BƆFO ƆMƐ A NÍ TSUMI

1 Oo Teofilo, ngɛ kekleekle womi ɔ mi ɔ, i ngma níhi tsuo nɛ Yesu je sisi nɛ e pee, kɛ níhi nɛ e tsɔɔ ɔ,+ 2 hluu kɛ ya si ligbi ɔ nɛ a ngɔ lɛ kɛ ho hiɔwe ya a.+ Loko a maa ngɔ lɛ kɛ ho ɔ, e gu mumi klɔuklɔu ɔ nɔ nɛ e kɛ blɔ tsɔɔmihi ha bɔfo ɔmɛ nɛ e hla a.+ 3 Benɛ e na amanehlu se ɔ, e gu blɔhi fuu a nɔ kɛ je e he kpo kɛ tsɔɔ mɛ kɛ ma nɔ mi ha mɛ kaa e ngɛ wami mi.+ A na lɛ ngɛ ligbi 40 ɔ tsuo mi, nɛ e tu Mawu Matsɛ Yemi ɔ he munyu.+ 4 Benɛ e kɛ mɛ ba kpe ɔ, e fã mɛ ke: “Nyɛ ko je Yerusalem,+ mohu ɔ, nyɛɛ ya nɔ nɛ nyɛɛ mlɛ nɔ́ nɛ Tsɛ ɔ wo he si,+ nɛ́ nyɛ nu kɛ je ye nya a; 5 ejakaa ngɛ anɔkuale mi ɔ, Yohane ngɔ nyu kɛ baptisi nihi, se nyɛɛ lɛɛ ngɛ ligbi bɔɔ komɛ a se ɔ, a kɛ mumi klɔuklɔu maa baptisi nyɛ.”+

6 Enɛ ɔ he ɔ, benɛ a bua a he nya a, a bi lɛ ke: “Nyɔmtsɛ, anɛ o kɛ matsɛ yemi ɔ ngɛ Israelbi ɔmɛ hae ekohu ngɛ be nɛ ɔ mi lo?”+ 7 E de mɛ ke: “Pi nyɛ blɔ nya ji kaa nyɛ maa le be ɔmɛ aloo ligbi ɔmɛ nɛ Tsɛ ɔ to ngɛ lɛ nitsɛ e he wami nya a.+ 8 Se ke mumi klɔuklɔu ɔ ná ba nyɛ nɔ ɔ, nyɛ ma ná he wami+ nɛ nyɛ maa ye ye he odase+ ngɛ Yerusalem,+ kɛ Yudea tsuo, kɛ Samaria,+ kɛ ya su zugba a nɔ hehi nɛ a kɛ wawɛɛ ɔ.”*+ 9 Benɛ e de ní nɛ ɔmɛ se ɔ, a ngɛ lɛ hyɛe, kɛkɛ nɛ Mawu wo e nɔ kɛ ho hiɔwe ya, nɛ bɔku ko ha e nɔ, nɛ a nɛ lɛ hu.+ 10 Benɛ e yaa nɛ a ngɛ hiɔwe hyɛe totooto ɔ, tlukaa a, nyumuhi enyɔ kɛ a he tade hiɔhi+ ba da si ngɛ a kasa nya 11 nɛ a bi mɛ ke: “Galilea nyumuhi, mɛni he je nɛ nyɛ daa si nɛ nyɛ ngɛ hiɔwe hyɛe kikɛ nɛ ɔ? Yesu ɔ nɛ a ngɔ lɛ kɛ je nyɛ he kɛ ho hiɔwe ya a, blɔ nɔ nɛ e gu kɛ ho hiɔwe ya nɛ nyɛ na lɛ ɔ, jamɛ a blɔ ɔ nɔ nɔuu lɛ e maa gu kɛ ba.”

12 Kɛkɛ nɛ a kpale a se kɛ je yoku ko nɛ a tsɛɔ ke Oliv Yoku ɔ nɔ kɛ ho Yerusalem ya.+ Lejɛ ɔ kɛ Yerusalem he kɛ we, e ji he jɔɔmi ligbi blɔ nyɛɛmi. 13 Benɛ a ya su ɔ, a kuɔ kɛ ho hiɔwe tsu ɔ mi ya, ngɛ he nɛ a ba to ɔ. Nihi nɛ a ngɛ lejɛ ɔ ji Petro kɛ Yohane kɛ Yakobo kɛ Andrea, Filipo kɛ Toma, Batolomeo kɛ Mateo, Alfeo bi Yakobo, kɛ Simon nɛ ji katsɛ ɔ, kɛ Yakobo bi Yuda.+ 14 Ni nɛ ɔmɛ tsuo, kɛ yi komɛ,+ kɛ Maria nɛ ji Yesu nyɛ ɔ, kɛ Yesu nyɛminyumu ɔmɛ ngɔ juɛmi kake kɛ hɛɛ sɔlemi mi.+

15 Ngɛ jamɛ a ligbi ɔmɛ a mi ɔ, Petro te si kɛ da si ngɛ nyɛmimɛ ɔmɛ a kpɛti (nihi* tsuo nɛ a bua a he nya a, a yibɔ maa pee 120), nɛ e de ke: 16 “Nyumuhi, nyɛmimɛ, mumi klɔuklɔu ɔ gu David nɔ kɛ gba kɛ fɔ si ngɛ Yuda,+ nɔ nɛ e tsɔɔ nihi blɔ nɛ a ya nu Yesu ɔ he,+ nɛ e he hia nɛ jamɛ a ngmami ɔ nɛ e ba mi. 17 Ejakaa jinɛ e piɛɛ wa he,+ nɛ e ná he blɔ ngɛ sɔmɔmi nɛ ɔ mi. 18 (Se kikɛmɛ a nyumu nɛ ɔ ngɔ nɔ́ nɛ dɛ he hiɔwo ɔ kɛ he ngmɔ ko,+ nɛ benɛ e yaa nɔ si ɔ, e yi ya ma si kekle, nɛ e nɔmlɔ tso ɔ pɛ́* nɛ e mi mi níhi tsuo pã ngɔ pue si.+ 19 Nihi tsuo nɛ a ngɛ Yerusalem ɔ nu nɔ́ nɛ ɔ he, enɛ ɔ he ɔ, a tsɛɔ jamɛ a ngmɔ ɔ ngɛ a gbi ɔ mi ke Akeldama, nɛ e sisi ji, “Muɔ Ngmɔ.”) 20 Ejakaa a ngma ngɛ La Womi ɔ mi ke, ‘Ha nɛ e sihi he ɔ nɛ pee we doku, nɛ nɔ ko nɔ ko nɛ e ko hi mi,’+ nɛ a ngma hu ke, ‘Ha nɛ nɔ kpa nɛ ngɔ e ní tsumi kaa nɔ hyɛlɔ ɔ.’+ 21 Enɛ ɔ he ɔ, nyumuhi nɛ a kɛ wɔ nyɛɛ be mi nɛ Nyɔmtsɛ Yesu ngɛ e ní tsumi ɔmɛ tsuo tsue* ngɛ wa kpɛti, 22 kɛ je be nɛ Yohane baptisi lɛ ɔ+ hluu kɛ ya si be nɛ a ngɔ lɛ kɛ je wa he kɛ ho hiɔwe ya a,+ e he hia nɛ nyumu nɛ ɔmɛ a kpɛti nɔ kake nɛ ba piɛɛ wa he kɛ ye Yesu si tlemi ɔ he odase.”+

23 Enɛ ɔ he ɔ, a je nihi enyɔ, mɛ ji Yosef nɛ a tsɛɔ lɛ ke Barsaba, nɛ e biɛ kpa hu ji Yusto ɔ, kɛ Matias. 24 Enɛ ɔ se ɔ, a sɔle nɛ a de ke : “Oo, Yehowa,* mo nɛ́ o le nihi tsuo a tsui mi,+ moo tsɔɔ nyumu enyɔ nɛ ɔmɛ a kpɛti nɔ nɛ o hla 25 konɛ e ngɔ sɔmɔmi kɛ bɔfo ní tsumi nɛ ɔ nɛ Yuda gba kɛ je he nɛ e ya ngɔ lɛ nitsɛ e blɔ ɔ.”+ 26 Enɛ ɔ he ɔ, a fɔ a nɔ sɔ,+ nɛ sɔ ɔ ya nɔ Matias nɔ, nɛ a bu lɛ ngɔ piɛɛ bɔfo 11 ɔmɛ a he.*

2 Jehanɛ ɔ, ngɛ ligbi nɛ a yeɔ Pentekoste Gbijlɔ ɔ+ nɔ ɔ, mɛ tsuo a bua a he nya ngɛ he kake. 2 Si kake too ɔ, nɔ́ ko bɔni pɛmi kɛ je hiɔwe kaa kɔɔhiɔ nɛ nya wa nɛ́ ngɛ fiae, nɛ e hyi we ɔ mi he nɛ a hii si ngɛ ɔ tsuo.+ 3 Nɛ a na lilɛhi nɛ a ngɛ kaa la, nɛ lilɛ ɔmɛ a mi gbɛ, nɛ kakaaka ba ma a ti nɔ fɛɛ nɔ yi mi, 4 nɛ mumi klɔuklɔu hyi mɛ tsuo tɔ,+ nɛ a bɔni gbi* slɔɔtoslɔɔtohi tumi kaa bɔ nɛ mumi ɔ ngɔ kɛ wo a nya a.+

5 Jamɛ a be ɔ mi ɔ, Yudabi nɛ a yeɔ Mawu gbeye nɛ a je je mahi tsuo a mi ngɛ zugba a nɔ ɔ ngɛ Yerusalem.+ 6 Enɛ ɔ he ɔ, benɛ nɔ́ nɛ ɔ pɛ ɔ, nihi babauu ba bua a he nya nɛ a nya kpɛ a he, ejakaa a ti nɔ fɛɛ nɔ nu nɛ a ngɛ lɛ nitsɛ e je gbi tue. 7 Ngɛ anɔkuale mi ɔ, a nya kpɛ a he wawɛɛ nitsɛ, nɛ a de ke: “Nyɛɛ hyɛ ha, anɛ pi Galileabi+ ji nihi nɛ a ngɛ munyu tue ɔ lo? 8 Lɛɛ kɛ e pee kɛɛ nɛ wa ti nɔ fɛɛ nɔ ngɛ lɛ nitsɛ e je gbi* nue ɔ? 9 Wa ti ni komɛ ji Patiabi, kɛ Mediabi,+ kɛ Elambi,+ kɛ nihi nɛ a je Mesopotamia, Yudea, Kapadokia, Ponto, kɛ Asia+ kpokpa a nɔ, 10 ni komɛ hu je Frigia kɛ Pamfilia, kɛ Egipt, kɛ Libia kpokpa amɛ nɛ́ a kɛ Kirene he kɛ we ɔ a mi, nibwɔhi hu je Roma kɛ ba, a ti ni komɛ ji Yudabi nɛ ni komɛ hu ji nihi nɛ a tsake kɛ ba Yudabi ɔmɛ a jami ɔ mi,+ 11 kɛ Kretabi, kɛ Arabiabi, wa nu kaa a ngɛ Mawu ní nguangua amɛ a he munyu tue ngɛ wa gbi ɔmɛ a mi.” 12 Ee, mɛ tsuo a nya kpɛ a he nɛ a dɛ yaa, nɛ a ngɛ a sibi bie ke: “Mɛni enɛ ɔ tsɔɔ?” 13 Se ni komɛ ye a he fɛu nɛ a de ke: “A nu wai ngɔngɔɛ* nɛ a de.”

14 Se Petro kɛ Ni Nyɔngma Kɛ Kake ɔmɛ+ te si kɛ da si, nɛ e kɛ gbi nɛ nya wa tu munyu kɛ tsɔɔ mɛ nɛ e de ke: “Yudea nyumuhi kɛ nyɛ nihi tsuo nɛ nyɛ ngɛ Yerusalem, nyɛ ná nɛ nyɛɛ le enɛ ɔ, nɛ nyɛɛ bu ye munyu ɔ tue saminya. 15 Ngɛ anɔkuale mi ɔ, pi nɛ nimli nɛ ɔmɛ tɔ dã kaa bɔ nɛ nyɛ susu ɔ, ejakaa ngmlɛfia etɛne* ɔ mi wa ngɛ nɛ ɔ nɛ. 16 Mohu ɔ, enɛ ɔ ji nɔ́ nɛ Mawu de kɛ gu gbalɔ Yoel nɔ ɔ nɛ. E de ke: 17 ‘Mawu de ke, “Ngɛ nyagbe ligbi ɔmɛ a mi ɔ, ma plɛ ye mumi ɔ eko ngɔ pue he lo slɔɔtohi tsuo a nɔ, nɛ nyɛ binyumu ɔmɛ kɛ nyɛ biyi ɔmɛ maa gba, nɛ nyɛ nihewi ɔmɛ maa na ninahi, nɛ nyɛ nimowi ɔmɛ maa nla nlamihi,+ 18 nɛ ngɛ jamɛ a ligbi ɔmɛ a mi ɔ, ma plɛ ye mumi ɔ eko ngɔ pue ye nyɔguɛ ɔmɛ kɛ ye mawayi ɔmɛ a nɔ, nɛ a maa gba.+ 19 Nɛ ma pee nyakpɛ níhi* ngɛ hiɔwe kɛ okadihi ngɛ zugba a nɔ, muɔ kɛ la kɛ lasuku kpii. 20 Pu ɔ maa wo diblii, nɛ nyɔhiɔ ɔ ma plɛ pee muɔ loko Yehowa* ligbi ngua a nɛ e ngɛ nyami ɔ maa ba. 21 Nɛ nɔ fɛɛ nɔ nɛ e tsɛɔ Yehowa* biɛ ɔ, a ma he e yi wami.”’+

22 “Israel nyumuhi, nyɛɛ bu munyu nɛ ɔmɛ tue. Yesu, Nazaretno ɔ ji nyumu ko nɛ Mawu je lɛ kpo ngɔ tsɔɔ nyɛ ngɛ ma hɛ mi, kɛ gu he wami ní tsumihi kɛ nyakpɛ níhi* kɛ okadihi nɛ Mawu gu e nɔ kɛ pee ngɛ nyɛ kpɛti ɔ nɔ+ kaa bɔ nɛ nyɛ nitsɛmɛ nyɛ le ɔ. 23 Mawu suɔmi nya,* kɛ níhi nɛ e le kɛ sɛ hlami ɔ he je nɛ a ngɔ nyumu nɛ ɔ kɛ ha,+ nɛ nyɛ gu nyumuhi nɛ a yi mlaa nɔ ɔ a nine nɔ, nɛ nyɛ ka lɛ kɛ wo tso he, nɛ nyɛ tane e yi ɔ nɛ.+ 24 Se Mawu tle lɛ si+ nɛ e kɛ je lɛ kɛ je gbenɔ piimi ɔ mi,* ejakaa gbenɔ nyɛ we nɛ e tsi e nya.+ 25 Ejakaa David de ngɛ e he ke: ‘I susuɔ Yehowa* he daa, ejakaa e ngɛ ye hiɔ nɔ, nɛ i be mimiɛe gblegbleegble. 26 Enɛ ɔ ha nɛ ye bua jɔ ngɛ ye tsui mi, nɛ ye lilɛ nya wawɛɛ. Nɛ ma* hi si ngɛ hɛ kɛ nɔ fɔmi mi; 27 ejakaa o be mi* sie ngɛ Yɔkɔ* mi, nɛ jã kɛ̃ lɛ o be nɔ nɛ yeɔ mo anɔkuale ɔ hyɛe nɛ e puɛ.+ 28 O ha nɛ i le wami blɔ ɔmɛ; o ma ha nɛ ma ná bua jɔmi babauu ngɛ o hɛ mi.’+

29 “Nyumuhi, nyɛmimɛ, nyɛ ha nɛ ma tu wekuyi David he munyu faa ngɔ tsɔɔ nyɛ, kaa e gbo nɛ a pu lɛ,+ nɛ e yɔkɔ ɔ ngɛ wa kpɛti kɛ ba si mwɔnɛ ɔ. 30 Ejakaa gbalɔ ji lɛ, nɛ e le kaa Mawu kã kita kɛ wo lɛ si kaa e ma ha nɛ e nina amɛ* a kpɛti nɔ kake maa hi e matsɛ sɛ ɔ nɔ,+ 31 e na kɛ sɛ hlami nɛ e tu Kristo ɔ si tlemi ɔ he munyu kaa a si we lɛ ngɛ Yɔkɔ* mi, nɛ jã kɛ̃ lɛ e he lo ɔ hu puɛ we.*+ 32 Yesu nɛ ɔ lɛ Mawu tle lɛ si ɔ nɛ, nɛ wɔ tsuo wa ji enɛ ɔ he odase yeli.+ 33 Enɛ ɔ he ɔ, akɛnɛ a wo e nɔ kɛ ya Mawu hiɔ nɔ+ nɛ́ e nine su mumi klɔuklɔu ɔ nɛ Tsɛ ɔ+ wo he si ɔ nɔ he je ɔ, e plɛ mumi klɔuklɔu ɔ kɛ pue wa nɔ, kaa bɔ nɛ nyɛ na nɛ́ nyɛ nu ɔ. 34 Ejakaa David kuɛ kɛ yɛ hiɔwe mohu lɛɛ, se lɛ nitsɛ e de ke, ‘Yehowa* de ye Nyɔmtsɛ ɔ ke: “Hii si ngɛ ye hiɔ nɔ 35 kɛ yaa si be nɛ ma ngɔ o he nyɛli ɔmɛ kɛ pee nɔ́ nɛ o kɛ o nane maa ma nɔ.”’+ 36 Enɛ ɔ he ɔ, nyɛ ha nɛ Israel we ɔ tsuo nɛ a le ngɛ anɔkuale mi kaa Yesu ɔ nɛ nyɛ gbe lɛ ngɛ tso nɔ ɔ,+ Mawu pee lɛ Nyɔmtsɛ+ kɛ Kristo tsuo.”

37 Jehanɛ ɔ, benɛ a nu nɔ́ nɛ ɔ, e gbɔ a tsui mi, nɛ a bi Petro kɛ bɔfo kpa amɛ ke: “Nyumuhi, nyɛmimɛ, mɛni e sa kaa waa pee?” 38 Petro de mɛ ke: “Nyɛ tsake nyɛ tsui,+ nɛ nyɛ ti nɔ fɛɛ nɔ nɛ e ha nɛ a baptisi lɛ+ ngɛ Yesu Kristo biɛ mi konɛ a ngɔ nyɛ he yayamihi kɛ ke nyɛ,+ nɛ nyɛ ma ná nike ní nɛ a kɛ haa faa nɛ ji mumi klɔuklɔu ɔ. 39 Ejakaa si womi ɔ+ ngɛ kɛ ha nyɛɛ kɛ nyɛ bimɛ, kɛ nihi tsuo nɛ a ngɛ tsitsaa lokoo, kɛ nihi tsuo nɛ Yehowa* wa Mawu ɔ ma tsɛ mɛ kɛ ba lɛ nitsɛ e ngɔ ɔ.”+ 40 Nɛ e tu munyu kpahi fuu nɛ e kɛ ye mɛ odase kɛ pi si, nɛ e ya nɔ nɛ e wo mɛ he wami ke: “Nyɛ ha nɛ a he nyɛ yi wami kɛ je yi nɔ kpɛ̃kpɛ̃ɛ nɛ ɔ mi.”+ 41 Kɛkɛ nɛ a baptisi nihi nɛ a kɛ bua jɔmi kplɛɛ e munyu ɔ nɔ ɔ,+ nɛ ngɛ jamɛ a ligbi ɔ nɔ ɔ, nihi* maa pee 3,000 ba piɛɛ a he.+ 42 Nɛ a ya nɔ nɛ a tu a he kɛ ha bɔfo ɔmɛ a tsɔɔmi ɔ, a kɛ a sibi bɔ huɛ,* nɛ a ya nɔ nɛ a ye ní,+ nɛ a hɛɛ sɔlemi mi.+

43 Ngɛ anɔkuale mi ɔ, nɔ fɛɛ nɔ* bɔni gbeye yemi, nɛ bɔfo ɔmɛ bɔni nyakpɛ níhi* babauu kɛ okadihi peemi.+ 44 Nihi tsuo nɛ a ba he ye ɔ pee kake, nɛ nɔ́ fɛɛ nɔ́ nɛ nɔ ko ngɛ ɔ peeɔ mɛ tsuo a nɔ́, 45 nɛ a juaa níhi nɛ a ngɛ ɔ+ kɛ a weto níhi, nɛ a gbaa nɔ́ nɛ a náa a kɛ haa mɛ tsuo ngɛ nɔ fɛɛ nɔ hiami níhi a nya.+ 46 Nɛ daa ligbi ɔ, a kɛ juɛmi kake kpeɔ ngɛ sɔlemi we ɔ, nɛ a yeɔ ní ngɛ we ekpaekpahi a mi, nɛ a kɛ bua jɔmi kɛ tsui nɛ e mi tsɔ gbaa a niye ní ɔmɛ kɛ haa a sibi, 47 nɛ a jeɔ Mawu yi, nɛ ni ɔmɛ tsuo bua jɔ a he. Ngɛ jamɛ a be ɔ mi nɔuu ɔ, daa ligbi ɔ, Yehowa* yaa nɔ nɛ e ngɔɔ nihi nɛ e ngɛ a yi wami hee ɔ kɛ ba piɛɛɔ a he.+

3 Jehanɛ ɔ, Petro kɛ Yohane ngɛ kuɔe kɛ yaa sɔlemi we ɔ ngɛ ngmlɛfia nɛ a kɛ sɔleɔ nɛ ji ngmlɛfia nɛɛne* ɔ mi, 2 nɛ nihi tloo nyumu ko nɛ a fɔ lɛ glɔtsɛ. Daa ligbi ɔ, a kɛ lɛ ya fɔɔ sɔlemi we ɔ sinya nɛ a tsɛɔ ke Saminyayoo ɔ nya konɛ e nyɛ nɛ e kpa nihi nɛ a ngɛ sɔlemi we ɔ sɛe ɔ pɛɛ nɛ́ a na lɛ mɔbɔ nɛ a ke lɛ ní. 3 Benɛ e hɛngmɛ gba Petro kɛ Yohane a nɔ nɛ a yaa sɛ sɔlemi we ɔ, e bɔni mɛ pɛɛ kpami kaa a na lɛ mɔbɔ nɛ a ke lɛ nɔ́ ko. 4 Se Petro kɛ Yohane hyɛ e hɛ mi too nɛ a de lɛ ke: “Moo hyɛ wɔ.” 5 Enɛ ɔ he ɔ, e hyɛ mɛ gaa, nɛ e ngɛ blɔ hyɛe kaa a ma ha lɛ nɔ́ ko. 6 Se Petro de lɛ ke: “Sika hiɔ kɛ sika tsu lɛɛ i be eko, se nɔ́ nɛ i ngɛ ɔ, lɔ ɔ lɛ ma ngɔ kɛ ha mo. Ngɛ Yesu Kristo, Nazaretno ɔ biɛ mi ɔ, moo nyɛɛ!”+ 7 Kɛkɛ nɛ Petro pɛtɛ e hiɔ nine he nɛ e wo e nɔ kɛ da si.+ Amlɔ nɔuu nɛ e nane ɔmɛ kɛ e nane si kpawo he ɔmɛ a mi wa;+ 8 nɛ benɛ e te si kɛ da e nane ɔmɛ a nɔ ɔ,+ e bɔni nyɛɛmi nɛ e kɛ mɛ ho sɔlemi we ɔ ya, nɛ e ngɛ nyɛɛe nɛ e ngɛ tuue nɛ e ngɛ Mawu yi jee. 9 Nɛ ni ɔmɛ tsuo na lɛ nɛ́ e ngɛ nyɛɛe nɛ́ e ngɛ Mawu yi jee. 10 Nɛ a yɔse kaa lɛ ji nyumu ɔ nɛ e hiɔ si ngɛ sɔlemi we ɔ Agbo Saminyayoo ɔ nya nɛ́ e hii mlɛe kaa nihi maa na lɛ mɔbɔ nɛ́ a ke lɛ ní ɔ nɛ.+ Enɛ ɔ pee mɛ nyakpɛ wawɛɛ nitsɛ nɛ a bua jɔ nɔ́ nɛ ba a he.

11 Benɛ nyumu ɔ kpla Petro kɛ Yohane a he loloolo ɔ, ni ɔmɛ tsuo tu fo kɛ ya a ngɔ ngɛ he nɛ a tsɛɔ ke Salomo Ablanaa a nɔ ɔ,+ nɛ a nya kpɛ a he wawɛɛ nitsɛ. 12 Benɛ Petro na nɔ́ nɛ ɔ, e bi ni ɔmɛ ke: “Israel nyumuhi, mɛni he je nɛ enɛ ɔ pee nyɛ nyakpɛ ɔ, nɛ mɛni he je nɛ nyɛ ngɛ wɔ hyɛe gaa kaa nɔ́ nɛ wɔ nitsɛmɛ wa he wami nya aloo Mawu nɛ wa jaa saminya a he je nɛ wa ha nɛ e nyɛɛ ɔ? 13 Abraham kɛ Isak kɛ Yakob a Mawu ɔ,+ wa nɛmɛ ɔmɛ a Mawu ɔ wo e Sɔmɔlɔ+ Yesu+ hɛ mi nyami, nɔ nɛ nyɛ ngɔ lɛ kɛ ha+ nɛ nyɛ kua lɛ ngɛ Pilato hɛ mi, be mi nɛ Pilato pee e juɛmi po kaa e maa ngmɛɛ e he ɔ. 14 Ee, nyɛ kua jamɛ a nɔ klɔuklɔu ɔ kɛ dalɔ ɔ, nɛ nyɛ bi kaa a ngmɛɛ nyumu ko nɛ e ji nɔmlɔ gbelɔ ɔ mohu he kɛ ha nyɛ,+ 15 nɛ nyɛ gbe wami Hɛ Mi Nyɛɛlɔ Kpanaa a.+ Se Mawu tle lɛ si kɛ je gbogboehi a kpɛti, nɛ wɔ ji anɔkuale munyu nɛ ɔ he odase yeli.+ 16 Nɛ kɛ gu e biɛ ɔ nɔ, kɛ jehanɛ se hu kɛ gu hemi kɛ yemi nɛ wa ngɛ ngɛ e biɛ ɔ mi ɔ nɔ lɛ nyumu nɛ ɔ nɛ nyɛ ngɛ lɛ hyɛe nɛ nyɛ le lɛ ɔ ba ná he wami ɔ nɛ. Hemi kɛ yemi nɛ wa ná kɛ gu e nɔ ɔ lɛ ha nɛ nyumu nɛ ɔ ná he wami kɛ pi si ngɛ nyɛ tsuo nyɛ hɛ mi ɔ nɛ. 17 Amlɔ nɛ ɔ, nyɛmimɛ, i le kaa nɔ́ nɛ nyɛ pee ɔ, nyɛ li nɛ nyɛ pee+ kaa bɔ nɛ e ji ngɛ nyɛ nɔ yeli ɔmɛ hu a blɔ fa mi ɔ.+ 18 Se kɛ gu blɔ nɛ ɔ nɔ ɔ, Mawu ha nɛ níhi nɛ e fia a he adafi kɛ sɛ hlami kɛ gu gbali ɔmɛ tsuo a nya mi munyu nɔ kaa e Kristo ɔ maa na nɔ́ ɔ ba mi.+

19 “Enɛ ɔ he ɔ, nyɛ tsake nyɛ tsui,+ nɛ nyɛɛ kpale nyɛ se+ konɛ a tsu nyɛ he yayami ɔmɛ,+ bɔ nɛ pee nɛ he jɔmi behi nɛ́ a je Yehowa nitsɛ ngɔ* kɛ ba, 20 nɛ e maa tsɔ Kristo nɛ a hla lɛ ha nyɛ, nɛ ji Yesu ɔ kɛ ba. 21 Nɔ nɛ ɔ ji nɔ nɛ e sa kaa hiɔwe nɛ ngɔ lɛ kɛ to e mi kɛ yaa si be nɛ a maa pee níhi tsuo ehe kaa bɔ nɛ Mawu ngɔ kɛ wo e gbali klɔuklɔu ɔmɛ nɛ a hi si blema a, a nya mi nɛ a de ɔ. 22 Ngɛ anɔkuale mi ɔ, Mose de ke: ‘Yehowa* nyɛ Mawu ɔ ma ha nyɛ gbalɔ ko nɛ́ e ngɛ kaa imi kɛ je nyɛ nyɛmimɛ ɔmɛ a kpɛti.+ E sa nɛ nyɛɛ bu nɔ́ fɛɛ nɔ́ nɛ e ma de nyɛ ɔ tue.+ 23 Niinɛ, nɔ fɛɛ nɔ* nɛ e be jamɛ a Gbalɔ ɔ tue bue ɔ, a ma kpata e hɛ mi kulaa kɛ je ni ɔmɛ a kpɛti.’+ 24 Nɛ gbali ɔmɛ tsuo nɛ a hi si kɛ je Samuel nɔ kɛ ya si ni nɛmɛ nɛ a ba ngɛ e se ɔ a nɔ ɔ, mɛ tsuo a tu ligbi nɛ ɔmɛ a he munyu kɛ tsɔɔ heii.+ 25 Nyɛ ji gbali ɔmɛ kɛ somi ɔ nɛ Mawu kɛ nyɛ nɛmɛ ɔmɛ so ɔ bimɛ,+ benɛ e de Abraham ke: ‘Nɛ kɛ gu o nina a* nɔ ɔ, a maa jɔɔ wekuhi tsuo nɛ a ngɛ zugba a nɔ ɔ.’+ 26 Benɛ Mawu hla e Sɔmɔlɔ ɔ se ɔ, e tsɔ lɛ kɛ ba nyɛ ngɔ kekle,+ konɛ e jɔɔ nyɛ kɛ gu kpalemi nɛ e maa kpale nyɛ ti nɔ fɛɛ nɔ kɛ je e ní peepee yaya amɛ a he ɔ nɔ.”

4 Benɛ mɛ ni enyɔ ɔmɛ a kɛ ni ɔmɛ ngɛ munyu tue ɔ, osɔfo ɔmɛ, sɔlemi we ɔ nɔ hyɛlɔ ɔ, kɛ Saduki bi ɔmɛ+ ba a ngɔ. 2 Nimli nɛ ɔmɛ a mi mi fu, ejakaa bɔfo ɔmɛ ngɛ ni ɔmɛ ní tsɔɔe nɛ a ngɛ jajee kɛ ngɛ mɛ tsɔɔe heii kaa a tle Yesu si kɛ je gbogboehi a kpɛti.+ 3 Enɛ ɔ he ɔ, a nuu mɛ nɛ a wo mɛ tsu+ kɛ ya si e nɔ jena, ejakaa jamɛ a be ɔ mi ɔ, je jɔ momo. 4 Se nihi nɛ a bu munyu ɔ tue ɔ, a kpɛti nihi fuu he ye, nɛ nyumu ɔmɛ a yibɔ ba su maa pee 5,000.+

5 E nɔ jena a, a nɔ yeli ɔmɛ, ma nikɔtɔma amɛ, kɛ womi ngmali ɔmɛ ya kpe ngɛ Yerusalem, 6 Anas,+ nɛ ji osɔfo nɔkɔtɔma a, Kayafa,+ Yohane, Aleksanda, kɛ osɔfo nɔkɔtɔma a wekuli ɔmɛ tsuo hu piɛɛ a he. 7 A ngɔ Petro kɛ Yohane kɛ ba da si ngɛ a kpɛti nɛ a bɔni mɛ sane bimi ke: “Mɛnɔ he wami nya, aloo ngɛ mɛnɔ biɛ mi lɛ nyɛ tsu nɔ́ nɛ ɔ?” 8 Kɛkɛ nɛ Petro nɛ mumi klɔuklɔu ɔ hyi lɛ tɔ ɔ+ de ke:

“Ma nɔ yeli kɛ nikɔtɔmahi, 9 ke mwɔnɛ ɔ, nyɛ ngɛ wɔ sanehi bie ngɛ kpakpa nɛ a pee kɛ ha libɔɔ nɛ ɔ he,+ nɛ nyɛ ngɛ hlae nɛ nyɛɛ le nɔ nɛ e ha nɛ nyumu nɛ ɔ ná he wami ɔ, 10 lɛɛ wa suɔ nɛ nyɛ tsuo kɛ Israelbi ɔmɛ tsuo nɛ́ a le kaa Yesu Kristo, Nazaretno ɔ,+ nɔ nɛ nyɛ gbe lɛ ngɛ tso nɔ,+ se Mawu tle lɛ si kɛ je gbogboehi a kpɛti ɔ,+ e biɛ mi lɛ nyumu nɛ ɔ ná he wami kɛ daa si ngɛ nyɛ hɛ mi ngɛ hiɛ ɔ nɛ. 11 Nɔ nɛ ɔ ji ‘tɛ ɔ nɛ́ nyɛ nɛ́ nyɛ ji tsu mali ɔ, nyɛ bui lɛ kaa se nami ko ngɛ e he nɛ́ e ba pee kɔ nya tɛ titli* ɔ’ nɛ.+ 12 Jehanɛ se hu ɔ, yi wami hemi be nɔ kpa ko mi, ejakaa biɛ kpa ko be+ zugba a nɔ nɛ a kɛ ha ngɛ nimli a kpɛti nɛ e sa kaa a gu nɔ kɛ he wa yi wami.”+

13 Jehanɛ ɔ, benɛ a na bɔ nɛ Petro kɛ Yohane a nya mi tsɔ kɛ* ngɛ munyu tue, nɛ́ a yɔse hu kaa a yɛ sukuu* nɛ a ji nimli guhi kɛkɛ ɔ,+ e pee mɛ nyakpɛ. Nɛ a kɔ se kaa a kɛ Yesu lɛ hi si.+ 14 Benɛ a ngɛ nyumu ɔ nɛ a tsa lɛ nɛ e kɛ mɛ daa si ɔ hyɛe ɔ,+ a li nɔ́ nɛ a ma de.+ 15 Enɛ ɔ he ɔ, a fã mɛ ke a je kpo ngɛ Sanhedri asa a nɔ kɛ ho kpo ɔ nya ya, nɛ a bɔni nɔ́ nɛ a maa pee mɛ ɔ he susumi, 16 a de ke: “Mɛni e sa kaa waa pee nyumu nɛ ɔmɛ?+ Ejakaa, ngɛ anɔkuale mi ɔ, a gu a nɔ kɛ pee okadi ngua ko, nɛ nihi tsuo nɛ a ngɛ Yerusalem ɔ na,+ nɛ wa be nyɛe ma kua. 17 Se bɔ nɛ pee nɛ enɛ ɔ nɛ e ko gbɛ kɛ fia ni ɔmɛ a kpɛti ɔ, nyɛ ha nɛ waa wo a he gbeye nɛ wa de mɛ ke a kɛ nɔ ko nɛ ko tu munyu ngɛ biɛ nɛ ɔ mi hu.”+

18 Kɛkɛ nɛ a tsɛ mɛ kɛ ba, nɛ a wo mɛ mlaa kaa a ko tu munyu ko, nɛ a ko tsɔɔ ní ngɛ Yesu biɛ mi hu. 19 Se Petro kɛ Yohane he nɔ nɛ a de mɛ ke: “Ke e da blɔ ngɛ Mawu hɛ mi kaa a bu nyɛ mohu tue pe Mawu ɔ, nyɛ nitsɛmɛ nyɛɛ kojo. 20 Se wɔɔ lɛɛ wa be nyɛe ma kpa níhi nɛ wa na kɛ níhi nɛ wa nu ɔ he munyu tumi.”+ 21 Lɔ ɔ he ɔ, a wo a he gbeye ekohu nɛ a ngmɛɛ a he akɛnɛ a nɛ nɔ́ ko nɛ a maa da nɔ kɛ gbla a tue ɔ he je, nɛ a ngɛ ni ɔmɛ hu gbeye yee,+ ejakaa ni ɔmɛ tsuo ngɛ Mawu hɛ mi nyami woe ngɛ nɔ́ nɛ ba a he. 22 Ejakaa nyumu ɔ nɛ a tsa lɛ ngɛ nyakpɛ blɔ nɔ nɛ ɔ ye pe jeha 40.

