KƐ YA HA FILEMON
1 Imi Paulo, nɔ nɛ a wo lɛ tsu+ ngɛ Kristo Yesu he je, nɛ́ wa nyɛminyumu Timoteo+ piɛɛ ye he ɔ, i ngɛ sɛ womi nɛ ɔ ngmae kɛ ya ha Filemon, wa nyɛmi nɛ waa kɛ lɛ tsuɔ ní nɛ wa suɔ lɛ ɔ, 2 kɛ wa nyɛmiyo Apia, kɛ wa nyɛmi tabulɔ Arkipo,+ kɛ asafo ɔ nɛ ngɛ o we ɔ mi ɔ:+
3 Nyɛ nine nɛ su dloomi kɛ tue mi jɔmi nɛ je Mawu nɛ ji wa Tsɛ ɔ kɛ wa Nyɔmtsɛ Yesu Kristo ngɔ ɔ nɔ.
4 Be fɛɛ be nɛ ma wo o ta ngɛ ye sɔlemihi a mi ɔ, i naa ye Mawu ɔ si,+ 5 akɛnɛ i nuɔ o hemi kɛ yemi kɛ suɔmi nɛ o ngɛ kɛ ha Nyɔmtsɛ Yesu kɛ ni klɔuklɔu ɔmɛ tsuo he ɔ he je. 6 I sɔleɔ kaa hemi kɛ yemi nɛ o ná kaa bɔ nɛ wɔ hu wa ná a nɛ wo mo he wami nɛ́ o yɔse ní kpakpahi tsuo nɛ wa ná kɛ gu Kristo nɔ ɔ. 7 Ejakaa, ye nyɛmi, benɛ i nu o suɔmi ɔ he ɔ, i ná bua jɔmi kɛ bua womi wawɛɛ, ejakaa kɛ gu o nɔ ɔ, ni klɔuklɔu ɔmɛ a tsui he jɔ mɛ.*
8 Enɛ ɔ he je ɔ, e ngɛ mi kaa i nyɛɔ nɛ i tuɔ munyu faa nitsɛ ngɛ Kristo blɔ fa mi nɛ ma nyɛ ma fã mo kaa o pee nɔ́ nɛ sa mohu lɛɛ, 9 se ma je suɔmi mi kɛ kpa mo pɛɛ, moo hyɛ imi Paulo, nyumu nɔkɔtɔma nɛ ɔ, ee, nɛ́ amlɔ nɛ ɔ hu a wo mi tsu ngɛ Kristo Yesu he ɔ. 10 I ngɛ mo pɛɛ kpae ngɛ ye bi Onesimo+ he je, nɔ nɛ i ba plɛ e tsɛ+ be mi nɛ i ngɛ tsu womi mi ɔ.* 11 Be ko nɛ be ɔ, jinɛ se nami be e he kɛ ha mo, se amlɔ nɛ ɔ, se nami ngɛ e he kɛ ha imi kɛ mo tsuo. 12 I ngɛ lɛ blɔ woe kɛ ma o ngɔ ekohu, ee lɛ, imi nitsɛ ye tsui ɔ.*
13 I ko suɔ kaa e kɛ mi nɛ hi hiɛ ɔ konɛ e da o nane mi nɛ e sɔmɔ mi be mi nɛ a wo mi tsu ngɛ sane kpakpa a he ɔ.+ 14 Se i sume nɛ ma pee nɔ́ ko nɛ o kplɛɛ we nɔ, bɔ nɛ pee nɛ nɔ́ kpakpa nɛ o maa pee ɔ, o ko pee ngɛ nɔ nyɛmi nya, se mohu ngɛ mo nitsɛ o suɔmi nya.+ 15 Eko ɔ, enɛ ɔ tutuutu he je nɛ e je o he be bɔɔ* ko ɔ nɛ, konɛ o nine nɛ su e nɔ ekohu kɛ ya neneene, 16 pi kaa nyɔguɛ hu,+ se mohu kaa nɔ nɛ e pe nyɔguɛ, kaa nyɛmi nɛ a suɔ lɛ,+ titli ɔ, kɛ ha imi, se e pe jã po kɛ ha mo ngɛ he lo mi kɛ Nyɔmtsɛ ɔ mi tsuo. 17 Enɛ ɔ he ɔ, ke o buɔ mi kaa huɛ ɔ,* lɛɛ mo he lɛ atuu kaa bɔ nɛ o ma he mi ɔ nɔuu. 18 Jehanɛ se hu ɔ, ke e pee mo yayami ko aloo e ye mo hiɔ ko ɔ, buu jamɛ a hiɔ ɔ kɛ ha mi. 19 Imi Paulo nitsɛ lɛ i ngɛ sɛ womi nɛ ɔ ngmae, nɛ i ngɛ mo si woe kaa ma wo mo hiɔhi tsuo nɛ Onesimo ye mo ɔ. Nɛ mo nitsɛ po o le kaa o hɛɛ mi hiɔ fuu.* 20 Ee, ye nyɛmi, moo pee enɛ ɔ kɛ ye bua mi ngɛ Nyɔmtsɛ ɔ blɔ fa mi; ha nɛ ye tsui nɛ nɔ ye mi ngɛ Kristo blɔ fa mi.
21 I ngɛ nɔ mi mami kaa o maa pee jã, lɔ ɔ he ɔ, i ngɛ mo ngmae, ejakaa i le kaa o maa pee pe nɔ́ nɛ i de ɔ po. 22 Se kɛ piɛɛ lɔ ɔ he ɔ, mo dla he ko kɛ ha mi nɛ ma ba hi, ejakaa i ngɛ blɔ hyɛe kaa kɛ gu nyɛ sɔlemihi a nɔ ɔ, a maa kpale ngɔ mi* kɛ ha nyɛ ekohu.+
23 Epafra,+ ye nyɛmi nɛ a wo i kɛ lɛ tsu ngɛ Kristo Yesu mi ɔ ke e biɔ mo, 24 jehanɛ ɔ, Marko, Aristarko,+ Dema,+ kɛ Luka,+ nɛ́ a ji ye nyɛmimɛ nɛ i kɛ mɛ tsuɔ ní ɔ hu ke a biɔ mo.
25 Nyɔmtsɛ Yesu Kristo dloomi ɔ kɛ nyɛ nɛ hi si, ejakaa nyɛ ngɛ tsui kpakpa.
Aloo “tsui nɔ a mi.”
Ngɛ Hela gbi mi ɔ, “be mi nɛ a bɔ mi pã a.”
Aloo “nɔ nɛ i suɔ e sane ɔ.”
Ngɛ Hela gbi mi ɔ, “ngmlɛfia kake.”
Ngɛ Hela gbi mi ɔ, “nɔ nɛ o kɛ lɛ dlaa ní ɔ.”
Aloo “o wami he hiɔ.”
Aloo “a maa ngmɛɛ ye he.”