔmɛ kɛ ke nyɛ.+ 13 Tsɛmɛ, i ngɛ nyɛ womi nɛ ɔ ngmae, ejakaa nyɛ ba le nɔ nɛ e ngɛ kɛ je sisije ɔ. Nihewi, i ngɛ nyɛ womi nɛ ɔ ngmae, ejakaa nyɛ ye nɔ yayami ɔ nɔ kunimi.+ Bimɛ tsɔwi, i ngɛ nyɛ womi nɛ ɔ ngmae, ejakaa nyɛ ba le Tsɛ ɔ.+ 14 Tsɛmɛ, i ngɛ nyɛ womi nɛ ɔ ngmae, ejakaa nyɛ ba le nɔ nɛ e ngɛ kɛ je sisije ɔ. Nihewi, i ngɛ nyɛ womi nɛ ɔ ngmae, ejakaa nyɛ he wa,+ nɛ Mawu munyu ɔ ngɛ nyɛ mi,+ nɛ nyɛ ye nɔ yayami ɔ nɔ kunimi.+

15 Nyɛ ko suɔ je ɔ aloo níhi nɛ ngɛ je ɔ mi ɔ.+ Ke nɔ ko suɔ je ɔ, Tsɛ ɔ suɔmi ɔ be e mi;+ 16 ejakaa nɔ́ fɛɛ nɔ́ nɛ ngɛ je ɔ mi ɔ, nɛ ji níhi nɛ peeɔ he lo ɔ akɔnɔ+ kɛ níhi nɛ peeɔ hɛngmɛ ɔ akɔnɔ+ kɛ níhi nɛ nɔ ko ngɛ nɛ e kɛ fĩaa a, pi Tsɛ ɔ ngɔ nɛ e je, mohu ɔ, je ɔ mi e je. 17 Jehanɛ se hu ɔ, je ɔ ngɛ bee kɛ yaa, nɛ jã kɛ̃ lɛ e mi níhi nɛ peeɔ nɔ akɔnɔ ɔ hu ngɛ bee kɛ yaa,+ se nɔ nɛ e peeɔ Mawu suɔmi nya ní ɔ maa hi si kɛ maa ya neneene.+

18 Bimɛ tsɔwi, nyagbe ngmlɛfia a ji nɛ ɔ nɛ, nɛ kaa bɔ nɛ nyɛ nu ɔ, Kristo he nyɛlɔ* ɔ ma,+ amlɔ nɛ ɔ po ɔ, Kristo he nyɛli babauu je a he kpo,+ nɛ anɔkuale nɛ ɔ ha nɛ wa le kaa nyagbe ngmlɛfia a ji nɛ ɔ nɛ. 19 A je wa kpɛti kɛ ho, se a piɛɛ we wa he;*+ ejakaa kaa a piɛɛ wa he ɔ, jinɛ a kɛ wɔ ko hi si. Se a je kpo konɛ e pee heii kaa pi nɔ fɛɛ nɔ nɛ e piɛɛ wa he.+ 20 Nyɛɛ lɛɛ nɔ klɔuklɔu ɔ pɔ nyɛ nu,+ nɛ nyɛ tsuo nyɛ le. 21 Pi kaa nyɛ li anɔkuale ɔ+ he je nɛ i ngɛ nyɛ womi nɛ ɔ ngmae ɔ, mohu ɔ, akɛnɛ nyɛ le, nɛ́ lakpa ko ji anɔkuale ɔ mi ɔ he je.+

22 Anɛ pi nɔ nɛ e kplɛɛ we nɔ kaa Yesu ji Kristo ɔ ji lakpatsɛ ɔ lo?+ Kristo he nyɛlɔ* ɔ+ ji nɔ nɛ e kuaa Tsɛ ɔ kɛ Bi ɔ nɛ. 23 Nɔ fɛɛ nɔ nɛ e kuaa Bi ɔ, e be Tsɛ ɔ.+ Se nɔ fɛɛ nɔ nɛ e heɔ Bi ɔ atuu ɔ,+ e ngɛ Tsɛ ɔ hulɔ.+ 24 Nyɛɛ lɛɛ, e sa nɛ níhi nɛ nyɛ nu kɛ je sisije ɔ nɛ hi nyɛ mi.+ Ke níhi nɛ nyɛ nu kɛ je sisije ɔ ngɛ nyɛ mi ɔ, nyɛɛ kɛ Bi ɔ maa pee kake, nɛ nyɛɛ kɛ Tsɛ ɔ hu maa pee kake. 25 Jehanɛ se hu ɔ, nɔ́ nɛ lɛ nitsɛ e wo wɔ he si ɔ ji, neneene wami.+

