ZEFANIA
1 Yehowa kɛ Zefania* nɛ ji Kushi bi ɔ, Gedalia bi ɔ, Amaria bi ɔ, Hezekia bi ɔ tu munyu ngɛ Yuda matsɛ Yosia+ nɛ ji Amon+ bi ɔ be ɔ mi, nɛ e de lɛ ke:
2 “Ma bɛɛ nɔ́ fɛɛ nɔ́ nɛ ngɛ zugba a nɔ ɔ kɛ je pɛsɛpɛsɛ,” Yehowa lɛ de.+
3 “Ma bɛɛ adesa kɛ lohwe awi yelɔ kɛ je.
Ma bɛɛ hiɔwe lohwe pɛlitsɛmɛ kɛ wo mi lohi tsuo kɛ je,+
Nɛ ma bɛɛ nane tɔ̃tɔ̃mi níhi*+ kɛ yiwutsotsɛmɛ hu kɛ je;
Nɛ ma je adesahi kɛ je zugba a nɔ,” Yehowa lɛ de.
4 “Ma kpa ye nine mi ngɛ Yuda
Kɛ nihi tsuo nɛ a ngɛ Yerusalem ɔ a nɔ,
Nɛ ma bɛɛ Baal kɛ e he nɔ́ fɛɛ nɔ́ kɛ je hiɛ ɔ,+
Nɛ a be ma se mawu ɔ we osɔfo ɔmɛ kɛ osɔfo kpa amɛ a biɛ kaie hu,+
5 Ma bɛɛ nihi tsuo nɛ a kplãã si ngɛ tsu yi mi kɛ haa hiɔwe tabo ɔ kɛ je,+
Nɛ ma bɛɛ nihi nɛ a kplãã si kɛ haa Yehowa nɛ a kãa kita kaa a maa ye lɛ anɔkuale+
Nɛ́ ngɛ jamɛ a be ɔ mi nɔuu a kãa kita kaa a maa ye Malkam anɔkuale ɔ hu kɛ je;+
6 Nɛ ma bɛɛ nihi tsuo nɛ a kpale ngɛ Yehowa se+
Kɛ nihi nɛ a hla we Yehowa se blɔ aloo a bi we blɔ tsɔɔmi ngɛ e ngɔ ɔ kɛ je.”+
7 Nyɛɛ pee dii ngɛ Nyɔmtsɛ Matsɛ Yehowa hɛ mi, ejakaa Yehowa ligbi ɔ su ta.+
Yehowa dla afɔle ko kɛ fɔ si; e tsu nihi tsuo nɛ e fɔ mɛ nine ɔ a he.
8 “Ngɛ Yehowa afɔle sami ligbi ɔ nɔ ɔ, ma gbla ganɔhi,
Matsɛ binyumuhi+ kɛ nihi tsuo nɛ a wo ma se tadehi ɔ a tue.
9 Ngɛ jamɛ a ligbi ɔ nɔ ɔ, ma gbla nɔ fɛɛ nɔ nɛ maa kuɔ kpoku* ɔ tue,
Nɛ ma gbla nihi tsuo nɛ a haa nɛ a nyɔmtsɛ ɔ we ɔ hyiɔ tɔ kɛ basabasa peemi kɛ nɔ sisimi ɔ hu a tue.”
10 Yehowa de ke: “Ngɛ jamɛ a ligbi ɔ nɔ ɔ,
Ya fomi nɛ nya wa maa pɛ kɛ je Lo Agbo ɔ he,+
A maa wo yana ngɛ Ma Ehe ɔ mi,+
Nɛ a maa nu pɛmi nɛ nya wa he kɛ je yoku ɔmɛ a nɔ.
11 Nyɛɛ wo yana, nyɛ nihi nɛ nyɛ ngɛ Maktesh,*
Ejakaa a kpata jua yeli ɔmɛ tsuo a hɛ mi;*
Nɛ a kpata nihi tsuo nɛ a ngmɛɔ sika hiɔ ɔ hu a hɛ mi.