23 Benɛ a ngmɛɛ a he ɔ, a je kɛ ho mɛ nitsɛmɛ a we bi ɔmɛ a ngɔ ya, nɛ a ya bɔ mɛ níhi nɛ osɔfo nikɔtɔma amɛ kɛ ma nikɔtɔma amɛ de mɛ ɔ. 24 Benɛ a nu nɔ́ nɛ ɔ, mɛ tsuo a pee a nya kake nɛ a wo a gbi nɔ nɛ a de Mawu ke:

“Nyɔmtsɛ Matsɛ, mo ji nɔ nɛ bɔ hiɔwe ɔ, kɛ zugba a, kɛ wo ɔ, kɛ níhi tsuo nɛ ngɛ a mi,+ 25 nɛ mo lɛ o gu mumi klɔuklɔu ɔ nɔ nɛ o ha nɛ wa nɛnɛ David,+ o sɔmɔlɔ ɔ kɛ e nya de ke: ‘Mɛni he je nɛ je ma amɛ pee hoo nɛ a ngɛ a yi mi tɛ puee ngɛ yaka níhi a he ɔ? 26 Zugba a nɔ matsɛmɛ ɔmɛ te da si, nɛ nɔ yeli ɔmɛ bua a he nya nɛ a pee kake ngɔ wo Yehowa* kɛ nɔ nɛ e pɔ lɛ nu ɔ* a he.’+ 27 Ejakaa ngɛ anɔkuale mi ɔ, Herode, kɛ Pontio Pilato,+ kɛ nyumuhi nɛ a je je ma amɛ a mi, kɛ Israelbi ɔmɛ bua a he nya ngɛ ma nɛ ɔ mi ngɔ wo o sɔmɔlɔ klɔuklɔu Yesu, nɔ nɛ o pɔ lɛ nu ɔ he,+ 28 a bua a he nya konɛ a pee níhi nɛ o de kɛ fɔ si ɔ. O ngɔ o he wami kɛ ha nɛ ní nɛ ɔmɛ ba mi kaa bɔ nɛ o yi mi tomi ɔ ji ɔ.+ 29 Nɛ amlɔ nɛ ɔ, Yehowa,* hyɛ wa he gbeye nɛ a ngɛ woe ɔ, nɛ́ o ha nɛ wɔ o nyɔguɛ ɔmɛ waa ya nɔ nɛ waa kɛ kã nɛ tu o munyu ɔ, 30 be mi nɛ o kpaa o nine mi konɛ o tsa hiɔhi, kɛ be mi nɛ okadihi kɛ nyakpɛ níhi* hu ngɛ nɔ yae+ kɛ gu o sɔmɔlɔ klɔuklɔu Yesu biɛ mi ɔ.”+

31 Nɛ benɛ a gbe pɛɛ kpami nɛ mi wa nɛ ɔ nya a,* he nɛ a bua a he nya ngɛ ɔ mimiɛ, nɛ mumi klɔuklɔu ɔ hyi mɛ tsuo tɔ,+ nɛ a kɛ kã ngɛ Mawu munyu ɔ tue.+

32 Jehanɛ se hu ɔ, nihi babauu nɛ a he ye ɔ hɛɛ tsui kake kɛ klaa* kake, nɛ a ti nɔ ko nɔ ko be nɛ e deɔ ke níhi nɛ e ngɛ ɔ, lɛɛ e nɔ́, mohu ɔ, níhi tsuo nɛ nɔ ko ngɛ ɔ peeɔ mɛ tsuo a nɔ́.+ 33 Nɛ bɔfo ɔmɛ ngɔ he wami ngua kɛ ya nɔ nɛ a ye Nyɔmtsɛ Yesu si tlemi ɔ he odase,+ nɛ dloomi babauu nitsɛ ngɛ mɛ tsuo a nɔ. 34 Ngɛ anɔkuale mi ɔ, nɔ ko nɔ ko be a kpɛti nɛ nɔ́ ko he hia lɛ,+ ejakaa nihi tsuo nɛ a ngɛ ngmɔhi aloo wehi ɔ, a juaa, nɛ a ngɔɔ nɔ́ nɛ a náa a kɛ baa, 35 nɛ a ngɔɔ kɛ ba pueɔ bɔfo ɔmɛ a nane nya.+ Nɛ a gbaa kɛ haa nɔ fɛɛ nɔ kaa bɔ nɛ e he hia lɛ ɔ.+ 36 Enɛ ɔ he ɔ, Yosef nɛ bɔfo ɔmɛ tsɛɔ lɛ ke Barnaba+ (nɛ e sisi ji, “Bua Womi Bi”), nɛ e ji Levino nɛ e je Kipro ɔ 37 ngɛ zugba ko, nɛ e ya jua nɛ e ngɔ sika a kɛ ba pue bɔfo ɔmɛ a nane nya.+

5 Se nyumu ko nɛ a tsɛɔ lɛ ke Anania kɛ e yo Safira ya jua a zugba ko. 2 Se e ngɔ sika a eko kɛ laa, nɛ e yo ɔ hu le he nɔ́ ko, nɛ e kɛ fã nɛ e piɛ ɔ ba nɛ e kɛ ba pue bɔfo ɔmɛ a nane nya.+ 3 Se Petro bi lɛ ke: “Anania, mɛni he je Satan kplii o tsui nɛ o ye mumi klɔuklɔu ɔ+ lakpa,+ nɛ o ngɔ sika nɛ o ná ngɛ zugba a nɛ o jua a mi ɔ eko kɛ laa a? 4 Be abɔ nɛ e ngɛ o dɛ ɔ, anɛ pi mo nitsɛ o nɔ́ lo? Nɛ benɛ o jua a hu ɔ, tse mo nɔuu lɛ o ngɛ nɔ he wami? Mɛni he je nɛ o susu nɔ́ ko kaa kikɛ nɛ ɔ ngɛ o tsui mi ɔ? Pi adesahi nɛ o ye lakpa a, se mohu Mawu.” 5 Benɛ Anania nu munyu nɛ ɔ, e tsɔ fia si nɛ e gbo. Nɛ gbeye nu nihi tsuo nɛ a nu he ɔ. 6 Kɛkɛ nɛ nihewi ɔmɛ te si, nɛ a ngɔ bohi kɛ blaa lɛ, nɛ a tloo lɛ kɛ je kpo, nɛ a ya pu lɛ.

7 Jehanɛ ɔ, maa pee ngmlɛfia etɛ se ɔ, e yo ɔ hu ba, e li nɔ́ nɛ ya nɔ ɔ. 8 Petro bi lɛ ke: “Mo de mi, anɛ bɔ nɛ nyɛ jua zugba a ha ji nɛ ɔ lo?” E ha heto ke: “Ee, jã nɛ wa jua lɛ.” 9 Lɔ ɔ he ɔ, Petro bi lɛ ke: “Mɛni he je nɛ nyɛ ni enyɔ ɔmɛ nyɛ pee kake kaa nyɛ maa ka Yehowa* mumi ɔ? Hyɛ! Nihi nɛ a ya pu o huno ɔ, a nane si lɛ ngɛ pɛe ngɛ sinya a nya kɛ ma a nɛ, nɛ a maa tloo mo hu kɛ je kpo.” 10 Amlɔ nɔuu nɛ lɛ hu e tsɔ fia si ngɛ Petro nane nya nɛ e gbo. Benɛ nihewi ɔmɛ ba a, a ba na kaa e gbo nɛ a tloo lɛ kɛ je kpo kɛ ho nɛ a ya pu lɛ ngɛ e huno ɔ kasa nya. 11 Enɛ ɔ he ɔ, gbeye nu asafo ɔ tsuo, kɛ nihi tsuo nɛ a nu ní nɛ ɔmɛ a he ɔ.

12 Jehanɛ se hu ɔ, a gu bɔfo ɔmɛ a nine nɔ kɛ ngɛ okadihi kɛ nyakpɛ níhi* fuu pee ngɛ ni ɔmɛ a kpɛti;+ nɛ mɛ tsuo a kpeɔ ngɛ Salomo Ablanaa a nɔ.+ 13 Ngɛ anɔkuale mi ɔ, ni kpa amɛ a ti nɔ ko nɔ ko ná we kã nɛ e ba piɛɛ a he; se kɛ̃ ɔ, ni ɔmɛ ngɛ a he munyu kpakpa tue. 14 Nɔ́ nɛ e pe kulaa a, nyumuhi kɛ yihi babauu nɛ a he Nyɔmtsɛ ɔ ye ɔ ya nɔ nɛ a ba ngɛ a he piɛɛe.+ 15 A ngɔ hiɔtsɛmɛ po kɛ je kpo kɛ ba gbɛjegbɛ ngua amɛ a he nɛ a kɛ mɛ ba fɔ sa tsɔwitsɔwihi a nɔ ngɛ lejɛ ɔ konɛ ke e hí kulaa a, ke Petro bee ɔ, e nini nɛ nɔ a ti ni komɛ a nɔ.+ 16 Jehanɛ se hu ɔ, nihi babauu je mahi nɛ a bɔle Yerusalem ɔ a mi kɛ ngɛ bae. A ngɛ hiɔtsɛmɛ, kɛ nihi nɛ mumi yayami ngɛ mɛ haoe ɔ ngɔe* kɛ ngɛ bae, nɛ a tsa mɛ tsuo.

17 Se osɔfo nɔkɔtɔma a kɛ nihi tsuo nɛ a piɛɛ e he nɛ a ji Saduki kuu ɔ mi bi ɔmɛ te si kɛ da si, nɛ hunga hyi mɛ tɔ. 18 Nɛ a nuu bɔfo ɔmɛ nɛ a wo mɛ tsu ngɛ he nɛ a woɔ ma bi ɔmɛ tsu ngɛ ɔ.+ 19 Se nyɔ ɔ mi ɔ, Yehowa* bɔfo ba bli tsu ɔ nya sinya amɛ,+ nɛ e ngɔ mɛ kɛ je kpo, nɛ e de mɛ ke: 20 “Nyɛɛ ya nɛ nyɛ ya da sɔlemi we ɔ, nɛ́ nyɛɛ ya nɔ nɛ nyɛɛ tu wami nɛ ɔ he munyu ɔ tsuo kɛ tsɔɔ ni ɔmɛ.” 21 Benɛ a nu nɔ́ nɛ ɔ, a sɛ sɔlemi we ɔ benɛ je na a, nɛ a bɔni ní tsɔɔmi.

Benɛ osɔfo nɔkɔtɔma a kɛ nihi nɛ a piɛɛ e he ɔ ba a, a tsɛ Sanhedri bi ɔmɛ kɛ Israel ma nikɔtɔma amɛ tsuo kpe, nɛ a tsɔ kɛ ya tsu womi he ɔ konɛ a ya ngɔ bɔfo ɔmɛ kɛ ba ha mɛ. 22 Se benɛ tsɔli ɔmɛ su lejɛ ɔ, a nɛ mɛ ngɛ tsu ɔ mi. Lɔ ɔ he ɔ, a kpale a se kɛ ba nɛ a ba bɔ amaniɛ. 23 A de ke: “Wa na kaa a ngmɛ tsu ɔ nya sinya amɛ a mi saminya, nɛ buli ɔmɛ daa si ngɛ sinya amɛ a nya, se benɛ wa bli ɔ, wa nɛ nɔ ko nɔ ko ngɛ mi.” 24 Benɛ sɔlemi we ɔ nɔ hyɛlɔ ɔ kɛ osɔfo nikɔtɔma amɛ nu munyu nɛ ɔ, a hɛ mi pee mɛ yaa, nɛ a li nɔ́ nɛ maa je enɛ ɔ mi kɛ ba. 25 Se nɔ ko ba nɛ e ba bɔ mɛ amaniɛ ke: “Nyɛɛ hyɛ! Nyumu ɔmɛ nɛ nyɛ wo mɛ tsu ɔ, a ngɛ sɔlemi we ɔ, a daa si nɛ a ngɛ ni ɔmɛ ní tsɔɔe.” 26 Kɛkɛ nɛ sɔlemi we ɔ nɔ hyɛlɔ ɔ kɛ e tsɔli ɔmɛ pue nɔ kɛ ho nɛ a ya ngɔ mɛ kɛ ba, se a pee we mɛ gidigidi, ejakaa a ngɛ gbeye yee kaa ni ɔmɛ maa fiaa mɛ tɛ.+

27 Enɛ ɔ he ɔ, a ngɔ mɛ kɛ ba nɛ a kɛ mɛ ba da si ngɛ Sanhedri bi ɔmɛ a hɛ mi. Lɔ ɔ se ɔ, osɔfo nɔkɔtɔma a ta a nya mi, 28 nɛ e de mɛ ke: “Wa wo nyɛ si veveeve kaa nyɛ ko ya nɔ nɛ nyɛɛ tsɔɔ ní ngɛ biɛ nɛ ɔ mi hu,+ se nyɛɛ hyɛ! nyɛ ha nɛ Yerusalem hyi tɔ kɛ nyɛ tsɔɔmi ɔ, nɛ nyɛ fia nyɛ pɛɛ si kaa nyɛ maa ngɔ nyumu nɛ ɔ muɔ kɛ ba wa nɔ.”+ 29 Petro kɛ bɔfo kpa amɛ he nɔ nɛ a de ke: “E sa nɛ waa bu Mawu tue kaa nɔ yelɔ mohu pe adesahi.+ 30 Wa nɛmɛ a Mawu ɔ tle Yesu, nɔ nɛ nyɛ sɛu lɛ ngɛ tso nɔ nɛ nyɛ gbe lɛ ɔ si.+ 31 Mawu wo nɔ nɛ ɔ nɔ kɛ ya e hiɔ nɔ+ kaa Hɛ Mi Nyɛɛlɔ Kpanaa+ kɛ Yi Wami Helɔ,+ konɛ e ha nɛ Israel nɛ e ná tsui tsakemi nɛ́ a ngɔ a he yayami ɔmɛ kɛ ke mɛ.+ 32 Nɛ wɔ ji sane nɛ ɔmɛ a he odase yeli,+ nɛ jã kɛ̃ lɛ e ji ngɛ mumi klɔuklɔu ɔ+ nɛ Mawu kɛ ha nihi nɛ a buɔ lɛ tue kaa nɔ yelɔ ɔ hu a blɔ fa mi.”

33 Benɛ a nu nɔ́ nɛ ɔ, a mi mi wo la,* nɛ a hla kaa a maa tane a yi. 34 Se Farisi no ko nɛ a tsɛɔ lɛ ke Gamaliel ɔ+ te si kɛ da si ngɛ Sanhedri bi ɔmɛ a kpɛti; e ji Mlaa tsɔɔlɔ, nɛ ni ɔmɛ tsuo buɔ lɛ wawɛɛ, nɛ e fã ke a je nyumu ɔmɛ kpo be bɔɔ. 35 Lɔ ɔ se ɔ, e de mɛ ke: “Israel nyumuhi, nyɛɛ hyɛ nɛ hi ngɛ nɔ́ nɛ nyɛ to kaa nyɛ maa pee nyumu nɛ ɔmɛ ɔ he. 36 Kaa nɔ hyɛmi nɔ́ ɔ, be ko nɛ be ɔ, Teuda te si nɛ e de ke nɔ ko ji lɛ, nɛ nyumuhi maa pee 400 kɛ a he ya bɔ e kuu ɔ. Se a gbe lɛ, nɛ nihi tsuo nɛ a nyɛɛ e se ɔ gbɛ fia nɛ e kuu ɔ gu. 37 Ngɛ e se ɔ, Yuda, Galileano ɔ hu te si ngɛ biɛ ngmami be ɔ mi, nɛ e gbla nihi babauu kɛ nyɛɛ e se. Jamɛ a nyumu ɔ hu hɛ mi kpata, nɛ nihi tsuo nɛ a nyɛɛ e se ɔ gbɛ fia. 38 Enɛ ɔ he ɔ, ngɛ sane nɛ wa ngɛ he susue amlɔ nɛ ɔ mi ɔ, i ngɛ nyɛ dee ke, nyɛ ko pee nyumu nɛ ɔmɛ nɔ́ ko, mohu ɔ, nyɛɛ ngmɛɛ a he. Ejakaa ke yi mi tomi nɛ ɔ loo ní tsumi nɛ ɔ je adesahi a ngɔ ɔ, e maa gu; 39 Se ke Mawu ngɔ lɛ e je ɔ, lɛɛ nyɛ be nyɛe maa gu lɛ.+ Ke nyɛ pee kaa nyɛ maa gu lɛ ɔ, lɛɛ e ma nyɛ maa ba po kaa nyɛɛ kɛ Mawu nitsɛ lɛ ngɛ hwue ɔ nɛ.”+ 40 Kɛkɛ nɛ a kplɛɛ e ga womi ɔ nɔ, nɛ a tsɛ bɔfo ɔmɛ kɛ ba nɛ a guao mɛ,*+ nɛ a wo mɛ mlaa ke a kpa munyu tumi ngɛ Yesu biɛ mi, nɛ a ngmɛɛ a he nɛ a ho.

41 Lɔ ɔ se ɔ, a je Sanhedri bi ɔmɛ a hɛ mi kɛ ho, nɛ a ngɛ nyae+ kaa ngɛ e biɛ ɔ he je ɔ, a bu mɛ kaa a ji nihi nɛ a sa hɛ mi si puemi. 42 Nɛ daa ligbi ɔ, a yaa sɔlemi we ɔ, nɛ a jeɔ wehi a mi kɛ yaa wehi a mi+ nɛ a yaa nɔ nɛ a tsɔɔ ní, nɛ a jajeɔ sane kpakpa a nɛ e kɔɔ Kristo ɔ, nɛ ji Yesu he ɔ nɛ a kpa we.+

6 Jehanɛ ɔ, jamɛ a be ɔ mi benɛ kaseli ɔmɛ a he ngɛ hiɛe ɔ, Yudabi nɛ a tuɔ Hela gbi ɔ bɔni munyu tumi kɛ si Yudabi nɛ a tuɔ Hebri gbi ɔ, ejakaa yalɔyi ɔmɛ nɛ a tuɔ Hela gbi ɔ a nine sui níhi nɛ a gbaa daa ligbi ɔ eko nɔ.+ 2 Enɛ ɔ he ɔ, Ni Nyɔngma Kɛ Enyɔ ɔmɛ tsɛ kaseli babauu ɔ tsuo kpe, nɛ a de mɛ ke: “E sɛ* kaa wa maa je Mawu munyu ɔ he nɛ wa ya gba niye ní ngɔ pue okplɔɔhi a nɔ.+ 3 Lɔ ɔ he ɔ, nyɛmimɛ, nyɛ nitsɛmɛ nyɛɛ hla nyumuhi kpaago ngɛ nyɛ kpɛti nɛ a ngɛ biɛ kpakpa,*+ nɛ́ mumi hyi mɛ tɔ, nɛ́ a ngɛ juɛmi saminya,+ konɛ waa ngɔ mɛ kɛ da ní tsumi nɛ e he hia nɛ ɔ nya;+ 4 se wɔɔ lɛɛ wa maa tu wa he kɛ ha sɔlemi kɛ Mawu munyu ɔ tsɔɔmi.” 5 Nimli babauu ɔ tsuo a bua jɔ nɔ́ nɛ a de ɔ he, nɛ a hla Stefano, nyumu ko nɛ e hemi kɛ yemi mi wa, nɛ́ mumi klɔuklɔu ɔ hyi lɛ tɔ ɔ, kɛ Filipo,+ Prokoro, Nikanor, Timon, Pamena, kɛ Nikolao, nɛ ji Antiokiano ko nɛ e tsake kɛ ba Yudabi ɔmɛ a jami ɔ mi ɔ. 6 A ngɔ mɛ kɛ ba bɔfo ɔmɛ a ngɔ, nɛ benɛ bɔfo ɔmɛ sɔle ta a, a ngɔ a ninehi kɛ pue a nɔ.+

7 Enɛ ɔ ha nɛ Mawu munyu ɔ ya nɔ nɛ e gbɛ fia,+ nɛ kaseli ɔmɛ a yibɔ ngɛ hɛ mi yae wawɛɛ nitsɛ+ ngɛ Yerusalem; nɛ osɔfohi babauu bɔni hemi kɛ yemi ɔ he pɛtɛmi.+

8 Jehanɛ ɔ, Stefano nɛ Mawu dloomi kɛ he wami hyi lɛ tɔ ɔ ngɛ nyakpɛ ní nguanguahi* kɛ okadihi pee ngɛ ni ɔmɛ a kpɛti. 9 Se nyumu komɛ nɛ a je he ko nɛ a ke a tsɛɔ ke Nyumu He Yeli A Kpe He ɔ ba hɛ mi, nɛ Kirenebi kɛ Aleksandriabi komɛ, kɛ ni komɛ nɛ a je Kilikia kɛ Asia hu piɛɛ a he kɛ ba konɛ a kɛ Stefano nɛ ba sã nya. 10 Se a nyɛ we nɛ a da juɛmi kɛ mumi nɛ e kɛ ngɛ munyu tue ɔ nya.+ 11 Enɛ ɔ he ɔ, a ya plɛ ni komɛ a yi mi ngɛ laami mi kaa a ba de ke: “Wa nu nɛ e ngɛ musu bɔmi munyuhi tue kɛ ngɛ Mose kɛ Mawu sie.” 12 Nɛ a su ni ɔmɛ, nikɔtɔma amɛ, kɛ womi ngmali ɔmɛ ngɔ wo e he, nɛ a bu kɛ ba e nɔ tlukaa, nɛ a ba nu lɛ pani nya, nɛ a ngɔ lɛ kɛ ho Sanhedri bi ɔmɛ a ngɔ ya. 13 Nɛ a ngɔ lakpa odase yeli kɛ ba, nɛ a ba de ke: “Nɔmlɔ nɛ ɔ ngɛ munyuhi tue kɛ ngɛ he klɔuklɔu nɛ ɔ kɛ Mlaa a sie, nɛ e kpa we. 14 Kaa nɔ hyɛmi nɔ́ ɔ, wa nu nɛ e ngɛ dee ke Yesu, Nazaretno ɔ maa ku sɔlemi we ɔ ngɔ pue si, nɛ e ma tsake kusumihi nɛ Mose si kɛ ha wɔ ɔ.”

15 Nɛ benɛ ni ɔmɛ nɛ a hii si ngɛ Sanhedri ɔ tsuo muɔɔ a hɛngmɛ ngɔ pue e nɔ ɔ, a na kaa e hɛ mi pee kaa Mawu bɔfo ko hɛ mi.

7 Se osɔfo nɔkɔtɔma a bi ke: “Anɛ ní nɛ ɔmɛ ngɛ mi jã lo?” 2 Stefano ha heto ke: “Nyumuhi, nyɛmimɛ kɛ tsɛmɛ, nyɛɛ bu tue. Loko wa nɛnɛ Abraham maa hia kɛ ya hi Haran ɔ,+ Mawu nɛ e hɛ mi ngɛ nyami ɔ je e he kpo kɛ tsɔɔ lɛ ngɛ Mesopotamia, 3 nɛ e de lɛ ke: ‘Moo je o zugba a nɔ kɛ o wekuli ɔmɛ a he, nɛ o ba zugba nɛ ma tsɔɔ mo ɔ nɔ.’+ 4 Kɛkɛ nɛ e hia kɛ je Kaldeabi ɔmɛ a zugba a nɔ, nɛ e ya hi Haran. Nɛ ngɛ e tsɛ ɔ gbenɔ se ɔ,+ e hia kɛ je lejɛ ɔ, nɛ Mawu ha nɛ e ba hi zugba nɛ nyɛ ngɛ nɔ amlɔ nɛ ɔ nɔ.+ 5 Se kɛ̃ ɔ, Mawu ha we lɛ he ko he ko ngɛ zugba a nɔ kaa weto ní, dɛbi, e ha we lɛ nane mami he kake po; se e wo lɛ si kaa e maa ngɔ kɛ ha lɛ kaa e weto ní, nɛ ngɛ e se ɔ, e maa ngɔ kɛ ha e nina,*+ pohu jamɛ a be ɔ mi ɔ, e be bi ko lolo. 6 Jehanɛ se hu ɔ, Mawu de lɛ kaa e nina* maa pee ma se bi ngɛ zugba ko nɛ pi a nɔ́ ɔ nɔ, nɛ ni ɔmɛ maa pee mɛ nyɔguɛ, nɛ a maa wa mɛ yi mi* jeha 400.+ 7 Mawu de ke: ‘Nɛ ma kojo jamɛ a ma a nɛ́ a ma ya sɔmɔ ɔ,+ nɛ ngɛ ní nɛ ɔmɛ a se ɔ, a maa je jamɛ a ma a mi, nɛ a ma ba sɔmɔ mi ngɛ blɔ klɔuu nɔ ngɛ hiɛ ɔ.’+

8 “Jehanɛ se hu ɔ, e kɛ lɛ so nɔ pomi somi,+ nɛ e ba fɔ Isak+ nɛ e po lɛ ngɛ ligbi nɛ ji kpaanyɔ ɔ nɔ,+ nɛ Isak hu ba fɔ* Yakob, nɛ Yakob hu ba fɔ wekuyi* 12 ɔmɛ. 9 Nɛ wekuyi ɔmɛ a hɛ kɔ Yosef+ nɔ nɛ a jua lɛ kɛ ho Egipt ya.+ Se Mawu piɛɛ e he,+ 10 nɛ e kpɔ̃ lɛ ngɛ e we amanehlu ɔmɛ tsuo a mi, nɛ e ha nɛ e hɛ mi ba nyami ngɛ Egipt matsɛ Farao hɛ mi, nɛ e ha lɛ juɛmi hulɔ. Nɛ Farao ngɔ Egipt kɛ e we ɔ tsuo ngɔ wo e dɛ.+ 11 Se hwɔ ba Egipt kɛ Kanaan tsuo, ee, amanehlu ngua, nɛ wa nɛmɛ ɔmɛ nɛ́ nɔ́ ko nɛ a maa ye.+ 12 Se Yakob nu kaa niye ní* ngɛ Egipt, nɛ e tsɔ wa nɛmɛ ɔmɛ kɛ ya lejɛ ɔ kekleekle nɔ́.+ 13 Benɛ e tsɔ mɛ si enyɔne ɔ, Yosef je e he si ha e nyɛminyumu ɔmɛ, nɛ Farao ba le Yosef weku ɔ.+ 14 Enɛ ɔ he ɔ, Yosef ngɔ sɛ gbi kɛ mane nɛ a ya ngɔ e tsɛ Yakob kɛ e wekuli ɔmɛ tsuo kɛ je lejɛ ɔ,+ mɛ* tsuo a yibɔ ji 75.+ 15 Enɛ ɔ he ɔ, Yakob kple kɛ ho Egipt ya,+ nɛ e ya gbo ngɛ lejɛ ɔ,+ nɛ jã kɛ̃ lɛ e ba ngɛ wa nɛmɛ ɔmɛ hu a blɔ fa mi.+ 16 A tloo mɛ kɛ ba Shekem nɛ a ba to mɛ ngɛ yɔkɔ ɔ nɛ Abraham ngɔ sika hiɔ fuu kɛ he ngɛ Hamor binyumu ɔmɛ a dɛ ngɛ Shekem ɔ mi.+

17 “Benɛ e piɛ bɔɔ nɛ Mawu maa ye si womi ɔ nɛ e fia he adafi kɛ tsɔɔ Abraham ɔ nɔ ɔ, ni ɔmɛ a he ba hiɛ babauu nitsɛ ngɛ Egipt 18 hluu kɛ ya si be nɛ matsɛ kpa ba ye Egipt nɔ, nɛ lɛɛ lɛɛ e li Yosef.+ 19 Nɔ nɛ ɔ lɛɛ e gu ga blɔ nɔ kɛ ye wa we bi ɔmɛ a nɔ, nɛ e nyɛ wa nɛmɛ ɔmɛ a nɔ ngɛ blɔ nɛ dɛ nɔ kaa a kua a bimwɔwi ɔmɛ konɛ a ko baa a yi.+ 20 Jamɛ a be ɔ mi lɛ a fɔ Mose ɔ nɛ, nɛ e he ngɛ fɛu saminya ngɛ Mawu hɛ mi. Nɛ a hyɛ e nɔ* ngɛ e tsɛ we ɔ nyɔhiɔ etɛ.+ 21 Se benɛ a ya ngmɛɛ e he kɛ fɔ he ko ɔ,*+ Farao biyo ɔ ngɔ lɛ nɛ e ya tsɔse lɛ kaa lɛ nitsɛ e binyumu.+ 22 Enɛ ɔ he ɔ, a tsɔɔ Mose Egipt nile ɔ tsuo. Ngɛ anɔkuale mi ɔ, he wami ngɛ e munyuhi kɛ e ní peepeehi a mi.+

23 “Jehanɛ ɔ, benɛ e ye jeha 40 ɔ, e ba e tsui mi* kaa e ma ya slaa* e nyɛmimɛ Israelbi ɔmɛ.+ 24 Benɛ e hɛngmɛ gba a kpɛti nɔ kake nɔ nɛ a ngɛ lɛ yi mi wae ɔ, e ya fã e he, nɛ e gbe Egiptno ɔ kɛ ye lue ha nɔ nɛ a ngɛ lɛ níhi nɛ sɛ pee ɔ. 25 E susu kaa e nyɛmimɛ ɔmɛ maa nu sisi kaa Mawu ngɛ e nine nɔ gue kɛ he a yi wami, se a ya nui sisi jã. 26 E nɔ jena a, e ya je kpo ngɛ a ngɔ nɛ e na a ti nihi enyɔ nɛ a ngɛ kunɔ nɔe, nɛ e bɔ mɔde kaa e ma kpata mɛ, nɛ e de mɛ ke: ‘Nyumuhi, nyɛmimɛ ji nyɛ. Mɛni he je nɛ nyɛ ngɛ nyɛ sibi yi mi wae ɔ?’ 27 Se nɔ nɛ e ngɛ e nyɛmi ɔ yi mi wae ɔ tsitsɛɛ lɛ kɛ ya se, nɛ e bi lɛ ke: ‘Mɛnɔ hla mo kaa nɔ yelɔ kɛ kojolɔ ngɛ wa nɔ? 28 Anɛ o ngɛ hlae nɛ o maa gbe mi kaa bɔ nɛ o gbe Egiptno ɔ hiɛ ɔ lo?’ 29 Benɛ Mose nu nɔ́ nɛ ɔ, e tu fo nɛ e ya hi si kaa nubwɔ ngɛ Midian zugba a nɔ, nɛ e fɔ binyumuhi enyɔ ngɛ lejɛ ɔ.+

30 “Jeha 40 se ɔ, bɔfo ko je e he kpo ngɔ tsɔɔ lɛ ngɛ la lilɛ mi ngɛ mio tso ko nɛ e ngɛ sãe ɔ mi, ngɛ nga a nɔ ngɛ Sinai Yoku ɔ he.+ 31 Benɛ Mose na nɔ́ nɛ ɔ, e pee lɛ nyakpɛ. Se benɛ e ngɛ nɔ́ ɔ he sue konɛ e kpa lɛ si ɔ, e nu Yehowa* gbi nɛ́ e de ke: 32 ‘Imi ji o nɛmɛ ɔmɛ a Mawu ɔ, nɛ ji Abraham kɛ Isak kɛ Yakob a Mawu ɔ nɛ.’+ Mose he bɔni domi blibliibli nɛ e jlo we lɛ kaa e ma kpa nɔ́ ɔ si hu. 33 Yehowa* de lɛ ke: ‘Mo je tokota amɛ ngɛ o nane, ejakaa zugba klɔuklɔu nɔ lɛ o daa si ngɛ ɔ nɛ. 34 Ngɛ anɔkuale mi ɔ, amanehlu nɛ ye we bi ɔmɛ ngɛ nae ngɛ Egipt ɔ, i na, nɛ kɛmɛmi nɛ a ngɛ kɛmɛe ɔ hu, i nu,+ nɛ i kple si kɛ ba konɛ ma ba kpɔ̃ mɛ. Amlɔ nɛ ɔ, ba nɛ ma tsɔ mo kɛ ya Egipt.’ 35 Mose nɛ ɔ nɔuu nɛ́ a kua lɛ nɛ́ a bi lɛ ke: ‘Mɛnɔ hla mo kaa nɔ yelɔ kɛ kojolɔ?’ ɔ,+ lɛ nɔuu lɛ Mawu gu bɔfo ɔ nɛ e je e he kpo ngɔ tsɔɔ lɛ ngɛ mio tso ɔ he ɔ nɔ kɛ tsɔ lɛ+ kaa nɔ yelɔ kɛ kpɔlɔ tsuo ɔ nɛ. 36 Nyumu nɛ ɔ nyɛɛ a hɛ mi+ kɛ je Egipt, nɛ e pee nyakpɛ níhi* kɛ okadihi ngɛ Egipt,+ kɛ Wo Tsu ɔ he,+ kɛ nga a nɔ jeha 40.+

37 “Mose nɛ ɔ lɛ e de Israelbi ɔmɛ ke: ‘Mawu ma ha nyɛ gbalɔ ko nɛ́ e ngɛ kaa imi kɛ je nyɛ nyɛmimɛ ɔmɛ a kpɛti’ ɔ nɛ.+ 38 Mose nɛ ɔ ji nɔ nɛ e piɛɛ asafo ɔ he ngɛ nga a nɔ, nɛ́ bɔfo ɔ+ kɛ lɛ kɛ wa nɛmɛ ɔmɛ tu munyu+ ngɛ Sinai Yoku ɔ nɔ, nɛ́ e nine su munyuhi nɛ a ngɛ klɔuklɔu nɛ a hɛ ngɛ ɔ nɔ, nɛ́ e kɛ ha wɔ ɔ nɛ.+ 39 Wa nɛmɛ ɔmɛ bui lɛ tue, mohu ɔ, a tsitsɛɛ lɛ kɛ ya se,+ nɛ a kpale a se kɛ ho Egipt ya ngɛ a tsui mi,+ 40 nɛ a de Aaron ke: ‘Pee mawuhi ha wɔ konɛ a nyɛɛ wa hɛ mi. Ejakaa wa li nɔ́ nɛ ya pee Mose nɛ ɔ nɛ e nyɛɛ wa hɛ mi kɛ je Egipt zugba a nɔ ɔ.’+ 41 Enɛ ɔ he ɔ, a pee na bi ko ngɛ jamɛ a be ɔ mi, nɛ a sã afɔlehi kɛ ha amaga a, nɛ a bɔni mɛ nitsɛmɛ a nine nya ní tsumihi a he bua jɔmi nami.+ 42 Enɛ ɔ ha nɛ Mawu je a se, nɛ e ngmɛɛ a he nɛ a sɔmɔ hiɔwe tabo ɔ+ kaa bɔ nɛ a ngma ngɛ gbali ɔmɛ a womi ɔ mi ɔ. A ngma ke: ‘Oo Israel we, anɛ imi lɛ nyɛ ngɔ níhi kɛ ha, nɛ nyɛ sã afɔlehi kɛ ha jeha 40 ngɛ nga a nɔ ɔ lo? 43 Nyɛ ngɔ Molok+ bo tsu ɔ kɛ mawu Refan dodoe ɔ, nɛ ji amagahi nɛ nyɛ pee nɛ nyɛ ja mɛ ɔ mohu, nɛ nyɛ tloo. Enɛ ɔ he ɔ, ma fia nyɛ nane si tu kɛ ya Babilon se lokoo.’+

44 “Wa nɛmɛ ɔmɛ a nine su odase yemi bo tsu ɔ nɔ ngɛ nga a nɔ, nɛ a pee lɛ kaa bɔ nɛ Nɔ nɛ e kɛ Mose tu munyu ɔ tsɔɔ lɛ ke e pee ɔ, nɛ e pee nɔ́ nɛ e na a henɔ pɛpɛɛpɛ.+ 45 Nɛ e ba pee wa nɛmɛ ɔmɛ a nɔ́, nɛ Yoshua piɛɛ a he nɛ a ngɔ kɛ ba je ma amɛ+ nɛ Mawu fie mɛ kɛ je wa nɛmɛ ɔmɛ a hɛ mi ɔ a zugba a nɔ.+ Hiɛ ɔ lɛ e hi hluu kɛ ba su David ligbi ɔmɛ a mi. 46 David hɛ mi ba nyami ngɛ Mawu hɛ mi, nɛ e bi ke a ha lɛ he blɔ nɛ e pee sihi he ko kɛ ha Yakob Mawu ɔ.+ 47 Se Salomo mohu ji nɔ nɛ e ma we kɛ ha lɛ.+ 48 Se Hiɔwe Lokoo No ɔ hí wehi nɛ a kɛ nine ma a mi,+ kaa bɔ nɛ gbalɔ ɔ de ɔ, e de ke: 49 ‘Hiɔwe ɔ ji ye matsɛ sɛ,+ nɛ zugba a ji nɔ́ nɛ i kɛ ye nane maa nɔ,+ Yehowa* lɛ de. Lɛɛ mɛni we lɛ nyɛ ma nyɛ maa ma ha mi mɔ? Aloo jije ji ye he jɔɔmi he? 50 Anɛ pi imi nitsɛ ye nine nɛ́ i kɛ pee ní nɛ ɔmɛ tsuo lo?’+

51 “Nyumuhi nɛ nyɛ tue mi ti, tsui kɛ tue mɔmlɔtɔtsɛmɛ, be fɛɛ be ɔ, nyɛ ngɛ mumi klɔuklɔu ɔ nya tsie; kaa bɔ nɛ nyɛ nɛmɛ ɔmɛ pee ɔ, jã kɛ̃ lɛ nyɛ hu nyɛ ngɛ pee.+ 52 Gbali ɔmɛ a kpɛti mɛnɔ lɛ nyɛ nɛmɛ ɔmɛ wɛ lɛ yi mi?+ Ee, a gbe nihi nɛ a sɛ hlami nɛ́ a fia dalɔ ɔ nɛ e ma a he adafi ɔ,+ nɛ amlɔ nɛ ɔ, nyɛ ba plɛ jamɛ a nɔ ɔ se blɔ tsɔɔli kɛ e gbeli,+ 53 nyɛ nihi nɛ nyɛ nine su Mlaa a nɔ kaa bɔ nɛ a gu hiɔwe bɔfohi a nɔ kɛ ha,+ se nyɛ yi nɔ ɔ.”

54 Benɛ a nu ní nɛ ɔmɛ ɔ, a tsui wo la,* nɛ a bɔni a lungu nya kpemi kɛ bɔni e he womi. 55 Se lɛɛ lɛɛ mumi klɔuklɔu ɔ hyi lɛ tɔ nɛ e hyɛ hiɔwe too, nɛ e na Mawu hɛ mi nyami ɔ kɛ Yesu nɛ e daa si ngɛ Mawu hiɔ nɔ,+ 56 nɛ e de ke: “Hyɛ! i na nɛ hiɔwe nya bli, nɛ i na nɔmlɔ Bi ɔ+ nɛ e daa si ngɛ Mawu hiɔ nɔ.”+ 57 Enɛ ɔ ha nɛ a kpa ngmlaa wawɛɛ, nɛ a ngɔ a ninehi kɛ tsi a tue nɛ mɛ tsuo a bu kɛ ya e nɔ. 58 Benɛ a tsitsɛɛ lɛ kɛ je kpo kɛ ya ma a se ɔ, a bɔni lɛ tɛ fiaami.+ Odase yeli ɔmɛ+ ngɔ tadehi nɛ a wo ngɛ a tade ɔmɛ a nɔ ɔ kɛ pue niheyo ko nɛ a tsɛɔ lɛ ke Saulo ɔ nane nya.+ 59 Benɛ a ngɛ Stefano tɛ ɔ fiaae ɔ, e kpa pɛɛ ke: “Nyɔmtsɛ Yesu, moo ngɔ ye mumi ɔ.” 60 Kɛkɛ nɛ e kplã si, nɛ e kɛ gbi nɛ he wa kpa ngmlaa ke: “Yehowa,* o kɛ mɛ nɛ ko ye ngɛ yayami nɛ ɔ he.”+ Nɛ benɛ e de nɔ́ nɛ ɔ ta a, e gbo.*

8 Saulo lɛɛ, e fĩ gbemi nɛ a gbe lɛ ɔ se.+

Jamɛ a ligbi ɔ, a bɔni asafo ɔ nɛ ngɛ Yerusalem ɔ yi mi wami wawɛɛ; nɛ mɛ tsuo a gbɛ fia Yudea kɛ Samaria kpokpa amɛ a nɔ, nɛ e piɛ bɔfo ɔmɛ pɛ.+ 2 Se nyumu komɛ nɛ a yeɔ Mawu gbeye ɔ tloo Stefano gbogboe ɔ kɛ ho nɛ a ya pu, nɛ a fo e he ya wawɛɛ. 3 Se Saulo lɛɛ, e bɔni asafo ɔ tuami. E jeɔ we kake mi kɛ yaa we kpa mi, nɛ e ya gblaa nyumuhi kɛ yihi tsuo, nɛ e haa nɛ a woɔ mɛ tsu.+

4 Se nihi nɛ a gbɛ fia a ya kpa zugba a tsuo nɔ, nɛ a ngɛ Mawu munyu ɔ he sane kpakpa a jajee.+ 5 Jehanɛ ɔ, Filipo kple kɛ ya Samaria ma a mi,*+ nɛ e bɔni Kristo ɔ he sane fiɛɛmi ha mɛ. 6 Asafo kuu ɔmɛ pee kake nɛ a ngɛ Filipo munyu ɔ tue bue benɛ a nu, nɛ́ a na okadihi nɛ e ngɛ pee ɔ. 7 Ejakaa mumihi nɛ a he tsɔ we ngɛ a ti nihi fuu a mi, nɛ mumi nɛ ɔmɛ kɛ gbi nɛ nya wa kpaa ngmlaa, kɛkɛ a je a mi.+ Jehanɛ hu ɔ, e tsa nihi nɛ́ a hule kɛ glɔtsɛmɛ* babauu. 8 Enɛ ɔ he ɔ, bua jɔmi babauu ba jamɛ a ma a mi.

