KEKLEEKLE WOMI KƐ YA HA TESALONIKABI ƆMƐ

1 Imi Paulo, Silvano*+ kɛ Timoteo,+ waa kɛ sɛ womi nɛ ɔ ngɛ asafo ɔ nɛ ngɛ Tesalonika nɛ e kɛ Mawu nɛ ji Tsɛ ɔ kɛ Nyɔmtsɛ Yesu Kristo pee kake ɔ hae:

Nyɛ nine nɛ su dloomi kɛ tue mi jɔmi nɔ.

2 Be fɛɛ be nɛ wa maa sɔle ɔ, wa naa Mawu si nɛ wa woɔ nyɛ tsuo nyɛ ta,+ 3 ejakaa wa kaiɔ ní nɛ nyɛɛ kɛ anɔkuale yemi tsu ɔ, suɔmi mi nɛ nyɛ je kɛ tsu ní, kɛ si nɛ nyɛ fĩ ngɛ hɛ kɛ nɔ fɔmi+ nɛ nyɛ ngɛ ngɛ wa Nyɔmtsɛ Yesu Kristo mi, ngɛ wa Mawu nɛ ji Tsɛ ɔ hɛ mi ɔ. 4 Nyɛmimɛ nɛ Mawu suɔ nyɛ, wa le hlami nɛ e hla nyɛ ɔ, 5 ejakaa sane kpakpa a nɛ wa fiɛɛɔ ɔ, pi wa nya pɛ nɛ waa kɛ fiɛɛ kɛ tsɔɔ nyɛ, se mohu he wami kɛ mumi klɔuklɔu ɔ kɛ nɔ mi mami nɛ mi wa hu piɛɛ he. Nyɛ le bɔ nɛ wa pee wa ní ha ngɛ nyɛ he je. 6 Nɛ nyɛ ba pee nihi nɛ a kaseɔ waa kɛ Nyɔmtsɛ ɔ,+ ejakaa wa na kaa nyɛɛ kɛ bua jɔmi nɛ mumi klɔuklɔu ɔ ha nɛ nyɛ ná a kplɛɛ munyu ɔ nɔ ngɛ amanehlu babauu mi,+ 7 nɛ enɛ ɔ ha nɛ nyɛ ba pee nɔ hyɛmi nɔ́ kɛ ha nihi tsuo nɛ a he ye ngɛ Makedonia kɛ Akaya a.

8 Anɔkuale sane ji kaa, nyɛ he je ɔ, nihi nɛ a ngɛ Makedonia kɛ Akaya a tsuo nu Yehowa* munyu ɔ, nɛ nyɛ hemi kɛ yemi ngɛ Mawu mi ɔ gbɛ fia he fɛɛ he,+ nɛ enɛ ɔ he ɔ, e he hia we nɛ wa de nɔ́ ko. 9 Ejakaa mɛ nitsɛmɛ a yaa nɔ nɛ a sɛɛɔ bɔ nɛ wa na nyɛ kekleekle ɔ, kɛ bɔ nɛ nyɛ kpale kɛ je nyɛ wɔ ɔmɛ a se kɛ ba Mawu ngɔ+ konɛ nyɛ ba ye nyɔguɛ kɛ ha anɔkuale Mawu nɛ e hɛ ngɛ ɔ, 10 nɛ́ nyɛɛ mlɛ e Bi ɔ nɛ e je hiɔwe ɔ,+ nɔ nɛ e tle lɛ si kɛ je gbogboehi a kpɛti nɛ ji Yesu, nɔ nɛ e kpɔ̃ wɔ kɛ je mi mi fumi nɛ ma a mi ɔ.+