12 Jamɛ a be ɔ mi ɔ, ma ngɔ kane kɛ ya kpa Yerusalem ma a mi saminya,
Nɛ ma gbla nihi tsuo nɛ a naa a he kaa a he mi jɔ mɛ* nɛ a deɔ ngɛ a tsui mi ke,
‘Yehowa be nɔ́ kpakpa pee, nɛ e be nɔ́ yaya hu pee’ ɔ a tue.+
13 A ma kpɔ̃ ní nɛ a ná a tsuo ngɛ a dɛ nɛ a we ɔmɛ a hɛ mi ma kpata.+
A maa ma wehi, se a be a mi hie;
Nɛ a maa pee wai ngmɔhi, se a be a mi wai ko nue.+
14 Yehowa ligbi ngua a su ta!+
E su si ta nɛ e ngɛ oya yee* kɛ ma!+
Yehowa ligbi ngua a ngɛ gbeye.+
Jamɛ a be ɔ mi ɔ, tatsɛ po ma kpa ngmlaa.+
15 Jamɛ a ligbi ɔ ji mi mi fumi ligbi,+
E ji amanehlu kɛ haomi ligbi,+
E ji ahumi kɛ hɛ mi kpatami ligbi,
E ji diblii kɛ diblii kpii ligbi,+
E ji bɔkuhi kɛ bɔku kpii ligbi,+
16 E ji titimati kɛ ta ose hemi ligbi,+
E ji ligbi nɛ a ma ba tua mahi nɛ a fia gbogbo kɛ wo a he kɛ mɔhi nɛ a ka gagaaga nɛ a ngɛ gbogbo ɔ kɔ nya a.+
17 Ma ngɔ haomi kɛ ba adesahi a nɔ,
Nɛ a maa nyɛɛ kaa hɛ yuyuili,+
Ejakaa Yehowa ji nɔ nɛ a pee yayami kɛ si ɔ nɛ.+
18 A sika tsu loo a sika hiɔ ɔ be nyɛe ma he a yi wami ngɛ Yehowa mi mi fumi ligbi ɔ nɔ;+
E mi mi fumi ngɛ kaa la nɛ maa sã zugba a tsuo,+
Ejakaa e kɛ hɛ mi kpatami maa ba, ee, e kɛ hɛ mi kpatami nɛ ngɛ gbeye maa ba nihi tsuo nɛ a ngɛ zugba a nɔ ɔ a nɔ.”+
2 Loko fami ɔ ma bɔni ní tsumi,
Nɛ́ ligbi ɔ maa be kɛ ho kaa tsakati* ɔ,
Loko Yehowa mi mi la a maa ba nyɛ nɔ,+
Nɛ́ Yehowa mi mi fumi ligbi ɔ maa ba nyɛ nɔ ɔ,
3 Nyɛ hla Yehowa se blɔ,+ nyɛ nihi nɛ nyɛ baa nyɛ he si* nɛ́ nyɛ ngɛ zugba a nɔ,
Nɛ́ nyɛ yeɔ e famihi nɛ a da a nɔ ɔ.*
Nyɛɛ pee nɔ́ nɛ da,* nyɛɛ ba nyɛ he si.*
Alini,* ligbi ɔ nɛ Yehowa mi mi ma fu wawɛɛ ɔ, nyɛɛ lɛɛ a maa laa nyɛ nɔ.+
4 Ejakaa Gaza maa pee ma nɛ maa fɔ si gu;
Nɛ Ashkelon maa pee ma doku.+
A maa fie Ashdod kɛ ho piani katakata,
Nɛ a maa hia Ekron kɛ fɔ si.+
5 “Musu tloo nyɛ nihi nɛ nyɛ ngɛ wo ɔ nya a, Keretbi ɔmɛ a ma a!+
Yehowa bu nyɛ fɔ.
Oo Kanaan, Filistibi a zugba, ma kpata o hɛ mi,
Nɛ nɔ ko nɔ ko be piɛe ngɛ ma a mi.
6 Nɛ wo ɔ nya zugba a ma ba pee lohwehi a ní yemi he,
Nɛ vuhi maa hi nɔ kɛ ha to hyɛli, nɛ to tsuhi nɛ a kɛ tɛ pee maa hi nɔ kɛ ha jijɔhi.
7 E ma ba pee Yuda we ɔ mi bi nɛ a piɛ ɔ a zugba;+
A maa ye ní ngɛ lejɛ ɔ.