9 Jamɛ a be ɔ mi ɔ, nyumu ko ngɛ jamɛ a ma a mi nɛ a tsɛɔ lɛ ke Simon, e tsuɔ kunya, nɛ e haa nɛ Samariabi ɔmɛ a nya kpɛɔ a he, nɛ e tsɔɔ kaa nɔmlɔ ngua ko ji lɛ. 10 Mɛ tsuo, kɛ je nɔ nyafii pe kulaa nɔ kɛ ya si nɔ ngua pe kulaa nɔ ɔ, a buɔ lɛ tue nɛ a deɔ ke: “Nyumu nɛ ɔ ji Mawu He Wami ɔ nɛ a tsɛɔ ke Ngua a nɛ.” 11 Enɛ ɔ he ɔ, a buɔ lɛ tue, ejakaa e ha nɛ a nya kpɛ a he be saii kɛ gu e kunya tsumi ɔ nɔ. 12 Se benɛ Filipo ba jaje Mawu Matsɛ Yemi ɔ he sane kpakpa a+ kɛ Yesu Kristo biɛ ɔ, a he lɛ ye, nɛ nyumuhi kɛ yihi tsuo ha nɛ a baptisi mɛ.+ 13 Simon nitsɛ hu ba he ye, nɛ benɛ a baptisi lɛ se ɔ, e ya nɔ nɛ e piɛɛ Filipo he;+ nɛ e nya kpɛ e he ngɛ okadihi kɛ he wami ní tsumi nguanguahi nɛ ngɛ nɔ yae ɔ he.

14 Benɛ bɔfo ɔmɛ nɛ a ngɛ Yerusalem ɔ nu kaa Samariabi ɔmɛ pɛtɛ Mawu munyu ɔ he ɔ,+ a tsɔ Petro kɛ Yohane kɛ ya a ngɔ; 15 nɛ a kple kɛ ho nɛ a ya sɔle ha mɛ konɛ a ná mumi klɔuklɔu ɔ.+ 16 Ejakaa mumi klɔuklɔu ɔ bɛ a ti nɔ ko nɔ ko nɔ lolo, se baptisimi pɛ lɛ a baptisi mɛ ngɛ Nyɔmtsɛ Yesu biɛ ɔ mi.+ 17 Kɛkɛ nɛ a ngɔ a ninehi kɛ pue a nɔ,+ nɛ a bɔni mumi klɔuklɔu ɔ nami.

18 Jehanɛ ɔ, benɛ Simon na kaa bɔfo ɔmɛ a ninehi nɛ́ a kɛ pue a nɔ ɔ lɛ ha nɛ a ná mumi ɔ, e je sika nɛ́ e kɛ ma ha mɛ, 19 nɛ e de ke: “Imi hu nyɛ ha mi he wami nɛ ɔ eko, konɛ nɔ fɛɛ nɔ nɛ ma ngɔ ye ninehi kɛ pue e nɔ ɔ, e ná mumi klɔuklɔu ɔ.” 20 Se Petro de lɛ ke: “O kɛ o sika hiɔ ɔ tsuo nyɛ hɛ mi nɛ kpata, ejakaa o susu kaa o ma nyɛ maa ngɔ sika kɛ he nike ní nɛ Mawu kɛ haa faa a.+ 21 O be blɔ nya loo blɔ fa mi nɔ́ ko ngɛ sane nɛ ɔ mi, ejakaa o tsui dɛ ngɛ Mawu hɛ mi. 22 Lɔ ɔ he ɔ, tsake o tsui ngɛ o yayami nɛ ɔ he, nɛ o kpa Yehowa* pɛɛ wawɛɛ kaa ke e maa hi ɔ, e ngɔ o tsui mi susumi yayami nɛ ɔ kɛ ke mo; 23 ejakaa i na kaa o ji duɔ nɛ dooɔ kɛ yayami nyɔguɛ.” 24 Simon he nɔ nɛ e de mɛ ke: “Nyɛ kpa Yehowa* pɛɛ wawɛɛ ha mi konɛ níhi nɛ nyɛ de nɛ ɔ ekoeko nɛ e ko ba ye nɔ.”

25 Enɛ ɔ he ɔ, benɛ a ye odase kɛ pi si nɛ a tu Yehowa* munyu ɔ ta a, a kpale ma blɔ nɔ kɛ yaa Yerusalem, nɛ a ya ngɛ sane kpakpa a jajee ngɛ Samaria kɔpe ɔmɛ fuu a mi.+

26 Se Yehowa* bɔfo ko+ kɛ Filipo tu munyu, nɛ e de lɛ ke: “Tee si nɛ o ya wo yi je ngɛ gbɛjegbɛ nɛ e kple kɛ je Yerusalem kɛ yaa Gaza a nɔ.” (E ji zia zugba nɔ gbɛjegbɛ.) 27 Kɛkɛ nɛ e te si, nɛ e pue nɔ kɛ ho, nɛ hyɛ! e ya na Etiopia nyumu ko nɛ́ e ji sɔmɔlɔ nɔkɔtɔma,* nɛ́ e hɛɛ blɔ nya ngɛ Etiopia manyɛ Kandake sisi, nɛ e ji manyɛ ɔ juetlihi tsuo a nɔ hyɛlɔ. E ya Yerusalem nɛ e ya ja Mawu,+ 28 nɛ e kpale kɛ yaa, nɛ e hii si ngɛ e ta zugba lɛ mi, nɛ e wo e gbi nɔ kɛ ngɛ gbalɔ Yesaya womi ɔ kanee. 29 Enɛ ɔ he ɔ, mumi ɔ de Filipo ke: “Nyɛɛ ta zugba lɛ ɔ se nɛ o ya ná lɛ.” 30 Benɛ Filipo ngɛ fo tue ngɛ e kasa nya a, e nu nɛ e wo e gbi nɔ kɛ ngɛ gbalɔ Yesaya womi ɔ kanee, nɛ e bi lɛ ke: “Anɛ o ngɛ nɔ́ nɛ o ngɛ kanee ɔ sisi nue saminya lo?” 31 E de ke: “Ngɛ anɔkuale mi ɔ, ke nɔ ko yi bua we mi ɔ, kɛ ma plɛ kɛ nu sisi kɛɛ?” Enɛ ɔ he ɔ, e kpa Filipo pɛɛ kaa e kuɔ nɛ e ba hi si ngɛ e kasa nya. 32 Munyu nɛ e ngɛ kanee ngɛ Ngmami ɔ mi ɔ ji nɛ ɔ nɛ: “A ngɔ lɛ kɛ ho kaa jijɔ bi nɛ a yaa gbe lɛ, nɛ kaa bɔ nɛ jijɔ bi peeɔ kpoo ngɛ e he bwɔmi sãlɔ hɛ mi ɔ, jã nɔuu nɛ lɛ hu e kpɛ we e kuɛ si.+ 33 Benɛ a ngɛ e hɛ mi si puee ɔ, a yi dami sane ha lɛ.+ Mɛnɔ maa tsɔɔ e yi nɔ ɔ mi fitsofitso? Ejakaa a ngɔ e wami kɛ je zugba a nɔ.”+

34 Kɛkɛ nɛ nyumu ɔ nɛ e ji sɔmɔlɔ nɔkɔtɔma a* bi Filipo ke: “I kpa mo pɛɛ, mɛnɔ he munyu lɛ gbalɔ ɔ tu ɔ? Lɛ nitsɛ e he, aloo nyumu kpa ko?” 35 Filipo bɔni munyu tumi, nɛ e je sisi kɛ je ngmami nɛ ɔ nɔ, nɛ e jaje Yesu he sane kpakpa a kɛ tsɔɔ lɛ. 36 Jehanɛ ɔ, benɛ a ngɛ gbɛjegbɛ ɔ nɔ kɛ yaa a, a ba su nyu ko he; nɛ sɔmɔlɔ nɔkɔtɔma a* de ke: “Hyɛ! Nyu ji nɛ ɔ nɛ; mɛni tsiɔ ye baptisimi nya?” 37* —— 38 Kɛkɛ nɛ e fã ke ta zugba lɛ ɔ nɛ e da si, nɛ Filipo kɛ sɔmɔlɔ nɔkɔtɔma a* tsuo kple si kɛ sɛ nyu ɔ mi, nɛ e baptisi lɛ. 39 Benɛ a je kpo kɛ je nyu ɔ mi ɔ, oya nɔuu nɛ Yehowa* mumi ɔ ngɔ Filipo kɛ je, nɛ sɔmɔlɔ nɔkɔtɔma a* nɛ́ lɛ hu, se e pue nɔ kɛ ho kɛ bua jɔmi. 40 Se Filipo lɛɛ, e ya je kpo ngɛ Ashdod, nɛ e jaje sane kpakpa a ngɛ mahi tsuo nɛ a ngɛ jamɛ a zugba kpɔ ɔ mi ɔ a mi hluu kɛ ya si be nɛ e ya su Kaisarea.+

9 Se loloolo ɔ, Saulo ngɛ Nyɔmtsɛ ɔ kaseli ɔmɛ a he gbeye woe kaa e maa gbe mɛ,+ nɛ e pue nɔ kɛ ho osɔfo nɔkɔtɔma a ngɔ ya 2 nɛ e ya bi kaa e ha lɛ sɛ womi nɛ e kɛ ya kpe he ɔmɛ nɛ a ngɛ Damasko ɔ, konɛ e nyɛ nɛ e nuu nɔ fɛɛ nɔ,* nyumuhi kɛ yihi tsuo nɛ a piɛɛ Blɔ ɔ he ɔ,+ nɛ́ e ngɔ mɛ kɛ ba Yerusalem.

3 Jehanɛ ɔ, benɛ e ngɛ blɔ nɔ kɛ yaa nɛ e piɛ bɔɔ nɛ e maa su Damasko ɔ, tlukaa a, la ko kpɛ kɛ je hiɔwe kɛ ba bɔle lɛ,+ 4 nɛ e nɔ si ngɛ zugba, nɛ e nu nɛ gbi ko de lɛ ke: “Saulo, Saulo, mɛni he je nɛ o ngɛ mi yi mi wae ɔ?” 5 E bi ke: “Nyɔmtsɛ, mo mɛnɔ?” E de ke: “Imi ji Yesu,+ nɔ nɛ o ngɛ lɛ yi mi wae ɔ.+ 6 Tee si nɛ o ho ma a mi ya, nɛ a maa tsɔɔ mo nɔ́ nɛ e sa kaa o pee.” 7 Jehanɛ ɔ, nyumuhi nɛ a kɛ lɛ ngɛ blɔ ɔ hiae ɔ daa si nɛ a nyɛ we nɛ a tu munyu, ngɛ anɔkuale mi ɔ, a ngɛ gbi ɔ nue, se a nɛ nɔ ko.+ 8 Kɛkɛ nɛ Saulo te si ngɛ zugba. E ngɛ mi kaa e hɛngmɛ ɔmɛ pueɔ si ngɛ nɔ mohu lɛɛ, se e nɛ nɔ́ ko nɔ́ ko. Enɛ ɔ he ɔ, a pɛtɛ e nine he nɛ a ngɔ lɛ kɛ ba Damasko. 9 Nɛ ligbi etɛ sɔuu ba be nɛ́ e hyɛ we nɔ́,+ e yi ní, nɛ e nui nɔ́ ko hulɔ.

10 Kaselɔ ko ngɛ Damasko nɛ a tsɛɔ lɛ ke Anania,+ nɛ Nyɔmtsɛ ɔ tsɛ lɛ ngɛ nina mi ke: “Anania!” Nɛ e he nɔ ke: “Nyɔmtsɛ, i ngɛ hiɛ ɔ.” 11 Nyɔmtsɛ ɔ de lɛ ke: “Tee si, yaa blɔ ɔ nɛ a tsɛɔ ke Tlɔmɔɔ ɔ nɔ, nɛ o ya hla nyumu ko nɛ a tsɛɔ lɛ ke Saulo nɛ e je Tarso ɔ,+ ngɛ Yuda we ɔ mi. Ejakaa hyɛ! e ngɛ sɔlee, 12 nɛ ngɛ nina ko mi ɔ, e na kaa nyumu ko nɛ a tsɛɔ lɛ ke Anania a ba e ngɔ, nɛ e ba ngɔ e ninehi kɛ pue e nɔ konɛ e hyɛ nɔ́ ekohu.”+ 13 Se Anania he nɔ nɛ e de lɛ ke: “Nyɔmtsɛ, i nu nyumu nɛ ɔ he sane ngɛ nihi fuu a nya kaa e pee o ni klɔuklɔu ɔmɛ nɛ a ngɛ Yerusalem ɔ yiwutso níhi babauu. 14 Nɛ hiɛ ɔ hu e ná he wami kɛ je osɔfo nikɔtɔma amɛ a ngɔ konɛ e ba nuu* nihi tsuo nɛ a tsɛɔ o biɛ ɔ.”+ 15 Se Nyɔmtsɛ ɔ de lɛ ke: “Moo ya! Ejakaa nyumu nɛ ɔ ji buɛ nɛ a hla kɛ ha mi+ konɛ e ngɔ ye biɛ ɔ kɛ ya ha je ma amɛ,+ kɛ matsɛmɛ,+ kɛ Israelbi ɔmɛ. 16 Ejakaa ma tsɔɔ lɛ amanehlu babauu nɛ e sa kaa e na ngɛ ye biɛ ɔ he ɔ heii.”+

17 Enɛ ɔ he ɔ, Anania pue nɔ kɛ ho nɛ e ya sɛ we ɔ mi, nɛ e ngɔ e ninehi kɛ pue e nɔ nɛ e de ke: “Ye nyɛmi Saulo, Nyɔmtsɛ Yesu, nɔ nɛ e je e he kpo kɛ tsɔɔ mo ngɛ gbɛjegbɛ ɔ nɔ benɛ o ma a tsɔ mi, bɔ nɛ pee nɛ o hyɛ nɔ́ ekohu konɛ mumi klɔuklɔu nɛ e hyi mo tɔ.”+ 18 Kɛkɛ nɛ amlɔ nɔuu ɔ, ní komɛ nɛ a ngɛ kaa pa mi lo totohi kpɔ kɛ je e hɛngmɛ ɔmɛ a nɔ kɛ pue si, nɛ e bɔni nɔ́ hyɛmi ekohu. Lɔ ɔ se ɔ, e te si nɛ a baptisi lɛ, 19 nɛ e ye ní nɛ e ná he wami.

E kɛ kaseli ɔmɛ hi Damasko ligbi bɔɔ ko,+ 20 nɛ amlɔ nɔuu ɔ, e bɔni fiɛɛmi ngɛ kpe he ɔmɛ kaa Yesu ji Mawu Bi ɔ nɛ. 21 Se nihi tsuo nɛ a ngɛ lɛ tue bue ɔ a nya kpɛ a he, nɛ a ngɛ bie ke: “Anɛ pi nyumu nɛ ɔ ji nɔ nɛ e tua nihi nɛ a ngɛ Yerusalem nɛ a tsɛɔ biɛ nɛ ɔ lo?+ Anɛ pi mɛ nɛ e ma nuumi konɛ e ngɔ* mɛ kɛ ya ha osɔfo nikɔtɔma amɛ ɔ he je nɛ e ba hiɛ ɔ ngɛ lo?”+ 22 Se Saulo ya nɔ nɛ e ná he wami babauu, nɛ e ha nɛ Yudabi nɛ a ngɛ Damasko ɔ a he mi po, ejakaa e ma nɔ mi heii kɛ tsɔɔ mɛ kaa nɔ nɛ ɔ ji Kristo ɔ nɛ.+

23 Jehanɛ ɔ, benɛ be pue mi ɔ, Yudabi ɔmɛ pee kake nɛ a so kɛ wo e he kaa a maa tane e yi.+ 24 Se Saulo ná le kaa a so e yi nɔ. Jehanɛ hu ɔ, a ngɛ agbo ɔmɛ a nya hwɔɔe daa nyɔ kɛ pia konɛ a gbe lɛ. 25 Enɛ ɔ he ɔ, nyɔ mi ɔ, e kaseli ɔmɛ ngɔ lɛ kɛ wo kusii* mi, nɛ a ngmɛɛ e he bɔɔbɔɔbɔɔ kɛ gu puɔ ko nɛ a je ngɛ gbogbo ɔ mi ɔ mi kɛ ba zugba.+

26 Benɛ e ba su Yerusalem ɔ,+ e bɔ mɔde si abɔ kaa e maa piɛɛ kaseli ɔmɛ a he, se mɛ tsuo a ngɛ gbeye yee, ejakaa a he we yi kaa kaselɔ ji lɛ. 27 Enɛ ɔ he ɔ, Barnaba+ ba ye bua lɛ, nɛ e ngɔ lɛ kɛ ya bɔfo ɔmɛ a ngɔ, nɛ e ya de mɛ níhi tsuo nɛ ya nɔ ngɛ gbɛjegbɛ ɔ nɔ benɛ Saulo na Nyɔmtsɛ ɔ,+ kɛ bɔ nɛ Nyɔmtsɛ ɔ kɛ lɛ tu munyu ha, nɛ́ e kɛ kã tu munyu ngɛ Yesu biɛ ɔ mi ngɛ Damasko ɔ.+ 28 Lɔ ɔ he ɔ, e kɛ mɛ hi si, nɛ e yaa nɛ e baa faa ngɛ Yerusalem, nɛ e kɛ kã tuɔ munyu ngɛ Nyɔmtsɛ ɔ biɛ mi. 29 E kɛ Yudabi nɛ a tuɔ Hela gbi ɔ tuɔ munyu nɛ e kɛ mɛ sãã nya, se a ngɛ hlae nɛ a maa gbe lɛ.+ 30 Benɛ nyɛmimɛ ɔmɛ ná le enɛ ɔ, a kɛ lɛ kple kɛ ya Kaisarea, nɛ a wo lɛ blɔ kɛ ho Tarso ya.+

31 Lɔ ɔ se ɔ, ngɛ anɔkuale mi ɔ, asafo ɔ nɛ ngɛ Yudea, kɛ Galilea, kɛ Samaria ní ɔmɛ a mi ɔ+ tsuo sɛ tue mi jɔmi be ko mi, nɛ a he ngɛ wae; nɛ be abɔ nɛ asafo ɔ ngɛ nyɛɛe ngɛ Yehowa* gbeye yemi kɛ mumi klɔuklɔu ɔ+ bua womi mi ɔ, jã nɔuu lɛ e yi ngɛ blie.

32 Jehanɛ ɔ, benɛ Petro hia blɔ kɛ ngɛ kpokpa a mi tsuo nyɛɛe ɔ, e kple kɛ ba ni klɔuklɔu ɔmɛ nɛ a ngɛ Lida a hu a ngɔ.+ 33 Ngɛ lejɛ ɔ, e na nyumu ko nɛ a tsɛɔ lɛ ke Aenea nɛ e hule* pue si ngɛ sa nɔ jeha kpaanyɔ sɔuu. 34 Petro de lɛ ke: “Aenea, Yesu Kristo tsa mo.+ Tee si nɛ o dla o sa a.”+ Kɛkɛ nɛ e te si amlɔ nɔuu. 35 Benɛ nihi tsuo nɛ a ngɛ Lida kɛ Saron Nga a nɔ ɔ na lɛ ɔ, a ba he Nyɔmtsɛ ɔ ye.

36 Jehanɛ ɔ, kaselɔ ko ngɛ Yopa nɛ a tsɛɔ lɛ ke Tabita, nɛ e sisi ji “Dorka.”* Kpakpa peemi hyi lɛ tɔ, nɛ nihi a he peeɔ lɛ mɔbɔ nɛ e keɔ mɛ ní. 37 Se ngɛ jamɛ a be ɔ mi ɔ, e ba nu hiɔ nɛ e gbo. Enɛ ɔ he ɔ, a du ha lɛ, nɛ a ngɔ lɛ kɛ fɔ sa nɔ ngɛ hiɔwe tsu ko mi. 38 Akɛnɛ Lida kɛ Yopa a he kɛ we he je ɔ, benɛ kaseli ɔmɛ nu kaa Petro ngɛ jamɛ a ma a mi ɔ, a tsɔ nyumuhi enyɔ kɛ ya e ngɔ konɛ a ya kpa lɛ pɛɛ ke: “Wa kpa mo pɛɛ nɛ o ba wa ngɔ oya nɔuu.” 39 Kɛkɛ nɛ Petro te si nɛ e kɛ mɛ ho. Nɛ benɛ e ya su ɔ, a ngɔ lɛ kɛ kuɔ kɛ ya hiɔwe tsu ɔ mi; nɛ yalɔyi ɔmɛ tsuo ba e ngɔ, a ngɛ ya foe nɛ a ngɔ tadehi kɛ tade klɔiihi* nɛ Dorka pee benɛ e kɛ mɛ ngɛ ɔ kɛ ba tsɔɔ lɛ. 40 Lɔ ɔ se ɔ, Petro je nɔ fɛɛ nɔ kpo,+ nɛ e kplã si nɛ e sɔle. Kɛkɛ nɛ e plɛ e hɛ mi kɛ tsɔɔ gbogboe ɔ, nɛ e de ke: “Tabita, tee si!” Yo ɔ bli e hɛngmɛ, nɛ benɛ e hɛngmɛ gba Petro nɔ ɔ, e hi si.+ 41 Petro pɛtɛ e nine he, nɛ e wo e nɔ, nɛ e tsɛ ni klɔuklɔu ɔmɛ kɛ yalɔyi ɔmɛ kɛ ba, nɛ e ngɔ lɛ kɛ ba da si ngɛ a hɛ mi hɛ ngmengmle.+ 42 A nu nɔ́ nɛ ɔ he ngɛ Yopa tsuo, nɛ nihi fuu ba he Nyɔmtsɛ ɔ ye.+ 43 Petro hi si be bɔɔ ngɛ Yopa ngɛ Simon, lohwe he womi tsopa wolɔ ɔ ngɔ.+

10 Jehanɛ ɔ, nyumu ko ngɛ Kaisarea nɛ a tsɛɔ lɛ ke Kornelio, e ji tabuli nɛ a tsɛɔ mɛ ke Italia tabo* ɔ, a nɔkɔtɔma.* 2 E ji nyumu nɛ e jaa Mawu, nɛ e kɛ e we mi bimɛ ɔmɛ tsuo a yeɔ Mawu gbeye, nɛ e naa nihi mɔbɔ nɛ e keɔ mɛ ní babauu, nɛ e yaa nɔ nɛ e kpaa Mawu pɛɛ wawɛɛ. 3 Jamɛ a ligbi ɔ, maa pee ngmlɛfia nɛɛne* ɔ mi ɔ,+ e na Mawu bɔfo ko heii ngɛ nina mi nɛ́ e ba e ngɔ ba de lɛ ke: “Kornelio!” 4 Kornelio hyɛ lɛ too, nɛ e tsui po, nɛ e bi lɛ ke: “Nyɔmtsɛ, mɛni sane?” E de lɛ ke: “Sɔlemi nɛ o sɔleɔ kɛ nihi a he mɔbɔ nɛ e peeɔ mo nɛ o keɔ mɛ ní ɔ kuɔ kɛ ya su hiɔwe kaa kaimi nɔ́ ngɛ Mawu hɛ mi.+ 5 Enɛ ɔ he ɔ, amlɔ nɛ ɔ, moo tsɔ nyumuhi kɛ ya Yopa nɛ a ya tsɛ Simon nɛ a tsɛɔ lɛ ke Petro ɔ kɛ ba. 6 Nyumu nɛ ɔ ya to Simon nɛ e ji lohwe he womi tsopa wolɔ ɔ nɛ e we ngɛ wo ɔ nya a nubwɔ.” 7 Benɛ bɔfo ɔ nɛ e kɛ lɛ tu munyu ɔ je nɔuu pɛ ɔ, e tsɛ e sɔmɔli ɔmɛ a kpɛti ni enyɔ kɛ tabulɔ ko nɛ e yeɔ Mawu gbeye kɛ je e tsɔli ɔmɛ a kpɛti, 8 nɛ e de mɛ nɔ́ fɛɛ nɔ́, nɛ e tsɔ mɛ kɛ ya Yopa.

9 E nɔ jena benɛ a ngɛ blɔ nɔ kɛ yaa nɛ e piɛ bɔɔ nɛ a maa su ma a mi ɔ, maa pee ngmlɛfia ekpane* ɔ mi ɔ, Petro kuɔ kɛ ya tsu ɔ yi mi konɛ e ya sɔle. 10 Se hwɔ ye lɛ wawɛɛ nɛ e ngɛ nɔ́ ko hlae nɛ e maa ye. Benɛ a ngɛ niye ní ɔ hooe ɔ, nɔ́ nɔ e nɔ+ 11 nɛ e na nɛ hiɔwe nya bli nɛ nɔ́ ko ngɛ si kplee nɛ e ngɛ kaa klala ngua nɛ a hɛɛ e kɔ nya eywiɛ ɔmɛ a mi nɛ́ a ngɛ he ngmɛɛe bɔɔbɔɔbɔɔ kɛ ma zugba; 12 nɛ zugba a nɔ lohwe nane eywiɛɛywiɛtsɛmɛ, kɛ akɔtɔku kɛ sinɔ a henɔhi,* kɛ hiɔwe lohwe pɛlitsɛmɛ slɔɔtoslɔɔto ɔmɛ tsuo eko ngɛ mi. 13 Kɛkɛ nɛ gbi ko de lɛ ke: “Petro, tee si nɛ o gbe nɛ o ye!” 14 Se Petro de ke: “Dɛbi, Nyɔmtsɛ, i yi nɔ́ ko nɛ e bleɔ nɔ, nɛ́ e he tsɔ we hyɛ.”+ 15 Nɛ gbi ɔ de lɛ si enyɔne ke: “Kpa níhi nɛ Mawu ha nɛ a he tsɔ ɔ tsɛmi ke níhi nɛ a he tsɔ we.” 16 Nɔ́ nɛ ɔ ya nɔ si etɛ, nɛ oya nɔuu nɛ a ngɔ nɔ́ ɔ kɛ ho hiɔwe ya.

17 Benɛ Petro juɛmi gbɛ ngɛ nina a he nɛ e ngɛ he susue kaa mɛni e tsɔɔ lo ɔ, jamɛ a be ɔ mi nɔuu ɔ, nyumu ɔmɛ nɛ Kornelio tsɔ mɛ ɔ bi he nɛ Simon we ɔ ngɛ, nɛ a ya da si ngɛ lejɛ ɔ, ngɛ agbo ɔ nya.+ 18 A tsɛ nɛ a bi si kaa Simon nɛ a tsɛɔ lɛ ke Petro ɔ ba to nubwɔ ngɛ lejɛ ɔ lo. 19 Benɛ Petro ngɛ nina a he susue loloolo ɔ, mumi ɔ+ de lɛ ke: “Hyɛ! Nyumuhi etɛ komɛ ngɛ mo hlae. 20 Enɛ ɔ he ɔ, tee si, kple kɛ ya sisi ɔ nɛ o ya a ngɔ, nɛ o yi mi ko pee mo enyɔɔnyɔ kulaa, ejakaa imi lɛ i tsɔ mɛ.” 21 Kɛkɛ nɛ Petro kple kɛ ya sisi ɔ nɛ e ya na nyumu ɔmɛ, nɛ e de mɛ ke: “Imi ji nɛ ɔ nɛ, imi ji nɔ nɛ nyɛ ngɛ hlae ɔ nɛ. Mɛni ji nyɛ nyɛɛmi amaniɛ?” 22 A de ke: “Kornelio,+ tabuli a nɔkɔtɔma ko, nyumu nɛ e ji dalɔ nɛ e yeɔ Mawu gbeye, nɛ́ Yuda ma a tsuo tuɔ e he munyu kpakpa a nine su Mawu blɔ tsɔɔmi ko nɔ kɛ gu bɔfo klɔuklɔu ko nɔ kaa é tsɔ kɛ ba tsɛ mo nɛ o ba e we ɔ mi konɛ e nu nɔ́ nɛ o ma de ɔ.” 23 Enɛ ɔ he ɔ, e fɔ mɛ nine kɛ ya we ɔ mi, nɛ e ha nɛ a hi e ngɔ kaa e nibwɔhi.

E nɔ jena a, e te si nɛ e kɛ mɛ pue nɔ kɛ ho, nɛ nyɛmimɛ ɔmɛ nɛ a je Yopa a, a ti ni komɛ piɛɛ e he kɛ ho. 24 E nɔ jena ekohu ɔ, e sɛ Kaisarea ma a mi. Ngɛ anɔkuale mi ɔ, Kornelio ngɛ mɛ blɔ hyɛe, nɛ e tsɛ e wekuli ɔmɛ kɛ e huɛmɛ nɛ nyu bi ngɛ e kɛ mɛ a kpɛti ɔ tsuo kɛ ba kpe. 25 Benɛ Petro ba su ɔ, Kornelio kɛ lɛ ba kpe, nɛ e kplã si ngɛ Petro nane nya, nɛ e ngɔ e hɛ mi kɛ bu si. 26 Se Petro wo e nɔ, nɛ e de lɛ ke: “Tee si; imi hu adesa kɛkɛ ji mi.”+ 27 Benɛ e kɛ lɛ ngɛ ní sɛɛe kɛ ya sɛ we ɔ mi ɔ, e na nihi babauu nɛ a bua a he nya. 28 E de mɛ ke: “Ngɛ anɔkuale mi ɔ, nyɛ le kaa mlaa ngmɛ́ blɔ kaa Yudano kɛ nɔ ko nɛ e je ma kpa mi nɛ a bɔ aloo e hɛ lɛ kɛ su e he,+ se kɛ̃ ɔ, Mawu ha nɛ i na kaa e sɛ nɛ ma tsɛ nɔ ko ke e ji nɔ nɛ mu ngɛ e he loo e he tsɔ we.+ 29 Enɛ ɔ he ɔ, benɛ a tsɔ kɛ ba tsɛ mi ɔ, i kɛ nɔ́ ko je we ye nya kulaa, nɛ i ba. Lɔ ɔ he ɔ, nyɛ de mi nɔ́ he je nɛ nyɛ tsɔ kɛ ba tsɛ mi ɔ.”

30 Kɛkɛ nɛ Kornelio de ke: “Mwɔnɛ ɔ ji ligbi eywiɛ maa pee ngmlɛfia nɛ ɔ mi ɔ, i ngɛ sɔlee ngɛ ye we ɔ mi ngɛ ngmlɛfia nɛɛne* ɔ mi; ngɛ jamɛ a be ɔ mi ɔ, nyumu ko kɛ e he tade nɛ e ngɛ kpɛe ba da si ngɛ ye hɛ mi 31 nɛ e de ke: ‘Kornelio, a nu o sɔlemi ɔ nɛ a ha heto, nɛ nihi a he mɔbɔ nɛ e peeɔ mo nɛ o keɔ mɛ ní ɔ hu Mawu kai. 32 Enɛ ɔ he ɔ, moo tsɔ kɛ ya Yopa nɛ a ya tsɛ Simon nɛ a tsɛɔ lɛ ke Petro ɔ kɛ ba. Nyumu nɛ ɔ ya to nubwɔ ngɛ Simon nɛ ji lohwe he womi tsopa wolɔ ko nɛ e ngɛ wo ɔ nya a we ɔ mi.’+ 33 Enɛ ɔ he ɔ, oya nɔuu nɛ i tsɔ ke a ba tsɛ mo kɛ ba, nɛ o bɔ mɔde kaa o ba hiɛ ɔ. Amlɔ nɛ ɔ, wɔ tsuo wa ba pue ngɛ Mawu hɛ mi konɛ waa nu níhi tsuo nɛ Yehowa* fã mo ke o de ɔ.”

34 Kɛkɛ nɛ Petro bɔni munyu tumi nɛ e de ke: “Amlɔ nɛ ɔ lɛɛ, i nu sisi nitsɛnitsɛ kaa Mawu hlɛ nɔ mi,+ 35 mohu ɔ, ngɛ ma fɛɛ ma mi ɔ, nɔ fɛɛ nɔ nɛ e yeɔ lɛ gbeye nɛ e peeɔ nɔ́ nɛ da a, e kplɛɛɔ e nɔ.+ 36 E tsɔ nɛ a ngɔ munyu ɔ kɛ ya ha Israelbi ɔmɛ konɛ a jaje tue mi jɔmi sane kpakpa a+ ngɔ tsɔɔ mɛ kɛ gu Yesu Kristo nɔ, lɛ ji nihi tsuo a Nyɔmtsɛ ɔ nɛ.+ 37 Nyɛ le sane ɔ nɛ́ a tu he munyu kɛ kpa Yudea tsuo, nɛ́ a je sisi kɛ je Galilea+ ngɛ baptisimi nɛ Yohane fiɛɛ ɔ se ɔ: 38 e kɔɔ Yesu nɛ e je Nazaret ɔ he, bɔ nɛ Mawu ngɔ mumi klɔuklɔu ɔ+ kɛ he wami kɛ pɔ lɛ nu, nɛ́ e ya kpa zugba a nɔ, nɛ́ e pee kpakpa, nɛ́ e tsa nihi tsuo nɛ Abosiami ngɛ mɛ yi mi wae ɔ,+ ejakaa Mawu piɛɛ e he.+ 39 Nɛ wɔ ji ní nɛ ɔmɛ tsuo nɛ e pee ngɛ Yudabi ɔmɛ a ma a mi kɛ Yerusalem ɔ he odase yeli; se a sɛu lɛ ngɛ tso nɔ nɛ a gbe lɛ. 40 Mawu tle nyumu nɛ ɔ si ngɛ ligbi etɛne ɔ nɔ,+ nɛ e ngmɛ lɛ blɔ nɛ e je e he kpo,* 41 pi kɛ tsɔɔ ni ɔmɛ tsuo, se kɛ tsɔɔ odase yeli nɛ Mawu sɛ hlami nɛ e hla mɛ ɔ, kɛ wɔ nɛ waa kɛ lɛ ye ní nɛ wa nu ní benɛ a tle lɛ si kɛ je gbogboehi a kpɛti ɔ se ɔ.+ 42 Jehanɛ hu ɔ, e fã wɔ kaa waa fiɛɛ kɛ tsɔɔ ni ɔmɛ, nɛ waa ye odase kɛ pi si+ kaa nɔ nɛ ɔ ji nɔ nɛ Mawu fã lɛ konɛ e kojo nihi nɛ a hɛ ngɛ, kɛ ni nɛmɛ nɛ a gbo ɔ.+ 43 E he odase lɛ gbali ɔmɛ tsuo ye,+ kaa nɔ fɛɛ nɔ nɛ e ma ná hemi kɛ yemi ngɛ e mi ɔ, a kɛ e he yayami maa ke lɛ kɛ gu e biɛ ɔ nɔ.”+

44 Benɛ Petro ngɛ sane nɛ ɔmɛ a he munyu tue nɛ e nya mɛ si lolo ɔ, mumi klɔuklɔu ɔ ba nihi tsuo nɛ a ngɛ munyu ɔ tue bue ɔ a nɔ.+ 45 Nɛ e pee nihi nɛ a po mɛ nɛ a he ye* nɛ a piɛɛ Petro he kɛ ba a nyakpɛ, ejakaa a ngɛ nike ní nɛ a kɛ haa faa nɛ ji mumi klɔuklɔu ɔ plɛe kɛ ngɛ nihi nɛ a je je ma amɛ a mi ɔ hu a nɔ puee. 46 Ejakaa a nu nɛ a ngɛ munyu tue ngɛ ma se gbihi* a mi, nɛ a ngɛ Mawu we agboje ɔ jajee.+ Kɛkɛ nɛ Petro he nɔ ke: 47 “Nimli nɛ ɔmɛ ná mumi klɔuklɔu ɔ kaa wɔ nɔuu, enɛ ɔ he ɔ, mɛnɔ ma nyɛ maa tsi a nya konɛ a ko ngɔ nyu kɛ baptisi mɛ?”+ 48 Kɛkɛ nɛ e fã ke a baptisi mɛ ngɛ Yesu Kristo biɛ mi.+ Lɔ ɔ se ɔ, a kpa lɛ pɛɛ kaa e kɛ mɛ nɛ hi si be bɔɔ.