2 Nyɛmimɛ, nyɛ nitsɛmɛ nyɛ le kaa slaami nɛ wa ba slaa nyɛ ɔ pee we yaka.+ 2 Ejakaa kaa bɔ nɛ nyɛ le ɔ, e ngɛ mi kaa wa na nɔ́, nɛ a pee wɔ níhi nɛ sɛ ngɛ Filipi+ mohu lɛɛ, se wa pee kã kɛ gu wa Mawu ɔ nɔ, nɛ wa de nyɛ Mawu he sane kpakpa a+ ngɛ si nɛ a te kɛ wo wɔ wawɛɛ ɔ tsuo se.* 3 Ejakaa he wami womi nɛ waa kɛ haa a, pi tɔmi mi, aloo mu ní tsumi mi, aloo sisimi mi nɛ e je, 4 mohu ɔ, kaa bɔ nɛ Mawu bua jɔ wa he nɛ e tu sane kpakpa a kɛ wo wa dɛ ɔ, jã lɛ wa tuɔ munyu konɛ wa kɛ sa Mawu, nɔ nɛ e hyɛɔ wa tsui mi ɔ+ hɛ mi, se pi adesahi.

5 Ngɛ anɔkuale mi ɔ, nyɛ le kaa wa tui munyu ngɔngɔɛ ko hyɛ kɛ gbe nyɛ yi mi, nɛ jã kɛ̃ lɛ waa kɛ hɛkɔ juɛmi pee we osato hulɔ;+ Mawu ji odase! 6 Jã kɛ̃ lɛ wa hla we adesahi a hɛ mi nyami ngɛ nyɛ ngɔ aloo ni kpahi a ngɔ, e ngɛ mi kaa akɛnɛ Kristo bɔfohi ji wɔ he je ɔ, jinɛ wa ko nyɛ pee tlomi ngɛ nyɛ kuɛ nɔ.+ 7 Se wa pee wa he kpoo ngɛ nyɛ kpɛti kaa bɔ nɛ bimwɔyo nyɛ hɛɛɔ lɛ nitsɛ e bimɛ dɔdɔɔdɔ ɔ.* 8 Lɔ ɔ he ɔ, akɛnɛ wa suɔ nyɛ sane he je ɔ, wa fia wa pɛɛ si* kaa pi Mawu he sane kpakpa a pɛ nɛ waa kɛ ma ha nyɛ, se mohu wɔ nitsɛmɛ wa he* hulɔ,+ ejakaa nyɛ ba pee nihi nɛ wa suɔ mɛ saminya.+

9 Nyɛmimɛ, e ngɛ heii kaa nyɛ kaiɔ wa dengme kɛ wa pɔtɔ ɔ. Benɛ wa ngɛ Mawu he sane kpakpa a fiɛɛe kɛ ngɛ nyɛ tsɔɔe ɔ, wa tsuɔ ní nyɔ kɛ pia bɔ nɛ pee nɛ wa ko ba pee tlomi ngɛ nyɛ kuɛ nɔ.+ 10 Nyɛɛ kɛ Mawu tsuo ji wa we odasehi, kaa wa ba wa je mi ngɛ nyɛ nihi nɛ nyɛ he ye ɔ nyɛ kpɛti kaa nihi nɛ a yeɔ anɔkuale nɛ a da nɛ piami ko be a he. 11 Nyɛ le wawɛɛ kaa wa ya nɔ nɛ wa wo nyɛ he wami, nɛ wa wo nyɛ bua, nɛ wa ye nyɛ ti nɔ fɛɛ nɔ odase+ kaa bɔ nɛ tsɛ+ peeɔ kɛ haa e bimɛ ɔ, 12 konɛ nyɛɛ ya nɔ nɛ nyɛɛ nyɛɛ bɔ nɛ sa Mawu hɛ mi.+ Lɛ ji nɔ nɛ ngɛ nyɛ tsɛe kɛ ngɛ e Matsɛ Yemi ɔ+ kɛ e hɛ mi nyami ɔ+ mi bae ɔ nɛ.