Ke je jɔ ɔ, a maa hwɔ Ashkelon we ɔmɛ a mi.
Ejakaa Yehowa a Mawu ɔ maa ngɔ e juɛmi kɛ ma a nɔ,*
Nɛ e ma bua a kpɛti nihi nɛ a nuu mɛ nyɔguɛ ɔ a nya kɛ kpale kɛ ba.”+
8 “I nu Moabbi ɔmɛ a nɔ he guɛ gbemi ɔ+ kɛ Ammonbi ɔmɛ a nɔ jɛmi ɔ,+
Nihi nɛ a ngɛ ye ma a ahlua bɔe nɛ a ngɛ dee ke a ma kpɔ̃ a zugba a ngɛ a dɛ ɔ.”+
9 Enɛ ɔ he ɔ, Yehowa tabohiatsɛ Israel Mawu ɔ ngɛ dee ke: “Be abɔ nɛ i ngɛ wami mi nɛ ɔ,
Moab maa pee kaa Sodom,+
Nɛ Ammonbi ɔmɛ maa pee kaa Gomora,+
He ko nɛ miohi ngɛ, nɛ́ ngo ha zugba a nɔ tsuo nɛ́ se nami ko be zugba a he kɛ yaa neneene.+
Ye ma a mi bi ɔmɛ nɛ a maa piɛ ɔ maa ha a níhi.
Nɛ ye ma a mi bi ɔmɛ nɛ a maa piɛ ɔ ma kpɔ̃ a zugba a ngɛ a dɛ.
10 Nɔ́ nɛ a ma ná ngɛ a he nɔ womi ɔ he je ji nɛ ɔ nɛ,+
Ejakaa a bɔ ye ma a ahlua nɛ a wo a he nɔ kɛ si Yehowa tabohiatsɛ ɔ we bi ɔmɛ.
11 Yehowa he nyakpɛ maa pee mɛ* wawɛɛ;
Ejakaa e ma kpata zugba a nɔ mawu ɔmɛ tsuo a hɛ mi,*
Nɛ je ma amɛ a zugbahi nɛ nyu bɔle mɛ ɔ tsuo ma kplã si ha lɛ,*+
Nɔ fɛɛ nɔ maa pee jã kɛ je e hi he.
12 Nyɛ Etiopiabi ɔmɛ hu, ye klaate ɔ ma kpata nyɛ hɛ mi.+
13 E maa kpa e nine mi kɛ ya yiti je nɛ e ma kpata Asiria hɛ mi,
Nɛ e ma ha nɛ Nineve maa fɔ si gu,+ nɛ e nɔ ma gbli kaa nga kplanaa.
14 Lohwe lɛlɛɛhi tsuo kɛ lohwe awi yeli tsuo* ma ba bu si ngɛ e mi.
Dɔkɔdɔkɔ nyagagatsɛ kɛ opɛsɛ maa hwɔ e titima yi mi kpɔ ɔmɛ a nɔ nyɔ mi.
Gbi* ko ma la ngɛ saflɛ ɔ mi.
Níhi a hɛ mi ma kpata ngɛ sinya kpoku ɔmɛ a nya;
Ejakaa e ma ha nɛ seda tsohi nɛ a kɛ pee tsu ɔ, a he maa fɔ si gu.
15 Ma nɛ woɔ e he nɔ nɛ e ngɛ slɔkee ɔ ji nɛ ɔ nɛ,
Nɛ e ngɛ dee ngɛ e tsui mi ke, ‘Imi ji nɛ ɔ nɛ, nɛ ye se ɔ nɔ ko be hu.’
Hyɛ bɔ nɛ e ba pee he gbeye womi nɔ́ ha,
He nɛ lohwe awi yeli maa bu si ngɛ!
Nɔ fɛɛ nɔ nɛ ma ba be ɔ ma kpa nyagba nɛ e ma huanya e kɔ̃.”+
3 Musu tloo ma nɛ tsɔɔ atuã, nɛ wo e he mu, nɛ e yi mi wa a!+
2 E bui nɔ ko gbi tue;+ e kplɛɛ we tsɔsemi ko nɔ.+
E kɛ e hɛ fɔ we Yehowa nɔ;+ e hɛ́ lɛ kɛ sui e Mawu ɔ he.+
3 E nikɔtɔma amɛ ji jatahi nɛ a ngɛ huãe.+
E kojoli ɔmɛ ji nyɔ mi ogbeteehi;
A si we wu kake po nɛ je nɛ na yi konɛ a kpe.