11 Jehanɛ ɔ, bɔfo ɔmɛ kɛ nyɛmimɛ ɔmɛ nɛ a ngɛ Yudea a nu kaa nihi nɛ a je je ma amɛ a mi ɔ hu pɛtɛ Mawu munyu ɔ he. 2 Enɛ ɔ he ɔ, benɛ Petro kuɔ kɛ ba Yerusalem ɔ, nihi nɛ a fĩ nɔ pomi se ɔ+ bɔni munyu tumi kɛ bɔni lɛ simi.* 3 A de ke: “O ya nyumuhi nɛ a pui mɛ ɔ a we mi nɛ o kɛ mɛ ya ye ní.” 4 Kɛkɛ nɛ Petro tsɔɔ mɛ sane ɔ nya fitsofitso, nɛ e de ke:

5 “Jinɛ i ngɛ Yopa ma a mi nɛ i ngɛ sɔlee, nɛ benɛ nɔ́ nɔ ye nɔ ɔ, i na nina ko, i na nɛ nɔ́ ko ngɛ si kplee nɛ́ e ngɛ kaa klala ngua nɛ a hɛɛ e kɔ nya eywiɛ ɔmɛ a mi nɛ a ngɛ he ngmɛɛe bɔɔbɔɔbɔɔ kɛ je hiɔwe kɛ ma zugba, nɛ e ba ye ngɔ.+ 6 Benɛ i hyɛ nɔ́ ɔ mi too ɔ, i na zugba a nɔ lohwe nane eywiɛɛywiɛtsɛmɛ, lohwe awi yeli, akɔtɔku kɛ sinɔ a henɔhi,* kɛ hiɔwe lohwe pɛlitsɛmɛ. 7 Jehanɛ hu ɔ, i nu nɛ gbi ko de mi ke: ‘Petro, tee si nɛ o gbe nɛ o ye!’ 8 Se i de ke: ‘Dɛbi, Nyɔmtsɛ, i yi nɔ́ ko nɛ e bleɔ nɔ aloo e he tsɔ we hyɛ.’ 9 Gbi ɔ nɛ e je hiɔwe ɔ pɛ si enyɔne ke: ‘Kpa níhi nɛ Mawu ha nɛ a he tsɔ ɔ tsɛmi ke níhi nɛ a he tsɔ we.’ 10 Nɔ́ nɛ ɔ ya nɔ si etɛ, kɛkɛ nɛ a ngɔ nɔ́ ɔ tsuo kɛ ho hiɔwe ya ekohu. 11 Jamɛ a be ɔ mi nɔuu ɔ, nyumuhi etɛ nɛ a tsɔ mɛ kɛ je Kaisarea a ba nɛ a ba daa si ngɛ we ɔ nɛ wa ya to mi ɔ nya.+ 12 Kɛkɛ nɛ mumi ɔ de mi ke i kɛ mɛ nɛ ya nɛ ye yi mi nɛ e ko pee mi enyɔɔnyɔ kulaa. Se nyɛmimɛ nyumuhi ekpa nɛ ɔmɛ hu kɛ mi ya, nɛ wa ya sɛ nyumu ɔ we ɔ mi.

13 “E bɔ wɔ bɔ nɛ e na hiɔwe bɔfo nɛ e ba da si ngɛ e we ɔ mi nɛ e de ke: ‘Moo tsɔ kɛ ya Yopa nɛ a ya tsɛ Simon nɛ a tsɛɔ lɛ ke Petro ɔ kɛ ba,+ 14 nɛ e ma de mo níhi nɛ a maa gu nɔ kɛ he mo kɛ o we mi bimɛ ɔmɛ tsuo nyɛ yi wami ɔ.’ 15 Se benɛ i bɔni munyu tumi ɔ, mumi klɔuklɔu ɔ ba a nɔ kaa bɔ nɛ e ba wɔ hu wa nɔ sisije ɔ.+ 16 Kɛkɛ nɛ i kai munyu nɛ Nyɔmtsɛ ɔ tu ɔ, kaa bɔ nɛ e pɔɔ demi ke: ‘Yohane ngɔ nyu kɛ baptisi nihi,+ se nyɛɛ lɛɛ a maa ngɔ mumi klɔuklɔu kɛ baptisi nyɛ’ ɔ.+ 17 Enɛ ɔ he ɔ, ke Mawu ngɔ nike ní nɛ e kɛ haa faa nɛ e kɛ ha wɔ nihi nɛ wa he Nyɔmtsɛ Yesu Kristo ye ɔ nɔuu kɛ ha mɛ ɔ, lɛɛ mɛnɔ ji mi nɛ ma nyɛ ma tsi Mawu nya?”*+

18 Benɛ a nu ní nɛ ɔmɛ ɔ, a ma a nya, nɛ a wo Mawu hɛ mi nyami, nɛ a de ke: “Ke jã a, lɛɛ Mawu ha nihi nɛ a je je ma amɛ a mi ɔ tsui tsakemi nɛ́ e kɛ nɔ yaa wami mi ɔ.”+

19 Jehanɛ ɔ, nihi nɛ yi mi wami nɛ te si ngɛ Stefano gbenɔ ɔ se ɔ ha nɛ a gbɛ fia a+ je kɛ ho Foinike, Kipro, kɛ Antiokia ya, se a fiɛɛ kɛ tsɔɔ Yudabi ɔmɛ pɛ.+ 20 Se kɛ̃ ɔ, a kpɛti nyumu komɛ nɛ a je Kipro kɛ Kirene ɔ ba Antiokia nɛ a kɛ nihi nɛ a tuɔ Hela gbi ɔ bɔni munyu tumi, nɛ a ngɛ Nyɔmtsɛ Yesu he sane kpakpa a jajee. 21 Jehanɛ se hu ɔ, Yehowa* nine kɛ mɛ ngɛ, nɛ nihi babauu ba he ye nɛ a kpale kɛ ba Nyɔmtsɛ ɔ ngɔ.+

22 A he sane ɔ ya su asafo ɔ nɛ ngɛ Yerusalem ɔ ngɔ, nɛ a tsɔ Barnaba+ kɛ ya Antiokia tɔɔ. 23 Benɛ e ya su nɛ e na Mawu dloomi ɔ, e nya nɛ e bɔni mɛ tsuo he wami womi kaa á ma nya si ngɛ a tsui mi kaa a maa ya nɔ ngɛ Nyɔmtsɛ ɔ mi;+ 24 ejakaa e ji nɔmlɔ kpakpa, nɛ mumi klɔuklɔu kɛ hemi kɛ yemi hyi lɛ tɔ. Nɛ a ngɔ nihi babauu kɛ ba piɛɛ Nyɔmtsɛ ɔ he.+ 25 Enɛ ɔ he ɔ, e je kɛ ho Tarso ya konɛ e ya hla Saulo saminya.+ 26 Benɛ e na lɛ ɔ, e ngɔ lɛ kɛ ba Antiokia. Lɔ ɔ he ɔ, jeha mluku ɔ, a kɛ asafo ɔ bua a he nya, nɛ a tsɔɔ nihi babauu ní, nɛ Antiokia ji he nɛ Mawu ha nɛ a tsɛ kaseli ɔmɛ ngɛ kekleekle ke Kristofohi.+

27 Ngɛ jamɛ a ligbi ɔmɛ a mi ɔ, gbali+ kple kɛ je Yerusalem kɛ ba Antiokia. 28 A kpɛti nɔ kake nɛ a tsɛɔ lɛ ke Agabo ɔ+ te si da si, nɛ kɛ gu mumi klɔuklɔu ɔ nɔ ɔ, e gba kɛ fɔ si kaa e be kɛe nɛ hwɔ ngua ko maa ba zugba a nɔ tsuo,+ nɛ ngɛ anɔkuale mi ɔ, e ba mi jã ngɛ Klaudio be ɔ mi. 29 Enɛ ɔ he ɔ, kaseli ɔmɛ mwɔ a yi mi kpɔ kaa a ti nɔ fɛɛ nɔ ma ha nɔ́ ko bɔ nɛ e ma nyɛ,+ konɛ a kɛ mane nyɛmimɛ ɔmɛ nɛ a ngɛ Yudea a nɛ́ a kɛ ye bua mɛ;*+ 30 nɛ a pee jã. A gu Barnaba kɛ Saulo a nine nɔ nɛ a kɛ mane nikɔtɔma amɛ.+

12 Jamɛ a be ɔ mi ɔ, Herode nɛ e ji matsɛ ɔ bɔni ni komɛ nɛ a ngɛ asafo ɔ mi ɔ yi mi wami.+ 2 E ngɔ klaate+ kɛ gbe Yohane nyɛminyumu Yakobo.+ 3 Benɛ e na kaa Yudabi ɔmɛ a bua jɔ he ɔ, e ya nu Petro hu nɛ e wo lɛ tsu. (Nɔ́ nɛ ɔ ya nɔ ngɛ Abolo Nɛ Masa Be Mi Gbijlɔ be ɔ mi.)+ 4 E nu lɛ nɛ e wo lɛ tsu,+ nɛ e ngɔ lɛ kɛ ha tabuli eywiɛɛywiɛ a kuuhi eywiɛ nɛ a tsakeɔ a sibi ɔ konɛ a bu e he, kɛ yi mi tomi ɔ kaa ke a ye Hetsɔmi ɔ ta a, e ma je lɛ kpo kɛ ba ni ɔmɛ a hɛ mi.* 5 Enɛ ɔ he ɔ, a ngɔ Petro kɛ to ngɛ tsu ɔ mi, se asafo ɔ ngɛ sɔlee wawɛɛ kɛ ngɛ Mawu hae ngɛ e he.+

6 Benɛ be ngɛ sue nɛ Herode ma je lɛ kpo ɔ, jamɛ a nyɔ ɔ mi ɔ, Petro hwɔɔ si nɛ a ngɔ kɔsɔkɔsɔ enyɔ kɛ fĩ lɛ ngɛ tabuli enyɔ a kpɛti, nɛ buli ngɛ sinya a nya nɛ a ngɛ tsu ɔ he bue. 7 Se hyɛ! Yehowa* bɔfo ko ba da si ngɛ lejɛ ɔ,+ nɛ la kpɛ ngɛ tsu ɔ mi. E gba Petro kasa mi ma, nɛ e tsɛ̃ɛ̃ lɛ, nɛ e de lɛ ke: “Tee si esɔ!” Nɛ kɔsɔkɔsɔ ɔmɛ kplɔ ngɛ e nine ɔmɛ a he kɛ pue si.+ 8 Hiɔwe bɔfo ɔ de lɛ ke: “Dla o he,* nɛ o wo o tokota amɛ.” E pee jã. Nyagbe ɔ, hiɔwe bɔfo ɔ de lɛ ke: “Moo wo tade nɛ o woɔ ngɛ o tade ɔ nɔ ɔ nɛ o nyɛɛ ye se.” 9 Nɛ e je kpo nɛ e nyɛɛ e se, se e li kaa nɔ́ nɛ ngɛ nɔ yae kɛ gu hiɔwe bɔfo ɔ nɔ ɔ ji nɔ́ nitsɛ. Ngɛ anɔkuale mi ɔ, e susu kaa nina lɛ e ngɛ nae ɔ nɛ. 10 Benɛ a be kekleekle buli ɔmɛ kɛ buli enyɔne ɔmɛ a he ɔ, a ba su dade agbo ɔ nɛ a kɛ yaa ma a mi ɔ he, nɛ lɔ ɔ nitsɛ hu bli kɛ ha mɛ. Benɛ a je kpo ɔ, a kple kɛ gu gbɛjegbɛ ko nɔ nɛ amlɔ nɔuu ɔ, bɔfo ɔ je e he. 11 Nɛ benɛ Petro yɔse nɔ́ nɛ ngɛ nɔ yae ɔ, e de ke: “Amlɔ nɛ ɔ lɛɛ i ba na heii kaa Yehowa* tsɔ e bɔfo nɛ e ba kpɔ̃ mi kɛ je Herode dɛ mi, nɛ e kpɔ̃ mi kɛ je nɔ́ fɛɛ nɔ́ nɛ Yudabi ɔmɛ ngɛ blɔ hyɛe kaa e maa ba a mi.”+

12 Benɛ e yɔse enɛ ɔ se ɔ, e pue nɔ kɛ ho Yohane nɛ a tsɛɔ lɛ ke Marko ɔ+ yayo Maria we ɔ mi ya, he nɛ nihi saii bua a he nya ngɛ nɛ a ngɛ sɔlee ɔ. 13 Benɛ e si agbo ɔ, mawayo ko nɛ a tsɛɔ lɛ ke Roda a ba konɛ e ba hyɛ nɔ nɛ e ngɛ agbo ɔ sie ɔ. 14 Benɛ e yɔse Petro gbi ɔ, bua jɔmi sɔuu nɛ e ná he je ɔ, e bli we agbo ɔ, mohu ɔ, e tu fo kɛ ho nɛ e ya bɔ amaniɛ kaa Petro daa si ngɛ agbo ɔ se. 15 A de lɛ ke: “O yi ngɛ puɛe.” Se e ya nɔ nɛ e tsɔɔ kaa nɔ́ nɛ e ngɛ dee ɔ ngɛ mi. Nɛ a bɔni demi ke: “Lɛɛ e bɔfo mɔ.” 16 Se loloolo ɔ, Petro ngɛ lejɛ ɔ nɛ e ngɛ agbo ɔ sie. Benɛ a bli agbo ɔ, a na lɛ, nɛ e pee mɛ nyakpɛ. 17 Se e ngɔ e nine kɛ pee okadi kɛ tsɔɔ mɛ kaa a pee kɔ̃, nɛ e de mɛ bɔ nɛ Yehowa* plɛ kɛ je lɛ kɛ je tsu ɔ mi ha a fitsofitso, nɛ e de mɛ ke: “Nyɛɛ ya nɛ nyɛ ya sɛɛ ní nɛ ɔmɛ ngɔ ha Yakobo+ kɛ nyɛmimɛ ɔmɛ.” Kɛkɛ nɛ e je kpo nɛ e hia blɔ kɛ ho he kpa ya.

18 Jehanɛ ɔ, benɛ je na a, tabuli ɔmɛ pee basaa, ejakaa a li nɔ́ nɛ ba Petro nɔ. 19 Se benɛ Herode hla lɛ saminya nɛ e nɛ lɛ ɔ, e bi buli ɔmɛ nɔ́ nɛ ya nɔ ɔ, nɛ e fã ke a ngɔ mɛ kɛ ho nɛ a ya gbla a tue;+ nɛ Herode je Yudea nɛ e kple kɛ ho Kaisarea ya, nɛ e ya ye be saii ngɛ lejɛ ɔ.

20 Jehanɛ ɔ, e mi mi fu Tiro kɛ Sidonbi ɔmɛ.* Enɛ ɔ he ɔ, a ba e ngɔ kɛ juɛmi kake, nɛ benɛ a ba plɛ Blasto, nɛ ji nyumu ɔ nɛ e hyɛɔ níhi nɛ yaa nɔ ngɛ matsɛ ɔ we ɔ mi* ɔ nɔ ɔ yi mi ta a, a kpa pɛɛ kɛ ha tue mi jɔmi, ejakaa matsɛ ɔ zugba a nɔ lɛ a ma a náa niye ní kɛ jeɔ. 21 Ngɛ ligbi ko nɛ a to ɔ nɔ ɔ, Herode wo matsɛ tade, nɛ e ba hi si ngɛ kojomi sɛ ɔ nɔ, nɛ e bɔni munyu tumi kɛ bɔni mɛ tsɔɔmi. 22 Kɛkɛ nɛ ni ɔmɛ nɛ a bua a he nya a bɔni ngmlaa kpami ke: “Enɛ ɔ lɛɛ, mawu ko gbi ji nɛ ɔ nɛ, pi adesa ko gbi!” 23 Amlɔ nɔuu nɛ Yehowa* bɔfo ko fia lɛ nɔ́, ejakaa e ngɔɛ hɛ mi nyami ɔ kɛ ha we Mawu, nɛ gɔgɔhi ye lɛ nɛ e gbo.

24 Se Yehowa* munyu ɔ ya nɔ nɛ e ngɛ wae nɛ e ngɛ gbɛe kɛ ngɛ fiae.+

25 Barnaba+ kɛ Saulo lɛɛ, benɛ a ya ye bua ni ɔmɛ ngɛ Yerusalem ta a,+ a kpale a se, nɛ a ngɔ Yohane+ nɛ a tsɛɔ lɛ ke Marko hulɔ ɔ kɛ piɛɛ a he.

13 Jehanɛ ɔ, gbali kɛ tsɔɔli komɛ ngɛ Antiokia asafo ɔ mi.+ Mɛ ji: Barnaba, Simeon nɛ a tsɛɔ lɛ ke Niger, Lusio nɛ e je Kirene ɔ, Manaen nɛ e kɛ Herode nɛ ji kpokpa nɔ yelɔ ɔ ya sukuu ɔ, kɛ Saulo. 2 Benɛ a ngɛ Yehowa* sɔmɔe* nɛ a ngɛ hwɔ hae ɔ, mumi klɔuklɔu ɔ de ke: “Nyɛ je Barnaba kɛ Saulo ngɔ ha mi+ kɛ ha ní tsumi nɛ lɔ ɔ he je i tsɛ mɛ ngɛ ɔ.”+ 3 Kɛkɛ nɛ benɛ a ha hwɔ nɛ a sɔle ta a, a ngɔ a ninehi kɛ pue a nɔ nɛ a wo mɛ blɔ.

4 Enɛ ɔ he ɔ, nyumu nɛ ɔmɛ nɛ mumi klɔuklɔu ɔ tsɔ mɛ ɔ kple kɛ ho Seleukia ya, nɛ a hi lɛ mi kɛ je lejɛ ɔ kɛ ho Kipro ya. 5 Benɛ a su Salami ɔ, a bɔni Mawu munyu ɔ jajemi ngɛ Yudabi ɔmɛ a kpe he ɔmɛ. Nɛ a kɛ Yohane hu nyɛɛ kaa a sɔmɔlɔ.*+

6 Benɛ a kpa zugba kpɔ nɛ nyu bɔle lɛ ɔ tsuo nɔ hluu kɛ ya su Pafo ɔ, a kɛ nyumu ko nɛ e ji Yudano nɛ a tsɛɔ lɛ ke Bar Yesu, nɛ e ji kunya yelɔ kɛ lakpa gbalɔ ɔ ya kpe. 7 E kɛ amlaalo* Sergio Paulo nɛ́ e ji nyumu ní lelɔ ɔ lɛ ngɛ. Benɛ e tsɛ Barnaba kɛ Saulo kɛ ba e ngɔ ɔ, nyumu nɛ ɔ suɔ wawɛɛ kaa e maa bu Mawu munyu ɔ tue. 8 Se Elima* nɛ ji kunya yelɔ ɔ (biɛ Elima a sisi ji kunya yelɔ) bɔni si temi kɛ bɔni mɛ womi, nɛ e ngɛ mɔde bɔe kaa e maa kpale amlaalo ɔ kɛ je hemi kɛ yemi ɔ he. 9 Kɛkɛ nɛ mumi klɔuklɔu ɔ hyi Saulo nɛ a tsɛɔ lɛ ke Paulo hulɔ ɔ tɔ, nɛ e hyɛ e hɛ mi totooto 10 nɛ e de lɛ ke: “Mo nyumu nɛ ojo fiami kɛ yayami slɔɔtohi tsuo hyi mo tɔ, mo Abosiami bi,+ mo nɛ o ji ní kpakpahi tsuo a he nyɛlɔ, Yehowa* blɔ ɔmɛ nɛ a da nɛ o ngɛ mɛ kpɛ̃e ɔ, o be kpae lo? 11 Hyɛ! Yehowa* maa gbla o tue, nɛ o hɛngmɛ ma yu, nɛ o be pu la nae kɛ ma ya su be ko.” Amlɔ nɔuu nɛ afua nɛ e mi ti kɛ diblii nɔ e nɔ, nɛ e bɔni si tataami nɛ e ngɛ nɔ ko hlae nɛ e pɛtɛ e nine he nɛ e tsɔɔ lɛ blɔ. 12 Kɛkɛ nɛ benɛ amlaalo ɔ na nɔ́ nɛ ba a, e he ye, ejakaa e nya kpɛ e he ngɛ Yehowa* tsɔɔmi ɔ he.

13 Jehanɛ ɔ, Paulo kɛ nihi nɛ a piɛɛ e he ɔ je Pafo nɛ a gu wo ɔ nɔ kɛ ba Perga ngɛ Pamfilia. Se Yohane+ je a he nɛ e kpale kɛ ho Yerusalem ya.+ 14 Se mɛɛ lɛɛ a tsa nɔ kɛ je Perga kɛ ba Antiokia ngɛ Pisidia. Nɛ a ya kpe he ɔ+ ngɛ He Jɔɔmi Ligbi ɔ nɔ, nɛ a ya hi si. 15 Benɛ a kane Mlaa a+ kɛ Gbali ɔmɛ a womi ɔ ngɛ ni ɔmɛ a hɛ mi ta a, kpe he ɔ nɔ hyɛli ɔmɛ ngɔ sɛ gbi kɛ ha mɛ ke: “Nyumuhi, nyɛmimɛ, ke nyɛ ngɛ he wami womi munyu ko kɛ ha ni ɔmɛ ɔ, nyɛ de.” 16 Lɔ ɔ he ɔ, Paulo te si nɛ e wo e nine nɔ konɛ a pee dii, nɛ e de ke:

“Nyumuhi, Israelbi, kɛ nyɛ ni kpahi nɛ nyɛ yeɔ Mawu gbeye, nyɛɛ bu tue. 17 Israelbi nɛ ɔmɛ a Mawu ɔ hla wa nɛmɛ ɔmɛ, nɛ e wo a nɔ benɛ a hi Egipt zugba a nɔ kaa nibwɔhi ɔ, nɛ e kɛ e kɔni nɛ he wa a je mɛ kɛ je lejɛ ɔ.+ 18 Nɛ e to e tsui si ha mɛ ngɛ nga a nɔ maa pee jeha 40.+ 19 Benɛ e kpata mahi kpaago nɛ a ngɛ Kanaan zugba a nɔ ɔ a hɛ mi ɔ, e gba a zugba a kɛ ha mɛ kaa weto ní.+ 20 Enɛ ɔ tsuo ya nɔ maa pee jeha 450.

“Ngɛ enɛ ɔ se ɔ, e ha mɛ kojoli hluu kɛ ya su Samuel nɛ ji gbalɔ ɔ yi nɔ.+ 21 Se lɔ ɔ se ɔ, a bi ke a wo matsɛ ha mɛ,+ nɛ Mawu ngɔ Kish binyumu Saul nɛ e je Benyamin wɛtso ɔ mi ɔ+ kɛ ha mɛ jeha 40. 22 Benɛ e kpa lɛ matsɛ yemi ɔ, e hla David kɛ ha mɛ kaa matsɛ,+ nɛ e ye e he odase ke: ‘I na David, Yese* binyumu ɔ,+ nyumu nɛ ye tsui kplɛɛ e nɔ ɔ;+ e maa pee níhi tsuo nɛ i suɔ.’ 23 Kaa bɔ nɛ Mawu wo si ɔ, e ngɔ Yesu, nɛ ji yi wami helɔ ɔ kɛ je nyumu nɛ ɔ nina a* mi kɛ ba ha Israel.+ 24 Loko jamɛ a nɔ ɔ maa ba a, Yohane fiɛɛ baptisimi nɛ e peeɔ tsui tsakemi he okadi ɔ ngɛ ma hɛ mi kɛ tsɔɔ Israelbi ɔmɛ tsuo.+ 25 Se benɛ Yohane ngɛ e ní tsumi ɔ nya gbee ɔ, e deɔ ke: ‘Mɛnɔ lɛ nyɛ susu kaa i ji? Pi imi ji lɛ. Mohu ɔ, nyɛɛ hyɛ! Nɔ ko ma ngɛ ye se nɛ i sɛ nɔ nɛ e pɛneɔ tokota nɔ kpa ngɛ e nane he.’+

26 “Nyumuhi, nyɛmimɛ, nyɛ Abraham weku ɔ mi bimɛ, kɛ ni kpahi nɛ a ngɛ nyɛ kpɛti nɛ a yeɔ Mawu gbeye, a wo yi wami hemi nɛ ɔ he munyu ɔ blɔ kɛ ba wa ngɔ.+ 27 Se nihi nɛ a ngɛ Yerusalem kɛ a nɔ yeli ɔmɛ li e mi tso, mohu ɔ, benɛ a ngɛ sɔmɔe kaa kojoli ɔ, a ha nɛ níhi nɛ Gbali ɔmɛ de+ nɛ a woɔ a gbi nɔ kɛ kaneɔ ngɛ he jɔɔmi ligbi fɛɛ he jɔɔmi ligbi nɔ ɔ ba mi. 28 E ngɛ mi kaa a nɛ nɔ́ ko nɛ e tsɔɔ kaa e sa gbenɔ mohu lɛɛ,+ se a kpa Pilato pɛɛ kaa e ha nɛ a gbe lɛ.+ 29 Nɛ benɛ a gbe nɔ́ fɛɛ nɔ́ nɛ a ngma ngɛ e he ɔ nya a, a je lɛ ngɛ tso ɔ nɔ nɛ a ya to lɛ ngɛ yɔkɔ* ko mi.+ 30 Se Mawu tle lɛ si kɛ je gbogboehi a kpɛti,+ 31 nɛ e je e he kpo kɛ tsɔɔ nihi nɛ a kɛ lɛ je Galilea kɛ kuɔ kɛ ya Yerusalem ɔ ligbihi fuu. Amlɔ nɛ ɔ, ni nɛ ɔmɛ ji nihi nɛ a yeɔ e he odase kɛ tsɔɔ ni ɔmɛ.+

32 “Enɛ ɔ he ɔ, wa ngɛ si nɛ a wo wa nɛmɛ ɔmɛ ɔ he sane kpakpa a jajee kɛ ngɛ nyɛ tsɔɔe. 33 Mawu ha nɛ e ba mi kɛ pi si ha wɔ nɛ wa ji a bimɛ ɔ kɛ gu Yesu si nɛ e tle ɔ nɔ;+ kaa bɔ nɛ a ngma ngɛ la enyɔne ɔ mi ke: ‘Ye bi ji mo; mwɔnɛ ɔ, i ba pee o tsɛ’ ɔ.+ 34 Mawu ma anɔkuale sane nɛ́ tsɔɔ kaa e tle lɛ si kɛ je gbogboehi a kpɛti, nɛ e be e se kpalee kɛ ya puɛmi mi hu kɔkɔɔkɔ ɔ nɔ mi benɛ e de ke: ‘Ma je suɔmi nɛ e se pui nɛ i wo David si ngɛ he, nɛ e ji anɔkuale* ɔ kpo kɛ ha nyɛ’ ɔ.+ 35 Lɔ ɔ he ɔ, a de ekohu ngɛ la kpa ko mi ke: ‘O be nɔ nɛ yeɔ mo anɔkuale ɔ hyɛe nɛ e puɛ.’+ 36 David lɛɛ, e sɔmɔ Mawu* ngɛ e be ɔ mi, e gbo,* nɛ a to lɛ kɛ piɛɛ e nɛmɛ ɔmɛ a he, nɛ e puɛ.+ 37 Se nɔ nɛ Mawu tle lɛ si ɔ lɛɛ e puɛ we.+

38 “Enɛ ɔ he ɔ, nyɛmimɛ, nyɛ ná nɛ nyɛɛ le kaa kɛ gu nɔ nɛ ɔ nɔ ɔ, a ngɛ yayami nɛ a kɛ maa ke ɔ jajee kɛ ngɛ nyɛ tsɔɔe,+ 39 nɛ ngɛ níhi tsuo nɛ a nyɛ we nɛ a gu Mose Mlaa a nɔ kɛ wo nyɛ nguɔ ngɛ he ɔ mi ɔ,+ kɛ gu nɔ nɛ ɔ lɛɛ e nɔ ɔ, a woɔ nɔ fɛɛ nɔ nɛ e heɔ yeɔ ɔ nguɔ.+ 40 Enɛ ɔ he ɔ, nyɛɛ hyɛ nɛ hi konɛ níhi nɛ a de ngɛ Gbali ɔmɛ a womi ɔ mi ɔ nɛ a ko ba nyɛ nɔ. E de ke: 41 ‘Nyɛ nihi a he fɛu yeli, nyɛɛ hyɛ, nɛ́ e pee nyɛ nyakpɛ, nɛ́ nyɛ hɛ mi nɛ kpata, ejakaa i ngɛ ní tsumi ko tsue ngɛ nyɛ ligbi ɔmɛ a mi, ní tsumi ko nɛ ke nɔ ko de nyɛ bɔ nɛ e ngɛ ha fitsofitso po ɔ, nyɛ be hee maa ye gblegbleegble.’”+

42 Jehanɛ ɔ, benɛ a ngɛ kpo jee ɔ, ni ɔmɛ kpa mɛ pɛɛ kaa a ba tu ní nɛ ɔmɛ a he munyu ngɛ He Jɔɔmi Ligbi nɛ e maa ba a nɔ. 43 Lɔ ɔ he ɔ, benɛ a kpa kpe ɔ nɛ a pee ngɛ kpe he ɔ, Yudabi kɛ nihi nɛ a tsake kɛ ba Yudabi ɔmɛ a jami ɔ mi ɔ, a kpɛti nihi fuu nɛ a jaa Mawu ɔ nyɛɛ Paulo kɛ Barnaba a se, nɛ benɛ Paulo kɛ Barnaba kɛ mɛ ngɛ munyu tue ɔ, a wo mɛ he wami kaa a ya nɔ nɛ a hi Mawu dloomi ɔ mi.+

44 Ngɛ He Jɔɔmi Ligbi nɛ e nyɛɛ se ɔ nɔ ɔ, lɔ ɔ ji kaa ma a tsuo ba bua a he nya konɛ a bu Yehowa* munyu ɔ tue. 45 Benɛ Yudabi ɔmɛ na asafo kuu ɔ, hunga hyi mɛ tɔ, nɛ a bɔni musu bɔmi munyuhi tumi kɛ bɔni nɔ́ nɛ Paulo ngɛ dee ɔ simi.+ 46 Kɛkɛ nɛ Paulo kɛ Barnaba tu munyu kɛ kã, nɛ a de mɛ ke: “Nyɛ ji nihi nɛ e he hia kaa a tu Mawu munyu ɔ kɛ tsɔɔ kekle.+ Se akɛnɛ nyɛ ngɛ Mawu munyu ɔ kuae, nɛ nyɛ bui nyɛ he kaa nihi nɛ a sa kɛ ha neneene wami he je ɔ, nyɛɛ hyɛ! wa dɔ wa yi kɛ yaa je ma amɛ a ngɔ.+ 47 Ejakaa Yehowa* fã wɔ ke: ‘I ngɔ mo kɛ pee la kɛ ha je ma amɛ, konɛ o pee yi wami hemi kɛ ya su zugba a nyagbe he ɔmɛ.’”+

48 Benɛ nihi nɛ a ngɛ je ma amɛ a mi ɔ nu nɔ́ nɛ ɔ, a bɔni nyami nɛ a wo Yehowa* munyu ɔ hɛ mi nyami, nɛ nihi tsuo nɛ a ngɛ tsui kpakpa nɛ ma ha nɛ a ná neneene wami ɔ ba he ye. 49 Jehanɛ se hu ɔ, a ngɛ Yehowa munyu ɔ gbɛe kɛ ngɛ fiae ngɛ ma a mi tsuo. 50 Se Yudabi ɔmɛ wo yihi nɛ a buɔ mɛ nɛ a yeɔ Mawu gbeye kɛ nyumuhi nɛ a hɛɛ blɔ nya ngɛ ma a mi ɔ a yi mi, nɛ a ha nɛ a te si+ kɛ wo Paulo kɛ Barnaba, nɛ a fie mɛ kɛ ho a huzu ɔmɛ a se ya. 51 Enɛ ɔ he ɔ, a blɛ a nane he bunyuku ɔ kɛ pue si kɛ pee odase kɛ si mɛ, nɛ a je kɛ ho Ikoniom ya.+ 52 Nɛ bua jɔmi+ kɛ mumi klɔuklɔu ya nɔ nɛ e hyi kaseli ɔmɛ tɔ.

14 Jehanɛ ɔ, ngɛ Ikoniom ɔ, a pee kake kɛ ya sɛ Yudabi ɔmɛ a kpe he ɔ, nɛ bɔ nɛ a plɛ kɛ tu munyu ha a ha nɛ Yudabi kɛ Helabi babauu nitsɛ ba he ye. 2 Se Yudabi ɔmɛ nɛ a he we yi ɔ wo nihi* nɛ a je je ma amɛ a mi ɔ a yi mi, nɛ a su mɛ ngɔ wo nyɛmimɛ ɔmɛ a he.+ 3 Enɛ ɔ he ɔ, a ye be saii ngɛ lejɛ ɔ, nɛ a kɛ kã tu munyu ngɛ Yehowa* he wami ɔ nya, nɛ lɛ hu e gu a nɔ kɛ pee okadihi kɛ nyakpɛ níhi* kɛ ye e dloomi munyu ɔ he odase.+ 4 Se nihi babauu nɛ a ngɛ ma a mi ɔ a mi gba; ni komɛ fĩ Yudabi ɔmɛ a se, nɛ ni kpahi hu fĩ bɔfo ɔmɛ a se. 5 Benɛ nihi nɛ a je je ma amɛ a mi kɛ Yudabi ɔmɛ kɛ a nɔ yeli ɔmɛ tsuo bɔ mɔde kaa a maa pee mɛ nisɛ níhi nɛ́ a maa fiaa mɛ tɛ ɔ,+ 6 a wo bɔfo ɔmɛ a tue nɔ nɛ a tu fo kɛ ho Likaonia, Listra, Derbe kɛ ma nɛ bɔle mɛ ɔ a mi ya.+ 7 A ya nɔ nɛ a jaje sane kpakpa a ngɛ lejɛ ɔ.

8 Jehanɛ ɔ, nyumu ko ngɛ Listra, libɔɔ ji lɛ, nɛ e hii si ngɛ zugba. A fɔ lɛ glɔtsɛ, nɛ e nyɛɛ we hyɛ. 9 Benɛ Paulo ngɛ munyu tue ɔ, nyumu nɛ ɔ ngɛ lɛ tue bue. Paulo hyɛ lɛ totooto, nɛ benɛ e na kaa nyumu ɔ ngɛ hemi kɛ yemi kaa a ma tsa lɛ ɔ,+ 10 e kɛ gbi nɛ nya wa de lɛ ke: “Tee si nɛ o da o nane nɔ.” Kɛkɛ nɛ nyumu ɔ hlu kɛ da si, nɛ e bɔni nyɛɛmi.+ 11 Benɛ asafo kuu ɔ na nɔ́ nɛ Paulo pee ɔ, a kpa ngmlaa ngɛ Likaonia gbi mi ke: “Mawu ɔmɛ plɛ a he nimli nɛ a kple si kɛ ba wa ngɔ!”+ 12 Nɛ a bɔni Barnaba tsɛmi ke Zeu, se Paulo lɛɛ Herme, ejakaa lɛ ji nɔ titli nɛ e ngɛ munyu ɔ tue. 13 Nɛ Zeu osɔfo ɔ nɛ e sɔlemi we ɔ ngɛ ma a nya a ngɔ na kuhi kɛ mɔmɔ akekleehi kɛ ba agbo ɔmɛ a nya, nɛ e ngɛ hlae nɛ e kɛ asafo kuu ɔ nɛ a ngɔ kɛ sã afɔlehi.

14 Se benɛ bɔfo Barnaba kɛ bɔfo Paulo nu he ɔ, a hía a tade ɔmɛ, nɛ a sa fo kɛ ya sɛ asafo kuu ɔ kpɛti, nɛ a kpa ngmlaa ke: 15 “Nyumuhi, mɛni he je nɛ nyɛ ngɛ ní nɛ ɔmɛ pee ɔ? Wɔ hu wa ji adesahi nɛ a ngɛ gbɔjɔmihi kaa nyɛ nɔuu.+ Nɛ wa ngɛ sane kpakpa a jajee kɛ ngɛ nyɛ tsɔɔe konɛ nyɛɛ kpale kɛ je ní nɛ ɔmɛ nɛ se nami be a he ɔ a se kɛ ba Mawu hɛ kalɔ ɔ, nɔ nɛ e bɔ hiɔwe ɔ, kɛ zugba a, kɛ wo ɔ, kɛ níhi tsuo nɛ ngɛ a mi ɔ ngɔ.+ 16 Ngɛ yi nɔhi nɛ a be ɔ a mi ɔ, e ngmɛ je ma amɛ tsuo blɔ nɛ a nyɛɛ ngɛ mɛ nitsɛmɛ a blɔhi a nɔ,+ 17 se kɛ̃ ɔ, e jɔɔ we lɛ nitsɛ e he odase yemi,+ ejakaa e pee kpakpa, e ha hiɔmi nɛ kɛ je hiɔwe ha nyɛ, nɛ e ha nyɛ be kpakpahi nɛ niye ní baa,+ nɛ e ha nyɛ ngma nɛ nyɛ ye nɛ nyɛ tɔ, nɛ e ha nɛ bua jɔmi hyi nyɛ tsui mi tɔ.”+ 18 Se ngɛ ní nɛ ɔmɛ nɛ a de ɔ tsuo se ɔ, e piɛ bɔɔ jinɛ a ko nyɛ we asafo kuu ɔ nya tsimi konɛ a ko sã afɔle ɔ ha mɛ.

19 Se Yudabi komɛ je Antiokia kɛ Ikoniom kɛ ba nɛ a ba plɛ asafo kuu ɔ yi mi,+ nɛ a fiaa Paulo tɛ nɛ a gbla lɛ si kɛ ya ma a se, nɛ a susu kaa e gbo.+ 20 Se benɛ kaseli ɔmɛ ba bɔle lɛ ɔ, e te si nɛ e sɛ ma a mi. E nɔ jena a, e kɛ Barnaba je kɛ ho Derbe ya.+ 21 Benɛ a ya jaje sane kpakpa a ngɛ jamɛ a ma a mi nɛ a pee nihi fuu kaseli se ɔ, a kpale kɛ ho Listra, Ikoniom, kɛ Antiokia ya. 22 A ya wo kaseli ɔmɛ* he wami ngɛ lejɛ ɔ.+ A wo mɛ he wami kaa a ya nɔ nɛ a hi hemi kɛ yemi ɔ mi, nɛ a de ke: “E sa nɛ waa gblee amanehlu babauu mi kɛ sɛ Mawu Matsɛ Yemi ɔ mi.”+ 23 Jehanɛ se hu ɔ, a hla nikɔtɔmahi kɛ ha mɛ ngɛ asafo fɛɛ asafo mi,+ a sɔle nɛ a ha hwɔ,+ nɛ a tu mɛ ngɔ wo Yehowa,* nɔ nɛ a ba he lɛ ye ɔ dɛ mi.