13 Niinɛ, lɔ ɔ he je nɛ wɔ hu wa naa Mawu si daa a nɛ,+ ejakaa benɛ nyɛ nine su Mawu munyu ɔ nɛ nyɛ nu kɛ je wa ngɔ ɔ nɔ ɔ, nyɛ pɛtɛ he, pi kaa adesahi a munyu, se mohu kaa Mawu munyu, kaa bɔ nɛ e ji ngɛ anɔkuale mi ɔ, nɛ e ngɛ ní hu tsue ngɛ nyɛ nihi nɛ nyɛ he ye ɔ nyɛ mi. 14 Ejakaa, nyɛmimɛ, nyɛ ba pee nihi nɛ a kaseɔ Mawu asafo ɔmɛ nɛ a ngɛ Yudea nɛ a kɛ Kristo Yesu pee kake ɔ, ejakaa amanehluhi nɛ nyɛ na ngɛ nyɛ nitsɛmɛ nyɛ ma mi bi ɔmɛ a dɛ mi ɔ,+ lɔ ɔmɛ nɔuu lɛ mɛ hu a ngɛ nae ngɛ Yudabi ɔmɛ a dɛ mi ɔ nɛ, 15 mɛ lɛ a gbe Nyɔmtsɛ Yesu+ po kɛ gbali ɔmɛ ɔ nɛ, nɛ a wa wɔ hu yi mi.+ Jehanɛ se hu ɔ, a sɛ Mawu hɛ mi, mohu ɔ, a teɔ si kɛ woɔ níhi nɛ a he ngɛ se nami kɛ ha adesahi tsuo ɔ, 16 be mi nɛ a bɔɔ mɔde kaa a maa tsi wa nya bɔ nɛ pee nɛ wa ko tu munyu kɛ tsɔɔ nihi nɛ a je je ma amɛ a mi ɔ konɛ a he a yi wami ɔ.+ Ngɛ blɔ nɛ ɔ nɔ ɔ, be fɛɛ be ɔ, a peeɔ yayami fuu. Se nyagbenyagbe ɔ, e mi mi fumi ɔ ba a nɔ.+

17 Se nyɛmimɛ, benɛ waa kɛ nyɛ wa mi gba* be kpiti ko ɔ (ngɛ he lo mi, se pi ngɛ wa tsui mi), akɛnɛ wa suɔ wawɛɛ nɛ́ waa na nyɛ he je ɔ, wa bɔ mɔde wawɛɛ kaa wa maa na nyɛ hɛ mi. 18 Enɛ ɔ he je ɔ, wa suɔ kaa wa maa ba nyɛ ngɔ, ee, imi Paulo, i bɔ mɔde, pi si kake, se si enyɔ sɔuu; se kɛ̃ ɔ, Satan tsi wɔ blɔ. 19 Ejakaa mɛni ji wa hɛ kɛ nɔ fɔmi aloo wa bua jɔmi aloo jlasi nɛ waa kɛ fĩaa ngɛ wa Nyɔmtsɛ Yesu hɛ mi ngɛ e bami ɔ mi ɔ? Ngɛ anɔkuale mi ɔ, anɛ pi nyɛ lo?+ 20 Niinɛ, nyɛ ji wa hɛ mi nyami kɛ wa bua jɔmi.

3 Enɛ ɔ he ɔ, benɛ wa nyɛ we nɛ waa da nya hu ɔ, wa susu kaa e maa hi wawɛɛ kaa wɔ pɛ wa maa hi Atene;+ 2 nɛ wa tsɔ Timoteo,+ wa nyɛminyumu nɛ e ji Mawu sɔmɔlɔ* ngɛ sane kpakpa a nɛ kɔɔ Kristo he ɔ mi ɔ, konɛ e ba ha nɛ nyɛ he nɛ wa* nɛ e wo nyɛ bua ngɛ nyɛ hemi kɛ yemi ɔ he, 3 bɔ nɛ pee nɛ amanehlu nɛ ɔmɛ nɛ a ko ha nɛ nɔ ko nɛ e mimiɛ.* Ejakaa nyɛ nitsɛmɛ nyɛ le kaa wa be nyɛe maa tu nɔ́ nami kaa kikɛ nɛ ɔmɛ a nya fo.*+ 4 Ejakaa benɛ waa kɛ nyɛ ngɛ ɔ, wa de nyɛ ngɔ to kaa wa maa na amanehlu, nɛ kaa bɔ nɛ nyɛ le ɔ, lɔ ɔ lɛ ba mi ɔ nɛ.+ 5 Enɛ ɔ he je nɛ benɛ i nyɛ we nɛ ma da nya hu ɔ, i tsɔ Timoteo kɛ ba nyɛ ngɔ konɛ ma le nyɛ we anɔkuale yemi ɔ,+ kaa alini Nɔ Kalɔ ɔ+ ba ka nyɛ nɛ wa dengme gbomi ɔ pee yaka lo.