26 Nihi nɛ a ngɛ mɔde bɔe kaa a maa sisi nyɛ ɔ a he je lɛ i ngɛ nyɛ ní nɛ ɔmɛ ngmae ɔ nɛ. 27 Nɛ nyɛɛ lɛɛ, nu nɛ e pɔ nyɛ ɔ+ ngɛ nyɛ mi, nɛ nyɛ hia we nɔ ko nɛ e hi nyɛ ní tsɔɔe; mohu ɔ, nu nɛ e pɔ nyɛ ɔ ngɛ nyɛ níhi tsuo tsɔɔe,+ nɛ e ji anɔkuale, tsa pi lakpa. Kaa bɔ nɛ e* tsɔɔ nyɛ ɔ, nyɛɛ kɛ lɛ* nɛ pee kake.+ 28 Enɛ ɔ he ɔ, bimɛ tsɔwi, nyɛɛ ya nɔ nɛ nyɛɛ kɛ lɛ nɛ pee kake konɛ ke a je lɛ kpo ɔ, wa nyɛ nɛ waa tu munyu faa,+ nɛ ke e ba a, waa kɛ zo nɛ ko yu wa he ngɛ e he. 29 Ke nyɛ le kaa dalɔ ji lɛ ɔ, nyɛ ná nɛ nyɛɛ le hu kaa nɔ fɛɛ nɔ nɛ e peeɔ nɔ́ nɛ da a, lɛ nɛ e fɔ lɛ.+

3 Nyɛɛ hyɛ suɔmi sɔuu nɛ Tsɛ ɔ ngɛ kɛ ha wɔ,+ kaa a ma tsɛ wɔ ke Mawu bimɛ!+ Nɛ jã nɛ wa ji. Enɛ ɔ he je nɛ je ɔ li wɔ ɔ nɛ,+ ejakaa je ɔ li lɛ.+ 2 Nihi nɛ i suɔ, amlɔ nɛ ɔ, wa ji Mawu bimɛ,+ se bɔ nɛ wa maa hi ha a lɛɛ, a je we kpo ngɔ tsɔɔ we wɔ lolo.+ Wa le kaa ke a je lɛ kpo ɔ, wa maa pee kaa lɛ, ejakaa wa maa na lɛ kaa bɔ nɛ e ngɛ ɔ pɛpɛɛpɛ. 3 Nɛ nɔ fɛɛ nɔ nɛ e ngɛ hɛ kɛ nɔ fɔmi nɛ ɔ ngɛ e mi ɔ, e peeɔ e he klɔuklɔu+ kaa bɔ nɛ jamɛ a nɔ ɔ hu ngɛ klɔuklɔu ɔ.

4 Nɔ fɛɛ nɔ nɛ e peeɔ yayami ɔ, e tɔ̃ mlaa nɔ hulɔ, ejakaa yayami ji mlaa nɔ tɔmi. 5 Nyɛ le hu kaa a je lɛ kpo konɛ e ba ngɔ wa he yayami ɔmɛ kɛ ho,+ nɛ yayami ko be e mi. 6 Nɔ fɛɛ nɔ nɛ e yaa nɔ nɛ e kɛ lɛ peeɔ kake ɔ, jamɛatsɛ ɔ pee we yayami;+ nɔ nɛ e peeɔ yayami ɔ nɛ lɛ, nɛ e li lɛ hulɔ. 7 Bimɛ tsɔwi, nyɛ ko ha nɛ nɔ ko nɛ e sisi nyɛ; nɔ nɛ e peeɔ nɔ́ nɛ da a ji dalɔ, kaa bɔ nɛ Yesu hu ji dalɔ ɔ. 8 Nɔ nɛ e peeɔ yayami ɔ je Abosiami mi, ejakaa kɛ je sisije tɔɔ nɛ Abosiami* bɔni yayami peemi.+ Enɛ ɔ he je nɛ a je Mawu Bi ɔ kpo ɔ nɛ, konɛ e ba puɛ Abosiami ní tsumi ɔmɛ.*+