4 E gbali ɔmɛ bui nɔ ko nɔ ko, lakpatsɛmɛ sɔuu ji mɛ.+
5 Yehowa ji dalɔ ngɛ ma a mi;+ e pee we nɔ́ yayami ko.
Daa mɔtu ɔ, e haa nɛ a leɔ e kojomi ɔmɛ,+
Kaa bɔ nɛ pu teɔ si daa ligbi ɔ.
Se nihi nɛ a dɛ ɔ lɛɛ, a zo tɔ ywia.+
6 “I kpata je ma amɛ a hɛ mi; a si a mɔ gaga amɛ nɛ́ a ngɛ gbogbo ɔ kɔ nya a kɛ fɔ si gu.
I puɛ a gbɛjegbɛ ɔmɛ, konɛ nɔ ko nɛ ko be ngɛ nɔ.
A ma amɛ a hɛ mi kpata, nɛ nɔ ko nɔ ko be mi.+
7 I de ke, ‘Bɔ fɛɛ bɔ nɛ ji ɔ, o maa ye mi gbeye nɛ o maa kplɛɛ tsɔsemi nɔ,’*+
Konɛ a ko kpata e hi he ɔ hɛ mi+
Ma gbla e tue ngɛ ní nɛ ɔmɛ tsuo nɛ e pee ɔ he je.
Se mɛ tsuo a fia a pɛɛ si kaa a maa pee nɔ́ yayami mohu.+
8 ‘Lɔ ɔ he ɔ, nyɛɛ ya nɔ nɛ nyɛɛ hyɛ mi blɔ,’*+ Yehowa lɛ de,
‘Kɛ yaa si be nɛ ma te si* nɛ ma tua nihi nɛ ma muɔɔ a níhi ɔ,
Ejakaa i to ye yi mi kaa ma bua je ma amɛ kɛ nɔ yemi ɔmɛ a nya,
Nɛ́ ma plɛ ye mi mi la kɛ abofu nɛ nya wa a tsuo kɛ pue a nɔ;+
Ejakaa ye mi mi fumi ɔ ngɛ kaa la nɛ maa sã zugba a tsuo.+
9 Ejakaa jamɛ a be ɔ mi ɔ, ma tsake je ma amɛ a gbi kɛ pee gbi nɛ ngɛ klɔuu,
Konɛ mɛ tsuo a tsɛ Yehowa biɛ ɔ,
10 Nihi nɛ a ngɛ mi pɛɛ kpae, nɛ ji ye we bi nɛ a gbɛ mɛ fia a maa ngɔ nike níhi ba ha mi,+
Kɛ je Etiopia pa a kpokpa a nɔ.
11 Ngɛ jamɛ a ligbi ɔ nɔ ɔ, a be mo zo gbee
Ngɛ níhi nɛ o pee kɛ tsɔ ye hɛ mi atuã a tsuo he,+
Ejakaa ma je he nɔ woli nɛ́ a fĩaa a kɛ je o mi;
Nɛ o be o he nɔ woe hu ngɛ ye yoku klɔuklɔu ɔ nɔ.+
12 Ma ha nɛ nihi nɛ a baa a he si kɛ nihi nɛ a he jɔ ɔ maa piɛ ngɛ nyɛ kpɛti,+
Nɛ a maa sa we ngɛ Yehowa biɛ ɔ mi.
13 Israelbi nɛ maa piɛ ɔ+ be ní yayahi pee;+
A be lakpa yee, nɛ a be sisimi lilɛ ko nae ngɛ a nya mi.
A maa ye ní nɛ a maa hwɔ si, nɛ nɔ ko be a he gbeye woe.”+
14 Oo Zion biyo, mo nya wawɛɛ!
Oo Israel, mo he kunimi yemi ose!+
Oo Yerusalem biyo, o bua nɛ jɔ nɛ o kɛ o tsui tsuo nɛ nya!+
15 Yehowa je kojomi ɔmɛ ngɛ o nɔ.+
E fie o he nyɛli ɔmɛ kɛ je.+
Yehowa, Israel Matsɛ ɔ kɛ mo ngɛ.+
O be amanehlu ko gbeye yee hu.+
16 Jamɛ a ligbi ɔ, a ma de Yerusalem ke:
“Koo ye gbeye, Oo Zion.+
Ko ha nɛ o kɔni mi nɛ jɔ̃.