6 Se piɔ pɛ lɛ Timoteo ba su wa ngɔ benɛ e je nyɛ ngɔ ɔ,+ nɛ e ba bɔ wɔ sane kpakpa nɛ kɔɔ nyɛ we anɔkuale yemi ɔ kɛ suɔmi ɔ he ɔ he amaniɛ, kaa be fɛɛ be ɔ, nyɛ yaa nɔ nɛ nyɛɛ kɛ bua jɔmi kaiɔ wɔ, nɛ nyɛ hɛ ngɛ jae ngɛ wa he kaa bɔ nɛ e ji ngɛ wɔ hu wa blɔ fa mi ɔ. 7 Enɛ ɔ he je nɛ nyɛmimɛ, benɛ wa nu nyɛ he, nɛ wa nu anɔkuale yemi nɛ nyɛ je kpo ɔ hu he ɔ, wa ná bua jɔmi ngɛ wa haomi* kɛ wa we amanehlu ɔ tsuo mi.+ 8 Ejakaa ke nyɛ daa si kpɛii ngɛ Nyɔmtsɛ ɔ mi ɔ, wa náa he wami ehe.* 9 Ejakaa ke wa hyɛ bua jɔmi babauu nɛ wa náa ngɛ Mawu hɛ mi ngɛ nyɛ he ɔ, wa li nɔ́ nɛ waa kɛ maa na Mawu si po. 10 Daa nyɔ kɛ pia a, wa kpaa pɛɛ nɛ mi wa wawɛɛ kɛ wa tsui tsuo konɛ waa na nyɛ hɛ mi, nɛ nɔ́ nɛ piɛ nyɛ ngɛ nyɛ hemi kɛ yemi ɔ he ɔ, wa ha nyɛ.+

11 Jehanɛ ɔ, wa Mawu nɛ ji Tsɛ ɔ nitsɛ kɛ wa Nyɔmtsɛ Yesu nɛ́ a bli blɔ ko kɛ ha wɔ konɛ waa ba nyɛ ngɔ. 12 Jehanɛ se hu ɔ, Nyɔmtsɛ ɔ nɛ e ha nɛ suɔmi nɛ nyɛ ngɛ kɛ ha nyɛ sibi+ kɛ nihi tsuo ɔ nɛ e hiɛ, ee, nɛ e be nɔ kaa bɔ nɛ wa peeɔ ha nyɛ ɔ, 13 konɛ e wo nyɛ tsui he wami, nɛ́ piami ko nɛ ko hi nyɛ he ngɛ klɔuklɔu peemi mi ngɛ wa Mawu+ nɛ ji Tsɛ ɔ hɛ mi, benɛ wa Nyɔmtsɛ Yesu maa ba+ nɛ́ e ni klɔuklɔu ɔmɛ tsuo maa piɛɛ e he ɔ.

4 Nyagbe ɔ, nyɛmimɛ, waa kɛ blɔ tsɔɔmi ha nyɛ ngɛ bɔ nɛ e sa kaa nyɛɛ ba nyɛ je mi ha, konɛ nyɛɛ sa Mawu hɛ mi ɔ he,+ nɛ ngɛ anɔkuale mi ɔ, nyɛ ngɛ jã pee pɛpɛɛpɛ. Se amlɔ nɛ ɔ, wa ngɛ nyɛ bie, nɛ wa ngɛ nyɛ pɛɛ kpae ngɛ wa nyɔmtsɛ Yesu biɛ mi kaa nyɛɛ ya nɔ nɛ nyɛɛ pee jã wawɛɛ kɛ pi si. 2 Ejakaa nyɛ le blɔ tsɔɔmihi* nɛ wa ngɔ kɛ ha nyɛ kɛ gu Nyɔmtsɛ Yesu nɔ ɔ.