9 Nɔ fɛɛ nɔ nɛ a fɔ lɛ kɛ je Mawu mi ɔ, e pee we yayami,+ ejakaa Mawu ngmɛdu* ngɛ jamɛ a nɔ ɔ mi, nɛ e be nyɛe maa hi yayami pee, ejakaa a fɔ lɛ kɛ je Mawu mi.+ 10 Anɔkuale nɛ ɔ lɛ haa nɛ wa leɔ Mawu bimɛ kɛ Abosiami bimɛ a mi tso: Nɔ fɛɛ nɔ nɛ e pee we nɔ́ nɛ da a, pi Mawu mi nɛ e je, nɛ jã nɔuu kɛ̃ lɛ e ji ngɛ nɔ nɛ e sume e nyɛmi ɔ hu blɔ fa mi.+ 11 Ejakaa enɛ ɔ ji sɛ gbi nɛ nyɛ nu kɛ je sisije ɔ nɛ, kaa e sa nɛ waa suɔ wa sibi;+ 12 e sɛ nɛ waa pee kaa Kain, nɔ nɛ e je nɔ yayami ɔ mi, nɛ́ e gbe e nyɛmi ɔ.+ Mɛni he je nɛ e gbe lɛ ɔ? E gbe lɛ ejakaa níhi nɛ e tsu ɔ ji ní yayahi,+ se e nyɛmi ɔ ní ɔmɛ lɛɛ a da.+

13 Nyɛmimɛ, e ko pee nyɛ nyakpɛ kaa je ɔ ngɛ nyɛ nyɛe.+ 14 Wa le kaa wa je gbenɔ mi kɛ ba wami mi,+ ejakaa wa suɔ nyɛmimɛ ɔmɛ.+ Nɔ nɛ e sume nɔmlɔ ɔ, e maa ya nɔ maa hi gbenɔ mi.+ 15 Nɔ fɛɛ nɔ nɛ e nyɛɔ e nyɛmi ɔ, e ji nɔmlɔ gbelɔ,+ nɛ nyɛ le kaa nɔmlɔ gbelɔ ko be neneene wami náe.+ 16 Kɛ gu enɛ ɔ nɔ ɔ, wa ba le nɔ́ nɛ suɔmi ji, ejakaa jamɛ a nɔ ɔ ngɔ e wami* kɛ fɔ si ngɛ wa he,+ nɛ e ji wɔ hu wa blɔ nya ní tsumi kaa wa maa ngɔ wa wami* kɛ fɔ si ngɛ wa nyɛmimɛ a he.+ 17 Se nɔ fɛɛ nɔ nɛ e ngɛ he lo nya níhi ngɛ je nɛ ɔ mi, nɛ e naa e nyɛmi nɛ e fĩ lɛ, se kɛ̃ ɔ, e mi mi sɛ̃ lɛ ngɛ e he ɔ, mɛni tsɔɔ kaa Mawu suɔmi ɔ ngɛ e mi?+ 18 Bimɛ tsɔwi, nyɛ ko ha nɛ waa suɔ nɔmlɔ ngɛ munyu tutui mi aloo ngɛ lilɛ nɔ,+ mohu ɔ, ngɛ ní peepee+ kɛ anɔkuale mi.+

19 Kɛ gu enɛ ɔ nɔ ɔ, wa maa le kaa anɔkuale ɔ mi lɛ wa je, nɛ wa tsui maa nɔ wa mi* ngɛ e hɛ mi. 20 Nɛ ke wa tsui maa bu wɔ fɔ po ɔ, Mawu kle pe wa tsui ɔ, nɛ e le níhi tsuo.+ 21 Nihi nɛ i suɔ, ke wa tsui ɔ bui wɔ fɔ ɔ, wa nyɛɔ nɛ waa kɛ Mawu tuɔ munyu faa;+ 22 nɛ nɔ́ fɛɛ nɔ́ nɛ wa biɔ lɛ ɔ, wa nine suɔ nɔ kɛ jeɔ e ngɔ,+ ejakaa wa yeɔ e mlaa amɛ a nɔ, nɛ wa peeɔ níhi nɛ saa e hɛ mi. 23 Niinɛ, e mlaa a ji nɛ ɔ nɛ: kaa wa ná hemi kɛ yemi ngɛ e Bi Yesu Kristo biɛ ɔ mi,+ konɛ waa suɔ wa sibi+ kaa bɔ nɛ e wo wɔ mlaa a. 24 Jehanɛ se hu ɔ, nɔ nɛ e yeɔ e mlaa amɛ a nɔ ɔ yaa nɔ nɛ e kɛ lɛ peeɔ kake, nɛ lɛ hu e kɛ jamɛ a nɔ ɔ peeɔ kake.+ Nɛ kɛ gu mumi ɔ nɛ e ha wɔ ɔ nɔ ɔ, wa le kaa e kɛ wɔ peeɔ kake.+