24 Lɔ ɔ se ɔ, a gu Pisidia nɛ a ba Pamfilia,+ 25 nɛ benɛ a jaje munyu ɔ ngɛ Perga ta a, a kple kɛ ho Atalia ya. 26 Benɛ a je lejɛ ɔ, a sɛ lɛ mi nɛ a pue nɔ kɛ ho Antiokia ya, he nɛ a tu mɛ ngɔ wo Mawu dloomi ɔ dɛ mi ngɛ kɛ ha ní tsumi nɛ amlɔ nɛ ɔ, a gbe nya a.+

27 Benɛ a ba su nɛ a bua asafo ɔ nya a, a bɔ mɛ níhi fuu nɛ Mawu gu a nɔ kɛ pee, kɛ bɔ nɛ e bli sinya nɛ a kɛ yaa hemi kɛ yemi mi ɔ kɛ ha je ma amɛ ɔ.+ 28 Lɔ ɔ he ɔ, a kɛ kaseli ɔmɛ hi si be saii ngɛ lejɛ ɔ.

15 Jehanɛ ɔ, nyumu komɛ kple kɛ je Yudea kɛ ba nɛ a ba bɔni nyɛmimɛ ɔmɛ tsɔɔmi ke: “Ke a pui nyɛ ngɛ Mose kusumi ɔ nya a,+ a be nyɛe ma he nyɛ yi wami.” 2 Se benɛ Paulo kɛ Barnaba kɛ mɛ je atsinyɛ nɛ a kɛ mɛ sã nya hluu ɔ, a to blɔ nya kaa Paulo, Barnaba, kɛ ni ɔmɛ a kpɛti ni komɛ nɛ́ a kuɔ kɛ ya bɔfo ɔmɛ kɛ nikɔtɔma amɛ a ngɔ ngɛ Yerusalem,+ ngɛ sane* nɛ ɔ he.

3 Lɔ ɔ he ɔ, benɛ asafo ɔ ya je mɛ blɔ bɔɔ ɔ, nyumu nɛ ɔmɛ tsa nɔ kɛ gu Foinike kɛ Samaria tsuo, nɛ a ngɛ bɔ nɛ nihi nɛ a je je ma amɛ a mi ɔ tsake ha a he amaniɛ bɔe fitsofitso, nɛ enɛ ɔ ha nɛ nyɛmimɛ ɔmɛ tsuo ná bua jɔmi babauu. 4 Benɛ a ya su Yerusalem ɔ, asafo ɔ kɛ bɔfo ɔmɛ kɛ nikɔtɔma amɛ he mɛ atuu, nɛ a bɔ mɛ níhi fuu nɛ Mawu gu a nɔ kɛ pee ɔ. 5 Se nihi nɛ a ji Farisi kuu ɔ mi bimɛ nɛ a ba he ye ɔ, a kpɛti ni komɛ te si ngɛ a sɛhi a mi nɛ a de ke: “E he hia nɛ a po mɛ nɛ a fã mɛ nɛ a ye Mose Mlaa a nɔ.”+

6 Enɛ ɔ he ɔ, bɔfo ɔmɛ kɛ nikɔtɔma amɛ kpe konɛ a hyɛ sane nɛ ɔ mi. 7 Benɛ a sɛsɛ he* hluu ɔ, Petro te si kɛ da si nɛ e de mɛ ke: “Nyumuhi, nyɛmimɛ, nyɛ nitsɛmɛ nyɛ le saminya kaa, kɛ je sisije tɔɔ nɛ Mawu hla mi ngɛ nyɛ kpɛti kaa e sa kaa nihi nɛ a je je ma amɛ a mi ɔ nɛ á nu sane kpakpa a he munyu ɔ kɛ je ye nya konɛ a he ye.+ 8 Nɛ Mawu nɛ e le nɔ tsui mi ɔ+ ye odase kɛ gu mumi klɔuklɔu ɔ nɛ e ngɔ kɛ ha mɛ+ kaa bɔ nɛ wɔ hu e ngɔ kɛ ha wɔ ɔ nɔ. 9 Nɛ e ha we nɛ slɔɔto ko kulaa nɛ hi waa kɛ mɛ wa kpɛti,+ mohu ɔ, e ngɔ hemi kɛ yemi ɔ kɛ tsu a tsui he.+ 10 Lɛɛ amlɔ nɛ ɔ, mɛni he je mɔ lɛ nyɛ ngɛ Mawu kae, nɛ nyɛ ngɔ kuɛpã tso+ nɛ wa nɛmɛ ɔmɛ nyɛ we nɛ a tloo nɛ wɔ hu wa nyɛ we nɛ waa tloo ɔ kɛ ngɛ kaseli ɔmɛ a kuɛ woe ɔ?+ 11 Wɔɔ lɛɛ, wa ngɛ hemi kɛ yemi kaa Nyɔmtsɛ Yesu dloomi ɔ+ nɔ lɛ a gu kɛ he wa yi wami kaa bɔ nɛ e ji ngɛ mɛ hu a blɔ fa mi ɔ nɛ.”+

12 Kɛkɛ nɛ kuu ɔ tsuo pee dii, nɛ a bɔni Barnaba kɛ Paulo tue bumi, nɛ a de okadihi kɛ nyakpɛ níhi* fuu nɛ Mawu gu a nɔ kɛ pee ngɛ je ma amɛ a kpɛti ɔ. 13 Benɛ a gbe a munyu ɔ nya a, Yakobo de ke: “Nyumuhi, nyɛmimɛ, nyɛɛ bu mi tue. 14 Simeon+ tu kekleekle be nɛ Mawu ngɔ e juɛmi kɛ ya je ma amɛ a nɔ, konɛ e ngɔ ni komɛ kɛ je a kpɛti kɛ ha e biɛ ɔ he munyu fitsofitso.+ 15 Nɛ enɛ ɔ kɛ Gbali ɔmɛ a munyu ɔ kɔ, kaa bɔ nɛ a ngma ke: 16 ‘Ngɛ ní nɛ ɔmɛ a se ɔ, ma kpale nɛ ma ya wo David bo tsu* ɔ nɛ e nɔ si ɔ nɔ kɛ ma si ekohu; ma ma e tsu nɛ e hule ɔ ekohu nɛ ma ha nɛ e hi kaa sa a, 17 bɔ nɛ pee nɛ nihi nɛ a piɛ, kɛ nihi nɛ a je je ma amɛ tsuo a mi, kɛ nihi nɛ a kɛ ye biɛ ɔ tsɛɔ mɛ ɔ nɛ a hla Yehowa* se blɔ kɛ hɛdɔ, Yehowa* nɛ́ ngɛ ní nɛ ɔmɛ pee ɔ lɛ de,+ 18 nɛ a le kɛ je blema lokoo.’+ 19 Enɛ ɔ he ɔ, yi mi kpɔ nɛ i mwɔ* ji kaa a ko hao nihi nɛ a je je ma amɛ a mi nɛ a ngɛ Mawu ngɔ bae ɔ,+ 20 mohu ɔ, a ngma kɛ ya ha mɛ kaa a yu a he ngɛ níhi nɛ wɔhi wo a he mu,+ ajuama bɔmi,*+ lohwehi nɛ a kika a kuɛ,* kɛ muɔ+ he. 21 Ejakaa kɛ je blema tɔɔ nɛ Mose ngɛ nihi nɛ a tuɔ e he munyu kɛ jeɔ ma kake mi kɛ yaa ma kpa mi, ejakaa a woɔ a gbi nɔ kɛ kaneɔ níhi nɛ e ngma a ngɛ he jɔɔmi ligbi fɛɛ he jɔɔmi ligbi nɔ.”+

22 Kɛkɛ nɛ bɔfo ɔmɛ kɛ nikɔtɔma amɛ kɛ asafo ɔ tsuo ma nya si kaa a maa hla nyumuhi ngɛ a kpɛti kɛ piɛɛ Paulo kɛ Barnaba a he konɛ a tsɔ mɛ kɛ ya Antiokia; a tsɔ Yuda nɛ a tsɛɔ lɛ ke Basaba hulɔ ɔ kɛ Sila,+ a ji nyumuhi nɛ a nyɛɛ hɛ mi ngɛ nyɛmimɛ ɔmɛ a kpɛti. 23 Nɔ́ nɛ a ngma kɛ tsɔ mɛ ɔ ji nɛ ɔ nɛ:

“Nyɛ nyɛmimɛ bɔfo ɔmɛ kɛ nikɔtɔma amɛ, kɛ ya ha nyɛmimɛ nɛ a ngɛ Antiokia,+ Siria, kɛ Kilikia nɛ a je je ma amɛ a mi ɔ: Wa biɔ nyɛ! 24 Akɛnɛ wa nu kaa ni komɛ je wa kpɛti kɛ ba nyɛ ngɔ nɛ pohu waa kɛ blɔ tsɔɔmi ko ha we mɛ, nɛ́ a kɛ a nya mi munyu ba hao nyɛ,+ nɛ a ngɛ mɔde bɔe kaa a ma puɛ nyɛ* he je ɔ, 25 wa pee wa nya kake nɛ wa hla nyumuhi kɛ piɛɛ Barnaba kɛ Paulo nɛ wa suɔ mɛ ɔ a he konɛ waa tsɔ mɛ nyɛ ngɔ, 26 a ji nyumuhi nɛ a ngɔ a wami* ngɔ ha ngɛ wa Nyɔmtsɛ Yesu Kristo biɛ ɔ he je.+ 27 Enɛ ɔ he ɔ, wa ngɛ Yuda kɛ Sila tsɔe konɛ mɛ hu a ngɔ a nya mi munyu kɛ jaje ní nɛ ɔmɛ nɔuu ngɔ tsɔɔ nyɛ.+ 28 Ejakaa mumi klɔuklɔu ɔ+ kɛ wɔ nitsɛmɛ hu wa sume kaa wa maa ngɔ tlomi kpa ko kɛ fɔ nyɛ nɔ kaa ja níhi nɛ a he hia nɛ ɔmɛ pɛ: 29 kaa nyɛɛ ya nɔ nɛ nyɛɛ hi nyɛ he yue ngɛ níhi nɛ a ngɔ kɛ sã afɔle ha wɔhi,+ muɔ,+ lohwehi nɛ a kika a kuɛ,*+ kɛ ajuama bɔmi* he.+ Ke nyɛ hyɛ nyɛ he nɔ saminya ngɛ ní nɛ ɔmɛ a he ɔ, níhi maa ya nɔ ha nyɛ saminya. Nyɛɛ hi si saminya!”*

30 Enɛ ɔ he ɔ, benɛ a wo nyumu nɛ ɔmɛ blɔ ɔ, a kple kɛ ho Antiokia ya, nɛ a ya bua kuu ɔ tsuo nya nɛ a ngɔ sɛ womi ɔ kɛ ha mɛ. 31 Benɛ a kane sɛ womi ɔ ta a, a bua jɔ he wami womi ɔ he wawɛɛ. 32 Nɛ akɛnɛ gbali hu ji Yuda kɛ Sila he je ɔ, a tu he wami womi munyuhi fuu kɛ tsɔɔ nyɛmimɛ ɔmɛ, nɛ a wo a bua.+ 33 Benɛ a ye be saii ngɛ lejɛ ɔ, nyɛmimɛ ɔmɛ wo mɛ blɔ ngɛ tue mi jɔmi mi kɛ ho nihi nɛ a tsɔ mɛ kɛ ba a a ngɔ ya. 34* —— 35 Se Paulo kɛ Barnaba hi Antiokia, nɛ a tsɔɔ ní nɛ a jaje Yehowa* munyu ɔ he sane kpakpa a, nɛ ni kpahi fuu hu pee jã.

36 Ligbi komɛ a se ɔ, Paulo de Barnaba ke: “Amlɔ nɛ ɔ,* ha nɛ waa kpale kɛ ya slaa nyɛmimɛ ɔmɛ nɛ a ngɛ ma fɛɛ ma nɛ wa jaje Yehowa* munyu ɔ ngɛ mi ɔ mi ɔ, konɛ wa ya hyɛ bɔ nɛ a ngɛ ha.”+ 37 Barnaba fia e pɛɛ si kaa e maa ngɔ Yohane nɛ a tsɛɔ lɛ ke Marko ɔ kɛ piɛɛ a he kɛ ya.+ 38 Se Paulo lɛɛ e bua jɔɛ he kaa a maa ngɔ lɛ kɛ piɛɛ a he kɛ ya, akɛnɛ e kpale ngɛ a se ngɛ Pamfilia nɛ e kɛ mɛ yɛ nɛ a ya tsu ní ɔ he je.+ 39 Enɛ ɔ ngɔ abofu kɛ ba nɛ a sã nya wawɛɛ, lɔ ɔ he ɔ, a mi gba; nɛ Barnaba+ ngɔ Marko kɛ piɛɛ e he nɛ a sɛ lɛ mi kɛ ho Kipro ya. 40 Paulo lɛɛ, e hla Sila, nɛ benɛ nyɛmimɛ ɔmɛ tu lɛ ngɔ wo Yehowa* dloomi ɔ dɛ mi ɔ,+ a pue nɔ kɛ ho. 41 E ya gu Siria kɛ Kilikia, nɛ e wo asafo ɔmɛ he wami.

16 Lɔ ɔ he ɔ, Paulo ya su Derbe nɛ e tsa nɔ kɛ ho Listra ya.+ Nɛ kaselɔ ko ngɛ lejɛ ɔ nɛ a tsɛɔ lɛ ke Timoteo,+ Yuda yo ko nɛ e he ye ɔ binyumu ji lɛ, se e tsɛ ɔ lɛɛ Helano, 2 nɛ nyɛmimɛ ɔmɛ nɛ a ngɛ Listra kɛ Ikoniom ɔ tuɔ e he munyu kpakpa. 3 Paulo suɔ nɛ Timoteo nɛ e ba piɛɛ e he, nɛ e ngɔ lɛ nɛ e po lɛ ngɛ Yudabi nɛ a ngɛ lejɛ ɔ ní ɔmɛ a mi ɔmɛ a he je,+ ejakaa mɛ tsuo a le kaa e tsɛ ɔ ji Helano. 4 Benɛ a ngɛ ma amɛ a nɔ kpae ɔ, a ngɔ mlaahi nɛ bɔfo ɔmɛ kɛ nikɔtɔma amɛ nɛ a ngɛ Yerusalem ɔ wo ɔ kɛ ngɛ mɛ hae konɛ a ye nɔ.+ 5 Enɛ ɔ he ɔ, ngɛ anɔkuale mi ɔ, asafo ɔmɛ ya nɔ nɛ a he wa ngɛ hemi kɛ yemi ɔ mi, nɛ daa ligbi ɔ, a he ngɛ hiɛe.

6 Jehanɛ se hu ɔ, a hia blɔ kɛ ya gu Frigia kɛ Galatia ma a mi,+ ejakaa mumi klɔuklɔu ɔ tsi a nya kaa a ko tu Mawu munyu ɔ ngɛ Asia kpokpa a nɔ. 7 Jehanɛ ɔ, benɛ a kple kɛ ba Misia a, a bɔ mɔde kaa a maa ya Bitinia,+ se Yesu mumi ɔ ha we mɛ blɔ. 8 Lɔ ɔ he ɔ, a be Misia he,* nɛ a kple kɛ ba Troya. 9 Nɛ nyɔ ɔ mi ɔ, a je nina ko kɛ tsɔɔ Paulo. E na Makedonia nyumu ko nɛ daa si ngɛ lejɛ ɔ, nɛ e ngɛ lɛ pɛɛ kpae ke: “Moo po mi kɛ ba Makedonia nɛ o ba ye bua wɔ.” 10 Benɛ e na nina a nɔuu pɛ ɔ, wa bɔ mɔde kaa wa maa ya Makedonia, ejakaa wa ma nya si kaa Mawu tsɛ wɔ konɛ wa ya jaje sane kpakpa a kɛ tsɔɔ mɛ.

11 Enɛ ɔ he ɔ, wa sɛ lɛ mi kɛ je Troya nɛ wa gu wo ɔ nɔ tɛɛ kɛ ho Samotrake ya, se e nɔ jena a, wa tsa nɔ kɛ ya Neapoli; 12 nɛ benɛ wa je lejɛ ɔ, wa ya Roma nɔ yemi he ko nɛ a tsɛɔ ke Filipi+ nɛ́ e ji ma ngua ngɛ Makedonia kpokpa a nɔ ɔ. Wa hi lejɛ ɔ ligbi bɔɔ ko. 13 Ngɛ He Jɔɔmi Ligbi ɔ nɔ ɔ, wa ya agbo ɔ se ngɛ pa a nya he nɛ wa susu kaa a sɔleɔ ngɛ ɔ, nɛ wa ya hi si, nɛ waa kɛ yihi nɛ a ba kpe ngɛ lejɛ ɔ bɔni munyu tumi. 14 Nɛ yo ko nɛ a tsɛɔ lɛ ke Lidia, nɛ e ji bo nɛ hɛɛ alamua tu su jualɔ nɛ e je Tiatira,+ nɛ e ji Mawu jalɔ ɔ ngɛ tue bue, nɛ Yehowa* bli e tsui mi gbajaa konɛ e bu níhi nɛ Paulo ngɛ dee ɔ tue. 15 Jehanɛ ɔ, benɛ a baptisi e kɛ e we mi bimɛ ɔmɛ tsuo ɔ,+ e kpa wɔ pɛɛ wawɛɛ ke: “Ke nyɛ bu mi kaa i yeɔ Yehowa* anɔkuale ɔ, lɛɛ nyɛɛ ba nɛ nyɛ ba to ye we ɔ mi.” Nɛ e pee hluu nɛ wa ya.

16 Jehanɛ ɔ, e ba mi kaa benɛ wa yaa he nɛ a sɔleɔ ngɛ ɔ, mawayo ko nɛ daimonio mumi ngɛ e mi, nɛ́ e haa nɛ e klaa a+ kɛ wɔ ba kpe. E gu níhi nɛ maa ba hwɔɔ se nɛ e deɔ nihi ɔ* nɔ kɛ ha nɛ e nyɔmtsɛmɛ ɔmɛ ná ní babauu. 17 Yoyo nɛ ɔ ya nɔ nɛ e ngɛ waa kɛ Paulo wa se nyɛɛe, nɛ e ngɛ ngmlaa kpae ke: “Nyumu nɛ ɔmɛ ji Mawu Hiɔwe Lokoo No ɔ nyɔguɛhi,+ nɛ a ngɛ yi wami hemi blɔ ɔ jajee kɛ ngɛ nyɛ tsɔɔe.” 18 E ya nɔ nɛ e pee nɔ́ nɛ ɔ ligbihi fuu. Nyagbe ɔ, nɔ́ nɛ ɔ ba gbe Paulo nya,* nɛ e plɛ e he, nɛ e de mumi ɔ ke: “I ngɛ mo fãe ngɛ Yesu Kristo biɛ mi kaa o je kpo ngɛ e mi.” Nɛ e je kpo jamɛ a ngmlɛfia a mi nɔuu.+

19 Jehanɛ ɔ, benɛ e nyɔmtsɛmɛ ɔmɛ na kaa blɔ nɔ nɛ a guɔ kɛ náa sika a se po ɔ,+ a nu Paulo kɛ Sila, nɛ a gbla mɛ kɛ ya nɔ yeli ɔmɛ a ngɔ ngɛ jua a nɔ.+ 20 A ngɔ mɛ kɛ ya nihi nɛ a hyɛɔ konɛ mlaa nɛ tsu ní ɔ a ngɔ, nɛ a de ke: “Nyumu nɛ ɔmɛ ngɛ wa ma a nya gbae wawɛɛ nitsɛ.+ Yudabi ji mɛ, 21 nɛ a ngɛ kusumihi nɛ mlaa ngmɛ́ blɔ kaa waa pɛtɛ he loo waa ngɔ kɛ tsu ní ɔ jajee, ejakaa Romabi ji wɔ.” 22 Nɛ asafo kuu ɔ pee kake nɛ a te si kɛ wo mɛ, nɛ benɛ nihi nɛ a hyɛɔ konɛ mlaa nɛ tsu ní ɔ gba a tadehi ngɛ a he ta a, a fã ke a fiaa mɛ kpa.+ 23 Benɛ a fiaa mɛ kpa saminya a, a wo mɛ tsu, nɛ a fã nɔ nɛ e hyɛɔ nihi nɛ a wo mɛ tsu ɔ a nɔ ɔ kaa e bu a he saminya.+ 24 Akɛnɛ e nine su fami kaa kikɛ nɛ ɔ nɔ he je ɔ, e ngɔ mɛ kɛ ya wo se tsu ɔ mi, nɛ e bɔ a nane ɔmɛ pã.

25 Se maa pee nyɔ mi kpɛti ɔ, Paulo kɛ Sila ngɛ sɔlee nɛ a ngɛ lae kɛ ngɛ Mawu yi jee,+ nɛ nihi nɛ mɛ hu a wo mɛ tsu ɔ ngɛ mɛ tue bue. 26 Si kake too ɔ, zugba mimiɛ wawɛɛ, nɛ e hoso tsu ɔ sisi tomi ɔ. Jehanɛ hu ɔ, amlɔ nɔuu nɛ sinya amɛ tsuo bli, nɛ pã nɛ a bɔ nɔ fɛɛ nɔ ɔ kplɔ.+ 27 Benɛ nɔ nɛ e hyɛɔ nihi nɛ a wo mɛ tsu ɔ a nɔ ɔ hɛ tsɛ̃ nɛ e na kaa tsu ɔ nya sinya amɛ bli ɔ, e hia klaate nɛ́ jinɛ e yaa gbe e he, kɛ susumi ɔ kaa nihi nɛ a wo mɛ tsu ɔ tu fo.+ 28 Se Paulo kɛ gbi nɛ nya wa kpa ngmlaa ke: “Koo ye o he awi, ejakaa wɔ tsuo wa ngɛ hiɛ ɔ!” 29 Lɔ ɔ he ɔ, e de ke a ba ha lɛ kane, nɛ e sa fo kɛ sɛ tsu ɔ mi, nɛ e he ngɛ doe blibliibli, nɛ e kplã si ngɛ Paulo kɛ Sila a hɛ mi. 30 E ngɔ mɛ kɛ je kpo, nɛ e bi mɛ ke: “Awetsɛmɛ, mɛni e sa kaa ma pee konɛ a he ye yi wami?” 31 A de lɛ ke: “Mo he Nyɔmtsɛ Yesu nɛ o ye, nɛ a ma he mo kɛ o we mi bimɛ ɔmɛ tsuo nyɛ yi wami.”+ 32 Kɛkɛ nɛ a tu Yehowa* munyu ɔ kɛ tsɔɔ lɛ kɛ nihi tsuo nɛ a ngɛ e we ɔ mi ɔ. 33 Nɛ nyɔ ɔ mi ngɛ jamɛ a ngmlɛfia a mi nɔuu ɔ, e ngɔ mɛ kɛ ho nɛ e ya fɔ a pa amɛ a nɔ ha mɛ. Lɔ ɔ se ɔ, a baptisi lɛ kɛ e we ɔ tsuo amlɔ nɔuu.+ 34 E ngɔ mɛ kɛ ba e we ɔ mi, nɛ e ngmɛ okplɔɔ ha mɛ, nɛ e kɛ e we ɔ tsuo a nya wawɛɛ akɛnɛ amlɔ nɛ ɔ, e he Mawu ye ɔ he je.

35 Benɛ je na a, nihi nɛ a hyɛɔ konɛ mlaa nɛ tsu ní ɔ tsɔ ma he buli ɔmɛ nɛ a ya de lɛ ke: “Ngmɛɛ jamɛ a nyumu ɔmɛ a he.” 36 Nɔ nɛ e hyɛɔ nihi nɛ a wo mɛ tsu ɔ a nɔ ɔ ba bɔ Paulo amaniɛ ke: “Nihi nɛ a hyɛɔ konɛ mlaa nɛ tsu ní ɔ tsɔ nihi kɛ ba kaa a ngmɛɛ nyɛ ni enyɔ ɔmɛ nyɛ he. Enɛ ɔ he ɔ, amlɔ nɛ ɔ, nyɛɛ je kpo, nɛ nyɛɛ ya ngɛ tue mi jɔmi mi.” 37 Se Paulo de mɛ ke: “E ngɛ mi kaa Romabi ji wɔ mohu lɛɛ, se a fiaa wɔ kpa ngɛ ma hɛ mi+ nɛ a wo wɔ tsu, be mi nɛ a bui wɔ fɔ.* Amlɔ nɛ ɔ, anɛ a ngɛ wa he ngmɛɛe ngɛ laami mi lo? Dɛbi, wa be kpo jee! Ha nɛ mɛ nitsɛmɛ a ba nɛ a ba je wɔ kpo.” 38 Ma he buli ɔmɛ ya bɔ nihi nɛ a hyɛɔ konɛ mlaa nɛ tsu ní ɔ munyu nɛ ɔmɛ. Benɛ a nu kaa Romabi ji nyumu ɔmɛ ɔ, a ye gbeye.+ 39 Lɔ ɔ he ɔ, a ba nɛ a ba kpa mɛ pɛɛ, nɛ benɛ a je mɛ kpo ɔ, a kpa mɛ pɛɛ kaa a je a ma a mi. 40 Se benɛ a je kpo kɛ je tsu womi he ɔ, a ho Lidia we ɔ mi ya; nɛ benɛ a na nyɛmimɛ ɔmɛ ɔ, a wo mɛ he wami+ nɛ a pue nɔ kɛ ho.

17 Jehanɛ ɔ, a hia blɔ kɛ ya gu Amfipoli kɛ Apolonia nɛ a ba Tesalonika,+ he nɛ Yudabi ɔmɛ a kpe he ko ngɛ ɔ. 2 Kaa bɔ nɛ Paulo pɔɔ peemi ɔ,+ e ho a ngɔ ya ngɛ kpe he ɔ, nɛ e kɛ mɛ ya susu níhi nɛ a ngɛ Ngmami ɔ mi ɔ a he he jɔɔmi ligbi etɛ sɔuu,+ 3 e tsɛ munyuhi a se kɛ tsɔɔ níhi a mi, nɛ e ma nɔ mi kaa e he hia nɛ Kristo ɔ nɛ e na amanehlu+ nɛ a tle lɛ si kɛ je gbogboehi a kpɛti,+ nɛ e de ke: “Yesu nɛ ɔ nɛ́ i ngɛ e he sane jajee kɛ ngɛ nyɛ tsɔɔe ɔ ji Kristo ɔ nɛ.” 4 Enɛ ɔ ha nɛ a ti ni komɛ ba he ye nɛ a kɛ Paulo kɛ Sila bɔ,+ nɛ Helabi babauu nitsɛ nɛ a jaa Mawu, kɛ yihi nɛ a he biɛ ɔ a ti nihi fuu hu pee jã.

5 Se Yudabi ɔmɛ ngɛ hunga jee+ nɛ a ya bua nyumu komɛ nɛ a ji yiwutsotsɛmɛ nɛ a ngɛ si kpae kɛkɛ ngɛ jua a nɔ ɔ a nya, nɛ benɛ a he ba hiɛ fuu ɔ, a ha nɛ basabasa peemi ba ma a mi. A ya tua Yason we ɔ, nɛ a ngɛ hlae nɛ a je Paulo kɛ Sila kpo kɛ ha basabasa peeli ɔmɛ. 6 Benɛ a nɛ mɛ ɔ, a gbla Yason kɛ nyɛmimɛ ɔmɛ a ti ni komɛ kɛ ya ma nɔ yeli ɔmɛ a ngɔ, nɛ a ngɛ ngmlaa kpae ke: “Nyumu nɛ ɔmɛ nɛ́ a plɛ zugba a tsuo hɛ mi ngɔ bu si* ɔ ba hiɛ ɔ hulɔ,+ 7 nɛ Yason he mɛ ngɔ to kaa e nibwɔhi. Nyumu nɛ ɔmɛ tsuo teɔ si kɛ woɔ Kaisare mlaa amɛ, nɛ a ngɛ dee ke matsɛ kpa ko ngɛ, nɛ lɛ ji Yesu.”+ 8 Benɛ a nu ní nɛ ɔmɛ ɔ, asafo kuu ɔ kɛ ma nɔ yeli ɔmɛ a tsui po; 9 nɛ benɛ a he sika* nɛ sa ngɛ Yason kɛ ni kpa amɛ a dɛ se ɔ, a ngmɛɛ a he nɛ a ho.

10 Oya nɔuu nɛ nyɛmimɛ ɔmɛ wo Paulo kɛ Sila blɔ nyɔ mi kɛ ho Beroya ya. Benɛ a ya su ɔ, a ya Yudabi ɔmɛ a kpe he ɔ. 11 Nihi nɛ a ngɛ Beroya lɛɛ a susuɔ níhi a he kɛ yaa tsitsaa pe Tesalonikabi ɔmɛ, ejakaa a kɛ a juɛmi tsuo pɛtɛ munyu ɔ he, nɛ daa ligbi ɔ, a kpaa Ngmami ɔ mi saminya konɛ a hyɛ kaa ní nɛ ɔmɛ ngɛ mi jã niinɛ lo. 12 Enɛ ɔ he ɔ, a ti nihi babauu ba he ye, nɛ Hela yihi fuu nɛ a ngɛ biɛ kpakpa kɛ nyumu komɛ hu pee jã nɔuu. 13 Se benɛ Yudabi nɛ a je Tesalonika a ná le kaa Paulo ngɛ Mawu munyu ɔ jajee ngɛ Beroya hulɔ ɔ, a ba lejɛ ɔ nɛ a ba wo asafo kuu ɔ yi mi, nɛ a pee basabasa.+ 14 Kɛkɛ nɛ amlɔ nɔuu ɔ, nyɛmimɛ ɔmɛ wo Paulo blɔ kɛ ho wo ɔ nya ya,+ se Sila kɛ Timoteo lɛɛ a hi lejɛ ɔ. 15 Se nihi nɛ a piɛɛ Paulo he ɔ ngɔ lɛ kɛ ba Atene tɔɔ, nɛ benɛ Paulo ngɔ sɛ kɛ ha mɛ kaa a ya de Sila kɛ Timoteo+ kaa a ba e ngɔ oya nɔuu ɔ, a je.

16 Jehanɛ ɔ, benɛ Paulo ngɛ mɛ mlɛe ngɛ Atene nɛ e na kaa wɔhi babauu ngɛ ma a mi ɔ, e hao* wawɛɛ. 17 Enɛ ɔ he ɔ, e kɛ Yudabi ɔmɛ kɛ ni kpahi nɛ a jaa Mawu ɔ bɔni níhi a he susumi ngɛ kpe he ɔ, nɛ daa ligbi ɔ, e kɛ nihi nɛ e naa mɛ ngɛ jua a nɔ ɔ susuɔ níhi a he. 18 Se Epikuro we bi kɛ Stoike we bi nɛ a ji je mi ní leli ɔ kɛ lɛ bɔni nya sami, nɛ a ti ni komɛ ngɛ dee ke: “Mɛni nyapuutsɛ nɛ ɔ ngɛ hlae nɛ e de?” Ni kpahi hu ngɛ dee ke: “E ngɛ kaa nɔ́ nɛ e ngɛ ma se mawuhi a he munyu jajee.” Ejakaa e ngɛ Yesu he sane kpakpa a kɛ gbogboehi a si tlemi ɔ jajee.+ 19 Enɛ ɔ he ɔ, a nu lɛ nɛ a ngɔ lɛ kɛ ho Areopago ɔ ya, nɛ a bi lɛ ke: “Anɛ o ma nyɛ ma ha nɛ waa le tsɔɔmi ehe nɛ o ngɛ he munyu tue nɛ ɔ lo? 20 Ejakaa o ha nɛ wa tuehi ngɛ ní ehehi nue, nɛ wa suɔ nɛ waa le nɔ́ nɛ ní nɛ ɔmɛ tsɔɔ.” 21 Ngɛ anɔkuale mi ɔ, nɔ́ pɛ nɛ Atenebi ɔmɛ kɛ nihi nɛ a je ma se nɛ a ngɛ* lejɛ ɔ tsuo ngɔɔ a he jɔɔmi be kɛ peeɔ kɛkɛ ji kaa a maa hi nɔ́ ehe ko he munyu tue aloo a maa hi tue bue. 22 Jehanɛ ɔ, Paulo da si ngɛ Areopago ɔ+ kpɛti nɛ e de ke:

“Atene nyumuhi, i na kaa ngɛ nɔ́ fɛɛ nɔ́ mi ɔ, nyɛ yeɔ mawu ɔmɛ gbeye* wawɛɛ pe ni kpa amɛ.+ 23 Kaa nɔ hyɛmi nɔ́ ɔ, benɛ i bee nɛ i ngɛ níhi nɛ nyɛ jaa a* a he hɛ toe saminya a, i na afɔle sami latɛ ko nɛ a ngma ngɛ he ke ‘Kɛ Ha Mawu Ko Nɛ A Li Lɛ ɔ.’ Enɛ ɔ he ɔ, nɔ nɛ nyɛ li lɛ se kɛ̃ ɔ, nyɛ ngɛ lɛ jae ɔ, jamɛ a nɔ ɔ he munyu lɛ i ngɛ jajee kɛ ngɛ nyɛ tsɔɔe ɔ nɛ. 24 Mawu ɔ nɛ e bɔ je ɔ kɛ níhi tsuo nɛ ngɛ mi ɔ, lɛ ji hiɔwe kɛ zugba Nyɔmtsɛ ɔ nɛ,+ e hí sɔlemi wehi nɛ a kɛ nine pee mi;+ 25 nɛ jã kɛ̃ lɛ a kɛ adesahi a nine sɔmɔ we lɛ, kaa nɔ ko nɛ nɔ́ ko hia lɛ,+ ejakaa lɛ nitsɛ lɛ e haa nihi tsuo wami kɛ mumi+ kɛ níhi tsuo. 26 Nɛ nɔmlɔ kake mi+ e je kɛ pee ma fɛɛ ma kɛ e mi nimli konɛ a hi si ngɛ zugba a nɔ tsuo,+ nɛ e to behi nɛ e wo huzuhi kɛ wo hehi nɛ adesahi maa hi ɔ,+ 27 konɛ a hla Mawu se blɔ, kaa eko ɔ, ke a tataa si ɔ, a maa na lɛ niinɛ lo,+ pohu e kɛ wa ti nɔ fɛɛ nɔ he kɛ we. 28 Ejakaa kɛ gu e nɔ lɛ wa ngɛ wami, nɛ wa yaa nɛ wa baa, nɛ wa ngɛ, kaa bɔ nɛ nyɛ nitsɛmɛ nyɛ asilɛte komɛ po de ɔ. A de ke, ‘Ejakaa wɔ hu e bimɛ ji wɔ.’

29 “Enɛ ɔ he ɔ, akɛnɛ Mawu bimɛ ji wɔ he je ɔ,+ e sɛ nɛ wa susu kaa Nɔ nɛ e ji Mawu ɔ ngɛ kaa sika tsu aloo sika hiɔ aloo tɛ, kaa nɔ́ ko nɛ adesahi kɛ ga pee.+ 30 Ngɛ anɔkuale mi ɔ, Mawu ma e hɛ ngɔ fɔ behi nɛ adesahi li níhi kaa kikɛ nɛ ɔmɛ a nɔ;+ se amlɔ nɛ ɔ lɛɛ, e ngɛ nimli tsuo nɛ a ngɛ he fɛɛ he ɔ dee kaa a tsake a tsui. 31 Ejakaa e to ligbi ko, nɛ e to e yi mi kaa ngɛ jamɛ a ligbi ɔ nɔ ɔ, e maa gu nyumu ko nɛ e hla lɛ ɔ nɔ kɛ kojo+ nihi tsuo nɛ a ngɛ zugba a nɔ ɔ ngɛ dami nya, nɛ e gu si nɛ e tle lɛ kɛ je gbogboehi a kpɛti ɔ nɔ kɛ ma enɛ ɔ nɔ mi kɛ ha adesahi tsuo.”+

32 Jehanɛ ɔ, benɛ a nu gbogboehi a si tlemi ɔ he ɔ, a kpɛti ni komɛ bɔni e he fɛu yemi,+ nɛ a kpɛti ni komɛ hu de ke: “Wa maa bu mo tue ngɛ sane nɛ ɔ he ekohu.” 33 Kɛkɛ nɛ Paulo je a he, 34 se nyumu ɔmɛ a ti ni komɛ ba piɛɛ e he nɛ a he ye. A kpɛti ni komɛ ji Dionisio nɛ e ji kojolɔ ngɛ Areopago kojomi he ɔ, kɛ yo ko nɛ a tsɛɔ lɛ ke Damari ɔ, kɛ ni kpahi.

18 Ngɛ enɛ ɔ se ɔ, e je Atene nɛ e ba Korinto. 2 Nɛ e ba na Yudano ko nɛ e je Ponto nɛ a tsɛɔ lɛ ke Akuila+ kɛ e yo Priskila nɛ a je Italia kɛ ba kɛ we, ejakaa Klaudio fã Yudabi tsuo kaa a je Roma. Enɛ ɔ he ɔ, e ya a ngɔ, 3 nɛ akɛnɛ ní tsumi nɛ e tsuɔ ɔ nɔuu lɛ mɛ hu a tsuɔ he je ɔ, e hi a we ɔ mi nɛ e kɛ mɛ tsu ní,+ ejakaa a ní tsumi ji bo tsu peemi. 4 He Jɔɔmi Ligbi fɛɛ he jɔɔmi ligbi ɔ,+ e ya tuɔ munyu* ngɛ kpe he ɔ,+ nɛ e plɛɔ Yudabi kɛ Helabi a yi mi.