3 Ejakaa enɛ ɔ ji Mawu suɔmi nya ní, kaa e sa nɛ nyɛɛ pee nyɛ he klɔuklɔu+ nɛ nyɛɛ yu nyɛ he ngɛ ajuama bɔmi* he.+ 4 E sa nɛ nyɛ ti nɔ fɛɛ nɔ nɛ e le bɔ nɛ e ma kudɔ lɛ nitsɛ e nɔmlɔ tso ɔ* ha+ ngɛ klɔuklɔu peemi+ kɛ bumi mi, 5 se pi kɛ hɛkɔ, kɛ bɔmi nami he akɔnɔ nɛ́ e nɔ hí yemi+ nɛ je ma amɛ nɛ a li Mawu ɔ ngɛ ɔ.+ 6 E sɛ nɛ nɔ ko nɛ e be huzuhi nɛ sa a he, nɛ́ e sisi e nyɛmi ngɛ sane nɛ ɔ mi, ejakaa Yehowa* gblaa nihi a tue ngɛ ní nɛ ɔmɛ tsuo a he kaa bɔ nɛ wa de nyɛ be ko nɛ be ɔ, nɛ́ wa bɔ nyɛ kɔkɔ wawɛɛ hulɔ ɔ. 7 Ejakaa Mawu tsɛ wɔ, pi kɛ ha mu ní tsumi, se mohu kɛ ha klɔuklɔu peemi.+ 8 Enɛ ɔ he ɔ, nɔ nɛ bui tsɔɔmi nɛ ɔ, pi adesa nɛ e bui ɔ, se mohu Mawu,+ nɔ nɛ e haa nyɛ e mumi klɔuklɔu ɔ.+

9 Se ngɛ nyɛmi suɔmi blɔ fa mi ɔ,+ e he hia we nɛ waa ngma he sane ba ha nyɛ, ejakaa Mawu tsɔɔ nyɛ kaa nyɛɛ suɔ nyɛ sibi.+ 10 Ngɛ anɔkuale mi ɔ, nyɛ ngɛ jã pee kɛ ngɛ nyɛmimɛ ɔmɛ tsuo hae ngɛ Makedonia tsuo. Se nyɛmimɛ, wa ngɛ nyɛ he wami woe kaa nyɛɛ ya nɔ nɛ nyɛɛ pee babauu pe jã. 11 Oti nɛ e sa kaa nyɛ kɛ ma nyɛ hɛ mi ji kaa nyɛ maa hi si kpoo,+ nɛ nyɛ maa ye nyɛ nitsɛmɛ nyɛ kɔmɔ,+ nɛ nyɛɛ kɛ nyɛ ninehi ma tsu ní+ kaa bɔ nɛ wa tsɔɔ nyɛ ɔ, 12 konɛ nyɛɛ nyɛɛ ngɛ blɔ nɛ e he tsɔ nɔ ngɛ nihi nɛ tsa pi Kristofohi ji mɛ ɔ a hɛ mi,+ nɛ́ nɔ́ ko nɔ́ ko nɛ ko hia nyɛ.