4 Nihi nɛ i suɔ, nyɛ ko he munyu fɛɛ munyu nɛ je mumi mi* ɔ nɛ nyɛɛ ye,+ mohu ɔ, nyɛɛ ka munyuhi nɛ je mumi mi ɔ* nɛ nyɛɛ hyɛ kaa a je Mawu ngɔ lo,+ ejakaa lakpa gbali fuu ba je ɔ mi.+

2 Enɛ ɔ lɛ ma ha nɛ nyɛ maa le kaa munyu nɛ je mumi mi ɔ je Mawu ngɔ: Munyu fɛɛ munyu nɛ je mumi mi nɛ tsɔɔ kaa Yesu Kristo ba ngɛ he lo mi ɔ je Mawu ngɔ.+ 3 Se munyu fɛɛ munyu nɛ je mumi mi nɛ tsɔɔ we jã ngɛ Yesu he ɔ, pi Mawu ngɔ nɛ e je.+ Jehanɛ se hu ɔ, enɛ ɔ ji munyu nɛ je mumi mi, nɛ e je Kristo he nyɛlɔ* ɔ nɛ nyɛ nu kaa e ma a+ ngɔ ɔ nɛ, nɛ amlɔ nɛ ɔ, e ngɛ je ɔ mi momo.+

4 Bimɛ tsɔwi, nyɛ je Mawu mi, nɛ nyɛ ye a nɔ kunimi,+ ejakaa nɔ nɛ e kɛ nyɛ pee kake ɔ+ kle pe nɔ nɛ e kɛ je ɔ pee kake ɔ.+ 5 Mɛɛ lɛɛ je ɔ mi lɛ a je;+ enɛ ɔ he je nɛ a tuɔ je ɔ mi níhi a he munyu nɛ je ɔ buɔ mɛ tue ɔ nɛ.+ 6 Wɔɔ lɛɛ wa je Mawu mi. Nɔ fɛɛ nɔ nɛ e ba le Mawu ɔ buɔ wɔ tue;+ nɔ fɛɛ nɔ nɛ pi Mawu mi nɛ e je ɔ bui wɔ tue.+ Enɛ ɔ lɛ waa kɛ naa slɔɔto nɛ ngɛ anɔkuale munyu nɛ je mumi mi kɛ lakpa munyu nɛ je mumi mi ɔ a kpɛti ɔ nɛ.+

7 Nihi nɛ i suɔ, nyɛ ha nɛ waa ya nɔ nɛ waa suɔ wa sibi,+ ejakaa suɔmi je Mawu ngɔ, nɛ nɔ fɛɛ nɔ nɛ e suɔ nɔmlɔ ɔ, a fɔ lɛ kɛ je Mawu mi, nɛ e le Mawu.+ 8 Nɔ fɛɛ nɔ nɛ e sume nɔmlɔ ɔ, e li Mawu, ejakaa Mawu ji suɔmi.+ 9 Blɔ nɔ nɛ Mawu gu kɛ je e suɔmi ɔ kpo kɛ tsɔɔ wɔ ji nɛ ɔ nɛ. Lɔ ɔ ji kaa e tsɔ e Bi kake too ɔ+ kɛ ba je ɔ mi konɛ kɛ gu e nɔ ɔ, wa ná wami.+ 10 Kikɛ nɛ ɔ ji bɔ nɛ suɔmi ɔ ngɛ, pi wɔ nɛ wa suɔ Mawu, mohu ɔ, lɛ nɛ e suɔ wɔ nɛ e tsɔ e Bi ɔ kɛ ba kaa kpatami afɔle*+ kɛ ha wa he yayami ɔmɛ.+