17 Yehowa o Mawu ɔ kɛ mo ngɛ.+
E ngɛ he wami, e ma he o yi wami.
E bua maa jɔ o he wawɛɛ nɛ e ma nya.+
E bua maa jɔ ngɛ suɔmi nɛ e ngɛ kɛ ha mo ɔ he je.
E ma nya ngɛ o he je, nɛ e ma he ose.
18 Nihi nɛ ngɛ aywilɛho yee akɛnɛ a ba piɛɛ we o he ngɛ o gbijlɔ ɔmɛ a mi he je ɔ, ma bua a nya;+
A ba piɛɛ we o he ejakaa e we ahlua bɔmi ɔ ngɛ a nɔ.+
19 Hyɛ! Jamɛ a be ɔ mi ɔ, ma te si kɛ wo nihi nɛ waa mo yi mi ɔ;+
Nɛ ma he nɔ nɛ ngɛ kpɛ̃ɛ̃e ɔ yi wami,+
Nɛ ma bua nihi nɛ a gbɛ fia a, a nya.+
Ma ha nɛ nihi ma je nyɛ yi nɛ nyɛ ma he biɛ
Ngɛ zugbahi tsuo nɛ a hɛ mi pue si ngɛ nɔ ɔ nɔ.
20 Jamɛ a be ɔ mi ɔ, ma kpale nyɛ kɛ ba we mi.
Ee, jamɛ a be ɔ mi ɔ, ma bua nyɛ nya.
Ma ha nɛ nyɛ ma he biɛ nɛ nihi ma je nyɛ yi+ ngɛ nihi tsuo nɛ a ngɛ zugba a nɔ ɔ a kpɛti,
Ke i ha nɛ o nihi nɛ a nuu mɛ nyɔguɛ ɔ tsuo kpale a se kɛ ba a,” Yehowa lɛ de.+
E sisi ji, “Yehowa Ngɔ Kɛ Laa (E Kɛ To).”
E ngɛ heii kaa níhi aloo ní peepeehi nɛ a kɛ amaga jami ngɛ tsakpa.
E ma nyɛ maa pee kaa kpoku nɛ a kɛ matsɛ sɛ ma nɔ ɔ.
E ngɛ heii kaa Yerusalem ma a fã ko nɛ kɛ Lo Agbo ɔ he kɛ we.
Ngɛ Hebri gbi mi ɔ, “a ha nɛ jua yeli ɔmɛ tsuo a nya ma.”
Ngɛ Hebri gbi mi ɔ, “nihi nɛ a ngɛ kaa wai sisi nɛ ma.”
Aloo “e ngɛ esɔ yee wawɛɛ.”
Ngɛ Hebri gbi mi ɔ, “a mini ɔmɛ.”
Aloo “jakati.”
Aloo “nyɛ nihi nɛ nyɛ he jɔ.”
Ngɛ Hebri gbi mi ɔ, “e kojomi ɔ nɔ ɔ.”
Aloo “Nyɛɛ di dami ní peemi se.”
Aloo “nyɛ he nɛ jɔ.”
Aloo “E ma nyɛ maa ba kaa.”
Aloo “maa hyɛ a nɔ.”
Aloo “gbeye ma pue a nɔ.”
Aloo “e ma ha nɛ zugba a nɔ mawu ɔmɛ tsuo maa flãã.”
Aloo “ma ja lɛ.”
Ngɛ Hebri gbi mi ɔ, “je ma lohwehi tsuo.”
E ma nyɛ maa pee kaa lohwe pɛlitsɛ ko gbi aloo kɔɔhiɔ.
Aloo “o ma ha nɛ a dla mo.”
Aloo “nyɛɛ to nyɛ tsui si kɛ mlɛ.”
Baiblo komɛ de ke “ma te si kaa odase.”
Aloo “a pee kake kɛ ja lɛ.”