13 Jehanɛ se hu ɔ, nyɛmimɛ, wa suɔ nɛ nyɛɛ le ni nɛmɛ nɛ a gbo* ɔ a he sane,+ konɛ nyɛ ko ye kɔmɔ kaa bɔ nɛ ni kpa amɛ nɛ a be hɛ kɛ nɔ fɔmi ɔ peeɔ ɔ.+ 14 Ejakaa ke wa ngɛ hemi kɛ yemi kaa Yesu gbo nɛ e te si ekohu ɔ,+ lɛɛ jã kɛ̃ nɛ Mawu hu maa ngɔ nihi nɛ a gbo* ngɛ Yesu mi ɔ kɛ piɛɛ e he kɛ ba.+ 15 Ejakaa enɛ ɔ ji nɔ́ nɛ wa deɔ nyɛ kɛ guɔ Yehowa* munyu ɔ nɔ ɔ nɛ, kaa wɔ nihi nɛ wa ngɛ wami mi nɛ wa be gboe kɛ yaa si be nɛ Nyɔmtsɛ ɔ maa ba a, wa be ni nɛmɛ nɛ a gbo* ɔ a hlami sɛe ngɛ blɔ ko blɔ ko nɔ; 16 ejakaa Nyɔmtsɛ ɔ nitsɛ ma kple si kɛ je hiɔwe nɛ e kɛ bɔfo nɔkɔtɔma+ gbi kɛ Mawu titimati ɔ ma tsɛ kɛ gbi nɛ he wa, nɛ ni nɛmɛ nɛ a gbo ngɛ Kristo mi ɔ maa te si kekle.+ 17 Lɔ ɔ se ɔ, a maa ngɔ wɔ nihi nɛ wa ngɛ wami mi nɛ wa gbo we ɔ kɛ piɛɛ a he kɛ ho ngɛ bɔku ɔmɛ a mi,+ nɛ waa kɛ Nyɔmtsɛ ɔ ma ya kpe+ ngɛ kɔɔhiɔ mi; kɛkɛ ɔ, waa kɛ Nyɔmtsɛ ɔ maa hi si daa.+ 18 Enɛ ɔ he ɔ, nyɛɛ ya nɔ nɛ nyɛɛ hi nyɛ sibi a bua woe kɛ munyu nɛ ɔmɛ.

5 Jehanɛ ɔ, nyɛmimɛ, ngɛ ligbi ɔmɛ kɛ be nɛ a to ɔmɛ a blɔ fa mi ɔ, e he hia we nɛ a ngma nyɛ he nɔ́ ko. 2 Ejakaa nyɛ nitsɛmɛ nyɛ le saminya kaa Yehowa* ligbi ɔ+ ma kaa bɔ nɛ julɔ baa nyɔ mi ɔ pɛpɛɛpɛ.+ 3 Be mi nɛ nihi ngɛ dee ke, “Wa ngɛ tue mi jɔmi kɛ slɔkee si himi!” ɔ, kɛkɛ si kake too ɔ, hɛ mi kpatami maa ba a nɔ tlukaa,+ kaa bɔ nɛ yohɔyo nuɔ kɔɔmi ɔ, nɛ a he be mi jee kɔkɔɔkɔ. 4 Se nyɛmimɛ, nyɛɛ lɛɛ nyɛ be diblii mi nɛ́ ligbi ɔ ma ba ti nyɛ si tlukaa kaa bɔ nɛ je nami tiɔ juli si ɔ, 5 ejakaa la bimɛ kɛ piani bimɛ ji nyɛ tsuo.+ Pi nyɔ aloo diblii níhi ji wɔ.+

6 Enɛ ɔ he ɔ, nyɛ ko ha nɛ waa hi mahe mi kaa ni kpa amɛ,+ mohu ɔ, nyɛ ha nɛ waa hwɔɔ+ nɛ wa hɛ nɛ hi wa he nɔ.+ 7 Ejakaa ni nɛmɛ nɛ a hwɔɔ mahe ɔ, nyɔ mi lɛ a hwɔɔ mahe, nɛ ni nɛmɛ nɛ a deɔ dã a, nyɔ mi lɛ a deɔ dã+. 8 Se wɔ ni nɛmɛ nɛ piani níhi ji wɔ ɔ lɛɛ, nyɛ ha nɛ wa hɛ nɛ hi wa he nɔ nɛ waa wo suɔmi kɛ hemi kɛ yemi he gugue nɔ dama a, nɛ́ wa bu yi wami hemi he hɛ kɛ nɔ fɔmi ɔ kaa dade pɛɛ,+ 9 ejakaa Mawu hlɛ wɔ kaa e maa gbla wa tue,* se mohu e hla wɔ konɛ a he wa yi wami+ kɛ gu wa Nyɔmtsɛ Yesu Kristo nɔ. 10 E gbo kɛ ha wɔ,+ konɛ ke wa hɛ ngɛ jio, wa hwɔ mahe* jio, waa kɛ lɛ tsuo nɛ hi wami mi.+ 11 Enɛ ɔ he ɔ, nyɛɛ ya nɔ nɛ nyɛɛ hi nyɛ sibi he wami woe,* nɛ́ nyɛɛ hi nyɛ sibi fiae kɛ hi si mae,+ kaa bɔ nɛ ngɛ anɔkuale mi ɔ, nyɛ ngɛ pee ɔ.