11 Nihi nɛ i suɔ, ke kikɛ nɛ ɔ ji bɔ nɛ Mawu suɔ wɔ ɔ, lɛɛ e ji wɔ hu wa blɔ nya ní tsumi kaa waa suɔ wa sibi.+ 12 Nɔ ko nɔ ko nɛ Mawu hyɛ.+ Ke wa ya nɔ nɛ wa suɔ wa sibi ɔ, Mawu maa ya nɔ nɛ e kɛ wɔ maa hi si, nɛ e suɔmi ɔ maa pi si ngɛ wa mi.+ 13 Kɛ gu enɛ ɔ nɔ ɔ, wa leɔ kaa kake peemi ngɛ waa kɛ lɛ wa kpɛti, nɛ lɛ hu e kɛ wɔ peeɔ kake, ejakaa e ha wɔ e mumi ɔ. 14 Jehanɛ se hu ɔ, wɔ nitsɛmɛ wa na, nɛ wa ngɛ odase yee kaa Tsɛ ɔ tsɔ e Bi ɔ kɛ ba kaa je ɔ yi wami helɔ.+ 15 Nɔ fɛɛ nɔ nɛ e jajeɔ kaa Yesu ji Mawu Bi ɔ,+ Mawu yaa nɔ nɛ e kɛ jamɛatsɛ ɔ peeɔ kake, nɛ jamɛatsɛ ɔ hu kɛ Mawu peeɔ kake.+ 16 Nɛ wa ba le suɔmi nɛ Mawu ngɛ kɛ ha wɔ ɔ, nɛ wa he ye.+

Mawu ji suɔmi,+ nɛ nɔ fɛɛ nɔ nɛ e yaa nɔ nɛ e jeɔ suɔmi kpo ɔ, e kɛ Mawu peeɔ kake, nɛ Mawu hu kɛ lɛ peeɔ kake.+ 17 Kɛ gu blɔ nɛ ɔ nɔ ɔ, a ha nɛ suɔmi ɔ pi si ngɛ wa mi konɛ wa nyɛ nɛ waa tu munyu faa+ ngɛ kojomi ligbi ɔ nɔ, ejakaa kaa bɔ nɛ Yesu Kristo ɔ ngɛ ɔ, jã kɛ̃ nɛ wɔ nitsɛmɛ hu wa ngɛ ngɛ je nɛ ɔ mi. 18 Ke suɔmi ngɛ ɔ, gbeye yemi be,+ mohu ɔ, suɔmi nɛ pi si fieɔ gbeye yemi kɛ yaa se, ejakaa gbeye yemi tsiɔ wa nya. Ngɛ anɔkuale mi ɔ, nɔ nɛ e yeɔ gbeye ɔ, e pí si ngɛ suɔmi mi.+ 19 Wa jeɔ suɔmi kpo, ejakaa lɛ nɛ e suɔ wɔ kekle.+

20 Ke nɔ ko de ke: “I suɔ Mawu,” se kɛ̃ ɔ, e nyɛɔ e nyɛmi ɔ, lakpatsɛ ji lɛ.+ Ejakaa nɔ nɛ e sume e nyɛmi+ nɛ e naa lɛ ɔ, e be nyɛe maa suɔ Mawu, nɔ nɛ e nɛ lɛ ɔ.+ 21 Nɛ mlaa nɛ e wo wɔ ji kaa nɔ fɛɛ nɔ nɛ e suɔ Mawu ɔ, e sa nɛ e suɔ e nyɛmi hulɔ.+

5 Nɔ fɛɛ nɔ nɛ e heɔ yeɔ kaa Yesu ji Kristo ɔ, Mawu bi ji lɛ,+ nɛ nɔ fɛɛ nɔ nɛ e suɔ Mawu ɔ, e suɔ Mawu bimɛ ɔmɛ hulɔ. 2 Ke wa suɔ Mawu nɛ wa yeɔ e mlaa amɛ a nɔ ɔ, lɔ ɔ haa nɛ wa leɔ kaa wa suɔ Mawu bimɛ ɔmɛ.+ 3 Ejakaa enɛ ɔ ji suɔmi nɛ wa suɔ Mawu ɔ nɛ, kaa wa maa ye e mlaa amɛ a nɔ;+ nɛ e mlaa amɛ ɔ, a pi tlomi,+ 4 ejakaa nɔ fɛɛ nɔ* nɛ a fɔ lɛ kɛ je Mawu mi ɔ yeɔ je ɔ nɔ kunimi.+ Nɛ nɔ́ nɛ waa kɛ ye je ɔ nɔ kunimi ɔ ji wa hemi kɛ yemi ɔ nɛ.+

5 Mɛnɔ ma nyɛ maa ye je ɔ nɔ kunimi?+ Anɛ pi nɔ nɛ e ngɛ hemi kɛ yemi kaa Yesu ji Mawu Bi ɔ lo?+ 6 Yesu Kristo ji nɔ nɛ e gu nyu kɛ muɔ mi kɛ ba a nɛ. Pi nyu ɔ mi pɛ nɛ e gu kɛ ba,+ se mohu ɔ, e gu nyu ɔ kɛ muɔ ɔ mi.+ Nɛ mumi ɔ ngɛ odase yee,+ ejakaa mumi ɔ ji anɔkuale ɔ nɛ. 7 Ejakaa odase yeli etɛ lɛ a ngɛ: 8 mumi ɔ+ kɛ nyu ɔ+ kɛ muɔ ɔ;+ nɛ ní etɛ ɔmɛ kɛ a he kpaa gbi.