5 Jehanɛ ɔ, benɛ Sila+ kɛ Timoteo+ kple kɛ je Makedonia kɛ ba a, Paulo kɛ e be tsuo bɔni Mawu munyu ɔ fiɛɛmi, nɛ e ye Yudabi ɔmɛ odase kɛ ma nɔ mi kaa Yesu ji Kristo ɔ nɛ.+ 6 Se benɛ a ya nɔ nɛ a te si kɛ wo lɛ nɛ a tu munyu yayahi kɛ si lɛ se ɔ, e huanya e tade ɔmɛ a mi,+ nɛ e de mɛ ke: “Nyɛ muɔ nɛ e tloo nyɛ nitsɛmɛ.+ Imi lɛɛ ye he tsɔ.+ Kɛ je amlɔ nɛ ɔ kɛ yaa a, ma ya nihi nɛ a ngɛ je ma amɛ a mi ɔ a ngɔ.”+ 7 Enɛ ɔ he ɔ, e je lejɛ ɔ,* nɛ e ya nyumu ko nɛ a tsɛɔ lɛ ke Titio Yusto nɛ e ji Mawu jalɔ nɛ e we ɔ tsa kpe he ɔ nɔ ɔ we ɔ mi. 8 Se Krispo+ nɛ e ji kpe he ɔ nɔ hyɛlɔ ɔ ba he Nyɔmtsɛ ɔ ye, lɛ kɛ e we mi bimɛ ɔmɛ tsuo. Nɛ Korintobi ɔmɛ a ti nihi fuu nɛ a nu sane kpakpa a he ye nɛ a baptisi mɛ. 9 Jehanɛ se hu ɔ, nyɔ mi ɔ, Nyɔmtsɛ ɔ de Paulo ngɛ nina ko mi ke: “Koo ye gbeye, mohu ɔ, yaa nɔ nɛ o hi munyu ɔ tue, nɛ ko ma o nya, 10 ejakaa i kɛ mo ngɛ,+ nɛ adesa ko be mo tuae nɛ e ye mo awi; ejakaa i ngɛ nihi fuu ngɛ ma nɛ ɔ mi.” 11 Lɔ ɔ he ɔ, e hi lejɛ ɔ jeha kake kɛ nyɔhiɔ ekpa, nɛ e tsɔɔ Mawu munyu ɔ ngɛ a kpɛti.

12 Benɛ Galio ji amlaalo* ngɛ Akaya a, Yudabi ɔmɛ pee kake nɛ a ya tua Paulo nɛ a ngɔ lɛ kɛ ho kojomi sɛ ɔ he ya, 13 nɛ a de ke: “Nyumu nɛ ɔ ngɛ nihi a yi mi plɛe ke a ja Mawu ngɛ blɔ nɛ e kɛ wa mlaa a kɔ we ɔ nɔ.” 14 Se benɛ Paulo ma munyu tumi ɔ, Galio de Yudabi ɔmɛ ke: “Nyɛ Yudabi, ngɛ anɔkuale mi ɔ, kaa tɔmi ko aloo yayami ngua ko lɛ e pee ɔ, jinɛ sisi numi ngɛ he kaa ma to ye tsui si kɛ bu nyɛ tue. 15 Se ke nya sami ɔ kɔɔ munyuhi kɛ biɛhi kɛ nyɛ nitsɛmɛ nyɛ mlaa a he ɔ,+ lɛɛ e sa nɛ nyɛ nitsɛmɛ nyɛɛ hyɛ mi. Imi lɛɛ i sume nɛ ma pee ní nɛ ɔmɛ a he kojolɔ.” 16 Kɛkɛ nɛ e fie mɛ kɛ je kojomi sɛ ɔ hɛ mi. 17 Enɛ ɔ he ɔ, mɛ tsuo a nu Sostene+ nɛ e ji kpe he ɔ nɔ hyɛlɔ ɔ nɛ a bɔni lɛ kongomi ngɛ kojomi sɛ ɔ hɛ mi. Se Galio kɛ e he wui ní nɛ ɔmɛ a mi kulaa.

18 Benɛ Paulo hi lejɛ ɔ ligbi bɔɔ komɛ a se ɔ, e kɛ nyɛmimɛ ɔmɛ ye sɛ, nɛ e hi lɛ mi kɛ ho Siria ya, nɛ Priskila kɛ Akuila piɛɛ e he. E ha nɛ a sɛ e yi nɛ e ba si ngɛ Kenkrea,+ ejakaa e kã kita ko. 19 Jehanɛ ɔ, a ya su Efeso, nɛ e je a he ngɛ lejɛ ɔ; se e ya sɛ kpe he ɔ, nɛ e kɛ Yudabi ɔmɛ ya susu níhi a he.+ 20 E ngɛ mi kaa a ya nɔ nɛ a kpa lɛ pɛɛ kaa e hi a ngɔ be bɔɔ, se e kplɛɛ we nɔ, 21 mohu ɔ, e kɛ mɛ ye sɛ nɛ e de mɛ ke: “Ke Yehowa* suɔ ɔ, ma kpale kɛ ba nyɛ ngɔ ekohu.” Kɛkɛ nɛ e sɛ lɛ mi kɛ je Efeso 22 nɛ e kple kɛ ba Kaisarea. Lɔ ɔ se ɔ, e kuɔ kɛ ya* nɛ e ya nga asafo ɔ, nɛ ngɛ lɔ ɔ se ɔ, e kple kɛ ho Antiokia ya.+

23 Benɛ e ye be saii ngɛ lejɛ ɔ se ɔ, e je lejɛ ɔ kɛ ho, nɛ e je mahi a mi kɛ ya mahi a mi ngɛ Galatia kɛ Frigia,+ nɛ e ngɛ kaseli ɔmɛ tsuo he wami woe.+

24 Jehanɛ ɔ, Yudano ko nɛ e je Aleksandria nɛ a tsɛɔ lɛ ke Apolo ɔ+ ba Efeso; e ji nyumu nɛ e nya mi tsɔ, nɛ e le Ngmami ɔ mi saminya. 25 A tsɔɔ nyumu nɛ ɔ Yehowa* blɔ ɔ he ní, nɛ mumi ɔ wo lɛ kã, nɛ e ngɛ Yesu he munyu tue nɛ e ngɛ e he ní tsɔɔe pɛpɛɛpɛ, se Yohane baptisimi ɔ pɛ e le. 26 E kɛ kã bɔni munyu tumi ngɛ kpe he ɔ, nɛ benɛ Priskila kɛ Akuila+ nu e he ɔ, a ngɔ lɛ kɛ ya a ngɔ, nɛ a tsɔɔ lɛ Mawu blɔ ɔ fitsofitso pe bɔ nɛ e le ɔ. 27 Jehanɛ se hu ɔ, akɛnɛ e suɔ kaa e maa po mi kɛ ya Akaya he je ɔ, nyɛmimɛ ɔmɛ ngma kɛ ya ha kaseli ɔmɛ, nɛ a wo mɛ he wami kaa a he lɛ atuu. Enɛ ɔ he ɔ, benɛ e su lejɛ ɔ, e ye bua nihi nɛ́ a ba he ye kɛ gu Mawu dloomi ɔ nɔ ɔ wawɛɛ nitsɛ; 28 ejakaa e kɛ he wami ngua tsɔɔ Yudabi ɔmɛ heii ngɛ ma hɛ mi kaa a susumi ɔ dɛ, nɛ e kɛ Ngmami ɔ tsɔɔ mɛ kaa Yesu ji Kristo ɔ nɛ.+

19 E ba mi kaa benɛ Apolo+ ngɛ Korinto ɔ, Paulo ya kpa kpokpahi nɛ a kɛ wo he kɛ ɔ a nɔ, nɛ e kple kɛ ba Efeso.+ E ba na kaseli komɛ ngɛ lejɛ ɔ, 2 nɛ e de mɛ ke: “Benɛ nyɛ ba he ye ɔ, anɛ nyɛ nine su mumi klɔuklɔu nɔ lo?”+ A ha lɛ heto ke: “Ei, wa nui hyɛ kaa mumi klɔuklɔu ko ngɛ.” 3 Lɔ ɔ he ɔ, e bi mɛ ke: “Lɛɛ mɛni mi lɛ a baptisi nyɛ ngɔ wo mɔ?” A de lɛ ke: “Yohane baptisimi ɔ mi.”+ 4 Paulo de mɛ ke: “Baptisimi nɛ Yohane baptisi ɔ lɛɛ e peeɔ tsui tsakemi he okadi,+ nɛ e de ni ɔmɛ kaa a he nɔ nɛ e ma ngɛ e se,+ nɛ ji Yesu ɔ nɛ a ye.” 5 Benɛ a nu nɔ́ nɛ ɔ, a baptisi mɛ ngɔ wo Nyɔmtsɛ Yesu biɛ ɔ mi. 6 Nɛ benɛ Paulo ngɔ e nine kɛ pue a nɔ ɔ, mumi klɔuklɔu ɔ ba a nɔ,+ nɛ a bɔni ma se gbihi tumi nɛ a bɔni gbami.+ 7 Nyumuhi maa pee 12 lɛ a ngɛ lejɛ ɔ.

8 Jehanɛ ɔ, e sɛ kpe he ɔ,+ nɛ e kɛ kã tu munyu ngɛ lejɛ ɔ nyɔhiɔ etɛ sɔuu, e tuɔ munyuhi kɛ tsɔɔ nihi, nɛ e kɛ mɛ susuɔ Mawu Matsɛ Yemi ɔ he ngɛ blɔ nɛ e plɛɔ nɔ yi mi nɔ.+ 9 Se benɛ a kpɛti ni komɛ kplii a tsui nɛ a sume kaa a ma he ye,* nɛ a ngɛ Blɔ ɔ+ he munyu yaya tue ngɛ asafo kuu ɔ hɛ mi ɔ, e yu e he ngɛ a he+ nɛ e je kaseli ɔmɛ hu kɛ je a kpɛti, nɛ daa ligbi ɔ, e tuɔ munyu kɛ tsɔɔ mɛ ngɛ Tirano sukuu ɔ asa a nɔ. 10 Nɔ́ nɛ ɔ ya nɔ jeha enyɔ sɔuu, enɛ ɔ he ɔ, nihi tsuo nɛ a ngɛ Asia kpokpa a nɔ ɔ nu Nyɔmtsɛ ɔ munyu ɔ, Yudabi kɛ Helabi tsuo.

11 Nɛ Mawu ya nɔ nɛ e gu Paulo nine nɔ kɛ tsu he wami ní tsumihi nɛ́ a nɛ́ eko hyɛ,+ 12 hluu po kaa a ngɔɔ bohi kɛ tade hɛ mi hami bohi* nɛ a sa e nɔmlɔ tso ɔ he ɔ kɛ yaa nihi nɛ a be he wami ɔ a ngɔ,+ nɛ a hiɔ ɔmɛ jɔɔ nɛ mumi yayami ɔmɛ jeɔ a mi.+ 13 Se Yudabi komɛ nɛ a kpaa si nɛ a hiaa daimoniohi ɔ hu bɔ mɔde kaa a maa ngɔ Nyɔmtsɛ Yesu biɛ ɔ kɛ tsu ní ngɛ nihi nɛ mumi yayamihi ngɛ a mi ɔ a nɔ; a deɔ ke: “I ngɛ mo fãe ngɛ Yesu, nɔ nɛ Paulo ngɛ e he sane fiɛɛe ɔ biɛ mi.”+ 14 Jamɛ a be ɔ mi ɔ, osɔfo nɔkɔtɔma ko nɛ e ji Yudano nɛ a tsɛɔ lɛ ke Skeva a ngɛ binyumuhi kpaago nɛ a ngɛ jã pee. 15 Se mumi yayami ɔ he nɔ nɛ e de mɛ ke: “I le Yesu,+ nɛ Paulo hu i le lɛ;+ se nyɛɛ lɛɛ mɛnɔmɛ ji nyɛ?” 16 Kɛkɛ nɛ nyumu ɔ nɛ mumi yayami ɔ ngɛ e mi ɔ tu gblɔ mɛ, nɛ e nine ngɔ a he kakaaka, nɛ e ye a nɔ kunimi, nɛ a tu fo kɛ je jamɛ a we ɔ mi kɛ ho kɛ a he gu kɛ a he pahi. 17 Yudabi kɛ Helabi tsuo nɛ a ngɛ Efeso ɔ nu nɔ́ nɛ ɔ he; nɛ gbeye nu mɛ tsuo, nɛ a ya nɔ nɛ a wo Nyɔmtsɛ Yesu biɛ ɔ hɛ mi nyami wawɛɛ nitsɛ. 18 Nɛ nihi nɛ a he ye ɔ, a kpɛti nihi fuu baa nɛ a ba jajeɔ nɛ a deɔ níhi nɛ a pee ɔ ngɛ ma hɛ mi. 19 Ngɛ anɔkuale mi ɔ, nihi babauu nɛ jinɛ a tsuɔ kunya a ngɔ a womihi kɛ ba nɛ a bua a nya, nɛ a sã mɛ ngɛ nɔ fɛɛ nɔ hɛ mi.+ Nɛ a bu nya nɛ a na kaa a he jua su sika hiɔ 50,000. 20 Enɛ ɔ he ɔ, Yehowa* munyu ɔ ya nɔ nɛ e ngɛ wae nɛ e ngɛ hɛ mi yae ngɛ he wami nya.+

21 Benɛ ní nɛ ɔmɛ ya nɔ se ɔ, Paulo to e yi mi kaa ke e ya gu Makedonia+ kɛ Akaya se ɔ, e maa hia blɔ kɛ ya Yerusalem.+ E de ke: “Ke i ya lejɛ ɔ, e sa nɛ ma ya su Roma hulɔ.”+ 22 Enɛ ɔ he ɔ, e tsɔ nihi nɛ́ a sɔmɔɔ lɛ ɔ a kpɛti ni enyɔ, nɛ ji Timoteo+ kɛ Erasto+ kɛ ya Makedonia, se lɛ nitsɛ lɛɛ e hi si be saii ngɛ Asia kpokpa a nɔ.

23 Jamɛ a be ɔ mi ɔ, basabasa peemi nɛ mi wa+ ko ba te si ngɛ Blɔ ɔ he je.+ 24 Ejakaa nyumu ko nɛ a tsɛɔ lɛ ke Demetrio nɛ e ji sika hiɔ ga ní tsulɔ, nɛ e ngɔ sika hiɔ kɛ pee Artemi wɔ tsuhi ɔ ha nɛ ga ní tsuli ɔmɛ ná ní babauu.+ 25 E bua a kɛ ga ní tsuli kpahi a nya, nɛ e de mɛ ke: “Nyumuhi, nyɛ le saminya kaa ní tsumi nɛ ɔ nɔ lɛ wa guɔ kɛ náa ní. 26 Amlɔ nɛ ɔ, nyɛ na nɛ nyɛ nu kaa pi Efeso+ pɛ, se mohu ɔ, ngɛ Asia kpokpa a tsuo nɔ ɔ, Paulo nɛ ɔ plɛ nihi babauu a yi mi nɛ e ha nɛ a ná susumi kpa, nɛ a ngɛ dee ke mawuhi nɛ a kɛ ninehi pee ɔ, pi mawuhi nitsɛnitsɛ ji mɛ.+ 27 Jehanɛ se hu ɔ, nyagba a ji kaa pi wa ní tsumi nɛ ɔ he guɛ kɛkɛ nɛ e ma gbo, se mohu ɔ, a be yo mawu Artemi sɔlemi we ɔ hu bue fɛɛ. Nɛ Artemi nɛ́ a jaa lɛ ngɛ Asia kpokpa a tsuo nɔ kɛ zugba a nɔ tsuo ɔ, e hɛ mi nyami ɔ hu ma bɔ lɛ.” 28 Benɛ nyumu ɔmɛ nu nɔ́ nɛ ɔ, a mi mi fu wawɛɛ nitsɛ nɛ a bɔni ngmlaa kpami ke: “Efesobi ɔmɛ a we Artemi ɔ je agbo!”

29 Enɛ ɔ he ɔ, ma a mi pee gidigidi, nɛ mɛ tsuo a pee kake nɛ a sa fo kɛ ya fiɛmi he ɔ, nɛ a gbla Gayo kɛ Aristarko+ nɛ a ji Makedoniabi nɛ a piɛɛ Paulo he kɛ ngɛ blɔ hiae ɔ ngɔ piɛɛ a he kɛ ya lejɛ ɔ. 30 Ngɛ Paulo blɔ fa mi ɔ, jinɛ e suɔ kaa e maa ya ni ɔmɛ a kpɛti, se kaseli ɔmɛ ngmɛ́ lɛ blɔ. 31 Gbijlɔhi kɛ fiɛmihi a he blɔ nya toli ɔmɛ a kpɛti ni komɛ nɛ a ji Paulo huɛmɛ ɔ po ngɔ sɛ gbi kɛ ya ha lɛ, nɛ a kpa lɛ pɛɛ kaa e ko nla kaa e maa ya fiɛmi he ɔ. 32 Ngɛ anɔkuale mi ɔ, benɛ ni komɛ ngɛ ngmlaa kpae kikɛ nɛ ɔ, ni komɛ hu ngɛ nɔ́ kpa dee; ejakaa ni ɔmɛ nɛ a kpe ɔ ngɛ gidigidi pee, nɛ a kpɛti nihi fuu li yi mi tomi he je nɛ a ba kpe ngɛ ɔ. 33 Enɛ ɔ he ɔ, a ngɔ Aleksanda kɛ je asafo kuu ɔ mi kɛ ba, Yudabi ɔmɛ ngɛ lɛ tsitsɛɛe, nɛ Aleksanda fɔ e nine nɛ e suɔ kaa e ma je e nya ngɛ ni ɔmɛ a hɛ mi. 34 Se benɛ a yɔse kaa Yudano ji lɛ ɔ, mɛ tsuo a kɛ gbi kake bɔni ngmlaa kpami maa pee ngmlɛfia enyɔ sɔuu, nɛ a ngɛ dee ke: “Efesobi ɔmɛ a we Artemi ɔ je agbo!”

35 Nyagbenyagbe ɔ, benɛ ma a womi ngmalɔ ɔ ha nɛ asafo kuu ɔ pee kɔ̃ ɔ, e de ke: “Efeso nyumuhi, adesahi a kpɛti mɛnɔ lɛ e li kaa Efeso ma a ji Artemi ngua a kɛ amaga a nɛ e je hiɔwe kɛ ba nɔ si ɔ sɔlemi we ɔ yi baalɔ? 36 Akɛnɛ nɔ ko be nyɛe maa je ní nɛ ɔmɛ a he atsinyɛ he je ɔ, e sa nɛ nyɛɛ pee dii, nɛ nyɛ ko pee gidigidi ko. 37 Ejakaa nyɛ ngɔ nyumu nɛ ɔmɛ kɛ ba hiɛ ɔ, pi kaa a ya ju níhi ngɛ sɔlemi we ɔmɛ, aloo a bɔ musu kɛ si wa yo mawu ɔ. 38 Enɛ ɔ he ɔ, ke Demetrio+ kɛ ga ní tsuli ɔmɛ nɛ a piɛɛ e he ɔ kɛ nɔ ko ngɛ sane ko ɔ, ligbihi ngɛ nɛ a kɛ kojoɔ, nɛ amlaalohi* hu ngɛ; nyɛ ha nɛ a ba sama a sibi. 39 Se ke nyɛ ngɛ nɔ́ ko hlae ngɛ enɛ ɔ se ɔ, lɛɛ e sa nɛ ma a nɛ e kpe konɛ a ma nya si. 40 Ejakaa ke wa hyɛ we nɛ hi ɔ, a maa bu wɔ kaa wa ji ma nɔ yelɔ ɔ hɛ mi atuã tsɔli ngɛ nɔ́ nɛ e ba mwɔnɛ ɔ he je, ejakaa wa be nɔ́ ko nɛ waa kɛ ma je wa nya kaa lɔ ɔ he je nɛ nimli babauu ɔ ngɛ basabasa nɛ ɔ pee ɔ.” 41 Nɛ benɛ e de enɛ ɔ se ɔ, e gbɛ kpe ɔ.

20 Se benɛ gidigidi peemi ɔ nya ba si ɔ, Paulo tsɔ kɛ ya tsɛ kaseli ɔmɛ, nɛ benɛ e wo mɛ he wami nɛ́ e kɛ mɛ ye sɛ ta a, e pue nɔ kɛ ho Makedonia ya. 2 Benɛ e ya kpa lejɛ ɔ kpokpa amɛ a nɔ nɛ e tu he wami womi munyuhi fuu kɛ tsɔɔ nihi nɛ a ngɛ lejɛ ɔmɛ ɔ ta a, e ya su Hela. 3 E ye nyɔhiɔ etɛ ngɛ lejɛ ɔ, se akɛnɛ Yudabi ɔmɛ so e yi nɔ+ benɛ e piɛ bɔɔ nɛ e maa sɛ lɛ mi kɛ ya Siria a he je ɔ, e to e yi mi kaa e maa kpale e se kɛ ya gu Makedonia. 4 Nihi nɛ a piɛɛ e he ji Sopater, nɛ́ e ji Piro nɛ e je Beroya a binyumu ɔ, Aristarko+ kɛ Sekundo nɛ a je Tesalonika a, Gayo nɛ e je Derbe ɔ, Timoteo,+ kɛ Tihiko+ kɛ Trofimo+ nɛ a je Asia kpokpa a nɔ ɔ. 5 Nyumu nɛ ɔmɛ sɛ wa hlami nɛ a ya ngɛ wɔ mlɛe ngɛ Troya; 6 se ngɛ Abolo Nɛ Masa Be Mi Gbijlɔ ɔ+ ligbi ɔmɛ a se ɔ, wa je Filipi nɛ wa gu wo ɔ nɔ, nɛ ngɛ ligbi enuɔ mi ɔ, wa ya ná mɛ ngɛ Troya, nɛ wa ye ligbi kpaago ngɛ lejɛ ɔ.

7 Ngɛ otsi ɔ we kekleekle ligbi ɔ nɔ benɛ wa bua wa he nya konɛ waa ye ní ɔ, Paulo bɔni munyu tumi kɛ ngɛ wɔ tsɔɔe akɛnɛ e nɔ jena e maa je ɔ he je; nɛ e tu munyu ɔ hluu kɛ su nyɔ mi kpɛti. 8 Enɛ ɔ he ɔ, kanehi fuu ngɛ hiɔwe tsu ɔ mi he nɛ wa bua wa he nya ngɛ ɔ. 9 Benɛ Paulo ngɛ munyu ɔ tue loloolo ɔ, niheyo ko nɛ a tsɛɔ lɛ ke Yutiko hii si ngɛ saflɛ ɔ nya. Niheyo nɛ ɔ sɛ mahe mi vii nɛ e tsɔ kɛ je mɔ siaudo etɛne ɔ nɔ kɛ ba nɔ si, nɛ benɛ a ya wo e nɔ ɔ, e gbo momo. 10 Se Paulo kple atlaakpe ɔ nɛ e ya bu e nɔ, nɛ e fua lɛ,+ nɛ e de ke: “Nyɛ kpa hoo ɔ peemi, ejakaa e ngɛ wami mi.”*+ 11 Kɛkɛ nɛ Paulo kuɔ atlaakpe ɔ kɛ ba nɛ e ba ku abolo ɔ nɛ e bɔni yemi. E tsa ní sɛɛmi ɔ nɔ hluu kɛ ya si be nɛ je na, nɛ lɔ ɔ se ɔ, e pue nɔ kɛ ho. 12 Nɛ a ngɔ nyumuyo ɔ kɛ ho hɛ ngmengmle, nɛ a bua jɔ saminya.

13 Jehanɛ ɔ, wa sɛ hlami kɛ ya sɛ mele mi, nɛ wa pue nɔ kɛ ho Aso ya, kɛ yi mi tomi ɔ kaa wa yaa ngɔ Paulo ngɛ lejɛ ɔ, ejakaa e kɛ blɔ tsɔɔmi ha wɔ ngɛ enɛ ɔ he momo, nɛ e to kaa e maa gu nane blɔ kɛ ya lejɛ ɔ. 14 Lɔ ɔ he ɔ, benɛ e ba ná wɔ ngɛ Aso ɔ, wa ha nɛ e sɛ mele ɔ mi, nɛ wa pue nɔ kɛ ho Mitilene ya. 15 E nɔ jena benɛ wa je lejɛ ɔ, wa ba su Kiyo, nɛ e nɔ jena ekohu ɔ, wa ba su Samo, nɛ e nɔ jena ekohu ɔ, wa ba su Mileto. 16 Paulo pee e juɛmi kaa e be si dae ngɛ Efeso,+ bɔ nɛ pee nɛ e se nɛ ko kɛ ngɛ Asia kpokpa a nɔ, ejakaa e ngɛ oya yee kaa ke e ma nyɛ ɔ, e ma ya su Yerusalem+ ngɛ Pentekoste Gbijlɔ ligbi ɔ nɔ.

17 Se benɛ e ngɛ Mileto ɔ, e tsɔ kɛ ya Efeso konɛ a ya tsɛ asafo ɔ mi nikɔtɔma amɛ kɛ ba. 18 Benɛ a ba e ngɔ ɔ, e de mɛ ke: “Nyɛ nitsɛmɛ nyɛ le bɔ nɛ i ba ye je mi ha benɛ i ngɛ nyɛ kpɛti ɔ, kɛ je kekleekle ligbi nɛ ye nane ma Asia kpokpa a nɔ ɔ,+ 19 nɛ i kɛ he si bami sɔmɔ Nyɔmtsɛ ɔ+ kɛ vonyu ngɛ kahi nɛ i kɛ kpe ngɛ ye yi nɔ nɛ Yudabi ɔmɛ so ɔ he je, 20 nɛ i laa we nyɛ níhi nɛ a he ngɛ se nami ha nyɛ* ɔ ekoeko nɔ, nɛ jã kɛ̃ lɛ i kpa we nyɛ ní tsɔɔmi ngɛ ma hɛ mi+ kɛ wehi a mi.+ 21 Se i ye odase kɛ pi si kɛ tsɔɔ Yudabi kɛ Helabi tsuo kaa a tsake a tsui+ nɛ́ a ba Mawu ngɔ nɛ́ a ná wa Nyɔmtsɛ Yesu mi hemi kɛ yemi.+ 22 Nɛ amlɔ nɛ ɔ, hyɛ! ngɛ mumi ɔ blɔ tsɔɔmi nya a,* i ngɛ blɔ hiae kɛ yaa Yerusalem, e ngɛ mi kaa i li nɔ́ nɛ e ma ya ba ye nɔ ngɛ lejɛ ɔ mohu, 23 kaa ja nɔ́ nɛ mumi klɔuklɔu ɔ pɔɔ mi he odase yemi ke i je ma ko mi kɛ yaa ma kpa mi ɔ, e deɔ mi ke, tsu womi kɛ amanehluhi ngɛ mi mlɛe.+ 24 Se kɛ̃ ɔ, i bui imi nitsɛ ye wami ɔ* kaa e he hia mi.* Nɔ́ nɛ he hia mi mohu ji kaa ma gbe ye blɔ nɛ i hia+ kɛ sɔmɔmi nɛ ye nine su nɔ kɛ je Nyɔmtsɛ Yesu ngɔ ɔ nya. Lɔ ɔ ji kaa ma ye Mawu dloomi ɔ he sane kpakpa a he odase kɛ pi si.

25 “Nɛ amlɔ nɛ ɔ, hyɛ! i le kaa nyɛ nihi nɛ i fiɛɛ Matsɛ Yemi ɔ kɛ ha nyɛ ɔ, nyɛ be ye hɛ mi nae hu. 26 Enɛ ɔ he ɔ, mwɔnɛ ligbi nɛ ɔ, i ngɛ nyɛ tsɛe nɛ nyɛ ba ye odase ha mi kaa i yi nɔ ko nɔ ko muɔ he fɔ,+ 27 ejakaa i de nyɛ Mawu yi mi tomi ɔmɛ tsuo, nɛ i laa we nyɛ ekoeko nɔ.+ 28 Nyɛ hɛ nɛ hi nyɛ nitsɛmɛ nyɛ he nɔ+ nɛ nyɛ hɛ nɛ hi to kuu ɔ tsuo hu nɔ, nɛ ji nihi nɛ mumi klɔuklɔu ɔ ngɔ nyɛ kɛ pee nɔ hyɛli ngɛ a kpɛti ɔ,+ konɛ nyɛɛ hyɛ Mawu asafo ɔ+ nɛ e ngɔ lɛ nitsɛ e Bi ɔ muɔ ɔ kɛ he ɔ nɔ.+ 29 I le kaa ke i je kɛ ho ɔ, ogbeteehi nɛ a yi mi wa ma ba sɛ nyɛ kpɛti,+ nɛ a be to kuu ɔ hɛɛe dɔdɔɔdɔ, 30 nɛ nyumuhi maa te si ngɛ nyɛ nitsɛmɛ nyɛ kpɛti, nɛ a ma plɛ anɔkuale ɔ hɛ mi konɛ a kɛ gbla kaseli ɔmɛ kɛ nyɛɛ mɛ nitsɛmɛ a se.+

31 “Enɛ ɔ he ɔ, nyɛɛ ya nɔ nɛ nyɛɛ hwɔɔ, nɛ nyɛ ha nɛ e hi nyɛ juɛmi mi kaa jeha etɛ sɔuu ɔ,+ nyɔnyɔɔnyɔ kɛ piapiaapia a, i kɛ vonyu wo nyɛ ti nɔ fɛɛ nɔ ga, nɛ i kpa we. 32 Nɛ amlɔ nɛ ɔ, i tu nyɛ ngɔ wo Mawu kɛ e dloomi munyu ɔ dɛ. Lɔ ɔ ji munyu nɛ e ma nyɛ maa fia nyɛ kɛ ma si, nɛ́ e ma ha nɛ nyɛ nine nɛ su weto ní ɔ nɔ ngɛ nihi tsuo nɛ a tsu a he ɔ a kpɛti.+ 33 Ye hɛ kɔɛ nɔ ko sika hiɔ loo sika tsu loo bo nɔ.+ 34 Nyɛ nitsɛmɛ nyɛ le kaa nine nɛ ɔmɛ lɛ i kɛ tsu imi nitsɛ ye hiami níhi+ kɛ nihi nɛ a piɛɛ ye he ɔ a hiami níhi a he ní. 35 I ha nɛ nyɛ na kaa kɛ gu ní tsumi wawɛɛ kaa kikɛ nɛ ɔ nɔ ɔ,+ e sa nɛ nyɛɛ ye bua nihi nɛ a gbɔjɔ ɔ, konɛ nyɛ ha nɛ munyu nɛ Nyɔmtsɛ Yesu tu ɔ nɛ e hi nyɛ juɛmi mi, be mi nɛ lɛ nitsɛ e de ke: ‘Bua jɔmi babauu ngɛ nɔ́ hami mi+ pe nɔ́ ngɔmi’ ɔ.”

36 Nɛ benɛ e tu munyu nɛ ɔmɛ ta a, e kɛ mɛ tsuo a kplã si nɛ a sɔle. 37 Ngɛ anɔkuale mi ɔ, mɛ tsuo a fo ya wawɛɛ nitsɛ, nɛ a fua Paulo,* nɛ a je suɔmi mi nɛ a fĩɔ e nya he,* 38 ejakaa nɔ́ nɛ dɔ mɛ pe kulaa ji munyu nɛ e tu kaa a be e hɛ mi nae hu ɔ.+ Lɔ ɔ se ɔ, a piɛɛ e he kɛ ya mele ɔ he.

21 Benɛ waa kɛ mɛ wa mi gba nɛ́ mele ɔ hia a, wa ya wa hɛ mi tɛɛ nɛ wa ba su Koo, nɛ e nɔ jena a, wa ba Rodo, nɛ benɛ wa je lejɛ ɔ, wa ba Patara. 2 Wa na mele ko nɛ yaa Foinike. Lɔ ɔ he ɔ, wa ya sɛ mi nɛ wa pue nɔ kɛ ho. 3 Benɛ wa na zugba kpɔ ko nɛ nyu bɔle lɛ nɛ a tsɛɔ ke Kipro ɔ, wa be he ngɛ wa muɔ nɔ, nɛ waa kɛ mele ɔ ba Siria, nɛ wa ba da si ngɛ Tiro, he nɛ a ma je mele ɔ mi tlomi ngɛ ɔ. 4 Wa hla kaseli ɔmɛ ngɛ lejɛ ɔ nɛ wa na mɛ, nɛ wa hi lejɛ ɔ ligbi kpaago. Se kɛ gu mumi ɔ nɔ ɔ, a de Paulo si abɔ kaa e nane nɛ e ko ma Yerusalem.+ 5 Enɛ ɔ he ɔ, benɛ ligbihi nɛ wa maa ye ngɛ lejɛ ɔ ba nyagbe ɔ, wa je nɛ wa pue nɔ kɛ yaa, se mɛ tsuo nɛ́ yihi kɛ jokuɛwi hu piɛɛ a he ɔ je wɔ blɔ hluu kɛ ya si be nɛ wa je ma a mi. Nɛ wa kplã si ngɛ wo ɔ nya nɛ wa sɔle, 6 nɛ waa kɛ wa sibi ye sɛ. Lɔ ɔ se ɔ, wa ya sɛ mele ɔ mi, nɛ mɛ hu a kpale a se kɛ ho a wehi a mi ya.

7 Jehanɛ ɔ, benɛ wa hia kɛ je Tiro ɔ, wa ba su Pitolemai, nɛ wa nga nyɛmimɛ ɔmɛ, nɛ waa kɛ mɛ hi si ligbi kake. 8 E nɔ jena a, wa je kɛ ba Kaisarea, nɛ wa ba sɛ Filipo nɛ e ji sane kpakpa fiɛɛlɔ nɛ e piɛɛ nyumuhi kpaago ɔmɛ a he ɔ we ɔ mi,+ nɛ wa hi e ngɔ. 9 Nyumu nɛ ɔ ngɛ biyihi eywiɛ nɛ a sɛ we gba si himi mi* nɛ́ a gbaa.+ 10 Benɛ wa hi lejɛ ɔ ligbihi fuu se ɔ, gbalɔ ko nɛ a tsɛɔ lɛ ke Agabo ɔ+ kple kɛ je Yudea kɛ ba. 11 E ba wa ngɔ nɛ e ba ngɔ Paulo mlɛ mi fimi nɔ́ ɔ nɛ e kɛ fi e nanehi kɛ e ninehi nɛ e de ke: “Nɔ́ nɛ mumi klɔuklɔu ɔ ngɛ dee ji nɛ ɔ nɛ, ‘Yudabi ɔmɛ nɛ a ngɛ Yerusalem ɔ maa fi nɔ nɛ e nɔ́ ji mlɛ mi fimi nɔ́ nɛ ɔ kaa kikɛ nɛ ɔ,+ nɛ a maa ngɔ lɛ kɛ wo nihi nɛ a je je ma amɛ a mi ɔ a dɛ mi.’”+ 12 Jehanɛ ɔ, benɛ wa nu nɔ́ nɛ ɔ, waa kɛ nihi nɛ a ngɛ lejɛ ɔ tsuo bɔni lɛ pɛɛ kpami kaa e ko kuɔ kɛ ya Yerusalem. 13 Kɛkɛ nɛ Paulo de ke: “Mɛni he je nɛ nyɛ ngɛ ya foe nɛ nyɛ ngɛ mɔde bɔe kaa nyɛ ma jɔ̃ ye kɔni mi ɔ?* Nyɛ ná nɛ nyɛɛ le kaa pi fimi nɛ a maa fi mi ɔ kɛkɛ nɛ i dla ye he kɛ ha, se mohu i dla ye he kaa ma gbo ngɛ Yerusalem kɛ ha Nyɔmtsɛ Yesu biɛ ɔ.”+ 14 Benɛ wa nyɛ we nɛ wa plɛ e yi mi ɔ, wa tsi we e nya hu, nɛ wa de ke: “Ha nɔ́ nɛ Yehowa* suɔ ɔ nɛ e ba mi.”

15 Jehanɛ ɔ, ngɛ ligbi nɛ ɔmɛ a se ɔ, wa dla wa he kɛ ha blɔ hiami ɔ, nɛ wa pue nɔ kɛ ho Yerusalem ya. 16 Kaseli ɔmɛ nɛ a ngɛ Kaisarea a, a kpɛti ni komɛ hu piɛɛ wa he kɛ ho, nɛ a ngɔ wɔ kɛ ya Minasin, nɛ e je Kipro ɔ we ɔ mi. E ji kaselɔ kɛ je blema, nɛ e we ɔ mi ji he nɛ wa ma ya to. 17 Benɛ wa su Yerusalem ɔ, nyɛmimɛ ɔmɛ kɛ bua jɔmi nya wa he. 18 Se e nɔ jena a, Paulo kɛ wɔ ya Yakobo ngɔ,+ nɛ nikɔtɔma amɛ tsuo hu ngɛ lejɛ ɔ. 19 Nɛ e nga mɛ, nɛ e bɔni mɛ níhi nɛ Mawu gu e sɔmɔmi ní tsumi ɔ nɔ kɛ pee ngɛ je ma amɛ a mi ɔ bɔmi fitsofitso.

20 Benɛ a nu nɔ́ nɛ ɔ, a bɔni Mawu hɛ mi nyami womi, se a de lɛ ke: “Nyɛminyumu, hyɛ, Yudabi ɔmɛ a kpɛti nihi akpehi abɔ nɛ a he ye ɔ, mɛ tsuo a hɛ dɔɔ wawɛɛ ngɛ Mlaa a he.+ 21 Se a nu akeake munyu ngɛ o he kaa o ngɛ Yudabi tsuo nɛ a ngɛ je ma amɛ a mi ɔ tsɔɔe kaa a kua Mose, nɛ o ngɛ mɛ dee kaa a ko po a bimɛ, nɛ a ko nyɛɛ kusumi ní peepee ɔmɛ hu a se.+ 22 Lɛɛ mɛni e sa kaa waa pee mɔ? Ejakaa bɔ fɛɛ bɔ nɛ e ji ɔ, a maa nu kaa o ba. 23 Enɛ ɔ he ɔ, moo pee nɔ́ nɛ wa ma de mo nɛ ɔ: Wa ngɛ nyumuhi eywiɛ nɛ a kã kita. 24 Ngɔɔ nyumu nɛ ɔmɛ kɛ piɛɛ o he nɛ o kɛ mɛ nɛ ya nɛ nyɛ ya tsukɔ nyɛ he ngɛ kusumi nya, nɛ́ o wo hiɔ nɛ a ma bɔ ɔ ha mɛ, konɛ a ha nɛ a sɛ a yi. Kɛkɛ ɔ, nɔ fɛɛ nɔ maa le kaa akeake munyu nɛ a ngɛ nue ngɛ o he ɔ be mi, mohu ɔ, o baa o je mi saminya, nɛ o ngɛ Mlaa a hu nɔ yee.+ 25 Ngɛ nihi nɛ a je je ma amɛ a mi nɛ a he ye ɔ a blɔ fa mi ɔ, wa ngma bɔ nɛ wa mwɔ wa yi mi kpɔ ha a kɛ ya ha mɛ kaa a ya nɔ nɛ a hi a he yue ngɛ níhi nɛ a ngɔ kɛ sã afɔle ha wɔhi+ kɛ muɔ,+ kɛ lohwehi nɛ a kika a kuɛ,*+ kɛ ajuama bɔmi* he.”+

26 Kɛkɛ nɛ e nɔ jena a, Paulo ngɔ nyumu ɔmɛ nɛ e kɛ mɛ ya tsukɔ a he ngɛ kusumi nya a,+ nɛ e ya sɔlemi we ɔ nɛ e ya ha nɛ a le be nɛ he tsukɔmi ligbi ɔmɛ maa ba nyagbe kɛ be nɛ e sa kaa a sã afɔle ha a ti nɔ fɛɛ nɔ.