12 Jehanɛ ɔ, nyɛmimɛ, wa ngɛ nyɛ pɛɛ kpae kaa nyɛɛ bu ni nɛmɛ nɛ a ngɛ ní tsue wawɛɛ ngɛ nyɛ kpɛti nɛ a ngɛ nyɛ nɔ hyɛe ngɛ Nyɔmtsɛ ɔ mi nɛ a ngɛ nyɛ ga woe ɔ; 13 nɛ nyɛ je suɔmi nɛ́ se be kɛ bumi nɛ mi kuɔ kpo kɛ tsɔɔ mɛ ngɛ a ní tsumi ɔ he je.+ Nyɛɛ kɛ nyɛ sibi nɛ hi si ngɛ tue mi jɔmi mi.+ 14 Se nyɛmimɛ, wa ngɛ nyɛ he wami woe kaa nyɛɛ bɔ nihi nɛ a peeɔ a ní basabasa a kɔkɔ,*+ nyɛɛ tu bua womi munyu kɛ tsɔɔ ni nɛmɛ nɛ a hao ɔ,* nyɛɛ ye bua ni nɛmɛ nɛ a gbɔjɔ ɔ, nɛ́ nyɛɛ to nyɛ tsui si kɛ ha nihi tsuo.+ 15 Nyɛɛ hyɛ nɛ nɔ ko nɛ e ko ngɔ yayami kɛ to yayami nane mi,+ se be fɛɛ be ɔ, nyɛɛ di nɔ́ kpakpa se ngɔ ha nyɛ sibi kɛ ni kpahi tsuo.+

16 Be fɛɛ be ɔ, nyɛɛ hi nyae.+ 17 Nyɛɛ sɔle be fɛɛ be.+ 18 Nyɛɛ na si ngɛ nɔ́ fɛɛ nɔ́ he.+ Enɛ ɔ ji Mawu suɔmi nya ní kɛ ha nyɛ ngɛ Kristo Yesu mi. 19 Nyɛ ko gbe mumi ɔ la a.+ 20 Nyɛ ko gbe gbamihi a he guɛ.+ 21 Nyɛ hla níhi tsuo a mi nɛ nyɛɛ hyɛ kaa a ji anɔkuale lo;+ nɛ́ nyɛɛ pɛtɛ nɔ́ nɛ hi he wawɛɛ. 22 Nyɛɛ yu nyɛ he ngɛ yayami slɔɔtohi tsuo a he.+

23 Tue mi jɔmi Mawu ɔ nitsɛ nɛ e ha nɛ nyɛ he nɛ tsɔ kɛ pi si. Nɛ́ e baa nyɛ mumi ɔ kɛ nyɛ klaa* kɛ nyɛ nɔmlɔ tso ɔ nɛ e hi kɛ pi si ngɛ blɔ fɛɛ blɔ nɔ ɔ yi, konɛ piami ko nɛ ko hi he ngɛ wa Nyɔmtsɛ Yesu Kristo bami ɔ mi.+ 24 Nɔ nɛ e tsɛ nyɛ ɔ maa pee ní nɛ ɔmɛ kokooko, ejakaa e yeɔ anɔkuale.

25 Nyɛmimɛ, nyɛɛ ya nɔ nɛ nyɛɛ hi sɔlee ha wɔ.+

26 Nyɛɛ ngɔ nya he fiɔmi nɛ ngɛ klɔuklɔu kɛ nga nyɛmimɛ ɔmɛ tsuo.

27 I kɛ blɔ nya ní tsumi nɛ hɛdɔ ngɛ he ngɛ nyɛ nɔ fɔe ngɛ Nyɔmtsɛ ɔ mi kaa nyɛ ha nɛ a kane sɛ womi nɛ ɔ kɛ ha nyɛmimɛ ɔmɛ tsuo.+

28 Wa Nyɔmtsɛ Yesu Kristo dloomi ɔ kɛ nyɛ nɛ hi si.