9 Ke wa kplɛɛɔ odase nɛ adesa yeɔ ɔ nɔ ɔ, lɛɛ odase nɛ Mawu yeɔ ɔ kle pe lɔ ɔ. Ejakaa odase nɛ Mawu yeɔ ɔ ji odase nɛ e ye ngɛ e Bi ɔ he ɔ nɛ. 10 Nɔ nɛ e náa hemi kɛ yemi ngɛ Mawu Bi ɔ mi ɔ ngɛ odase ngɛ lɛ nitsɛ e mi. Nɔ nɛ e be hemi kɛ yemi ngɛ Mawu mi ɔ ha nɛ Mawu pee lakpatsɛ,+ ejakaa e ná we hemi kɛ yemi ngɛ odase nɛ Mawu ye ngɛ e Bi ɔ he ɔ mi. 11 Odase ɔ ji nɛ ɔ nɛ: Mawu ha wɔ neneene wami,+ nɛ wami nɛ ɔ ngɛ e Bi ɔ mi.+ 12 Nɔ nɛ e ngɛ Bi ɔ ngɛ wami nɛ ɔ. Nɔ nɛ e be Mawu Bi ɔ be wami nɛ ɔ.+

13 Nyɛ nihi nɛ nyɛ ná hemi kɛ yemi ngɛ Mawu Bi ɔ mi ɔ,+ i ngɛ nyɛ ní nɛ ɔmɛ ngmae konɛ nyɛɛ le kaa nyɛ ngɛ neneene wami.+ 14 Nɛ enɛ ɔ ji nɔ mi mami nɛ wa ngɛ* ngɛ e mi ɔ nɛ,+ kaa ke wa bi lɛ nɔ́ ko nɛ e kɛ e suɔmi nya ní kɔ ɔ, e buɔ wɔ tue.+ 15 Nɛ ke wa le kaa nɔ́ fɛɛ nɔ́ nɛ wa biɔ lɛ ɔ, e buɔ wɔ tue ɔ, lɛɛ wa le kaa níhi nɛ wa bi lɛ ɔ, wa nine maa su nɔ, akɛnɛ wa bi lɛ ɔ he je.+

16 Ke nɔ ko hɛngmɛ gba e nyɛmi nɔ nɛ e ngɛ yayami ko nɛ gbi nɔ pee ɔ, e ma kpa pɛɛ, nɛ Mawu ma ha lɛ wami,+ ee, e kɛ ma ha nihi nɛ a peeɔ yayami nɛ e gbi nɔ ɔ. Yayami ko ngɛ nɛ e gbeɔ nɔ.+ Pi jamɛ a yayami ɔ nɛ i ngɛ dee ke e kpa he pɛɛ ɔ. 17 Níhi tsuo nɛ dɛ ɔ ji yayami,+ se kɛ̃ ɔ, yayami ko ngɛ nɛ e gbi nɔ.

18 Wa le kaa nɔ fɛɛ nɔ nɛ a fɔ lɛ kɛ je Mawu mi ɔ yɛ nɔ nɛ e peeɔ yayami, mohu ɔ, nɔ nɛ a fɔ lɛ kɛ je Mawu mi* ɔ hyɛɔ e nɔ, enɛ ɔ he ɔ, nɔ yayami ɔ nine be nyɛe maa su e nɔ.*+ 19 Wa le kaa wa je Mawu mi, se je ɔ tsuo lɛɛ, nɔ yayami ɔ lɛ ngɛ lɛ kudɔe.+ 20 Se wa le kaa Mawu Bi ɔ ba,+ nɛ e ha wɔ nɔ́ se kɔmi* konɛ waa ná anɔkualetsɛ ɔ he nile. Nɛ waa kɛ nɔ nɛ e ji anɔkualetsɛ ɔ pee kake+ kɛ gu e Bi Yesu Kristo nɔ. Nɔ nɛ ɔ ji anɔkuale Mawu ɔ kɛ wami nɛ ngɛ kɛ yaa neneene ɔ nɛ.+ 21 Bimɛ tsɔwi, nyɛɛ hyɛ nyɛ he saminya ngɛ wɔhi a he.+