27 Jehanɛ ɔ, benɛ e piɛ bɔɔ nɛ ligbi kpaago ɔ maa ba nyagbe ɔ, Yudabi nɛ a je Asia a na lɛ ngɛ sɔlemi we ɔ, nɛ a su asafo kuu ɔ tsuo ngɔ wo e he, nɛ a nu lɛ, 28 a ngɛ ngmlaa kpae ke: “Israel nyumuhi, nyɛ ba ye bua wɔ! Nyumu ɔ nɛ́ e ngɛ munyu tue kɛ ngɛ wa we bi ɔmɛ, kɛ wa Mlaa a, kɛ he klɔuklɔu nɛ ɔ sie kɛ ngɛ nɔ fɛɛ nɔ tsɔɔe ngɛ he fɛɛ he ɔ ji nɛ ɔ nɛ. Nɛ nɔ́ nɛ pa hí pe kulaa ji kaa e ngɔ Helabi po kɛ ba sɛ sɔlemi we ɔ, nɛ e ble he klɔuklɔu nɛ ɔ.”+ 29 Ejakaa a na Paulo kɛ Trofimo,+ nɛ e je Efeso ɔ ngɛ ma a mi momo, nɛ a susu kaa e ngɔ lɛ kɛ ba sɛ sɔlemi we ɔ. 30 Ma a mi tsuo pee hoo, nɛ ni ɔmɛ tsuo pee kake nɛ a tu fo kɛ ba nɛ a ba nu Paulo, nɛ a gbla lɛ kɛ je sɔlemi we ɔ, nɛ amlɔ nɔuu nɛ a nga sinya amɛ. 31 Benɛ a ngɛ mɔde bɔe kaa a maa gbe lɛ ɔ, sɛ gbi ya su tabuli a nyatsɛ ngua a ngɔ kaa basabasa peemi ngɛ nɔ yae ngɛ Yerusalem tsuo; 32 nɛ amlɔ nɔuu ɔ, e ngɔ tabuli kɛ tabuli a nikɔtɔmahi kɛ piɛɛ e he nɛ a tu fo nɛ a kple kɛ ba a ngɔ. Benɛ a hɛngmɛ gba tabuli a nyatsɛ ngua a kɛ tabuli ɔmɛ a nɔ ɔ, a jɔɔ Paulo kongomi.

33 Kɛkɛ nɛ tabuli a nyatsɛ ngua a ba e hɛ mi nɛ e ba nu lɛ nɛ e fã ke a wo lɛ kɔsɔkɔsɔ enyɔ;+ lɔ ɔ se ɔ, e bi kaa mɛnɔ ji lɛ nɛ mɛni e pee? 34 Se asafo kuu ɔ mi ni komɛ bɔni ngmlaa kpami kɛ ngɛ dee kikɛ nɛ ɔ, nɛ ni kpahi hu ngɛ nɔ́ kpa dee. Akɛnɛ lɛ nitsɛ hu e nyɛ we nɛ e le sane ɔ mi tutuutu ngɛ basabasa peemi nɛ ngɛ nɔ yae ɔ he he je ɔ, e fã ke a ngɔ lɛ kɛ ba tabuli ɔmɛ a hi he ɔ. 35 Se benɛ e su atlaakpe ɔ he ɔ, tabuli ɔmɛ wo e nɔ akɛnɛ asafo kuu ɔ ngɛ basabasa pee ɔ he je, 36 ejakaa asafo kuu ɔ ya nɔ nɛ a ngɛ ngmlaa kpae ke: “Nyɛɛ gbe lɛ!”

37 Benɛ e piɛ bɔɔ nɛ a kɛ Paulo maa su tabuli ɔmɛ a hi he ɔ, e bi tabuli a nyatsɛ ngua a ke: “Anɛ ma nyɛ ma de mo nɔ́ ko lo?” E bi Paulo ke: “Ei, o tuɔ Hela gbi lo? 38 Lɛɛ anɛ pi mo ji Egiptno ɔ nɛ be ko nɛ be ɔ, e ha nɛ nihi tsɔ atuã nɛ e nyɛɛ nyumuhi 4,000 nɛ́ a hiaa ha a, a hɛ mi kɛ ho nga a nɔ ya a lo?” 39 Kɛkɛ nɛ Paulo de ke: “Ngɛ anɔkuale mi ɔ, Yudano ji mi,+ i je Tarso+ ngɛ Kilikia, pi ma ko nɛ a nui e biɛ mi no ji mi. Enɛ ɔ he ɔ, i kpa mo pɛɛ, mo ha nɛ ma tu munyu kɛ tsɔɔ ni ɔmɛ.” 40 Benɛ e ngmɛ lɛ blɔ ɔ, Paulo da si ngɛ atlaakpe ɔ nɔ nɛ e ngɔ e nine kɛ pee okadi. Benɛ lejɛ ɔ jɔ dii ɔ, e tu munyu kɛ tsɔɔ mɛ ngɛ Hebri gbi mi+ ke:

22 “Nyumuhi, nyɛmimɛ kɛ tsaatsɛmɛ, amlɔ nɛ ɔ, nyɛɛ bu ye nya nɛ i ma jemi ɔ tue.”+ 2 Benɛ a nu kaa e kɛ mɛ ngɛ munyu tue ngɛ Hebri gbi mi ɔ, a pee dii po pe kekle ɔ, nɛ e de mɛ ke: 3 “Yudano ji mi,+ a fɔ mi ngɛ Tarso ngɛ Kilikia,+ se ma nɛ ɔ mi a tsɔse mi ngɛ ngɛ Gamaliel nane nya,+ a tsɔɔ mi ní kaa bɔ nɛ wa nɛmɛ ɔmɛ a Mlaa a tsɔɔ ɔ pɛpɛɛpɛ,+ nɛ i kplɛɛ we Mawu he nɔ́ kulaa kaa bɔ nɛ nyɛ tsuo nyɛ ngɛ pee mwɔnɛ ɔ.+ 4 I wa Blɔ nɛ ɔ yi mi hluu kɛ ya si gbenɔ mi tete po, i fiɔ nyumuhi kɛ yihi tsuo, nɛ i ngɔɔ mɛ kɛ haa nɛ a ya woɔ mɛ tsu,+ 5 kaa bɔ nɛ osɔfo nɔkɔtɔma a kɛ nikɔtɔma amɛ a kuu ɔ tsuo ma nyɛ maa ye he odase ɔ. Mɛ nɔuu a ngɔ lɛ ye nine su sɛ womihi a nɔ kɛ je nɛ jinɛ i kɛ yaa ha nyɛmimɛ ɔmɛ nɛ a ngɛ Damasko ɔ, nɛ i ngɛ blɔ nɔ kɛ yaa konɛ ma ya fi nihi nɛ a ngɛ lejɛ ɔ kɛ ba Yerusalem nɛ a ba gbla a tue.

6 “Se benɛ i ngɛ blɔ ɔ nɔ kɛ yaa nɛ e piɛ bɔɔ nɛ ma su Damasko ɔ, maa pee piani katakata a, tlukaa nɛ la ngua ko kpɛ kɛ je hiɔwe kɛ ba bɔle mi,+ 7 nɛ i nɔ si ngɛ zugba, nɛ i nu nɛ gbi ko bi mi ke: ‘Saulo, Saulo, mɛni he je nɛ o ngɛ mi yi mi wae ɔ?’ 8 I bi ke: ‘Nyɔmtsɛ, mo mɛnɔ?’ Nɛ e de mi ke: ‘Imi ji Yesu, Nazaretno ɔ nɛ o ngɛ lɛ yi mi wae ɔ nɛ.’ 9 Jehanɛ ɔ, nyumu ɔmɛ nɛ a piɛɛ ye he ɔ na la a, se a nui nɔ nɛ e kɛ mi ngɛ munyu ɔ tue ɔ gbi ɔ. 10 Kɛkɛ nɛ i bi ke: ‘Nyɔmtsɛ, mɛni e sa kaa ma pee?’ Nyɔmtsɛ ɔ de mi ke: ‘Tee si, yaa Damasko, nɛ a maa tsɔɔ mo nɔ́ fɛɛ nɔ́ nɛ a to kɛ ha mo kaa o pee ɔ ngɛ lejɛ ɔ.’+ 11 Se akɛnɛ jamɛ a la a hɛ mi nyami ɔ ha nɛ i nyɛ we nɛ ma hyɛ nɔ́ he je ɔ, nihi nɛ a piɛɛ ye he ɔ pɛtɛ ye nine he kɛ ya Damasko.

12 “Lɔ ɔ se ɔ, nyumu ko nɛ a tsɛɔ lɛ ke Anania, nɛ e jaa Mawu saminya ngɛ Mlaa a nya, nɛ Yudabi ɔmɛ tsuo nɛ a ngɛ lejɛ ɔ tuɔ e he munyu kpakpa a 13 ba ye ngɔ. E ba da si ngɛ ye kasa nya nɛ e de mi ke: ‘Ye nyɛmi Saulo, moo hyɛ nɔ́ ekohu!’ Nɛ amlɔ nɔuu nɛ i wo ye yi nɔ, nɛ i na lɛ.+ 14 E de mi ke: ‘Wa nɛmɛ ɔmɛ a Mawu ɔ hla mo konɛ o ba le e suɔmi nya ní, konɛ o na dalɔ ɔ,+ nɛ́ o nu e nya mi gbi, 15 ejakaa o ma ba pee e he odase yelɔ kɛ ha adesahi tsuo ngɛ níhi nɛ o na nɛ o nu ɔ a he.+ 16 Nɛ amlɔ nɛ ɔ, mɛni he je nɛ o ngɛ tsle toe ɔ? Tee si, ha nɛ a baptisi mo, nɛ o fɔ o he yayami ɔmɛ+ kɛ pue he kɛ gu e biɛ ɔ nɛ o ma tsɛ ɔ nɔ.’+

17 “Se benɛ i kpale ye se kɛ ya Yerusalem+ nɛ i ngɛ sɔlee ngɛ sɔlemi we ɔ, nɔ́ nɔ ye nɔ, 18 nɛ i na Nyɔmtsɛ ɔ nɛ e ngɛ mi dee ke: ‘O he nɛ sɔ nɛ o je Yerusalem mla, ejakaa a be ye he odase nɛ o maa ye ɔ nɔ kplɛɛe.’+ 19 Nɛ i de ke: ‘Nyɔmtsɛ, mɛ nitsɛmɛ a le saminya kaa jinɛ i jeɔ kpe hehi kɛ yaa kpe hehi nɛ i ya woɔ nihi nɛ a he mo ye ɔ tsu nɛ i fiaa mɛ kpa;+ 20 nɛ benɛ a ngɛ Stefano, nɔ nɛ ye o he odase ɔ muɔ si puee ɔ, i daa si ngɛ lejɛ ɔ, nɛ i kplɛɛ nɔ, nɛ i ngɛ tadehi nɛ nihi nɛ a gbe lɛ ɔ wo ngɛ a tade ɔmɛ a nɔ ɔ he bue.’+ 21 Se kɛ̃ ɔ, e de mi ke: ‘Yaa, ejakaa ma tsɔ mo kɛ ya je mahi nɛ a ngɛ tsitsaa lokoo ɔ a ngɔ.’”+

22 A ya nɔ nɛ a bu lɛ tue kɛ ba si munyu nɛ ɔ nɔ. Lɔ ɔ se ɔ, a wo a gbi nɔ nɛ a de ke: “Nyɛ je nyumu kaa kikɛ nɛ ɔ kɛ je zugba a nɔ, ejakaa e sɛ kaa e hiɔ wami mi!” 23 Akɛnɛ a ngɛ ngmlaa kpae nɛ a ngɛ tadehi nɛ a wo ngɛ a tade ɔmɛ a nɔ ɔ fɔe, nɛ a ngɛ bunyuku woe puu he je ɔ,+ 24 tabuli a nyatsɛ ngua a fã ke a ngɔ Paulo kɛ ba tabuli ɔmɛ a hi he ɔ, nɛ e de ke a fiaa lɛ kpa kɛ bi lɛ e nya mi, konɛ e nyɛ nɛ e le nɔ́ tutuutu he je nɛ ni ɔmɛ ngɛ ngmlaa kpae kɛ ngɛ Paulo woe kikɛ nɛ ɔ. 25 Se benɛ a kpa e mi nɛ a yaa fiaa lɛ kpa a, Paulo de tabuli a nɔkɔtɔma a nɛ e daa si ngɛ lejɛ ɔ ke: “Ke a bui Romano ko fɔ ɔ,* anɛ mlaa ngmɛɔ blɔ kaa a fiaa lɛ kpa lo?”+ 26 Benɛ tabuli a nɔkɔtɔma a nu nɔ́ nɛ ɔ, e ya tabuli a nyatsɛ ngua a ngɔ nɛ e ya de lɛ ke: “Mɛni o to o yi mi kaa o maa pee ɔ? Ejakaa Romano ji nyumu ɔ nɛ.” 27 Enɛ ɔ he ɔ, tabuli a nyatsɛ ngua a hɛ lɛ kɛ su Paulo he nɛ e bi lɛ ke: “Mo de mi, anɛ Romano ji mo lo?” E ha heto ke: “Ee.” 28 Tabuli a nyatsɛ ngua a de lɛ ke: “I kɛ sika babauu nitsɛ lɛ he ma mi no peemi he blɔ nɛ ɔmɛ.” Paulo de ke: “Se imi lɛɛ a fɔ mi Romano.”+

29 Enɛ ɔ he ɔ, oya nɔuu nɛ nyumu ɔmɛ nɛ jinɛ a ma lɛ piimi konɛ a kɛ bi lɛ e nya mi ɔ ya senyasenya nɛ a je e he kɛ ho; nɛ tabuli a nyatsɛ ngua a ye gbeye benɛ e ná le kaa Romano ji lɛ nɛ e wo lɛ kɔsɔkɔsɔ ɔ.+

30 Enɛ ɔ he ɔ, e nɔ jena a, akɛnɛ e suɔ nɛ e le nɔ́ tutuutu he je nɛ Yudabi ɔmɛ ngɛ Paulo nya poe he je ɔ, e je lɛ, nɛ e fã osɔfo nikɔtɔma amɛ kɛ Sanhedri bi ɔmɛ tsuo kaa a bua a he nya. Lɔ ɔ se ɔ, e ngɔ Paulo kɛ kple kɛ ba nɛ e ha nɛ e ya da si ngɛ a kpɛti.+

23 Benɛ Paulo hyɛ Sanhedri bi ɔmɛ a hɛ mi kɛ kpe ɔ, e de mɛ ke: “Nyumuhi, nyɛmimɛ, i kɛ he nile nɛ bui mi fɔ kulaa ba ye je mi ngɛ Mawu hɛ mi+ kɛ ba si mwɔnɛ ligbi nɛ ɔ.” 2 Kɛkɛ nɛ Anania nɛ ji osɔfo nɔkɔtɔma a fã nihi nɛ a daa si ngɛ e kasa nya a ke a gba e nya nɔ ma. 3 Kɛkɛ nɛ Paulo de lɛ ke: “Mawu maa fia mo nɔ́, mo gbogbo nɛ a kpa he kalo. Mo nɛ́ o hii si nɛ o ngɛ mi kojoe ngɛ Mlaa a nya a, anɛ mo nɔuu o ngɛ Mlaa a nɔ tɔ̃e nɛ o ngɛ fãe ke a fia mi nɔ́ lo?” 4 Nihi nɛ a daa si ngɛ lejɛ ɔ de ke: “Anɛ o ngɛ Mawu we osɔfo nɔkɔtɔma a jɛe lo?” 5 Nɛ Paulo de ke: “Nyɛmimɛ, i li kaa osɔfo nɔkɔtɔma ji lɛ. Ejakaa a ngma ke, ‘E sɛ nɛ o tu o ma mi bi ɔmɛ a nɔ yelɔ ko he munyu yaya.’”+

6 Jehanɛ ɔ, benɛ Paulo yɔse kaa fã kake ji Saduki bi, nɛ fã kake hu ji Farisi bi ɔ, e kpa ngmlaa kɛ de ngɛ Sanhedri bi ɔmɛ a hɛ mi ke: “Nyumuhi, nyɛmimɛ, Farisi no ji mi,+ nɛ Farisi bi a binyumu ji mi. Gbogboehi a si tlemi ɔ he hɛ kɛ nɔ fɔmi ɔ he je lɛ a ngɛ mi kojoe ngɛ nɛ ɔ nɛ.” 7 Enɛ ɔ nɛ e de ɔ he je ɔ, pɛ te si ngɛ Farisi bi ɔmɛ kɛ Saduki bi ɔmɛ a kpɛti, nɛ kpe ɔ mi gba. 8 Ejakaa Saduki bi ɔmɛ deɔ kaa gbogboehi a si tlemi ko be, nɛ jã kɛ̃ lɛ hiɔwe bɔfo ko aloo mumi ko hu be, se Farisi bi ɔmɛ lɛɛ a kplɛɛɔ ní nɛ ɔmɛ tsuo a nɔ.*+ 9 Lɔ ɔ he ɔ, hoo peemi nɛ nya wa te si, Farisi bi ɔmɛ a kuu ɔ mi womi ngmali komɛ te si nɛ a bɔni atsinyɛ jemi wawɛɛ ke: “Wa nɛ tɔmi ko ngɛ nyumu nɛ ɔ he, se ke mumi ko loo hiɔwe bɔfo ko kɛ lɛ tu munyu ɔ, lɛɛ+—.” 10 Jehanɛ ɔ, benɛ pɛ ɔ mi ba wa wawɛɛ ɔ, tabuli a nyatsɛ ngua a ye gbeye kaa eko ɔ, a ma tsɔtslɔɔ Paulo mi, nɛ e fã tabuli ɔmɛ kaa a kple si nɛ a ya kpɔ̃ lɛ ngɛ a kpɛti konɛ a kɛ lɛ nɛ ba tabuli ɔmɛ a hi he ɔ.

11 Se jamɛ a nyɔ ɔ mi ɔ, Nyɔmtsɛ ɔ ba da si ngɛ e kasa nya nɛ e de lɛ ke: “Koo ye gbeye!+ Ejakaa kaa bɔ nɛ o ngɛ ye he odase yee wawɛɛ ngɛ Yerusalem ɔ, jã kɛ̃ lɛ e sa kaa o ya ye odase ngɛ Roma.”+

12 Benɛ je na a, Yudabi ɔmɛ so nɛ a kã a he kita kaa a be nɔ́ ko yee, nɛ a be nɔ́ ko hu nue kɛ yaa si be nɛ a maa gbe Paulo. 13 Nyumuhi nɛ a he hiɛ pe 40 lɛ a so nɛ a kã kita nɛ ɔ nɛ. 14 Nyumu nɛ ɔmɛ ya osɔfo nikɔtɔma amɛ kɛ ma nikɔtɔma amɛ a ngɔ, nɛ a ya de mɛ ke: “Wa so nɛ wa kã kita veveeve kaa wa be nɔ́ ko nɔ́ ko yee kɛ yaa si be nɛ wa maa gbe Paulo. 15 Lɔ ɔ he ɔ, amlɔ nɛ ɔ, nyɛɛ kɛ Sanhedri ɔ tsuo nyɛ de tabuli a nyatsɛ ngua a kaa e ngɔ lɛ kɛ kple kɛ ba nyɛ ngɔ kaa nɔ́ nɛ nyɛ suɔ nɛ nyɛ maa hyɛ e sane ɔ mi fitsofitso pe kekle ɔ. Se loko e maa su nyɛ ngɔ ɔ, wa maa pee klaalo kaa wa maa tane e yi.”

16 Se Paulo nyɛmiyo binyumu ko nu kaa a ngɛ blɔ nya toe nɛ a maa wo ka, nɛ e sɛ tabuli ɔmɛ a hi he ɔ, nɛ e ya bɔ Paulo amaniɛ. 17 Kɛkɛ nɛ Paulo tsɛ tabuli a nikɔtɔma amɛ a kpɛti nɔ kake, nɛ e de lɛ ke: “Moo ngɔ niheyo nɛ ɔ kɛ ya tabuli a nyatsɛ ngua a ngɔ, ejakaa e ngɛ nɔ́ ko nɛ e ma de lɛ.” 18 Enɛ ɔ he ɔ, e ngɔ niheyo ɔ kɛ ya tabuli a nyatsɛ ngua a ngɔ, nɛ e de lɛ ke: “Paulo, nɔ nɛ a wo lɛ tsu ɔ tsɛ mi nɛ e de mi ke ma ngɔ niheyo nɛ ɔ kɛ ba o ngɔ, ejakaa e ngɛ nɔ́ ko nɛ e ma de mo.” 19 Tabuli a nyatsɛ ngua a pɛtɛ e nine he nɛ e kɛ lɛ pɛ a tsɔ a he banee, nɛ e bi lɛ ke: “Mɛni o ngɛ nɛ o ma de mi?” 20 E de lɛ ke: “Yudabi ɔmɛ pee a nya kake konɛ a bi mo nɛ o ngɔ Paulo kɛ kple kɛ ba Sanhedri ɔ hwɔɔ, kaa nɔ́ nɛ a juɛmi ji kaa a maa le e sane ɔ mi fitsofitso pe kekle ɔ.+ 21 Se mo ko ha nɛ a plɛ o yi mi, ejakaa nyumuhi nɛ a he hiɛ pe 40 ngɛ mlɛe nɛ a ma tua lɛ, nɛ a kã a he kita kaa a be nɔ́ ko yee, nɛ a be nɔ́ ko hu nue kɛ yaa si be nɛ a maa gbe lɛ;+ nɛ amlɔ nɛ ɔ, a pee klaalo, nɛ a ngɛ si nɛ o maa wo mɛ ɔ mlɛe.” 22 Enɛ ɔ he ɔ, tabuli a nyatsɛ ngua a ha nɛ niheyo ɔ ho, nɛ e fã lɛ ke: “Ko ya de nɔ ko nɔ ko kaa o ba bɔ mi amaniɛ nɛ ɔ.”

23 Nɛ e tsɛ tabuli a nikɔtɔma amɛ a kpɛti ni enyɔ nɛ e de mɛ ke: “Ngɛ gbɔkuɛ ngmlɛfia etɛne* ɔ mi ɔ, nyɛ ha nɛ tabuli 200 nɛ a dla a he nɛ a bɔ sala kɛ ya Kaisarea, kɛ okpɔngɔ nɔ hili 70 kɛ akplɔ hɛɛli 200 hulɔ. 24 Jehanɛ hu ɔ, nyɛ dla okpɔngɔhi kɛ ha Paulo nɛ e hi nɔ, nɛ nyɛɛ ngɔ lɛ kɛ ya ha amlaalo Felike slɔkee.” 25 Nɛ e ngma sɛ womi kɛ e mi munyu nɛ ɔmɛ:

26 “Klaudio Lisia kɛ ya ha Amlaalo Kpakpa Felike: I biɔ mo! 27 Yudabi ɔmɛ nu nyumu nɛ ɔ nɛ jinɛ a ma lɛ gbemi, se i kɛ ye tabuli ɔmɛ ba oya nɔuu nɛ wa ba kpɔ̃ lɛ,+ ejakaa i ná le kaa Romano ji lɛ.+ 28 Nɛ benɛ i ngɛ hlae nɛ ma le nɔ́ he je nɛ a ngɛ e nya poe ɔ, i ngɔ lɛ kɛ kple kɛ ya a Sanhedri ɔ.+ 29 Nɛ i na kaa sanehi nɛ kɔɔ a Mlaa a he ɔ he je lɛ a po e nya a nɛ,+ se sanehi nɛ a po kɛ fɔ e nɔ ɔ ekoeko be nɛ e tsɔɔ kaa e sa gbenɔ loo tsu womi. 30 Se akɛnɛ i ná le kaa a so ngɔ wo e he he je ɔ,+ i ngɛ lɛ blɔ woe oya nɔuu kɛ ma o ngɔ, nɛ i ngɛ nihi nɛ a po e nya a fãe kaa a ba po e nya ngɛ o hɛ mi.”

31 Enɛ ɔ he ɔ, tabuli nɛ ɔmɛ ngɔ Paulo+ kaa bɔ nɛ a fã mɛ ɔ, nɛ a ngɔ lɛ kɛ ba Antipatri nyɔ ɔ mi. 32 E nɔ jena a, a ngmɛ okpɔngɔ nɔ hili ɔmɛ blɔ kaa a kɛ lɛ nɛ tsa nɔ kɛ ho, se tabuli nɛ a piɛ ɔ lɛɛ, a kpale kɛ ba tabuli ɔmɛ a hi he ɔ. 33 Okpɔngɔ nɔ hili ɔmɛ sɛ Kaisarea nɛ a ngɔ sɛ womi ɔ kɛ ya ha amlaalo ɔ, nɛ a ngɔ Paulo hu kɛ wo e dɛ mi. 34 Enɛ ɔ he ɔ, e kane sɛ womi ɔ nɛ e bi kaa mɛni kpokpa nɔ Paulo je, nɛ e ná le kaa e je Kilikia.+ 35 E de lɛ ke: “Ke nihi nɛ a ngɛ o nya poe ɔ ba a, ma bu mo tue saminya.”+ Nɛ e fã ke buli nɛ a bu e he ngɛ Herode matsɛ we ɔ.*

24 Ligbi enuɔ se ɔ, Anania,+ nɛ ji osɔfo nɔkɔtɔma a kɛ nikɔtɔma komɛ kɛ nyumu ko nɛ e tuɔ munyu kɛ haa nihi ngɛ ma hɛ mi* nɛ a tsɛɔ lɛ ke Tertulo ɔ kple kɛ ba, nɛ a ba po Paulo nya ngɛ amlaalo ɔ+ hɛ mi. 2 Benɛ a tsɛ lɛ ɔ, Tertulo bɔni e nya pomi ke:

“Akɛnɛ wa ná tue mi jɔmi babauu kɛ gu o nɔ, nɛ níhi nɛ o hyɛɔ kɛ yaa tsitsaa a hu ngɔ tsakemihi kɛ ngɛ ma nɛ ɔ mi bae he je ɔ, 3 be fɛɛ be kɛ he fɛɛ he nɛ wa ngɛ ɔ, wa tuɔ nɔ́ nɛ ɔ he munyu, nɛ wa naa mo si wawɛɛ, Wa Nɔmo Felike. 4 Se bɔ nɛ pee nɛ ma ko puɛ o be fuu he je ɔ, i kpa mo pɛɛ nɛ o bu wɔ tue be kpiti ko ngɛ o mi mi himi ɔ nya. 5 Ejakaa wa na nyumu nɛ ɔ kaa e ji nihi a tue puɛlɔ,*+ nɛ e ngɛ atuã tsɔmi si tlee+ ngɛ Yudabi tsuo nɛ a ngɛ zugba a nɔ tsuo ɔ a kpɛti, nɛ e ji Nazaretbi ɔmɛ a jami kuu ɔ nya dalɔ.+ 6 Jehanɛ se hu ɔ, e ka kaa e ma ble sɔlemi we ɔ, enɛ ɔ he ɔ, wa nu lɛ.+ 7* —— 8 Ke mo nitsɛ o bi lɛ e nya mi ɔ, o maa na munyu nɛ ɔmɛ tsuo nɛ waa kɛ ngɛ e nya poe ɔ.”

9 Kɛkɛ nɛ Yudabi ɔmɛ hu fĩ e se, nɛ a ngɛ dee ke ní nɛ ɔmɛ tsuo ngɛ mi niinɛ. 10 Benɛ amlaalo ɔ ngɔ e yi kɛ pee okadi kɛ tsɔɔ Paulo kaa e tu munyu ɔ, Paulo de ke:

“Akɛnɛ i le wawɛɛ kaa o kojo ma nɛ ɔ jehahi babauu he je ɔ, e ngɔ ye nya kaa ma je imi nitsɛ ye nya.+ 11 Ke mo nitsɛ o hla mi ɔ, o maa na kaa benɛ i kuɔ kɛ ho Yerusalem ya nɛ ma ya ja Mawu ɔ, maa pee ligbi 12 pɛ ji nɛ ɔ nɛ;+ 12 nɛ a nɛ kaa i kɛ nɔ ko ngɛ atsinyɛ jee ngɛ sɔlemi we ɔ, aloo i ngɛ nihi a yi mi woe konɛ a pee basabasa ngɛ kpe he ɔmɛ aloo ma a mi. 13 Jã kɛ̃ lɛ amlɔ nɛ ɔ, a be nyɛe maa ma munyuhi nɛ a kɛ ngɛ ye nya poe ɔ a nɔ mi ha mo. 14 Se enɛ ɔ lɛɛ i kplɛɛ nɔ ngɛ o hɛ mi, kaa i baa ye je mi ngɛ nɔ́ nɛ a ngɛ tsɛe ke jami kuu ko ɔ nya, nɛ jamɛ a blɔ ɔ nɔ i guɔ kɛ jaa ye nɛmɛ ɔmɛ a Mawu ɔ ngɛ blɔ klɔuu nɔ,+ kaa bɔ nɛ i heɔ níhi tsuo nɛ a ngma ngɛ Mlaa a kɛ Gbali ɔmɛ a womi ɔ mi ɔ yeɔ ɔ.+ 15 Nɛ i ngɛ hɛ kɛ nɔ fɔmi ngɛ Mawu mi, nɛ jamɛ a hɛ kɛ nɔ fɔmi ɔ nɔuu lɛ nyumu nɛ ɔmɛ hu ngɛ blɔ hyɛe, kaa a ma tle nihi nɛ a da kɛ nihi nɛ a dɛ ɔ+ tsuo si.+ 16 Enɛ ɔ he ɔ, be fɛɛ be ɔ, i bɔɔ mɔde wawɛɛ konɛ ye he nile nɛ e ko bu mi fɔ* ngɛ Mawu kɛ nimli a hɛ mi.+ 17 Jehanɛ ɔ, ngɛ jehahi fuu a se ɔ, i ba konɛ ma ngɔ mɔbɔ nami nike níhi+ kɛ ba ha ye ma a, konɛ ma ba sã afɔlehi. 18 Benɛ i ngɛ ní nɛ ɔmɛ a he ní tsue ɔ, a na mi ngɛ sɔlemi we ɔ kaa ye he tsɔ momo ngɛ kusumi nya,+ se a nɛ i kɛ asafo kuu ko aloo kaa i ha nɛ nihi ngɛ basabasa pee. Mohu ɔ, Yudabi komɛ nɛ a je Asia kpokpa a nɔ ɔ ngɛ lejɛ ɔ, 19 jinɛ mɛ lɛ e sa kaa a ko ba o hɛ mi konɛ ke a ngɛ nɔ́ ko kɛ si mi niinɛ ɔ, nɛ a ba de.+ 20 Aloo ha nɛ nyumu nɛ ɔmɛ nitsɛmɛ nɛ a ngɛ hiɛ ɔ nɛ a tsɔɔ tɔmi nɛ i tɔ̃ nɛ́ a na benɛ i ya da Sanhedri ɔ hɛ mi ɔ, 21 lɛɛ nɔ́ kake pɛ nɛ́ a ma nyɛ ma de ji kaa benɛ i daa si ngɛ a kpɛti ɔ, i kpa ngmlaa kɛ de ke: ‘Gbogboehi a si tlemi ɔ he je lɛ a ngɛ mi kojoe ngɛ nyɛ hɛ mi ɔ nɛ!’”+

22 Se akɛnɛ Felike le Blɔ+ nɛ ɔ he sanehi fuu he je ɔ, e tsɛ̃ a munyu ɔ ngɔ to, nɛ e de ke: “Be fɛɛ be nɛ Lisia nɛ ji tabuli a nyatsɛ ngua a ma kple kɛ ba a, ma ma nyɛ sane nɛ ɔmɛ a nya si.” 23 Nɛ e fã tabuli a nɔkɔtɔma a kaa e ha nɛ a wo nyumu ɔ tsu, se á ha nɛ́ e ye e he bɔɔ, nɛ́ a ngmɛ e we bi ɔmɛ blɔ nɛ a ba tsu e hiami níhi ha lɛ.

24 Ligbi komɛ a se ɔ, Felike kɛ e yo Drusila nɛ e ji Yudano ɔ ba, nɛ e tsɔ nɛ a ya tsɛ Paulo kɛ ba, nɛ e bu Kristo Yesu mi hemi kɛ yemi ɔ he munyu nɛ e tu ɔ tue.+ 25 Se benɛ Paulo ngɛ dami kɛ he nɔ yemi kɛ kojomi nɛ ma a he munyu tue ɔ,+ Felike ye gbeye nɛ e de lɛ ke: “Moo ya lolo, se ke i ná he blɔ ɔ, ma tsɔ nɛ a ba tsɛ mo kɛ ba ekohu.” 26 Jamɛ a be ɔ mi nɔuu ɔ, e ngɛ blɔ hyɛe kaa Paulo ma ha lɛ sika. Enɛ ɔ he ɔ, e tsɔɔ kɛ ya tsɛɔ lɛ kɛ baa kpitikpiti nɛ e kɛ lɛ ba sɛɛɔ ní. 27 Se jeha enyɔ se ɔ, Porkio Festo ba ye Felike se; nɛ akɛnɛ Felike suɔ kaa e maa sa Yudabi ɔmɛ a hɛ mi he je ɔ,+ e si Paulo ngɛ tsu ɔ mi.

25 Lɔ ɔ he ɔ, benɛ Festo+ ba kpokpa a mi nɛ e bɔni nɔ yemi ɔ, ligbi etɛ se ɔ, e je Kaisarea nɛ e kuɔ kɛ ho Yerusalem ya. 2 Nɛ osɔfo nikɔtɔma amɛ kɛ Yudabi ɔmɛ a kpɛti nyumuhi nɛ a hɛɛ blɔ nya a po Paulo nya kɛ ha lɛ.+ Enɛ ɔ he ɔ, a bɔni Festo pɛɛ kpami 3 kaa e pee mɛ kpakpa* nɛ e tsɔ nɛ a ya ngɔ Paulo kɛ ba Yerusalem. Se a to a yi mi kaa a maa wo Paulo he ka, nɛ a maa gbe lɛ ngɛ blɔ ɔ nɔ.+ 4 Se Festo he nɔ nɛ e tsɔɔ kaa á tsi Paulo nya ngɛ Kaisarea, ejakaa lɛ nitsɛ e maa kpale e se kɛ ya lejɛ ɔ ngɛ be kpiti mi. 5 E de ke: “Lɔ ɔ he ɔ, nyɛ ha nɛ nihi nɛ a hɛɛ blɔ nya ngɛ nyɛ kpɛti ɔ nɛ a ba nɛ wa kple kɛ ho, konɛ ke niinɛ nɛ nyumu ɔ pee nɔ́ yayami ko ɔ, nɛ a ba po e nya.”+

6 Enɛ ɔ he ɔ, benɛ e ye maa pee ligbi kpaanyɔ aloo ligbi nyɔngma ngɛ a kpɛti ɔ, e kple kɛ ho Kaisarea ya, nɛ e nɔ jena a, e ya hi kojomi sɛ ɔ nɔ, nɛ e fã ke a ya ngɔ Paulo kɛ ba. 7 Benɛ e ba a, Yudabi ɔmɛ nɛ a kple kɛ je Yerusalem kɛ ba a ba da si kɛ bɔle lɛ, nɛ a po munyu nguanguahi kɛ fɔ e nɔ, se a nyɛ we nɛ a ma nɔ mi.+

8 Se Paulo de kɛ fã e he ke: “I pee we yayami ko kɛ si we Yudabi ɔmɛ a Mlaa a aloo sɔlemi we ɔ aloo Kaisare.”+ 9 Akɛnɛ Festo ngɛ hlae nɛ e sa Yudabi ɔmɛ a hɛ mi he je ɔ,+ e bi Paulo ke: “Anɛ o suɔ kaa o maa kuɔ kɛ ya Yerusalem konɛ a ya kojo mo ngɛ ye hɛ mi ngɛ lejɛ ɔ ngɛ ní nɛ ɔmɛ a he lo?” 10 Se Paulo de ke: “I daa si ngɛ Kaisare kojomi sɛ ɔ hɛ mi, he nɛ e sa kaa a kojo mi ngɛ ɔ. I pee we Yudabi ɔmɛ yayami ko kaa bɔ nɛ mo nitsɛ hu o le saminya a. 11 Ke niinɛ nɛ i pee yayami ko aloo i pee nɔ́ ko nɛ sa gbenɔ ɔ,+ lɛɛ i de we ke a ko gbe mi; se ke nɔ mi mami ko be munyuhi nɛ nyumu nɛ ɔmɛ po kɛ fɔ ye nɔ ɔ mi ɔ, adesa ko be he blɔ kaa e maa ngɔ mi kɛ wo a dɛ mi konɛ e kɛ sa a hɛ mi. I ngɔ ye sane ɔ kɛ ha Kaisare!”+ 12 Kɛkɛ nɛ benɛ Festo kɛ e ga woli ɔmɛ tu munyu ta a, e de lɛ ke: “Akɛnɛ o ngɔ o sane ɔ kɛ ha Kaisare he je ɔ, Kaisare ngɔ lɛ o maa ya.”

13 Ligbi komɛ a se ɔ, Agripa nɛ ji matsɛ ɔ kɛ Bernike ba Kaisarea nɛ a ba slaa Festo konɛ a ha lɛ manye. 14 Akɛnɛ a se maa kɛ bɔɔ ngɛ lejɛ ɔ he je ɔ, Festo ngɔ Paulo sane ɔ kɛ pue matsɛ ɔ hɛ mi, nɛ e de ke:

“Nyumu ko ngɛ hiɛ ɔ nɛ Felike wo lɛ tsu nɛ e je e he, 15 nɛ benɛ i ngɛ Yerusalem ɔ, osɔfo nikɔtɔma amɛ kɛ Yudabi ɔmɛ a nikɔtɔma amɛ ngɔ e he sane kɛ ba ha mi,+ nɛ a ngɛ bie kaa ma bu lɛ fɔ. 16 Se i de mɛ kaa ngɛ Romabi a kusumi nya a, a be nyɛe maa ngɔ nɔ ko kɛ ha konɛ a kɛ sa nihi a hɛ mi kaa ja nɔ nɛ a po e nya a kɛ nihi nɛ a po e nya a kpe hɛ mi kɛ hɛ mi, nɛ nɔ ɔ ná he blɔ nɛ e je e nya ngɛ sane nɛ a po ngɔ fɔ e nɔ ɔ he.+ 17 Enɛ ɔ he ɔ, benɛ a ba hiɛ ɔ, i gbla we ye nane si kulaa, mohu ɔ, e nɔ jena a, i hi si ngɛ kojomi sɛ ɔ nɔ, nɛ i fã kaa a ya ngɔ nyumu ɔ kɛ ba. 18 Nihi nɛ a po e nya a ba da si, se pi munyu yayahi nɛ i susu ɔ ekoeko nɛ a kɛ po e nya.+ 19 Mɛ nitsɛmɛ a mawu jami he sane+ komɛ kɛ nyumu ko nɛ a tsɛɔ lɛ ke Yesu nɛ e gbo, se Paulo lɛɛ e tsɔɔ kaa e ngɛ wami mi ɔ he sanehi mohu lɛ a kɛ ba.+ 20 Akɛnɛ i li blɔ nɔ nɛ ma gu kɛ tsu sane nɛ ɔ he ní he je ɔ, i bi lɛ ke ji kaa e maa suɔ kaa e maa ya Yerusalem konɛ a ya kojo lɛ ngɛ sane nɛ ɔmɛ a he ngɛ lejɛ ɔ lo?+ 21 Se benɛ Paulo bi kaa á ha nɛ e hi tsu ɔ mi kɛ ya si be nɛ Matsɛ Ngua a*+ maa hyɛ e sane ɔ mi ha lɛ ɔ, i fã ke a ngɔ lɛ kɛ to kɛ ya si be nɛ ma wo lɛ blɔ kɛ ya ha Kaisare.”

22 Kɛkɛ nɛ Agripa de Festo ke: “I suɔ nɛ imi nitsɛ ma bu nyumu ɔ tue.”+ E de lɛ ke: “O maa bu lɛ tue hwɔɔ.” 23 Enɛ ɔ he ɔ, e nɔ jena a, Agripa kɛ Bernike dla a he kɛ̃tsɛ̃ɛ, nɛ a ba sɛ tsu nɛ a yeɔ sane ngɛ mi ɔ mi, nɛ tabuli a nyatsɛmɛ nguahi kɛ nimli nguahi nɛ a ngɛ ma a mi hu piɛɛ a he; nɛ Festo fã nɛ a ya ngɔ Paulo kɛ ba. 24 Nɛ Festo de ke: “Matsɛ Agripa kɛ nyɛ nihi tsuo nɛ waa kɛ nyɛ ngɛ hiɛ ɔ, nyumu nɛ ɔ nɛ nyɛ ngɛ lɛ hyɛe nɛ ɔ, lɛ ji nɔ nɛ Yudabi ɔmɛ tsuo ba kpa mi pɛɛ ngɛ Yerusalem kɛ hiɛ ɔ kɛ ngmlaa kaa e sɛ nɛ e hi wami mi hu ɔ nɛ.+ 25 Se imi lɛɛ i na kaa e pee we nɔ́ ko nɛ e sa gbenɔ.+ Lɔ ɔ he ɔ, benɛ nyumu nɛ ɔ ngɔ e sane ɔ kɛ ha Matsɛ Ngua a, i pee ye juɛmi kaa ma wo lɛ blɔ kɛ ho. 26 Se i li nɔ́ tutuutu nɛ ma ngma ngɛ e he kɛ ya ha ye Nyɔmtsɛ ɔ. Enɛ ɔ he ɔ, i ngɔ lɛ kɛ ba nyɛ tsuo nyɛ hɛ mi, titli ɔ, mo Matsɛ Agripa o hɛ mi, konɛ ke o bi lɛ e nya mi ta a, ma na nɔ́ ko nɛ ma ngma. 27 Ejakaa e peeɔ mi kaa sisi numi be he kaa ma wo nɔ ko nɛ a wo lɛ tsu ɔ blɔ nɛ i be munyuhi nɛ a po kɛ fɔ e nɔ ɔ tsɔɔe.”

26 Agripa+ de Paulo ke: “A ngmɛ mo blɔ nɛ́ o tu munyu kɛ je o nya.” Kɛkɛ nɛ Paulo kpa e nine mi nɛ e bɔni e he fami ke:

2 “Matsɛ Agripa, ye bua jɔ kaa o hɛ mi lɛ i ma ye he fami ngɛ mwɔnɛ ligbi nɛ ɔ ngɛ níhi tsuo nɛ Yudabi ɔmɛ ngɛ ye nya poe ngɛ a he ɔ he,+ 3 titli ɔ, akɛnɛ o le Yudabi ɔmɛ a kusumi ɔmɛ kɛ níhi nɛ a jeɔ he atsinyɛ ɔ tsuo saminya a he je. Enɛ ɔ he ɔ, i kpa mo pɛɛ nɛ o to o tsui si nɛ o bu mi tue.

4 “Ngɛ anɔkuale mi ɔ, Yudabi ɔmɛ tsuo nɛ a le mi be ko nɛ be ɔ le bɔ nɛ i ba ye je mi ha ngɛ ye we bi ɔmɛ a kpɛti,* kɛ ngɛ Yerusalem, kɛ je ye nihe mi tɔɔ.+ 5 Nimli nɛ ɔmɛ le mi kɛ. Nɛ ke a maa ye odase ɔ, a ma de mo ke, i hi si kaa Farisi bi ɔmɛ a jami mi no,+ nɛ kaa bɔ nɛ o le ɔ, Farisi bi ɔmɛ a jami kuu ɔ peeɔ kpɛii ngɛ Mawu jami mi pe Yudabi kpa amɛ.+ 6 Se amlɔ nɛ ɔ, ngɛ si nɛ wa nɛmɛ ɔmɛ a Mawu ɔ wo ɔ he hɛ kɛ nɔ fɔmi ɔ he je ɔ,+ i daa si nɛ a ngɛ mi kojoe; 7 si womi nɛ ɔ nɔuu lɛ wa wɛtso 12 ɔmɛ ngɛ blɔ hyɛe kaa e maa ba mi, nɛ a ja Mawu wawɛɛ nyɔ kɛ pia ngɛ blɔ klɔuu nɔ ɔ nɛ. Se Matsɛ, hɛ kɛ nɔ fɔmi nɛ ɔ he je lɛ Yudabi ɔmɛ ngɛ ye nya poe ngɛ ɔ nɛ.+

8 “Mɛni he je nɛ nyɛ kpɛti ni komɛ he we yi* kaa Mawu tleɔ ni gbogboehi si ɔ? 9 Imi hu i ná nɔ mi mami kaa e sa nɛ ma pee níhi fuu kɛ te si kɛ wo Yesu, Nazaretno ɔ biɛ ɔ. 10 Jã pɛpɛɛpɛ lɛ i pee ngɛ Yerusalem, nɛ i wo ni klɔuklɔu ɔmɛ a ti nihi fuu tsu,+ ejakaa i ná he wami ɔ kɛ je osɔfo nikɔtɔma amɛ a ngɔ;+ nɛ benɛ a maa gbe mɛ ɔ, i fĩ se. 11 Nɛ i pɔɔ a tue gblami ngɛ kpe he ɔmɛ tsuo, nɛ i bɔ mɔde kaa ma nyɛ a nɔ nɛ a ngmɛɛ a hemi kɛ yemi ɔ he; nɛ akɛnɛ ye mi mi fu mɛ wawɛɛ he je ɔ, i ya ma se mahi po a mi nɛ i ya wa mɛ yi mi ngɛ lejɛ ɔmɛ hulɔ.

12 “Benɛ i ngɛ nɔ́ nɛ ɔ pee ɔ, i pue nɔ kɛ yaa Damasko ngɛ osɔfo nikɔtɔma amɛ a he wami kɛ a tsɔmi nya, 13 se Matsɛ, benɛ wa ngɛ blɔ ɔ nɔ kɛ yaa a, piani katakata a, la ko nɛ e nya wa pe pu la kpɛ kɛ je hiɔwe kɛ ba bɔle i kɛ nihi nɛ a piɛɛ ye he kɛ ngɛ blɔ ɔ hiae ɔ.+ 14 Nɛ benɛ wɔ tsuo wa nɔ si ngɛ zugba a, i nu gbi ko nɛ́ e de mi ngɛ Hebri gbi mi ke: ‘Saulo, Saulo, mɛni he je nɛ o ngɛ mi yi mi wae ɔ? Ke o ya nɔ nɛ o ngɛ lohwehi a tsɔ̃mi tso* ɔmɛ atia sie ɔ, o maa ye o he awi.’ 15 Se i bi ke: ‘Nyɔmtsɛ, mo mɛnɔ?’ Nɛ e de mi ke: ‘Imi ji Yesu, nɔ nɛ o ngɛ lɛ yi mi wae ɔ nɛ. 16 Se tee si kɛ da o nane nɔ. Enɛ ɔ he lɛ i je ye he kpo kɛ tsɔɔ mo ɔ nɛ, konɛ ma hla mo kaa níhi nɛ o na momo kɛ níhi nɛ ma ha nɛ o maa na ngɛ ye he ɔ tsuo a he sɔmɔlɔ kɛ odase yelɔ.+ 17 Nɛ ma kpɔ̃ mo ngɛ nimli nɛ ɔmɛ, kɛ je ma amɛ nɛ i ngɛ mo a ngɔ tsɔe ɔ a dɛ mi.+ 18 I ngɛ mo tsɔe nɛ o ya bli a hɛngmɛ,+ nɛ o kpale mɛ kɛ je diblii mi+ kɛ ba la he,+ nɛ́ o je mɛ kɛ je Satan he wami ɔ sisi+ kɛ ba Mawu ngɔ. Nɛ kɛ gu enɛ ɔ nɔ ɔ, Mawu maa jɔɔ mɛ nɛ e maa tsu a he,+ kaa bɔ nɛ e pee anɔkualetsɛmɛ kpahi ɔ.’

19 “Enɛ ɔ he ɔ, Matsɛ Agripa, i gbo we hiɔwe nina a tue, 20 mohu ɔ, i ngɔ sɛ gbi ɔ nɛ tsɔɔ kaa e sa nɛ nihi nɛ a tsake a tsui, nɛ a kpale kɛ ba Mawu ngɔ kɛ gu níhi nɛ tsɔɔ kaa a tsake a tsui nɛ a maa pee ɔ nɔ ɔ+ kɛ ya ha nihi nɛ a ngɛ Damasko ɔ+ kekle, nɛ lɔ ɔ se ɔ, nihi nɛ a ngɛ Yerusalem,+ kɛ nihi nɛ a ngɛ mahi tsuo nɛ a ngɛ Yudea, kɛ je ma amɛ a mi ɔ. 21 Enɛ ɔ he je lɛ Yudabi ɔmɛ nu mi ngɛ sɔlemi we ɔ nɛ a bɔ mɔde kaa a maa gbe mi ɔ nɛ.+ 22 Se ngɛ Mawu yemi kɛ buami nya a, kɛ ba si mwɔnɛ ligbi nɛ ɔ, i ya nɔ nɛ i ngɛ nimli wawi kɛ nimli nguahi tsuo odase yee, nɛ i tu we munyu kpa ko kaa ja níhi nɛ gbali ɔmɛ kɛ Mose tsɔɔ kaa a maa ba a pɛ+— 23 kaa Kristo ɔ maa na amanehlu,+ nɛ lɛ nɛ e maa pee kekleekle nɔ nɛ a ma tle lɛ si kɛ je gbogboehi a kpɛti,+ nɛ e maa jaje la a kɛ ha nimli nɛ ɔmɛ kɛ je ma amɛ tsuo.”+

24 Jehanɛ ɔ, benɛ Paulo ngɛ ní nɛ ɔmɛ dee kɛ ngɛ e he fãe ɔ, Festo kɛ gbi nɛ nya wa de lɛ ke: “Paulo, o yi ngɛ puɛe! Womi kasemi sɔuu ha nɛ o yi ngɛ puɛe!” 25 Se Paulo de lɛ ke: “Wa Nɔmo Festo, pi nɛ ye yi ngɛ puɛe, mohu ɔ, i ngɛ anɔkuale munyu tue kɛ juɛmi nɛ e mi tsɔ. 26 Ngɛ anɔkuale mi ɔ, matsɛ ɔ nɛ i ngɛ munyu tue faa kɛ ngɛ lɛ tsɔɔe ɔ le ní nɛ ɔmɛ tsuo kulaa; i ngɛ nɔ mi mami kaa ní nɛ ɔmɛ a kpɛti kake ngmelu po be nɛ e li, ejakaa a pee we ní nɛ ɔmɛ ekoeko ngɛ kɔkɔɔ mi.+ 27 Matsɛ Agripa, anɛ o heɔ Gbali ɔmɛ yeɔ lo? I le kaa o heɔ mɛ yeɔ.” 28 Se Agripa de Paulo ke: “Ngɛ be kpiti mi ɔ, o ma plɛ ye yi mi nɛ ma ba pee Kristofono.” 29 Kɛkɛ nɛ Paulo de ke: “Ngɛ be kpiti mi jio, ngɛ be gagaa mi jio, i ná nɛ Mawu ha nɛ́ pi mo pɛ kɛkɛ, se mohu nihi tsuo nɛ a ngɛ mi tue bue mwɔnɛ ɔ ba pee kaa imi, se tsu pɛ lɛ a ko wo mɛ.”

30 Kɛkɛ nɛ matsɛ ɔ te si, nɛ amlaalo ɔ kɛ Bernike kɛ nyumuhi nɛ a piɛɛ a he kɛ hii si ɔ hu te si. 31 Se benɛ a yaa a, a bɔni a sibi demi ke: “Nyumu nɛ ɔ pee we nɔ́ ko nɛ e sa gbenɔ aloo tsu womi.”+ 32 Kɛkɛ nɛ Agripa de Festo ke: “Kaa pi nɛ nyumu nɛ ɔ ngɔ e sane ɔ kɛ ha Kaisare ɔ, jinɛ a ko nyɛ ko ngmɛɛ e he.”+

27 Jehanɛ ɔ, benɛ a mwɔ a yi mi kpɔ kaa waa ngɔ mele kɛ ya Italia a,+ a ngɔ Paulo kɛ nihi nɛ a wo mɛ tsu ɔ a ti ni komɛ kɛ wo tabuli a nɔkɔtɔma ko nɛ a tsɛɔ lɛ ke Yulio nɛ e ngɛ Augusto tabo ɔ mi ɔ dɛ mi. 2 Nɛ mele ko nɛ e je Adramitio ɔ ma hiami kɛ ya mele si dami hehi nɛ a ngɛ wo nya mahi nɛ a ngɛ Asia kpokpa a nɔ ɔ a mi. Lɔ ɔ he ɔ, wa ya kuɔ nɛ e hia. Nɛ Aristarko+ nɛ e ji Makedoniano nɛ e je Tesalonika a piɛɛ wa he. 3 E nɔ jena a, wa ya su Sidon, nɛ Yulio je mi mi jɔmi kpo kɛ tsɔɔ Paulo, nɛ e ngmɛ lɛ blɔ kaa e ya e huɛmɛ ɔmɛ a ngɔ konɛ a ya hyɛ e nɔ.

4 Nɛ benɛ wa je lejɛ ɔ nɛ wa gu wo ɔ nɔ kɛ yaa a, wa ya gu he ko nɛ ma ha nɛ Kipro zugba kpɔ nɛ nyu bɔle lɛ ɔ nɛ po wa he piɛ kɛ je kɔɔhiɔ ɔ he, ejakaa wa ngɛ kɔɔhiɔ ɔ kpee. 5 Lɔ ɔ se ɔ, wa nyɛɛ wo gbajaa a hɛ mi kɛ be ngɛ Kilikia kɛ Pamfilia wo ɔ nya, kɛ ba melehi a si dami he nɛ e ngɛ Mira ngɛ Likia a. 6 Tabuli a nɔkɔtɔma a na mele ko ngɛ lejɛ ɔ nɛ e je Aleksandria nɛ e yaa Italia, nɛ e ha nɛ wa ya sɛ mi. 7 Nɛ benɛ wa nyɛɛ wo ɔ nɔ blɛuu be saii ɔ, wa gbo dengme kɛ ba su Kenido. Akɛnɛ kɔɔhiɔ ɔ ngmɛ́ wɔ blɔ nɛ waa ya wa hɛ mi he je ɔ, wa ya gu Kreta nɛ ngɛ Salmone ɔ kasa nya haa konɛ e po wa he piɛ kɛ je kɔɔhiɔ ɔ he. 8 Nɛ benɛ wa gbo dengme kɛ nyɛɛ wo ɔ nya a, wa ba su he ko nɛ a tsɛɔ ke Lɛ Si Dami He Kpakpahi, nɛ́ e kɛ Lasea ma a he kɛ we ɔ.

9 Be saii ba be, nɛ wo nɔ blɔ hiami ba pee oslaa, ejakaa Kpatami Ligbi ɔ+ nɔ hwɔ hami ɔ po be momo, enɛ ɔ he ɔ, Paulo wo mɛ ga, 10 nɛ e de mɛ ke: “Nyumuhi, i na kaa wa ma gbo dengme, nɛ níhi hu ma bɔ wɔ ngɛ blɔ hiami nɛ ɔ mi, pi mele ɔ mi níhi kɛ mele ɔ kɛkɛ, se mohu wa wami* hulɔ.” 11 Se tabuli a nɔkɔtɔma a bu mele kudɔlɔ ɔ kɛ meletsɛ ɔ tue mohu pe nɔ́ nɛ Paulo ngɛ dee ɔ. 12 Akɛnɛ melehi a si dami he ɔ hí nɛ a be nyɛe maa ye ahlabata be ɔ ngɛ lejɛ ɔ he je ɔ, a ti nihi fuu wo ga ke a hia kɛ je lejɛ ɔ nɛ a hyɛ kaa a ma nyɛ ma ya su Foinike lo konɛ a ye ahlabata be ɔ ngɛ lejɛ ɔ. Foinike ji melehi a si dami he nɛ ngɛ Kreta. Melehi a si dami he nɛ ɔ hɛ mi tsɔɔ puje he blɔ.

13 Benɛ woyi je kɔɔhiɔ ɔ bɔni fiami blɛuu ɔ, a susu kaa a yi mi tomi ɔ ba mi, nɛ a wo osɛkɛ ɔ nɔ, nɛ a hia kɛ nyɛɛ wo ɔ nɔ kɛ be ngɛ Kreta wo ɔ nya haa. 14 Se e kɛ we kulaa nɛ kɔɔhiɔ nɛ nya wa ko nɛ a tsɛɔ ke Yurokilo* ɔ hia kɛ ba kpee mele ɔ. 15 Benɛ kɔɔhiɔ ɔ sɛ mele ɔ mi wawɛɛ nɛ mele ɔ nyɛ we nɛ e ya e hɛ mi hu ɔ, wa ngmɛɛ mele ɔ he kɛ ha kɔɔhiɔ ɔ nɛ e kɛ wɔ ho. 16 Kɛkɛ nɛ waa kɛ fo ya gu he ko, nɛ zugba kpɔ nyafii ko nɛ nyu bɔle lɛ nɛ a tsɛɔ ke Kauda a po wa he piɛ kɛ je kɔɔhiɔ ɔ he, nɛ dengmedengme loko wa nyɛ nɛ wa nu ahima* a nɛ ngɛ mele ɔ supa je ɔ kɛ da si. 17 Nɛ benɛ a wo nɔ kɛ ba mele ɔ mi ɔ, a kɛ níhi fi mele ɔ, nɛ akɛnɛ a ngɛ gbeye yee kaa eko ɔ, e ma ya sa si ngɛ Sirti* zia kpɔ ɔ nɔ he je ɔ, a gbe abalaa a, nɛ kɔɔhiɔ ɔ kɛ wɔ ho. 18 Akɛnɛ kɔɔhiɔ nɛ nya wa a ngɛ wɔ fiae kɛ ngɛ yae kɛ ngɛ bae he je ɔ, e nɔ jena a, a bɔni níhi nɛ ngɛ mele ɔ mi ɔ jemi kɛ bɔni wo ɔ mi womi. 19 Nɛ ligbi etɛne ɔ nɔ ɔ, a ngɔ mɛ nitsɛmɛ a ninehi kɛ je mele ɔ he ní ɔmɛ ngɔ pue he.

20 Benɛ wa nɛ pu loo dodoehi ligbihi fuu, nɛ́ kɔɔhiɔ nɛ nya wa ngɛ wɔ kpee ɔ,* hɛ kɛ nɔ fɔmi tsuo nɛ wa ngɛ kaa a ma he wa yi wami ɔ bɔni tami. 21 Benɛ a yi ní be saii ɔ, Paulo te si kɛ da si ngɛ a kpɛti, nɛ e de ke: “Nyumuhi, jinɛ e sa kaa nyɛ ko bu ga nɛ i wo nyɛ ɔ tue, nɛ wa ko hiɛ mele ɔ kɛ ji Kreta kɛ bɛ, nɛ wa ko ba gbo we dengme nɛ ɔ, nɛ wa ní ɔmɛ hu a hɛ mi ko ba kpataa we kikɛ nɛ ɔ.+ 22 Se kɛ̃ ɔ, amlɔ nɛ ɔ, i ngɛ nyɛ he wami woe kaa nyɛ ná kã, ejakaa nyɛ ti nɔ kake ngmelu po* be laae, mele ɔ pɛ lɛ e ma puɛ. 23 Nyɔ nɛ ɔ mi ɔ, Mawu, nɔ nɛ e nɔ́ ji mi, nɛ́ i sɔmɔɔ lɛ ngɛ blɔ klɔuu nɔ ɔ bɔfo+ ko ba da si ngɛ ye kasa nya 24 nɛ e de mi ke: ‘Paulo, koo ye gbeye. E sa nɛ o ya da si ngɛ Kaisare hɛ mi,+ nɛ hyɛ! Mawu ngɔ nihi tsuo nɛ a piɛɛ o he ngɛ mele ɔ mi ɔ kɛ ke mo.’ 25 Lɔ ɔ he ɔ, nyumuhi, nyɛ ná kã, ejakaa i heɔ Mawu yeɔ kaa e maa ba mi kaa bɔ nɛ a de mi ɔ pɛpɛɛpɛ. 26 Se kɛ̃ ɔ, e sa nɛ wa ya sa si ngɛ zugba kpɔ ko nɛ nyu bɔle lɛ ɔ nɔ.”+

27 Jehanɛ ɔ, benɛ nyɔ nɛ ji 14 ɔ ba su nɛ wa ngɛ yae nɛ wa ngɛ bae ngɛ Adria Wo ɔ nɔ ɔ, nyɔ mi kpɛti ɔ, mele ɔ mi ní tsuli ɔmɛ bɔni susumi kaa a ngɛ zugba ko he sue. 28 A ngmɛɛ susumi kpa a he kɛ wo wo ɔ mi, nɛ a ná gugue 20,* enɛ ɔ he ɔ, a ya a hɛ mi bɔɔ, nɛ a kpale ngmɛɛ susumi kpa a he kɛ wo wo ɔ mi, nɛ a ná gugue 15.* 29 Nɛ akɛnɛ a ngɛ gbeye yee kaa eko ɔ, wa ma ya sa tɛsahi a nɔ he je ɔ, a fɔ osɛkɛ eywiɛ ngɛ mele ɔ supa je, nɛ a ná nɛ je na mla. 30 Se benɛ mele ɔ mi ní tsuli ɔmɛ bɔni mɔde bɔmi kaa a maa tu fo kɛ je mele ɔ mi, nɛ́ a ngɛ ahima* a si kplee kɛ fɔ wo ɔ nɔ, nɛ a bua pee kaa a yaa fɔ̃ osɛkɛ ɔmɛ ngɛ lɛ ɔ yi je ɔ, 31 Paulo de tabuli a nɔkɔtɔma a kɛ tabuli ɔmɛ ke: “Ke nyumu nɛ ɔmɛ hí mele ɔ mi ɔ, lɛɛ a be nyɛe ma he nyɛ yi wami.”+ 32 Kɛkɛ nɛ tabuli ɔmɛ poo ahima a he kpa amɛ nɛ a ha nɛ e nɔ si.

33 Jehanɛ ɔ, benɛ e piɛ bɔɔ nɛ je maa na a, Paulo wo mɛ tsuo he wami kaa a ye nɔ́ ko, nɛ e de mɛ ke: “Mwɔnɛ ɔ ji ligbi 14 sɔuu nɛ́ nyɛɛ kɛ tsui yemi ngɛ mlɛe, nɛ nyɛ yi nɔ́ ko nɔ́ ko. 34 Enɛ ɔ he ɔ, i ngɛ nyɛ he wami woe kaa nyɛɛ ye ní; lɔ ɔ lɛ ma ha nɛ nyɛ yi ma ná wami, ejakaa nyɛ ti nɔ ko nɔ ko yi bwɔmi kake ngmelu po hɛ mi be kpatae.” 35 Benɛ e de nɔ́ nɛ ɔ, e ngɔ abolo, nɛ e na Mawu si ngɛ mɛ tsuo a hɛ mi, nɛ e ku mi, nɛ e bɔni yemi. 36 Kɛkɛ nɛ mɛ tsuo a ná kã nɛ mɛ hu a bɔni ní yemi. 37 Wɔ nihi* nɛ wa ngɛ mele ɔ mi ɔ tsuo wa yibɔ ji 276. 38 Benɛ a ye ní ɔ nɛ a tɔ ɔ, a sake ngma a tsuo nɛ a to ngɛ mele ɔ mi ɔ kɛ pue wo ɔ mi konɛ mele ɔ nɛ pee huyɛhuyɛ.+

39 Benɛ je na a, a nyɛ we nɛ a yɔse zugba kpɔ ɔ,+ mohu ɔ, a na wo nya kɔkɔɔ mi he ko kɛ e nya zia, nɛ a to a yi mi kaa ke a ma nyɛ ɔ, a ma ha nɛ mele ɔ nɛ ya sa si ngɛ lejɛ ɔ. 40 Enɛ ɔ he ɔ, a po osɛkɛ ɔmɛ, nɛ a ha nɛ a nɔ wo ɔ mi, nɛ jamɛ a be ɔ mi nɔuu ɔ, a pɛne kudɔɔ ɔ he kpa amɛ; nɛ benɛ a wo abalaa a nɛ ngɛ mele ɔ yi je ɔ nɔ kɛ kpee kɔɔhiɔ ɔ, a plɛ mele ɔ yi kɛ tsɔɔ wo ɔ nya blɔ. 41 Benɛ a ya hɛ zia kpɔ ko ngɛ wo ɔ kpɛti ɔ, a ha nɛ mele ɔ ya sa si nɛ e yi je ɔ ya pu zu nɛ e nyɛ we nɛ e je, se oslɔke ɔ bɔni mele ɔ supa je ɔ ywiami wɔtsɔwɔtsɔ.+ 42 Kɛkɛ nɛ tabuli ɔmɛ to a yi mi kaa a maa gbe nihi nɛ a wo mɛ tsu ɔ konɛ nɔ ko nɔ ko nɛ e ko sle kɛ ho nɛ e ba tu fo kɛ je. 43 Se tabuli a nɔkɔtɔma a fia e pɛɛ si kaa e maa baa Paulo yi, nɛ e ngmɛ́ mɛ blɔ nɛ a tsu a yi mi tomi ɔ he ní. E fã nihi nɛ a le slemi ɔ kaa a tu ngɔ fɔ wo ɔ mi nɛ a sle kɛ ya kpo kekle, 44 nɛ́ ni nɛmɛ nɛ a piɛ ɔ, a ti ni komɛ nɛ́ a bu gbegbelihi a nɔ, nɛ́ ni komɛ hu nɛ́ a bu mele ɔ he ní ɔmɛ a nɔ kɛ nyɛɛ a se. Enɛ ɔ he ɔ, a ngɔ mɛ tsuo kɛ ba su kpo slɔkee.+

28 Benɛ wa ba su slɔkee ɔ, wa ná le kaa a tsɛɔ zugba kpɔ nɛ nyu bɔle lɛ ɔ ke Malta.+ 2 Nɛ nihi nɛ a tuɔ ma se gbi ɔ* je mi mi himi nɛ e se be kpo kɛ tsɔɔ wɔ. A slɛ la nɛ a he wɔ tsuo atuu, ejakaa hiɔmi ngɛ nɛe nɛ fĩɛ hu ngɛ yee. 3 Se benɛ Paulo bua lɛ́ tsɔwi nya nɛ e kɛ pue la a mi ɔ, la a ha nɛ sinɔ duɔtsɛ ko je kpo nɛ e mimla e nine. 4 Benɛ nihi nɛ a tuɔ ma se gbi ɔ a hɛngmɛ gba lohwe duɔtsɛ ɔ nɔ nɛ e ngɛ bɛlee* ngɛ e nine he ɔ, a bɔni a sibi demi ke: “Niinɛ, nɔmlɔ gbelɔ ji nyumu nɛ ɔ, nɛ e ngɛ mi kaa e je wo ɔ mi kɛ ba slɔkee mohu lɛɛ, se Dami Sane Yemi* ngmɛ́ lɛ blɔ kaa e ya nɔ nɛ e hi je mi.” 5 Se e huanya lohwe ɔ ngɔ fɔ la a mi nɛ lohwe ɔ yi lɛ awi. 6 Se a ngɛ blɔ hyɛe kaa e maa fuufuu aloo e ma tsɔ kɛ fia si tlukaa nɛ e ma gbo. Benɛ a mlɛ hluu nɛ nɔ́ ko pee we lɛ ɔ, a tsake a juɛmi nɛ a bɔni demi ke mawu ko ji lɛ.

7 Jehanɛ ɔ, nyumu ko ngɛ zugba kpɔ nɛ nyu bɔle lɛ ɔ nɔ nɛ a buɔ lɛ saminya. A tsɛɔ lɛ ke Publio, nɛ e ngɛ zugbahi ngɛ lejɛ ɔ ní ɔmɛ a mi. E nya wa he, nɛ e pee wɔ nibwɔ ligbi etɛ sɔuu. 8 Nɛ e ba mi kaa asla bu Publio tsɛ ɔ si nɛ e ngɛ muɔ hu nyaae, nɛ Paulo ya e ngɔ nɛ e ya sɔle, nɛ e ngɔ e ninehi kɛ pue e nɔ, nɛ e tsa lɛ.+ 9 Benɛ nɔ́ nɛ ɔ ya nɔ ɔ, nihi nɛ a ngɛ zugba kpɔ nɛ nyu bɔle lɛ ɔ nɔ nɛ a be he wami ɔ hu bɔni e ngɔ bami, konɛ e tsa mɛ.+ 10 A ke wɔ níhi fuu kɛ wo wa hɛ mi nyami, nɛ benɛ wa ngɛ mele mi sɛe kɛ je lejɛ ɔ, a ngɔ nɔ́ fɛɛ nɔ́ nɛ e he maa hia wɔ ɔ kɛ ba wo mele ɔ mi.

11 Nyɔhiɔ etɛ se ɔ, wa sɛ mele ko nɛ a to e he so ke, “Zeu Binyumu Ɔmɛ” ɔ mi kɛ je lejɛ ɔ. Mele ɔ je Aleksandria, nɛ e ba ye ahlabata be ɔ ngɛ zugba kpɔ nɛ nyu bɔle lɛ ɔ nɔ. 12 Benɛ wa ba su Sirakusa melehi a si dami he ɔ, wa hi lejɛ ɔ ligbi etɛ; 13 benɛ wa je lejɛ ɔ, wa tsa nɔ nɛ wa ba su Regio. Ligbi kake se ɔ, woyi je kɔɔhiɔ ko te si, nɛ ngɛ ligbi enyɔne ɔ nɔ ɔ, wa ba su Puteoli. 14 Wa ba na nyɛmimɛ ngɛ hiɛ ɔ, nɛ a kpa wɔ pɛɛ kaa waa ye ligbi kpaago ngɛ a ngɔ, nɛ lɔ ɔ se ɔ, wa pue Roma blɔ. 15 Benɛ nyɛmimɛ ɔmɛ nɛ a ngɛ lejɛ ɔ nu wa he ɔ, a ba kpee wɔ ngɛ Apio Jua a nɔ kɛ Nibwɔhi A To He Etɛ ɔ tɔɔ. Benɛ Paulo hɛngmɛ gba a nɔ ɔ, e na Mawu si, nɛ e ná kã.+ 16 Nyagbenyagbe ɔ, benɛ wa sɛ Roma ma a mi ɔ, a ngmɛ Paulo blɔ kaa lɛ pɛ e hi si, konɛ tabulɔ nɛ e bu e he.

17 Se ligbi etɛ se ɔ, e tsɛ Yudabi ɔmɛ a kpɛti nyumuhi nɛ a hɛɛ blɔ nya a kpe. Benɛ a ba bua a he nya a, e de mɛ ke: “Nyumuhi, nyɛmimɛ, e ngɛ mi kaa i pee we nɔ́ yayami ko kɛ si we ni ɔmɛ aloo wa nɛmɛ ɔmɛ a kusumi ɔmɛ mohu lɛɛ,+ se a ngɔ mi kɛ wo Romabi ɔmɛ a dɛ mi kɛ je Yerusalem kaa nɔ ko nɛ a wo lɛ tsu.+ 18 Nɛ benɛ a bi ye nya mi ɔ,+ jinɛ a suɔ kaa a maa ngmɛɛ ye he, ejakaa a nɛ nɔ́ ko nɛ a maa da nɔ kɛ gbe mi.+ 19 Se benɛ Yudabi ɔmɛ kplɛɛ we ɔ, nɔ́ kpa ko be nɛ ma pee hu kaa ja i ngɔ ye sane ɔ kɛ ha Kaisare,+ se pi kaa i ngɛ nɔ́ ko nɛ ma de kɛ po ye ma a nya. 20 Enɛ ɔ he je nɛ i bi kaa ma na nyɛ konɛ i kɛ nyɛ nɛ tu munyu ɔ nɛ, ejakaa Israel hɛ kɛ nɔ fɔmi ɔ he je lɛ a wo mi kɔsɔkɔsɔ nɛ ɔ nɛ.”+ 21 A de lɛ ke: “Wa nine sui sɛ womihi a nɔ kɛ ji Yudea ngɛ o he, nɛ nyɛmimɛ ɔmɛ nɛ a je lejɛ ɔ kɛ ba a hu a ti nɔ ko nɔ ko ba bɔɛ wɔ o he sane ko aloo o he munyu yaya ko. 22 Se wa susu kaa e hi kaa wa maa bu mo tue konɛ waa le o susumi, ejakaa ngɛ anɔkuale mi ɔ, wa le kaa jami kuu nɛ ɔ lɛɛ,+ a tuɔ munyu kɛ siɔ lɛ ngɛ he fɛɛ he.”+

23 Enɛ ɔ he ɔ, a to ligbi nɛ a kɛ lɛ maa kpe, nɛ a he hiɛ babauu po pe kekle ɔ kɛ ba e ngɔ ngɛ he nɛ e ngɛ ɔ. Nɛ kɛ je mɔtu kɛ ya si gbɔkuɛ ɔ, e tsɔɔ mɛ sane ɔ nya, nɛ e je Mose Mlaa a+ kɛ Gbali ɔmɛ+ a munyu ɔmɛ a mi kɛ ye Mawu Matsɛ Yemi ɔ he odase kɛ pi si konɛ e plɛ a yi mi ngɛ Yesu he.+ 24 A ti ni komɛ bɔni nɔ́ nɛ e ngɛ dee ɔ he pɛtɛmi; ni komɛ hu he we yi. 25 Enɛ ɔ he ɔ, akɛnɛ a juɛmi pee we kake he je ɔ, a bɔni jemi, nɛ Paulo tu munyu kake nɛ ɔ ke:

“E da blɔ kaa mumi klɔuklɔu ɔ gu gbalɔ Yesaya nɔ kɛ tu munyu kɛ tsɔɔ nyɛ nɛmɛ ɔmɛ, 26 nɛ e de ke: ‘Yaa nimli nɛ ɔmɛ a ngɔ nɛ o ya de ke: “Numi lɛɛ nyɛ maa nu, se nyɛ be sisi nue kɔkɔɔkɔ, nɛ nyɛ maa hyɛ, se nyɛ be nae kɔkɔɔkɔ.+ 27 Ejakaa nimli nɛ ɔmɛ kplii a tsui, a nu kɛ a tue, se a pee we he nɔ́ ko, nɛ a ma a hɛngmɛ bɔ nɛ pee nɛ a ko hyɛ kɛ a hɛngmɛ nɛ́ a ko nu kɛ a tue nɛ́ a tsui hu nɛ ko nu sisi, konɛ a ko ba kpale a se nɛ ma tsa mɛ.”’+ 28 Enɛ ɔ he ɔ, nyɛ ná nɛ nyɛɛ le kaa a tsɔ konɛ a ngɔ yi wami hemi nɛ ɔ nɛ e je Mawu ngɔ ɔ kɛ ya ha je ma amɛ;+ nɛ bɔ fɛɛ bɔ nɛ e ji ɔ, mɛɛ lɛɛ a maa bu tue.”+ 29* ——

30 Enɛ ɔ he ɔ, e hi lejɛ ɔ jeha enyɔ sɔuu ngɛ we ko nɛ lɛ nitsɛ e hai ɔ mi,+ nɛ e kɛ bua jɔmi heɔ nihi tsuo nɛ a baa e ngɔ ɔ, 31 nɛ e fiɛɛɔ Mawu Matsɛ Yemi ɔ kɛ tsɔɔ mɛ, nɛ e tuɔ munyu faa*+ nitsɛnitsɛ kɛ tsɔɔ mɛ Nyɔmtsɛ Yesu Kristo he ní, nɛ nɔ́ ko nɔ́ ko tsi we lɛ blɔ.